Cenisihs 21 - Ojibwe Kihcimasina'ikan

Aaisik Kiinihtaawikitc

¹ KaaTipenciketc tepwe okii shawenimaan Serawan (Sarah), ekii ishihciketc kaakii ishi ahshotamawaatc.

² Tepwe tahsh Sera kiih⁠kikishkawaawahso, ekii nihtaawiki'aatc ke⁠okosihsinitc Eparahaaman (Abraham) aanawiin ekiih kihci aya'aawinitc. A'a tahsh kwiiwisenhs mayaa kii⁠nihtaawiki ahpii Kishemanitoon kaakii ihkitonitc.

³ Eparahaam tahsh Aaisik (Isaac) okii ishinihkaanaan ini okosihsan kaakii nihtaawikihtamaakotc wiiwan Serawan.

⁴ Miitahsh kaa⁠ishi kihkinawaatashakeshwaatc ini okosihsan Aaisikoon ahpii kaa⁠nihshwaahsokonakisinitc (8), ekii ishihciketc Kishemanitoon kaakii'ikotc.

⁵ Eparahaam tahsh ninkotwaahk kiih⁠tahso pipoonwe ahpii Aaisikoon kii⁠nihtaawikinitc.

⁶ Sera tahsh kii‑ihkito, “Kishemanitoo hsa ninkiih piitamaak ke⁠onci minwentamowak, ke⁠onci paahpiwak kaye. Kahkina hsa awiya ke⁠noontank kaakii ishihsewak ninka wiici paahpiimik.”

⁷ Miitahsh kaye kaa‑ani ihkitotc, “Kaanika awekwen kekii'inaakopanen Eparahaaman, ‘Sera ci⁠nooni'aatc apinoonciisha'.’ Shaakooc itahsh tepwe nintayaawimaan ke⁠okosihsitc aanawiin e⁠ahkiwensiiwitc,” kii‑ihkito.

⁸ A'a tahsh kwiiwisenhs kii⁠ani maaciiki, kaye ekiih pooni noonitc, miihsh i'i ahpii Eparahaam kaakii kihci wiihkwanketc.

Hekaar, Ishmeyal Kaye Ninkoci Kii'ishinisha'ontwaa

⁹ Sera (Sarah) tahsh okii waapamaan ini kwiiwisenhsan Ishmeyalwan (Ishmael) e⁠mihkincii'aanitc okosihsan Aaisikoon (Isaac). Ishmeyalwan iitok kii⁠omaamaawan Iicipiiwihkwen Hekaaroon (Hagar), Eparahaamink (Abraham) kaakii ontinaanitc.

¹⁰ Miihsh o'o kaa'inaatc Eparahaaman, “Taka inkoci ishinisha'o wa'a pemiihtaaketc ihkwe, ini kaye okosihsan. Wa'a hsa pemiihtaaketc ihkwe okosihsan kaawiin wiihkaa ninantawenimimaahsiin ci⁠wiitoohkaasonitc kiwenootisiwinink Aaisik keni tepinank,” okii'inaan.

¹¹ Eparahaam tahsh kaawiin aahpici o'o okii minwaapantansiin aaniihsh Ishmeyalwan kaye kii⁠okosihsi.

¹² Kishemanitoon tahsh Eparahaam okii'ikoon, “Keko onci mikoshkaatentanken a'a onci kwiiwisenhs, a'a kaye kipamiihtaakanihkwem. Ishihcikew Sera aaniin iko enihk. Aaisikonk ohsha ta⁠onciiwak kipiiwesiimak kaakii ahshotamawinaan.

¹³ A'a tahsh kaye kipamiihtaakanihkwem okosihsan ninka ishi'imaan ci⁠ani paahtiinonitc opiiwesiima', aaniihsh kiin a'a kikosihs,” okii'ikoon.

¹⁴ Wiipa tahsh kikishep Eparahaam okii miinaan Hekaaroon miicim, pashkwekino nipiiwash e⁠mooshkinepiinik kaye. Miihsh kaa⁠ishi pihciwane'aatc ekii maacinisha'waatc ini kaye okosihsini. Miitahsh kaa⁠ishi maacaanitc ekiih papaami ayaanitc pikwatahkamik Piiarshiipa (Beersheba) kaa'icikaatenik.

¹⁵ Ahpii tahsh kaah⁠caakihsenik nipi i'imaa pashkwekino nipiiwashink, Hekaar shekopakaank okii ishi nakanaan ini oshkiniikiinhsan.

¹⁶ Miitahsh kaa⁠ishi nakanaatc ekii awi namatapitc pehsho kaakii ina'enk minihk eh⁠pimocikenk. O'o tahsh kii‑ihkito, “Kaawiin nintaa kashkihtoohsiin ci⁠kanawaapamak ninkosihs ci⁠nipotc.” E⁠namatapitc tahsh pehsho, mii 'i kaa⁠ishi maacii mawitc.

¹⁷ Kishemanitoon tahsh okii noontawaani oshkiniikiinhsan e⁠mawinitc. Kishemanitoon otencalimini tahsh kihci kiishikonk Hekaar okii onci kanoonikoon ekii'ikotc, “Hekaar aaniin eshiwepisiyan? Keko kohtaacihken, kaaTipenciketc ohsha onoontawaan e⁠mawinitc ini oshkiniikiinhsan.

¹⁸ Wanishkaan, otaahpin a'a oshkiniikiinhs, sakinihken, ninka ishi'aa hsa cini kihci inentaakositc ci⁠ani paahtiinonitc opiiwesiima',” okii'ikoon.

¹⁹ Kishemanitoon okii ishi'ikoon ci⁠waapantank onta'ipaan. Miitahsh kaa⁠ishi mooshkinepatootc pashkwekino nipiiwash ekii mina'aatc ini oshkiniikiinhsan.

²⁰ Kishemanitoon tahsh pehsho okii wiiciiwikoon a'a oshkiniikiinhs e⁠ompikitc. Pikwatahkamik tahsh kii⁠ayintaa, pimocikewinini tahsh kiih⁠tinowi.

²¹ Mekwaa tahsh pikwatahkamik Peran (Paran) kaa'icikaatenik e⁠ayaatc, omaamaan Iicipahkiink (Egypt) okii ontinaani ke⁠wiiwitc.

Eparahaam, Apimelehkoon Kii'ahshotamaatiwaatc

²² E⁠ani ayishihsenik tahsh Apimelehkoon (Abimelech) okiih pi naasihkaakoon Eparahaam (Abraham) ekiih pi wiiciiwaanitc kaa⁠tipenimaanitc oshimaakanihshiima' Paaihkol (Phicol) e⁠ishinihkaasonitc ekii'ikotc, “Kishemanitoo kiwiiciiwik kahkina kekoon kaa⁠ishihcikeyan.

²³ Ahpimon tahsh noonkom o'omaa enaahsamiitc Kishemanitoo cikii wayeshimihsiwan, niniicaanihsak kaye iki nimpiiwesiimak. Waapanta'ihshin itahsh, naakohtoon kaye o'omaa ahkiink noonkom kaashi piiwitewentaakosiyan ci⁠minotootawiyan taapishkoo kaashi minotootawinaan,” okii'ikoon.

²⁴ Eparahaam tahsh okii'inaan, “Mii 'iwe eshi ahpimoyaan.”

²⁵ Eparahaam okii onci kihci kakanoonaan Apimelehkoon i'i onta'ipaan kaakii mahkantwenitc otanohkii'aakanini.

²⁶ O'o tahsh Apimelehkoon okii'ikoon, “Kaawiin ninkihkenimaahsii awenen o'o kaa⁠ishihcikekwen! Kaawiin kikii wiintamawihsii, miitahsh i'i payesh noonkom kaa⁠kiishikahk o'o e⁠noontamaan,” okii'ikoon.

²⁷ Eparahaam tahsh okiih piinaa' maanahcaanihsha', pishihkiwa' kaye ekii miinaatc Apimelehkoon. Miitahsh i'i iki niishin ininiwak kaakii ahshotamaatiwaatc.

²⁸ Pahkaan tahsh niishwaahso (7) noonshe maanahcaanihshenhsa' okii oshi pakitinaa'.

²⁹ Apimelehkoon tahsh okii'ikoon, “Aaniin tahsh enwaanatwaa iki niishwaahso (7) noonshe maanahcaanihshenhsak pahkaan kaa⁠pakitinatwaa ci⁠nishihke ayaawaatc,” okii'ikoon.

³⁰ Eparahaam tahsh o'o okii'inaan, “Otaahpin oko niishwaahso (7) noonshe maanahcaanihshenhsak kaa⁠miininaan, miitahsh kiin e⁠ihkitoyan niin ekii waanihkaatamaan o'o onta'ipaan,” okii'inaan.

³¹ Piiarshiipa (Beersheba) tahsh okii ishinihkaataan i'imaa, aaniihsh mii 'imaa minciniish kaakii ishi ahpimowaatc.

³² Kaa⁠ishkwaa ahshotamaatiwaatc itahsh i'imaa Piiarshiipa (Beersheba); Apimelehkoon, ini kaye Paaihkolwan kaa⁠tipenimaanitc oshimaakanihshiimini kii⁠ani maacaawa' ekii ishi kiiwenitc Pilistiyawahkiink (Philistine).

³³ Eparahaam tahsh okii kihtikaanaan mihtikoon taamarisk (tamarisk) eshinihkaasonitc i'imaa Piiarshiipa ecikaatenik. Miitahsh i'imaa kaa⁠ishi anami'ehtawaatc kaaTipencikenitc, Kaa⁠nehpici Kishemanitoowinitc.

³⁴ Eparahaam tahsh kinwesh kii⁠ayaa i'imaa Pilistiyawahkiink.