Caahshowaa 2 - Ojibwe Kihcimasina'ikan

Caahshowaa Kii'ishinisha'waatc Okiimoosaapii' Ci'antawaapantaminitc Kihci'ootenaani Cerahko

¹ Caahshowaa (Joshua) tahsh kaakii otetetc Nanan (Nun) i'imaa Akesha (Acacia) ayaawinink ecikaatenik okii onci maacinisha'waa' niishin (2) ininiwa' ci⁠anta kiimoosaapinitc o'o ekii'inaatc, “Maacaak anta waapantamok i'i ahki, memintake ko i'i kihci ootena Cerahko (Jericho). Miitahsh kaa⁠ishi maacaawaatc iki niishin ininiwak. Weti tahsh kii‑ishi takohshinook owaahkaa'ikaninink ini pihshikwaacihkwewan Orehaap (Rahab) eshinihkaasonitc.” Miitahsh i'imaa kaa⁠ishi tipihkihshiwaatc.

² A'a tahsh kaakiih kihciokimaawitc i'imaa Cerahko kii⁠noontam ekii'inintc, “Inashke hsa ininiwak Isriyalihkaank onciiwak kaa⁠piishaawaatc o'omaa noonkom kaa⁠onaakohshininik, ehpi anta kihkentamowaatc o'o ahkiini.”

³ Miitahsh a'a kihciokimaa kaa'inaatc Orehaapoon, “Saakisi' hsa iki ininiwak kaakii otihsihkwaa i'imaa kiwaahkaa'ikanink. Kiih⁠piishaawak ohsha ekiih pi'anta kihkentamowaatc o'o ahkiini,” kii‑ihkito.

⁴ A'a tahsh ihkwe kii‑ishihcike ekiih kaanaatc i'i niishin ininiwa', miitahsh kaa⁠ihkitotc, “Eya', tepwe hsa ininiwak ninkiih pi otihsikook, kaawiin hsa ninkihkenimaahsiik tipi kaah⁠pi onciiwaakwen.

⁵ Ahpii hsa ko kii⁠ani ocihcihsek ci⁠kipa'ikaatek maawac iko kihci ishkwaantem kiini tipihkahk, mii 'i ahpii kaa⁠maacaawaatc, kaawiin tahsh ninkihkenimaahsiik tipi kaa⁠ishaawaakwen, inashke wewiip iko piminisha'ohkwak, ci⁠atimekwaa,” kii‑ihkito.

⁶ A'a tahsh ihkwe kii‑ishiwinaakopan i'i ininiwa' wakitapahk, ekii ishi kaanaakopanen i'imaa anaamaaya'ii kaakii ishi ohkwaahkohsininikin mihtikonhsan ishiikin wenci oshihcikaatenik. Wakitapahk hsa kii⁠ahtookopan a'a ihkwe ini mihtikonhsan.

⁷ Kaa⁠ishkwaa maacaanitc itahsh i'i kihciokimaa otininiima' eh⁠piminisha'waanitc okiimoosaapii', mii hsa 'i kaa⁠ishi kipa'ikaatenik i'i kihci ishkwaantem. Weti kii‑ishi antone'ikewa' miihkanaank enamoninik inahke Cwaartan siipink.

⁸ Miihsh iinsan kaakii anta waapamaatc i'i ininiwa' cipwaa kawihshimonitc weti wakitapahk.

⁹ Miitahsh kaa'inaatc, “Ninkihkentaan hsa kaaTipenciketc ekii miininek o'o ahkiini, wawiinke kaye kikohsikoom, kahkina hsa ko pemaatisiwaatc o'omaa ahkiink nininkaanimisiwak wiinke e⁠kohtaaciwaatc.

¹⁰ Ninkii noontaamin ohsha aaniin kaaTipenciketc kaakii ishi paankwahkamikihtootc i'i Misko kihcikamiini (Red Sea) keshi pimohsewek ahpii Iicipahkiink (Egypt) kiih⁠pi'onci saaka'amek. Ninkii noontaamin kaye aaniin kaah⁠tootawekwaa iki niishin kihciokimaak Saaihaan (Sihon), a'a kaye Aak (Og) kaakii ishinihkaasowaatc kaakiih tipenimaawaatc Emorii kaatinowinitc (Amorites) weti akaamink Cwaartan Siipink.

¹¹ Ahpii tahsh kii⁠noontamaank ninkii nininkite'eyaanimisimin, kahkina hsa ninkiih pakitaanimisimin kiinawaa onci, aaniihsh kaaTipenciketc kiKishemanitoomiwaa, Kishemanitoowi weti ishpimink kiishikonk o'omaa kaye ahkiink.

¹² Taka tahsh kaaTipenciketc ahpimok, niin ekii minotootawinakook, kekiinawaa tahsh ci⁠minotootawekwaa nintetenk kaa⁠onciiwaatc, kekoon hsa kihkinawaacihcikek ke⁠onci tepweyeniminakook.

¹³ I'iwe tahsh ahpii ishihsek keko nihsaahkek, nintete, nimaamaa, nintawemaak, niicihkwek kaye, i'i kaye kahkina kaa⁠tipenimaawaatc, keko pakitinihshinaahkaank ci⁠nihsikoyaank,” kii‑ihkito a'a ihkwe.

¹⁴ Miihsh o'o iki ininiwak kaa'inaawaatc, “Taka niinawint meshkwac pisaan ninka nihsikoomin ahpiihc kiin kiishpin tipaacimohsiwan wekonen wenci piishaayaank. Ahpii tahsh kaaTipenciketc miininankitc o'o ahkiini aahpici hsa kika minotootaakoo, weweni kaye kika tootaakoo,” okii'inaawaan.

¹⁵ A'a tahsh ihkwe Orehaap i'imaa kaakii ishi waahkaayaapihkinikaatenik kihci ootenaani kii‑ishitaa. Mii hsa tahsh kaa⁠ishihciketc, ekii niihsaapiikinaatc i'i ininiwa' owaahsehcikanink.

¹⁶ Mii hsa kaa'inaatc, “Weti hsa kaashi papiihkwatinaak ahpa'iwek ci⁠atimihsinowinekwaa iki ke⁠piminisha'onekwaa! Nihsokiishik itahsh weti kaasoohkek, paanimaa tahsh kiih⁠kiiwewaatc ke⁠piminisha'onekwaa, miitahsh payesh ishi kiiwehkek,” okii inaa'.

¹⁷ Miihsh o'o okiimoosaapiik kaa'inaawaatc ini ihkwewan, “Ninka kanawentaamin hsa i'i kashi ahpimoyaank e'ishiyaank ci⁠aayiici ahshotamaakooyan,

¹⁸ ahpii pi⁠kacishkinamaakeyaank o'o ahki. Kiishpin kota ehta kii⁠akootooyan o'o miskweyaap i'imaa waahsehcikanink kaakii onci niihsaapiikiniyaank, kiishpin kaye ehta kiihpiinatwaapan kitete, kimaamaa kaye, kiicishaanak kaye, i'i kaye kahkina enawemaawaatc i'imaa kiwaahkaa'ikanink.

¹⁹ Kiishpin itahsh wiin awiya kiwaahkaa'ikanink onci saaka'ank miihkanaank itahsh ishaatc, wiin hsa i'i otishihcikewin, kaawiin niinawint kekoon ninka ishi anaamentaakosihsiimin. Kiishpin itahsh wiin awiya kiwaahkaa'ikanink eyaatc nihsintc itahsh, niinawint hsa ninka anaamentaakosimin aaniin ke⁠ishihsetc.

²⁰ Kiishpin itahsh kaye tipaacimiyaank aaniin eshihcikeyaank, mii hsa 'i ci⁠pakicishkaakoyaank i'i kaakiih tootawiyaank ci⁠aayiici ahshotamaakooyan,” okii'inaawaan.

²¹ Miihsh o'o kaa⁠ikowaatc ini ihkwewan, “Mii hsa 'i ke⁠ishinaakwahk kaa⁠ihkitoyek.” Miitahsh kaa⁠ishi maacinisha'okowaatc. Okiih tahkopitooni tahsh kaye miskweyaap owaahsehcikaniniink. Miitahsh kaa⁠ishi maacaawaatc.

²² Eshi papiihkwatinaanik itahsh inahke kii‑ishi maacaawak, nihsokiishik weti ekii ayaawaatc paanimaa hsa kaah⁠kiiwenitc i'i kaakiih piminisha'okowaatc. I'i hsa kaakiih piminisha'okowaatc misiwe miihkanaank okii ishi nanaantone'okowaa', kaawiin itahsh okii mihkaakohsiiwaa'.

²³ Miihsh iki niishin ininiwak kii⁠niihsaamaciwewak eshi papiihkwatinaanik, siipiini kaye ekii aashawishkaawaatc ekiih kiiwewaatc. Kii‑ishi takohshinook itahsh eshi'ayaanitc Caahshowaan kaakii otetenitc Nanan. Miihsh kaakii wiintamawaawaatc kahkina kaa⁠ishihsewaatc.

²⁴ O'o hsa okii'inaawaan Caahshowaan, “KaaTipenciketc hsa tepwe kimiinikonaan i'i misiwe ahkiini ci⁠mahkantwewank; kahkina kaye pemaatisiwaatc weti eyaawaatc ishi'ayaawak taapishkoo e⁠nininkishkaawaatc ehpiihtaanimisiwaatc, kiinawint onci,” okii'inaawaan.