Cenisihs 13 - Ojibwe Kihcimasina'ikan

Eparam, A'a Kaye Laat Kiipahkewinitiwaatc

¹ Eparam (Abram) tahsh Iicipahkiink kii⁠onci maacaatc Nekep (Negev) ahkiink kii‑ishaa, wiiwan ekii wiiciiwaatc. Kahkina kaye otaya'iiman okii maaciitoonan. Laatan (Lot) tahsh kaye okii wiiciiwikoon.

² Eparam wiinke kii⁠wenootisi niipiwa' ekii ayaawaatc awahkaana', waapaapihko shooniyaan, osaawi shooniyaan kaye.

³ Kii⁠ani pimi'ayaa tahsh i'imaa Nekep ecikaatenik piinihsh ekii ani takohshink Pehtal (Bethel) kaa'icikaatenik. Kii⁠ani takohshin tahsh nahsawaya'ii eshi'ayaanik ootenawan Pehtal, Eaai (Ai) kaye kaakii ishi'ayaanikin, kaakii ishi kapehshikopanen otaanaank.

⁴ Mii hsa 'iwe kaakii ishi onaapihkinikekopanen nihtam; miitahsh i'imaa Eparam kaa⁠kii ishi anami'ehtawaatc kaaTipencikenitc otishinihkaasowininiink.

⁵ Laatan (Lot) tahsh kaakii wiiciiwikotc Eparam okii ayaawaani maanahcaanihsha', maanatihkwa', pishihkiwa' kaye. Wiinke tahsh iko kaye kiih⁠paahtiinowa' entashinitc kaakii wiiciiwikonitc.

⁶ Kaawiin tahsh kiih⁠tepihsehsinini i'i ahki i'imaa kaakii ishi'ayaawaatc cikii maamawi ayaawaahpan aaniihsh onsaam okiih paahtiino'aawaa' awahkaana'.

⁷ Eparam tahsh otanohkii'aakana' kaa⁠kanawenimaanitc otaya'aawihshiima', Laat kaye otanohkii'aakana' kii⁠ani maanshi wiiciintiwa'. Pemaatisinitc Kenan (Canaan) ahkiink kaakii onciinitc i'i kaye pemaatisinitc Perisii (Perizzites) kaakii'inimintc kewiinawaa kii⁠ayaawa' i'imaa ahkiink.

⁸ Eparam tahsh okii'inaan Laatan, “Taka hsa naa kaawiin kika maanshi wiiciintihsiimin, iki kaye kitininiiminaanik kaa⁠kanawenimaawaatc awahkaana', kitinawentimin iitok.

⁹ Inashke naa ehpiihci mihcaak ahki kaa⁠waapantaman, taka pahkewinititaa. Kiishpin onamantinihkimaank inahke ishaayan, okihcinihkimaank itahsh niin inahke ninkashi maacaa; kiishpin tahsh wiin okihcinihkimaank inahke ishaayan, onamantinihkimaank itahsh inahke ninkashi maacaa,” kii‑ihkito.

¹⁰ Laat (Lot) tahsh kii⁠ayinaapi. Okii waapantaan tahsh Cwaartan (Jordan) kaashi pahsatinaanik inahke e⁠paahtiinatininik nipiini piinihsh weti kihci ootena Swaar (Zoar) ecikaatenik, ekii ishinaakwaninik taapishkoo kaaTipenciketc okihtikaan mayaa kaye Iicipahkiink (Egypt) kaa⁠ishinaakwaninik. Kaawiin iitok kaaTipenciketc mahshi i'i ahpii okii nihshiwanaacihtoohsiinan ootenawan Swaatam (Sodom), Kamwaara (Gomorrah) kaye.

¹¹ Laat tahsh okii onaapantaan ewii ayaatc kahkina Cwaartan kaashi pahsatinaanik. Waapanonk tahsh inahke kii‑ishi maacaa. Miitahsh i'i nahke kaa⁠ishi pahkewinitiwaatc.

¹² Eparam (Abram) tahsh wiin Kenan ahkiink kii‑ishi kapehshi. Laat tahsh wiin kaashi pahsatinaanik eshi ootenawaninik kii‑ishi kapehshi. Pehsho tahsh eshi'ayaanik Swaatam kii‑ishi kapehshi.

¹³ Pemaatisinitc itahsh i'imaa kaakii ayaanitc wiinke kii⁠maci'ishiwepisiwa', okii macitootawaani kaye kaaTipencikenitc.

Eparam Kii'ishikositc Hiiparan

¹⁴ Laatan (Lot) tahsh kaa⁠ishkwaa nakanikotc, kaaTipencikenitc Eparam (Abram) okii'ikoon, “I'imaa hsa kaashi niipawiyan kiiwetinonk inahke inaapin, shaawanonk kaye, waapanonk inahke, ninkaapii'anonk kaye inahke.

¹⁵ Kahkina i'i ahki kaa⁠waapantaman, mii 'iwe kaa⁠nehpici miininaan, iki kaye keni opiiwesiimiyan.

¹⁶ Ninka ishi'aak hsa kipiiwesiimak ci⁠ahpiihci paahtiinowaatc taapishkoo kaa⁠paashkinehsek o'omaa ahkiink; kiishpin tahsh awiya kashkihtoohpan ci⁠akintank kaa⁠paashkinehsenik, mii iinsan ci⁠kashki'intwaapan kipiiwesiimak ci⁠akimintwaapan.

¹⁷ Maacaan tahsh, pimohsaatan ehkwaak, enikohkwateyaak kaye i'i ahki, aaniihsh kiin mii 'iwe kaa⁠miininaan,” okii'ikoon.

¹⁸ Eparam tahsh kii⁠aanci kapehshi ekii ishi kositc eshi'ayaanitc kehtentaakosinitc weti oohk tinowaahtikoo' eyaawinink Mamri (Mamre) ecikaatenik, ootenaank Hiiparanik (Hebron). Miitahsh weti kaa⁠ishi onaapihkinamawaatc kaaTipencikenitc.