Cenisihs 14 - Ojibwe Kihcimasina'ikan

Eparam Kiinaatamawaatc Laatan

¹ I'i tahsh ahpii oko kihciokimaak Amrapel (Amraphel) kihciokimaa Paapilan (Babylon) ahkiink wenciitc, Ariyaahk (Arioch) kihciokimaa wenciitc Elesaar (Ellasar) ahkiink, Kiitarleomar (Chedorlaomer) kihciokimaa wenciitc Iilam (Elam) ahkiink, a'a kaye Taaital (Tidal) kihciokimaa wenciitc Koim (Goiim)

² kii‑ishaawak e⁠anta miikaanaawaatc o'o kihciokimaa' Piira (Bera) kihciokimaan Swaatam (Sodom) ootenaank wenciinitc, Pirsha (Birsha) kihciokimaan wenciinitc Kamwaara (Gomorrah) ootenaank, Shaainap (Shinab) kihciokimaan Aatma (Admah) ootenaank wenciinitc, Shemiipar (Shemeber) kihciokimaan Siipooim (Zeboiim) ootenaank wenciinitc, kihciokimaan kaye Piila (Bela) ootenaank wenciinitc, mii 'iwe Swaar (Zoar) kaa'icikaatenik.

³ Oko tahsh naanan kihciokimaak kii⁠maamawinitiwak ekii wiiciintiwaatc i'imaa eshi pahsatinaanik Sitam (Siddim) eshinihkaatenik, mii hsa 'i Shiiwihtaakaniwi saaka'ikaniink.

⁴ Mitaahshiniishopipoon (12) hsa okiih tetako tipenimikowaan ini kihciokimaan Kiitarleomar kaa⁠ishinihkaasonitc. Mitaahshinihsopipoon (13) tahsh e⁠ishihsenik mii 'i kaakii maacii miikaanaawaatc.

⁵ Mitaahshiniiwipipoon tahsh e⁠ishihsenik, kihciokimaa Kiitarleomar kiih⁠piishaa ekiih pi wiiciiwaatc kaakii wiiciiwikotc ekiih shaakooci'aawaatc Orehpa'im (Rephaites) kaatinowinitc i'imaa Aashtaraht Kaarneimink (Ashteroth Karnaim) kaa‑ayaanitc, kaye Soosim (Zuzim) kaatinowinitc i'imaa Hemink (Ham) kaa‑ayaanitc, kaye Emim (Emim) kaatinowinitc Shepah Keryahteimink (Shaveh Kiriathaim) kaa‑ayaanitc,

⁶ i'i kaye Korii (Horites) tinowiya'aak imaa kaakii ayaanitc Iitam (Edom) eshi papiihkwatinaanik ekii ahkonisha'waawaatc weti El Peraan (El Paran) kaa⁠pi ahkosink i'i pikwatahkamik.

⁷ Kiih⁠pi ashe kiiwewak itahsh ekii ishaawaatc En Mishpat (En Mishpat) mii 'iwe Ketesh (Kadesh) kaa'icikaatenik. Misiwe i'imaa nahke ahkiink kiih⁠shaakoocihtwaawak, ekiih shaakooci'aawaatc Amalehkii (Amalekites) kaatinowinitc, i'i kaye Emorii (Amorites) kaatinowinitc kaakii ishitaanitc i'imaa Hesiison Temaar (Hazezon Tamar).

⁸ Oko tahsh kihciokimaak, Swaatam (Sodom) onci ootenaank, kaye Kamwaara (Gomorrah) ootenaank, Aatma (Admah) ootenaank kaye wenciitc, Siipooim ootenaank kaye, Piila (Bela) kaye ootenaank wenciitc, mii 'iwe Swaar kaa'icikaatek, okiih piinaawaa' oshimaakanihshiimiwaa' i'imaa kaashi pahsatinaanik Sitam (Siddim) eshinihkaatenik, ewii miikaanaawaatc

⁹ o'o kihciokimaa' Kiitarleomarwan (Chedorlaomer) kaa⁠kihciokimaawinitc Iilam (Elam) ahkiink, i'i kaye Taaitalwan (Tidal) kihciokimaan wenciinitc Koim (Goiim), Amrapeloon (Amraphel) kihciokimaan Paapilan (Babylon) ahkiink wenciinitc, Ariyaahk (Arioch) kaye kihciokimaan wenciinitc Elesaar (Ellasar) ahkiink, niiwewaan ci⁠miikaanaawaatc naanwewaan.

¹⁰ I'imaa tahsh Sitam (Siddim) pahsatinaank wiinke kiih⁠paahtiinatinoon waanihkaanan kaakii ontinimintc pasakocii mahkate pikiihkaanan. Kihciokimaak tahsh ootenawan Swaatam, Kamwaara kaakii onciiwaatc, e⁠maaciipa'iwewaatc kiih⁠piincihsewak waanihkaanink. Kotak itahsh wiin kaakiih shaapwiiwaatc kii⁠ahpa'iwewak eshi papiihkwatinaanik.

¹¹ Iki tahsh niiwin kihciokimaak okii otaahpinaanaawaan kahkina kekoonan kaakii ayaanikin ootenaank Swaatam, Kamwaara kaye, kahkina kaye miicim kii⁠mahkantwewak. Miitahsh kaa‑anishi maacaawaatc.

¹² Okii maaciinaawaan tahsh kaye Laatan (Lot), Eparaman (Abram) otooshimini, kahkina kaye kekoon kaakii ayaanitc. Swaatam ootenaank iitok kii‑ishitaawan.

¹³ Peshik tahsh awiyan kaakiih shaapwiinitc kiih⁠pi takohshinoon ekiih pi wiintamawintc Eparam Hiiparoo (Hebrew) kaakiih tinowitc. Eparam tahsh kii⁠ayintaa i'imaa pehsho eshi'ayaanitc mihtikoo' kehtentaakosinitc kaakii ishi tipentaminitc Mamri (Mamre) eshinihkaasonitc Emorii (Amorite) kaatinowinitc. Eparam tahsh okii wiici'ikoon Mamriwan, ini kaye wiicihkiweni Eshkol (Eshcol), Enar (Aner) e⁠ishinihkaasonitc.

¹⁴ Ahpii tahsh Eparam e⁠noontank otinawemaakanan ekii matwe maaciinimintc, okiih kanoonaa' nihswaahk mitaahshinihshwaahso (318) otininiima' kaakii nakaciinitc otaawinink kaakiih tashi nihtaawikinitc. Miitahsh kaakii ishi maacinisha'iketc piinihsh weti waahsa Ten (Dan) ahki ecikaatenik.

¹⁵ Okii nenaawinaa' itahsh otininiima', eh⁠tipihkaninik tahsh wiin iko otininiima' kaye, kii⁠otihtiniwewak ekii miikaasowaatc, ekiih shaakoocihtwaatc. Weti tahsh waahsa eyaawinink Hopah (Hobah) ecikaatenik kiiwetinonk inahke Timaaskahs (Damascus) ootenaank kii‑inaamohkiiwak i'i kaakii miikaanaawaatc.

¹⁶ Kahkina tahsh kekoonan kiih⁠kiiwe mahkantwe kaakii otaahpinikaatenikopanen ekiih pikiiwewitootc. Okiih pikiiwewinaan kaye otinawemaakanan Laatan (Lot), kahkina kaye otaya'iimini, kahkina kaye ihkwewa', pemaatisinitc kaye kaakii maaciicikaniwinikopanen.

Melhkisitehkoon Kii'ikotc Eparam Kishemanitoon Ciminohse'ikotc

¹⁷ Ahpii tahsh Eparam (Abram) kaah⁠pi takohshink kii‑ishkwaa shaakooci'aatc Kiitarleomarwan (Chedorlaomer), i'i kaye kihciokimaa' kaakii wiiciiwikonitc, kihciokimaan ootenaank Swaatam (Sodom) wenciinitc okiih pi anta nakishkaakoon i'imaa pahsatinaank Shepah (Shaveh), mii hsa 'iwe Kihciokimaa otoopahsatinaam kaa'icikaatenik.

¹⁸ Kihciokimaan tahsh Melhkisitehk (Melchizedek) eshinihkaasonitc wenciinitc ootenaank Selam (Salem) okiih piitamaakoon pahkweshikanan, shoominaapooni kaye. Kii⁠kihci anami'ewikimaawiwan e⁠anohkiihtawaanitc Kishemanitoon Maawac Eshpentaakosinitc.

¹⁹ Okii'ikoon tahsh ci⁠minohsetc, “Taka kiin Eparam kiKishemanitoom Maawac Eshpentaakositc kaa⁠oshihtootc kiishik, ahki kaye, kika minohse'ik!

²⁰ Ta⁠miikwehciwentaakosi Kishemanitoo Maawac Eshpentaakositc, wiin iitok kaa⁠miinihk ci⁠shaakooci'imatc kaa⁠shiinkenimihkwaa,” okii'ikoon. Eparam tahsh okii miinaan peshik mitaahso kekoon kaakii ayaatc.

²¹ Kihciokimaan tahsh Swaatam (Sodom) wenciinitc Eparam okii'ikoon, “Miishihshin iko pemaatisiwaatc, kanawentan itahsh wiin ini kekoonan,” okii'ikoon.

²² Eparam tahsh o'o okii'inaan ini kihciokimaan, “Ninkii ayiici ahshotamawaa ohsha Kishemanitoo Maawac Eshpentaakositc, kaa⁠oshihtootc kiishik, ahki kaye,

²³ ci⁠otaahpinaahsiwak kashkikwaacikaneyaap, komaa kaye mahkisineyaap, kekoon hsa ko kiin tepentaman, kaawiin tahsh kika kashkihtoohsiin ci‑ihkitoyan, ‘Niin ohsha ninkii wenootisii'aa Eparam.’

²⁴ Kaawiin niin kekoon niwii otaahpinansiin, miiehtako nintininiimak kaakii miiciwaatc, i'i kaye kaakii maamawihcikewaatc kaakii wiiciiwiwaatc. Maano Enar (Aner), Eshkol (Eshcol), a'a kaye Mamri (Mamre) ta⁠otaahpinamaasowak kaakii ishi wiitoohkaasowaatc.”