Cenisihs 1 - Ojibwe Kihcimasina'ikan

Kishemanitoo Kii'oshihtootc Kahkina Kekoonini

¹ Maawac tahsh kihci niikaan, Kishemanitoo okii oshihtoon kiishik, ahkiini kaye.

² Kiih⁠pikwacaya'iiwan, kii⁠mashashkwaa hsa kaye o'o ahki. Nipi tahsh kiih⁠kiishkaayawaa, wiinke tahsh misiwe kiih⁠kashkiitipihkan. Kishemanitoo tahsh otAhcaahkwan ahshicipiik kiih⁠pimi ayaawan.

³ Kishemanitoo tahsh kii‑ihkito, “Taka ta⁠waahseyaa.” Miihsh kaa⁠ishi waahseyaanik.

⁴ Miitahsh kaa⁠ishi minwaapantank i'i kaakii waahseyaanik. Okii nenaawinaan tahsh i'i kaakii waahseyaanik i'i kaye kaakii kashkiitipihkaninik.

⁵ Kaakii waahseyaanik tahsh kiishikan okii ishinihkaataan shikwa kaakii kashkiitipihkaninik tahsh tipihkan okii ishinihkaataan. Miihsh kaa‑anishi tipihkaninik, kii⁠ani kishepaawakanini kaye, mii 'i kiih⁠peshikokiishikaninik.

⁶ Kishemanitoo tahsh kii‑ihkito, “Taka, ta‑ayaamakan aahsamikiishik akwana'ikanink ke⁠inentaakwahk keshi piihtawaakin nipiin.”

⁷ Miitahsh kaakii oshihtootc aahsamikiishik, ekii nenaawinank ini nipiin anaamikiishik eyaanikin, ini kaye wakici kiishik. Mii hsa 'i kaaishihsenik.

⁸ Kiishik tahsh okii ishinihkaataan i'i aahsamikiishik. Miihsh kaa‑anishi tipihkaninik ekii ani kishepaawakaninik kaye, mii 'i kii⁠niishokiishikaninik.

⁹ Kishemanitoo tahsh miinawaa kii‑ihkito, “Taka ta⁠maamawiciwanoon ini aahsamikiishik eyaakin nipiin i'imaa peshik ayaawinink, ci⁠naakwahk ci⁠paankwahkamikaak.” Mii hsa 'i kaa⁠ishihsenik.

¹⁰ Kaakiih paankwahkamikaanik tahsh ahki okii ishinihkaataan, kaakii ishi maamawiciwaninikin tahsh nipiin kihcikam okii ishinihkaataan. Wiinke tahsh okii minwaapantaan.

¹¹ Kishemanitoo tahsh miinawaa kii‑ihkito, “Taka o'omaa ahkiink ta⁠saakahkiiwan kaa⁠tahswewaanakahkin kihtikaani kekoonan, taapishkoo ashkipakoon kaa⁠miiniwankin kihtikaanenhsan, iki kaye miinaahtikook entinowiwaatc kaa⁠nihtaawikihtoowaatc miinan i'imaa kaa⁠piintekin wahkantaaminan.” Mii hsa 'i kaaishihsenik.

¹² Kiihpi saakahkiiniwan tahsh ini kaa⁠tahswewaanakahkin kihtikaani kekoonan taapishkoo ashkipakoon minihk entinowiwaatc kaa⁠miiniwankin kihtikaanenhsan, iki kaye miinaahtikook minihk entinowiwaatc kaa⁠nihtaawikihtoowaatc miinan i'imaa kaa⁠piintekin wahkantaaminan. Wiinke tahsh okii minwaapantaan.

¹³ Miinawaa tahsh kii⁠ani tipihkan, kii⁠ani kishepaawakan kaye, mii 'i kii⁠nihsokiishikaninik.

¹⁴ Kishemanitoo tahsh kii‑ihkito, “Taka ta‑ayaamakanoon ke⁠onciwaahseyaak aahsamikiishik, ci⁠onci nenaawinikaatekin kaa⁠kiishikahkin, kaa⁠tipihkahkin kaye. Mii hsa iwe ke⁠onci kihkinawaaci kihkencikaatekin aaniin eshi kiishikahk, aaniin kaye ahpii ke⁠pipoonk, ahpii kaye ke⁠wiihkwantinaaniwank.

¹⁵ Taka ta‑ayaamakanoon ke⁠waahseyaakin aahsamikiishik ke⁠onciwaahseyaak o'o ahki.” Mii hsa 'i kaaishihsenik.

¹⁶ Miitahsh Kishemanitoo kaa⁠ishi oshihtootc niishin kehci waahsahkonenikin; kiisihsoon ke⁠tipentaminitc kiishikan shikwa tipihkikiisihsoon ke⁠tipentaminitc tipihkan. Wanankohsha' tahsh kaye okii oshi'aa'.

¹⁷ Miiwa' o'o kaa⁠ishi pakitinaatc aahsamikiishik ci⁠waahseshkaminitc ahkiini.

¹⁸ Ci⁠tipentaminitc kaa⁠kiishikaninik, kaa⁠tipihkaninik kaye ci⁠nenaawishkaminitc kaa⁠waahseyaanik, onci kaa⁠kashkiitipihkaninik. Kishemanitoo tahsh okii minwaapantaan.

¹⁹ Kii⁠ani tipihkan tahsh, miinawaa ekii ani kishepaawakahk, mii 'i kii⁠niiwikiishikaninik.

²⁰ Miinawaa tahsh Kishemanitoo kii‑ihkito, “Taka ta⁠paahtiinowak nipiink kaa‑ayaawaatc ke⁠mooshkinewaatc i'imaa nipiink. Ta⁠tashi papaamihsewak kaye pinehshiinshak newacikiishik.”

²¹ Miitahsh kaa⁠ishi oshi'aatc kihci tinowihkaana' i'imaa kihcikamiink ci⁠ayaanitc. Okii oshi'aa' kaye kahkina nipiink kaa‑ayaanitc kaa⁠wahkawiinitc i'i wehkwiinonitc i'imaa nipiink, anooc entahswewaanakisinitc, kahkina kaye kaa⁠pimihsenitc pinehshiinsha' aaniin entahswewaanakisinitc. Okii minwaapantaan tahsh i'i kaakii waapantank.

²² Kishemanitoo tahsh okii'inaa' ci⁠minohsenitc ekii ihkitotc, “Nihtaawikinaawahsok cini paahtiinoyek, misiwe ani ayaak o'omaa kihcikamiink, tani paahtiinowak kaye pinehshiinshak wakitahkamik.”

²³ Miinawaa kii⁠ani tipihkan, kii⁠ani kishepaawakan kaye. Mii hsa 'i kii⁠naanokiishikaninik.

²⁴ Miinawaa tahsh Kishemanitoo kii‑ihkito, “Taka ta‑ayaawak aya'aawihshak wakitahkamik, anooc ci⁠tahswewaanakisiwaatc. Awahkaanak ta‑ayaawak, iki kaye kaa⁠pimootewaatc, pikwaci aya'aawihshak kaye.” Mii hsa 'i kaaishihsenik.

²⁵ Miitahsh i'i nahke kaa⁠ishi oshi'aatc pikwaci aya'aawihsha', minihk iko entahswewaanakisinitc ci‑ishi'ayaanitc, okii oshi'aa' kaye awahkaana' entahswewaanakisinitc ci‑ishi'ayaanitc. Kahkina kaye mihtahkamik kaa⁠pimootenitc, entahswewaanakisinitc okii oshi'aa'. Kishemanitoo tahsh okii minwaapantaan.

²⁶ Kishemanitoo tahsh kii‑ihkito, “Taka oshi'aataanik awiyak pemaatisiwaatc kaa⁠ishinaakosiyank ishi'aataanik, eshi'ayaayank kaye ci‑ishi'ayaawaatc. Oka tipenimaawaa' tahsh kinooshe' i'imaa kihcikamiink eyaanitc, pinehshiinsha' kaye newacikiishikonk eyaanitc, awahkaana' kaye, kaa⁠papaamootenitc kaye. Misiwe kaye ahkiini oka tipentaanaawaa.”

²⁷ Miitahsh kaa⁠ishi oshi'aatc awiya' pemaatisinitc ekii ishi'aatc taapishkoo eshinaakositc. Mayaa hsa piko eshinaakositc ekii ishi'aatc. Okii ishi'aa' ci‑ininiiwinitc, ci‑ihkwewinitc kaye.

²⁸ Miitahsh kaa'inaatc ci⁠minohsenitc. O'o okii'inaa', “Nihtaawikinaawahsok cini paahtiinoyek, misiwe ani ayaak i'imaa ahkiink. Tipentamaasok ahki. Tipenimihkook kinooshek kihcikamiink kaa‑ayaawaatc, pinehshiinshak kaye newacikiishik kaa‑ayaawaatc, kahkina kaye kekoon kaa⁠pimaatahk kaa⁠wawaahkawiimakahk wakitahkamik.”

²⁹ Miihsh kaye kaa'inaatc, “Inashke, kahkina kimiinininim kaa⁠miiniwankin kihtikaanenhsan o'omaa misiwe wakitahkamik, kahkina kaye tinowaahtikook kaa⁠miiniwiwaatc kaa⁠wahkantaaminiwiwaatc mii 'iwe ke⁠omiicimimiyan.

³⁰ Kahkina kaye aya'aawihshak miinaawak kahkina kihtikaanan kaa⁠nihtaawikininikin ci⁠miiciwaatc, iki kaye kahkina pinehshiinshak, kaa⁠pimootewaatc kaye mihtahkamik. Minihk hsa ko pemaatisiwaatc aya'aawihshak mii 'i eshi miinakwaa cishi omiicimimiwaatc.” Mii hsa 'i kaaishihsenik.

³¹ Kishemanitoo tahsh okii waapantaan kahkina kekoon kaakii oshihtootc, aahpici tahsh wiinke kii⁠onishihshinini. Miinawaa tahsh kii⁠ani tipihkan, ekii ani kishepaawakahk kaye. Mii 'i kii⁠ninkotwaahsokiishikaninik.