Cenisihs 19 - Ojibwe Kihcimasina'ikan

Maci'ishiwepisiwin Kaakii'ayaak Swaatamink

¹ Iki tahsh niishin (2) encalak kiih⁠takohshinook Swaatam (Sodom) ootenaank e⁠onaakohshininik. Laat (Lot) tahsh kii⁠namatapi i'imaa eshi kihci ishkwaantemiwaninik i'i kihci ootena. Ahpii tahsh e⁠waapamaatc eh⁠pinaakosinitc kiih⁠pasikwii ekii anta nakishkawaatc, mihtahkamik ekii ishi animihkohtaatc.

² Miitahsh o'o kaa'inaatc, “Nintookimaamak, taka piintikek kaa⁠pamiihtawinek owaahkaa'ikanink! Ci⁠kisiipiikisiteyek, peshiko tipihk ci⁠kapehshiyek kaye, wiipa tahsh kikishep kikani maacaam,” okii'inaa'. Miihsh o'o kaa'ikotc, “Kaawiin, i'imaa hsa mekwe ootena akwaciink ninka ayaamin,” okii'ikoo'.

³ Wiinke tahsh okiih kakaansomaa', miitahsh kaa⁠ishi naasihkaakotc ekiih piintikenitc owaahkaa'ikanink. Okiih kiishitepoonaa' itahsh ci⁠kihci wiihsininitc, ekiih kiishiswaatc pahkweshikanan kaa⁠ompisikaniwihsinik, miihsh kaa⁠ishi wiihsininitc.

⁴ Cipwaa kawihshimonitc tahsh kaakii otihsintc, owaahkaa'ikan kii⁠waahkaashkikaateni. Kahkina ininiwa' misiwe i'imaa Swaatam ootenaank kaakii onciinitc, oshkiniikiwa', ahkiwensiwa' kaye ekii waahkaashkaminitc.

⁵ Miitahsh Laat kaa'ikotc, “Aaniinti tahsh iki ininiwak kaakii otihsihkwaa noonkom kaa⁠onaakohshininik? Pi⁠saakiciwihsh, piitamawihshinaam, ci⁠wiihpemankitwaa,” okii'ikoo'.

⁶ Laat hsa tahsh kiih⁠saaka'am eshi'ayaanitc miihsh kaa⁠ishi kipa'ank ishkwaantem otootaanaamink.

⁷ O'o tahsh okii'inaa', “Niwiiciiwaakanak, taka keko noociko ishihcikehkek.

⁸ Inashke naa, niishin ohsha nintaanihsak nintayaawaak mahshi wiihkaa eh⁠papaamenimikohsikwaa ininiwa'. Taka miiwak iki kepi saakisi'akwaa waah⁠tootawekwaa ko ci⁠tootawekwaa. Keko tahsh wiin kekoon tootawaahkekwaanik oko ininiwak kaa⁠otihshiwaatc, niwaahkaa'ikanink ohsha nintishi mawatihsikook weweni ci⁠naakaci'akwaa,” okii'inaa'.

⁹ “Tawishkawihshinaam tahsh,” okii'ikoo'. Miitahsh kaye kaa⁠ihkitonitc, “Wa'a hsa inini kiih⁠pitakohshin ekii mayakisitc, inashke tahsh aasha kikakwe onaahkonikonaan! Awahshime kiin kika tootaakoo ahpiihc oko ke⁠tootawaankitwaa,” kii‑ihkitowa'. Aahpici tahsh enikohk okii ashe kaancishkaakoo' ewiih kakwe piikopitoonitc ishkwaantem.

¹⁰ Ini tahsh niishin (2) ininiwa' piintik kaakii ayaanitc okiih piintike wiihkopinikoo' ekiih kipa'aminitc ishkwaantem.

¹¹ Miitahsh kaa⁠ishi ishi'aanitc kahkina akwaciink eyaanitc ininiwa' ci⁠waapihsinik, ci⁠mihkansinik ishkwaantem.

Laat Kiinakatank Swaatam

¹² Laat (Lot) tahsh okii'ikoo' i'i niishin (2) ininiwa', “Awenenak itahsh keyaapi eyaawatwaa o'omaa? Kininkwanak ina, komaa kaye kikosihsak, komaa kaye kitaanihsak. Awenen hsa piko eyaawaawatwen o'omaa ootenaank, taka o'omaa onci saakisi';

¹³ aasha ohsha kekaa niwii nihshiwanaacihtoomin o'o ootena. Onsaam aaniihsh kaaTipenciketc onoontaan kaashi anaamimimintc i'i pemaatisinitc e⁠kihci ishinaakwaninik, ninkiih pi ishinisha'okonaan ci⁠nihshiwanaacihtooyaank o'o Swaatam (Sodom) ootena.”

¹⁴ Laat tahsh kii‑ishaa ekii anta waapamaatc ke⁠oninkwanitc, kaakii ahshotaminitc ewii wiiwinitc otaanihsa', miihsh kaa'inaatc, “Weyiip ninkoci o'omaa onci ishaak, aaniihsh kaaTipenciketc owii nihshiwanaacihtoon o'o ootenaani,” okii'inaa'. Miitahsh kaa⁠inihtaakotc taapishkoo e⁠mihci papaahpishimiwetc.

¹⁵ E⁠ani piitaapaninik tahsh, encala' okiih kakaansomikoo' Laat ekii'ikotc, “Weyiip, maaciish kiwiiw, iki kaye kitaanihsak kaa⁠niishiwaatc o'omaa kaa‑ayaawaatc, ci⁠tako nipohsiwek ahpii nihshiwanaacihcikaatek o'o ootena,” okii'ikoo'.

¹⁶ Laat tahsh kiih⁠pwaahtawi. Shaakooc tahsh kaaTipencikenitc okiih koohpaatenimikoon. Miitahsh kaakiih tepipinikotc i'i ininiwa' oninciink, wiiwan kaye oninciiniink, i'i kaye otaanihsa' oninciiniink ekii onci saakiciwinikowaatc i'imaa ootenaank.

¹⁷ Ahpii tahsh weti akwaciink e⁠ayaawaatc, shemaak peshik ini ekii'ikowaatc, “Maaciipa'iwek ci⁠pimaatisiyek! Keko aapanaapihkek, keko kaye kipihciihkek kaashi pahsatinaak. Kaashi pihkwatinaak ahpa'iwek ci⁠tako nihsikoohsiwek,” okii'ikowaan.

¹⁸ Laat tahsh kii‑ishi nahkwehtam, “Nintookimaamak, kaawiin i'i nintaa ishihcikehsii!

¹⁹ Kiminwaapamaawaa hsa kitanohkii'aakaniwaa, aahpici kaye kikihci minotootawim eh⁠pimaacihtooyek nimpimaatisiwin. Kaawiin tahsh nintaa kashkihtoohsiin kaashi papiihkwatinaak ci⁠ahpa'iweyaan, maakishaa nintaa atimikon nehshiwanaaci'iwemakahk, nintaa nihsikon itahsh.

²⁰ Inashke hsa pehsho o'omaa ayaa e⁠akaahsink ootena ke⁠ahpa'iwenaaniwankipan. Taka pakitinihshin weti ci⁠ahpa'iweyaan ci⁠pimaatisiyaan, akaahsin ohsha 'i ootena,” kii‑ihkito.

²¹ O'o tahsh okii'ikoon, “Haw, ninka ishihcike kaye'i kaashi kakwecimiyan, kaawiin tahsh ninka papaamentansiin i'i ootena kaa⁠tashintaman.

²² Weyiip tahsh ahpa'iwen, aaniihsh kaawiin kekoon ninka kashkihtoohsiin ci‑ishihcikeyaan paanimaa weti kii⁠otihtaman,” okii'ikoon. Miitahsh i'i ootena wenci ishinihkaatek Swaar (Zoar).

Kiinihshiwanaacihcikaatek Swaatam, I'i Kaye Kamwaara

²³ Laat (Lot) tahsh kii⁠otihtank i'i Swaar ootena, aasha kiisihsoon kii‑ishpakoocinoon.

²⁴ KaaTipenciketc tahsh kwetahto kii‑ishihcike ci⁠pankihshininitc kaa⁠wiihsakaapahsowenitc ahsiniin kiishikonk kaye kii⁠onci pankihsinini ishkote i'imaa Swaatam (Sodom) ootenaank, i'imaa kaye Kamwaara (Gomorrah) ootenaank.

²⁵ Miitahsh i'i nahke kaa⁠ishi nihshiwanaacihtootc ini ootenawan, i'i kaye misiwe kaakiih pahsatinaanik. Ekiih tako nihsaatc kaye kahkina i'imaa ootenaahkaank kaakii ayaanitc, kahkina kaye kekoon kaakii nihtaawikink i'imaa ahkiink.

²⁶ Laat tahsh wiiwan kii⁠aapanaapiwan, miihsh kaa⁠ishi shiiwihtaakaniwihsenitc.

²⁷ Wiipa tahsh kikishep Eparahaam (Abraham) kii‑ishaa kaakii ishi niipawikopanen enaahsamiinitc kaaTipencikenitc.

²⁸ Kii‑inaapi tahsh inahke kaakii ishi'ayaanikin Swaatam, Kamwaara ootenawan, misiwe kaye pahsatinaank. Miitahsh kaakii waapantank i'imaa ahkiink e⁠onci ompaapahtenik ekii ishinaakwaninik taapishkoo kihci pootawaanaapihk kaa⁠ompaapahsikemakahk.

²⁹ Ahpii tahsh Kishemanitoo kii⁠nihshiwanaacihtootc ootenawan i'imaa kaashi pahsatinaanik, Eparahaaman hsa okii maamihkwenimaan. Miitahsh kaakiih pakitinaatc Laatan ci⁠shaapwiinitc.

Ehtashinsowaatc Moowapahkiink, Amanii Wenciiwaatc Aanti Wentahkaanesiwaatc

³⁰ Laat (Lot) tahsh kii⁠kohtaaci ci⁠ayaatc i'imaa Swaar ootenaank. Miitahsh kaakii nakatank ekii wiiciiwaatc niishin otaanihsa', kaashi pihkwatinaanik ekii ishi kapehshiwaatc. Wiimpaapihkaank ekii ishitaawaatc.

³¹ A'a tahsh sesiihkisitc otaanihsimaa okii'inaan ohshiimenshan, “Kitetenaan hsa aasha ahkiwensiiwi, kaawiin inini o'omaa ayaahsii ci⁠wiihpeminankipan kaa⁠ishihcikenaaniwank misiwe ahkiink, ci⁠wiitikemikoyank ci⁠ontinankwaapan apinoonciishak.

³² Taka hsa mina'aataa kitetenaan shoominaapooni ci⁠kiiwashkwepiitc ci⁠wiihpemank. Miitahsh i'imaa kitetenaanink ke⁠ontoosheyank ci⁠ani ayaanike ayaayank,” okii'inaan.

³³ E⁠ani tipihkaninik tahsh shoominaapooni okii mina'aawaan otetewaan ci⁠kiiwashkwepiinitc. Miitahsh a'a kaa⁠sasiihkisitc kaa⁠ishi piintikawaatc ekii wiihpemaatc. Kaawiin tahsh okii kihkentansiini ekii wiihpemaatc, ahpii kaye kaa⁠wanishkaatc.

³⁴ E⁠ani waapaninik tahsh kaa⁠sasiihkisitc okii'inaan ohshiimenshan, “Tipihkonk hsa niin ninkii wiihpemaa nintete. Taka hsa miinawaa mina'aataa shoominaapooni ci⁠kiiwashkwepiitc, kiin tahsh ci⁠piintikawatc ci⁠wiihpematc, kitetenaanink ci⁠ontoosheyank ci⁠pooni ontahkaanesihsiwank,” okii'inaan.

³⁵ E⁠ani tipihkaninik tahsh miinawaa okii mina'aawaan shoominaapooni ci⁠kiiwashkwepiinitc. Ohshiimenshimaa tahsh kii‑ishaa ekii wiihpemaatc oteten. Kaawiin itahsh awaac pankii okii kihkentansiini ahpii kaa⁠maacii wiihpemaatc, ahpii kaye kaa⁠wanishkaatc.

³⁶ Miitahsh i'i minciniish otaanihsa' Laat kaakiih kikishkawaawahsonitc oteteniink inahke ekii ontooshenitc.

³⁷ Kaa⁠sasiihkisitc tahsh a'a otaanihsimaa kii⁠okosihsi, Moowap (Moab) tahsh okii ishinihkaanaan. Miitahsh i'imaa iki Moowapii kaatinowiwaatc wentahkaanesiwaatc.

³⁸ A'a tahsh ohshiimenshimaa kewiin kii⁠okosihsi. Pinaami (Benammi) tahsh okii ishinihkaanaan. Miitahsh i'imaa wentahkaanesiwaatc iki Amanii kaa'inintwaa noonkom kaa⁠kiishikaninik.