Cenisihs 15 - Ojibwe Kihcimasina'ikan

Kishemanitoo Kii'ahshotamawaatc Eparaman

¹ O'o tahsh ekii ishkwaa ishihsenik, Eparam (Abram) kii‑ishinam ekii noontawaatc kaaTipencikenitc ekii'ikotc, “Keko sekisihken, Eparam, niin ohsha kaa‑aakooshkawinaan. Kitipa'amaakoowin hsa kaye wiinke ta⁠mihcaa.”

² Eparam tahsh kii‑ishi nahkwehtam, “Kiin kaaTipencikeyan Kishemanitoo, wekonen tahsh ke⁠miishiyampan? Kaawiin iitok apinoonciish nintayaawaahsii. A'a tahsh kaawiih tipentank nintaya'iiman, amii 'awe Eli'iisar (Eliezer) weti Timaaskahsink (Damascus) kaa⁠onciitc.”

³ Keyaapi tahsh kii⁠ani ihkito, “E⁠miishihsiwan tahsh apinoonciishak, peshik hsa kaa⁠pamiihtamawitc oka tipentaanan nintaya'iiman,” kii‑ihkito.

⁴ Inashke tahsh kaaTipencikenitc okii'ikoon, “A'a hsa inini kaa⁠pamiihtawihk kaawiin a'a oka tipentansiinan kitaya'iiman; a'a hsa piko kiwiiyawink kaawii onciitc, mii hsa awe ke⁠tipentank kitaya'iiman,” okii'ikoon.

⁵ Akwaciink tahsh kaaTipencikenitc okii ishiwinikoon ekii'ikotc, “Inashke kihci kiishikonk inaapin, kakweci akim wanankohshak taka ci⁠kashkihtoowanen. Mii hsa ke⁠tahshiwaatc kipiiwesiimak kaa⁠tahshiwaatc wanankohshak,” okii'ikoon.

⁶ Eparam hsa tahsh okiih tepwehtawaan kaaTipencikenitc. Miitahsh kaakii inakimikotc eh⁠kwayahkwaatisitc.

⁷ O'o tahsh kaaTipencikenitc okii'ikoon, “Niin ohsha Tepenciketc kaakiih saakiciwinihk Er (Ur) ootenaank, Kaaltiiya (Chaldea) ahkiink, ewii miininaan o'o ahki kiin ci⁠tipinawewisiyan,” okii'ikoon.

⁸ Eparam tahsh okiih kakwecimaan, “Tepencikeyan Kishemanitoo, aanti itahsh kekii onci kihkentamaan niin ci⁠tipinawewisiyaan,” kii‑ihkito.

⁹ O'o tahsh okii ishi nahkwehtaakoon, “Piitamawihshin ci⁠nihsopipoonwewaatc (3) oshki pishihki, noonshe maanatihk kaye, ayaape maanahcaanihsh kaye. Piitamawihshin kaye kihci omiimii, omiimiihsenhs kaye.”

¹⁰ Kahkina tahsh okiih piitamawaan ono Kishemanitoon, miitahsh kaa⁠ishi taahtaashkishwaatc. Kwehkwehk itahsh okii ishi pimihshimaa' ekii oncishkawihshimaatc. Pinehshiinsha' itahsh wiin kaawiin okiih taashkishwaahsii'.

¹¹ Mihtaskihtikwaanaakehsiwa' tahsh i'imaa kiih⁠pooniiwa' eshi apinitc aya'aawihsha'. Eparam (Abram) itahsh okii osha'waa'.

¹² Ahpii tahsh kiisihsoon e⁠ani pankihshimonitc, Eparam kii⁠ani kihci kihpakinkwahshi. Wiinke tahsh kiih⁠kashkiitipihkanini kiih⁠kohtaaci, kiih⁠kakwaanihsakamanci'o kaye.

¹³ Kishemanitoon tahsh okii'ikoon, “Kehcinaac hsa kihkentan kipiiwesiimak ci⁠piiwitewiwaatc weti pahkaan ahkiink. Mii hsa 'iweti ke⁠tashi pamiihtaakewaatc ci⁠kakwaatakanohkii'intwaa, kaawiin kaye kwayahk ta⁠tootawaahsiiwak niiwaahk (400) tahso pipoon minihk.

¹⁴ Ninka nana'ahsimaa' itahsh i'i pemaatisinitc ke⁠kakwaatakanohkii'ikowaatc weti pahkaan ahkiink. Ahpii tahsh nakatamowaatc i'i ahkiini, wiinke hsa ta⁠kihci wenootisiwak.

¹⁵ Kiin itahsh wiin kika otihsaapantaan ci⁠kihci ahkiwensiiwiyan. Weweni hsa kika nip, miihsh ci⁠na'inikooyan.

¹⁶ Paanimaa tahsh niiwiink kii⁠ani aanihke ayaawaatc kipiiwesiimak miitahsh i'i payesh o'omaa ahkiink cipi takohshinowaatc, aaniihsh kaawiin mahshi ocihcihsehsinini ci⁠nana'ahsakwaapan Emorii (Amorites) kaatinowiwaatc eshi mamaashiiwaatc,” okii'ikoon.

¹⁷ Ahpii tahsh kiisihsoon kaah⁠pankihshimonitc, wiinke eh⁠kashkiitipihkaninik, okii waapamaan itahsh ishkote ahkihkwan eh⁠paashkinesonitc, i'i kaye waahsahkonencikan e⁠ishkotewaninik i'imaa eh⁠pipimi ayaanik nahsawaya'ii eshi'ayaanitc aya'aawihsha' kaakiih taashkishwaatc.

¹⁸ Miitahsh i'i eh⁠kiishikaninik Kishemanitoon Eparam kaakii'ishi ahshotamaakotc ekii'ikotc, “Kipiiwesiimak hsa nimiinaak o'o ahki, ci⁠onci maacihsenik siipiink Iicipahkiink eyaanik, piinihsh weti kihci siipink Iyoohparetiis (Euphrates);

¹⁹ otahkiimini kaye i'i Kiinii (Kenites) kaatinowiwaatc, Kenisii (Kenizzites) kaatinowiwaatc, Kaatmanii (Kadmonites) kaatinowiwaatc,

²⁰ shikwa Heht (Hittites) kaatinowiwaatc, Perisii (Perizzites) kaatinowiwaatc, Orehpaa (Rephaites) kaatinowiwaatc,

²¹ Emorii (Amorites) kaatinowiwaatc, Kenan (Canaanites) kaatinowiwaatc, Kirkashii (Girgashites) kaatinowiwaatc, shikwa Ciipas (Jebusites) kaatinowiwaatc.”