Cenisihs 18 - Ojibwe Kihcimasina'ikan

Eparahaam Kii'ahshotamawintc Ci'okosihsitc

¹ Eparahaam (Abraham) tahsh okii naakosiihtaakoon kaaTipencikenitc i'imaa e⁠ayaatc ciikaya'ii kehtentaakosinitc oohk tinowaahtikoo' Mamri (Mamre) kaa'icikaatenik, mekwaa e⁠namatapitc hsa eshi ishkwaantemiwaninik opakwaanekamik maawac kii⁠kishaahtenik eh⁠kiishikaninik.

² Ahpii hsa Eparahaam e⁠inaapitc okii waapamaa' nihsin (3) ininiwa' e⁠niipawinitc pehsho. E⁠waapamaatc tahsh eshi ishkwaantemiwaninik opakwaanekamik kii⁠onci maaciipahtoo ekii anta nakishkawaatc. Mihtahkamik tahsh kii‑ishi animihkohtaa.

³ Miitahsh kaa'inaatc, “Nintookimaam, kiishpin menwaapamiwanen enaahsamiiyan, keko tahsh wiin mihci mayashkawaahken eh⁠tinowiyaan ewiih pami'inakook entaayaan.

⁴ Taka hsa pankii nipi ta⁠piicikaate ci⁠kisiipiikisiteyek, i'imaa tahsh a'a mihtik kaa⁠ishi akawaahtehkisotc ishi anwehshinik.

⁵ Ninka piinaa kaye pahkweshikan ke⁠onci minomanci'oyek; kii‑ishkwaa wiihsiniyek tahsh mii 'i pisaan anishi maacaahkek, aasha aaniihsh kikii mawatihsaawaa kitanohkii'aakaniwaa,” okii'inaa'. O'o tahsh okii'ikoo', “Ishihciken hsa ko kaa⁠ihkitoyan.”

⁶ Eparahaam tahsh wewiip kiih⁠piintike pakwaanekamikonk eshi'ayaanitc Serawan ekii'inaatc, “Taka wewiip oshi' nihso tipa'aakan (3) ci⁠maamaakonatc pahkweshikan miihsh ishi kiishiswaahkan,” okii'inaan.

⁷ Miitahsh kaa⁠ishi ahpahtootc eshi'ayaanitc aya'aawihsha' ekii onaapamaatc pishihkiinhsan wenishihshinitc. Miihsh kaa⁠ishi miinaatc otanohkii'aakanan wewiip ci⁠kwayaanci'aanitc.

⁸ Kaa⁠misihtikwaakamininik tahsh coocoohshaapo, coocoohshaapo kaye, ini tahsh kaye pishihkiinhsan kaakiih kiishisomintc, okii ahtamawaa' enaahsamiinitc. E⁠wiihsininitc tahsh, pehsho i'imaa kii⁠niipawi eshi akawaahtehkisonitc mihtikoon.

⁹ O'o tahsh okii ishi kakwecimikoo', “Aanti tahsh kiwiiw Sera (Sarah) eyaatc,” okii'ikoo'. Miihsh kaa'inaatc, “Piinci pakwaanekamikonk ayaa,” okii'inaa'.

¹⁰ O'o tahsh okii'ikoon, “Tepwe hsa o'o ahpii miinawaa ishi tipihsek ninka piishaa, kiwiiw tahsh Sera oka ayaawaan kwiiwisenhsan,” okii'ikoon. Sera tahsh ishkwaantenk kii⁠niipawi ekiih pisintank, otootaanaaminiink inahke ekii ayaatc.

¹¹ Eparahaam tahsh a'a kaye Sera aasha kii⁠kihci aya'aawiwak, niipiwa' ekiih tahso pipoonwewaatc. Sera (Sarah) tahsh kii‑ishkwaahseni otihkwewi ishi'ayaawin tahso kiisihs.

¹² Miitahsh Sera kiih⁠paahpiwentam ekii inentank, “Aasha tahsh e⁠kihci aya'aawiyaan ninaapem itahsh kaye e⁠ahkiwensiiwitc, keyaapi na nintaa ciihkentaan ci⁠minweninkeyaampaan,” kii⁠ayinentam.

¹³ Miitahsh kaaTipencikenitc Eparahaam kaakii'ikotc, “Wekonenini tahsh Sera kaa⁠onci paahpitc ekii ihkitotc, ‘Koonike tahsh tepwe nintaa ayaawaa apinoonciish e⁠kihci aya'aawiyaan?’

¹⁴ Kekoonan ina onsaam osanakentaan kaaTipenciketc? O'o tahsh ahpii mayaa tipihsek miinawaa ninka pi takohshin, Sera oka ayaawaan okosihsan,” okii'ikoon.

¹⁵ Sera kiih⁠sekisi, miihsh kaa⁠ishi kiiwanimotc ekii ihkitotc, “Kaawiin ninkiih paahpihsii,” kii‑ihkito. O'o tahsh okii'ikoon, “Tepwe ohsha kikiih paahp,” okii'ikoon.

Eparahaam Kiikakwetwetc Cinihshiwanaacihcikaatehsininik Swaatam

¹⁶ Ahpii tahsh i'i ininiwa' eh⁠pasikwiinitc ewii maacaanitc, kii‑inaapiwa' inahke eshi'ayaanik Swaatam (Sodom) ootena. Eparahaam (Abraham) tahsh okii noomake wiiciiwaa' e⁠ani maacaanitc.

¹⁷ KaaTipenciketc tahsh kii‑ihkito, “Kaawiin iitok nintaa kaatamawaahsii Eparahaam aasha kekaa kaawii ishihcikewak!

¹⁸ Wiin iitok tepwe tani kihci inentaakosi, tani mashkawentaakosi kaye, kahkina awiyak kaa⁠tahswewaanakisiwaatc o'omaa misiwe ahkiink wiin onci ta⁠onci shawentaakosiwak.

¹⁹ Wiin hsa ninkii onaapamaa ci⁠kihkinowinaatc oniicaanihsa', i'i kaye keni opiiwesiimitc, eshi antawentaminitc kaaTipencikenitc. Kwayahk ci‑ishihcikenitc, weweni kaye ci⁠tootaakenitc. Kiishpin i'i ishihcikenitc, miitahsh kahkina kekoon ci‑ishihcike'ak kaakii ishi ahshotamawak Eparahaam,” kii‑ihkito.

²⁰ KaaTipencikenitc tahsh okii'ikoon, “Iki hsa pemaatisiwaatc eyaawaatc Swaatam, Kamwaara (Gomorrah) kaye ootenaank kihci anaamimaawak, aaniihsh kihci maci'ishihcikewak.

²¹ Niwii ishaa tahsh weti ewii waapantamaan taka ci‑ishihcikewaakwen i'i kaashi noontamaan eshi anaamimintwaa. Miitahsh ci⁠kihkentamaan kiishpin tepwe eshihcikehsiwaakwen kaashi noontamaan,” okii'ikoon.

²² Miitahsh i'i ininiwa' kaani ishi maacaanitc ekii ishaanitc inahke eshi'ayaanik Swaatam ootena. Eparahaam tahsh wiin i'imaa kii‑ishi niipawi enaahsamiinitc kaaTipencikenitc.

²³ Eparahaam hsa tahsh pehsho okii naasihkawaan kaaTipencikenitc ekii'inaatc, “Kika tako nihshiwanaaci'aak ina iki kweyahkwaatisiwaatc nihshiwanaaci'atwaa meci'ishiwepisiwaatc?

²⁴ Kiishpin tahsh naanimitana (50) tahshiwaatc kweyahkwaatisiwaatc i'imaa ootenaank; kitaa nihshiwanaacihtoon ina i'i ootena? Kaawiin ina kitaa onci manaacihtoohsiin wiinawaa onci kweyahkwaatisiwaatc i'imaa ootenaank kaa‑ayaawaatc?

²⁵ Taka keko'i awaac pankii inentanken, ci⁠tako nihsintwaapan kweyahkwaatisiwaatc nihshimintc omaci'ishiwepisii'. Peshikwan ina ta⁠tootawaawak kweyahkwaatisiwaatc iki tahsh kaye meci'ishiwepisiwaatc? Keko i'iwe ishihcikehken! Kaa⁠Tipaahkoniwetc o'omaa misiwe ahkiink iitok ishinaakwanini weweni ci‑ishihcikehpan!” okii'inaan.

²⁶ KaaTipencikenitc tahsh o'o okii'ikoon, “Kiishpin hsa eyaawaakwen naanimitana (50) kweyahkwaatisiwaatc i'imaa Swaatam ootenaank, mii hsa 'i ci⁠manaacihtaawak wiinawaa onci,” okii'ikoon.

²⁷ Miitahsh Eparahaam kii⁠ani ihkitotc, “Inashke hsa maano niwiih soonkite'e ewiih kanooninaan, aanawiin kekoon e⁠inentaakosihsiwaan e⁠mihci ininiiwiyaan.

²⁸ Kiishpin tahsh wiin niimitanashinaanan (45) tehshiwaakwen kweyahkwaatisiwaatc, kitaa nihshiwanaacihtoon ina'i kahkina ootena,” okii'inaan. Miihsh o'o kaa'ikotc, “Kaawiin nintaa nihshiwanaacihtoohsiin kiishpin eyaawaakwen niimitanashinaanan (45),” okii'ikoon.

²⁹ Miihsh miinawaa kaa'inaatc, “Kiishpin tahsh wiin niimitana (40) i'imaa eyaawaakwen?” okii'inaan. Miihsh kaa⁠ihkitonitc kaaTipencikenitc, “Kiishpin eyaawaakwen niimitana (40) kaawiin ninka nihshiwanaacihtoohsiin wiinawaa onci,” okii'ikoon.

³⁰ Miitahsh o'o kaa‑ani'inaatc, “Tepencikeyan, taka keko onci nishkentanken o'o kaawii ihkitoyaan; kiishpin tahsh wiin nihsimitana (30) ehta kweyahkwaatisiwaatc i'imaa eyaawaakwen?” okii'inaan. O'o tahsh okii'ikoon, “Kiishpin nihsimitana (30) eyaawaakwen, kaawiin ninka nihshiwanaacihtoohsiin,” okii'ikoon.

³¹ Eparahaam tahsh kii⁠ani ihkito, “Inashke hsa maano nisoonkite'e o'o kaawii'ininaan, ‘Kiishpin itahsh wiin niishtana (20) i'imaa eyaawaakwen,’ ” okii'inaan. Miihsh o'o kaa'ikotc, “Kiishpin niishtana (20) eyaawaakwen, kaawiin ninka nihshiwanaacihtoohsiin,” okii'ikoon.

³² Miinawaa tahsh okii ani'inaan, “Tepencikeyan, taka keko nishkentanken, keyaapi ehta aapitink niwiih kiikit; kiishpin tahsh wiin ehta mitaahso (10) eyaawaakwen?” okii'inaan. Miihsh o'o kaa'ikotc, “Kaawiin ninka nihshiwanaacihtoohsiin i'i ootena iki onci ke⁠mitaahciwaatc (10),” okii'ikoon.

³³ Kaa⁠ishkwaa kakanoonikotc tahsh kaaTipencikenitc, mii 'i kaa⁠ishi nakanikotc. Eparahaam tahsh wiin kiih⁠kiiwe.