ᐃᔑᒋᑫᐎᓇᓐ 9 - Ojibwe Kihcimasina'ikan

Swaal kiikwehkaatisitc

¹ Swaal (Saul) tahsh keyaapi okii aahkwaatisiihkantawaa' e'ahshonaatc ewii'-nihsaatc i'i kaaTipencikenitc okihkino'amawaakanini. Okii'anta waapamaan tahsh maawac kihcianami'ewikimaan,

² ekiih kakwetwetc cimiinintc masina'ikanan keonci kihkenimikotc Timaaskahs (Damascus) ootenaank kaa'ayaanitc Coowianami'ewikamikonk. Kiishpin tahsh mihkawaatc awiyan piko pepiminisha'aminitc Ishaawin, ininiwan, komaa kaye ihkwewan, ewii'-mamaancikwahpinaatc ci'ishiwinaatc Ceroosalamink (Jerusalem).

³ Pehsho tahsh e'ani pimiayaatc ootenaank Timaaskahsink, okii koshkowinikon e'waahtehsenik eshi ayaatc, kihcikiishikonk ekii'-oncihsenik.

⁴ Mihtahkakamik tahsh kii'ishi pankihshin, awekwenan tahsh okii'-noontawaan ehkanoonikotc: “Swaal, Swaal, wekonen wenci kakwaataki'iyan?” ekii'ikotc.

⁵ Miihsh kaa'ihkitotc: “Tepencikeyan, awenen kiin?” O'o tahsh okii'ikoon: “Niin ohsha a'a Ciisahs kaakakwaataki'atc.

⁶ Taka tahsh, pasikwiin. Weti ootenaank ishaan, miitahsh weti keshi wiintamaakooyan aaniin keishihcikeyan,” okii'ikoon.

⁷ Iniweniwa' tahsh ininiwa' kaakii'-wiiciiwikotc kiihkipihciiwa' kekoon ekii'-ihkitohsinik, enoontaminitc i'i kaakii'-ihkitowintc. Kaawiin tahsh awiyan okii waapamaahsiini.

⁸ Swaal tahsh mihtahkamik kii'onci pasikwii. Ahpii tahsh e'inaapitc, kaawiin kiiwaapihsii. Weti tahsh ootenaank Timaaskahs kii'ishiwicikaniwi ekiih sakinihkenintc.

⁹ Nihsokiishik tahsh kaawiin kiiwaapihsii, kaawiin cikiiwiihsinitc, kaawiin kaye cikii'onci minihkwetc.

¹⁰ I'imaa tahsh ootenaank Timaaskahsink kii'ayaa peshik otepwehtamoo, Aananaayahs (Ananias) eshinihkaasotc. Ishinamowinink tahsh okii'onci kanoonikoon kaaTipencikenitc e'ikotc: “Aananaayahs!” okii'ikoon. “Wekonen, Tepencikeyan?” kii'ihkito.

¹¹ KaaTipencikenitc tahsh o'o okii'ikoon: “Ishaan weti pimohsehkanaank Kwayahkwamon ecikaatek. Cootahs (Judas) owaahkaa'ikanink ishipiintiken. Miitahsh i'imaa keshiantooshkawatc Swaal (Saul) eshinihkaasotc Taarsahs (Tarsus) kaaonciitc. Mekwaa ohsha anami'aa.

¹² Kii'ishinam hsa ewaapamaatc ininiwan Aananaayahs (Ananias) eishinihkaasonitc ehpi naasihkaakotc ehsaaminikotc cikiiwe waapitc,” okii'ikoon.

¹³ Aananaayahs tahsh kii'ishi nahkwehtam: “Tepencikeyan, niipiwa' ohsha ninaanoontam enaacimintc a'a inini, aaniin eshi maanshi tootawaatc kaatipenimimatc otepwehtamoo' eyaanitc Ceroosalamink.

¹⁴ Okii'-miinikoon iitok kihcianami'ewikimaan kashki'ewisiwin citahkonaatc kahkina kaashi kanoonimihk kiwiinsowininiink,” okii'inaan.

¹⁵ Miihsh o'o kaa'ikotc kaaTipencikenitc: “Maacaan, ishaan! Wiin ohsha ninkii'-onaapamaa ewii'-aapaci'ak cikihkentamoonaatc niwiinsowin kaaCoowiwihsinik (Gentiles), kihciokimaa' kaye, i'i tahsh kaye Isriyala'.

¹⁶ Niin ohsha piko niwii'waapanta'aa aaniin minihk keshikakwaatakihtootc niwiinsowinink onci,” okii'ikoon.

¹⁷ Aananaayahs (Ananias) tahsh kii'ani maacaa ekii'awi piintiketc waahkaa'ikanink eshi ayaanitc Swaalan. Okiih saaminaan tahsh ekii'inaatc: “Niici otepwehtamo, Swaal, kaaTipenciketc Ciisahs kaakii naakosiihtawihk weti miihkanaank, ninkiih piicinisha'ok miinawaa ciwaapiyan, cimooshkineshkawihk tahsh kaye Kishemanitoo otAhcaahkwan,” okii'inaan.

¹⁸ Shemaak itahsh oshkiishikonk kekoonan kii'onci pankihsininiwan taapishkoo wanakayak e'ishinaakwaninikin. Shemaak tahsh kiiwaapi. Miitahsh kaa'ishi pasikwiitc ekiih siika'antaasotc.

¹⁹ Kaa'ishkwaa wiihsinitc tahsh miinawaa kiihkiiwe mashkawaatisi. Acina tahsh okii wiiciiwaa' otepwehtamoo' Timaaskahsink (Damascus) kaakii'-ayaanitc.

Swaal kiikakiihkwetc Timaaskahsink

²⁰ Miitahsh shemaak Coowi anami'ewikamikohkaank kaa'ishi papaa wiintamaaketc Ciisahsoon e'okosihsimikonitc Kishemanitoon.

²¹ Kahkina tahsh kaakii noontaakotc kiimaamahkaatentamoo' ekii'-ihkitonitc: “Kaawiin ina mii 'awe Ceroosalamink kaakiih kakwaataki'aatc i'i kaawiintaminitc Ciisahsoon owiinsowinini enami'aanitc? Kaawiin ina mii 'i kaaonci piishaatc o'omaa ewiitahkoniwetc ci'ishiwinaatc eshi ayaanitc kihcianami'ewikimaa?” kii'ihkitowa'.

²² Swaal (Saul) tahsh aanciihke kii'ani mashkawaani eshi kakiihkwetc. Okii'-wawaanentami'aa' itahsh Coowa' eshitaanitc i'imaa Timaaskahsink ekiih pehtenaakohtootc Ciisahsoon eyaawinitc kaakiih piicinisha'okonitc Kishemanitoon cipimaaci'iwenitc.

²³ Naanaake tahsh e'ani kakiishikaninik Coowa' kiimaawaci'itiwa' e'onaahkonikenitc ewiinihsikotc Swaal.

²⁴ Okii kihkentaan tahsh aaniin waahtootaakotc. Entahsokiishik, entahso tipihk kaye okii'-ahkamaakoo' eshi ayishkwaantemiwaninik i'i ootena ewiinihsikotc.

²⁵ Swaal tahsh kaakiih piminisha'okotc okii'-naasihkaakoo' mekwaa etipihkaninik. Eshi pakoneyaanik tahsh waahkaayaapihkinikan okii'onci niihsaapiikinikoo' mashkohsiimahkahkonk ekii'ishi namatapitc.

Swaal kii'ishaatc Ceroosalamink

²⁶ Swaal tahsh kii'ishaa Ceroosalamink (Jerusalem), ekiihkakwe wiiciiwaatc ishinisha'waakana'. Kahkina tahsh okiih kohsikoo', ekiih tepwehtansinik kewiin iinsan ishinisha'waakan ehtinowitc.

²⁷ Paarnapahs (Barnabas) hsa okii'-wiici'aan ekii'-ishiwinaatc eshi ayaanitc ishinisha'waakana'. Okii'-wiintamawaa' mekwaa ehpimiayaanitc aaniin kaa'ishi waapamaanitc kaaTipencikenitc, ekii'-kakanoonikonitc itahsh kaye. Okii'-wiintamawaa' kaye aaniin weti Timaaskahsink (Damascus) kaakii'ishi soonkite'enitc ehkakiihkwenitc owiinsowininiink Ciisahsoon.

²⁸ Swaal tahsh okii wiiciiwaa' ishinisha'waakana' misiwe ekiihpapaa ishaatc Ceroosalamink, ekiih soonkite'etc ehkakiihkwetc owiinsowininiink kaaTipencikenitc.

²⁹ Okiih kakanoonaa' tahsh ekiihkakwe shaakoosomaatc i'i Kariihk (Greek) kaaishikiishwenitc Coowa'. Shaakooc itahsh okiihkakwe nihsikoo'.

³⁰ Ahpii tahsh otepwehtamoo' kaakihkentaminitc aaniin waahtootawintc okii'ishi wiiciiwikoo' Sehsariiyaink (Caesarea), miihsh weti kaakii'-ishinisha'ontc ci'ishaatc Taarsahs (Tarsus) ootenaank.

³¹ Otepwehtamook tahsh misiwe Cootiiyahkiink (Judah), Kaalaliink (Galilee) kaye, Sameriyahkiink (Samaria) itahsh kaye pisaan kii'ayayaawak. Kii'ani mashkawisiiwak kaye, pehkihsh itahsh kii'ani paahtiinowak ewiici'ikowaatc Kishemanitoon otAhcaahkoni. Kii'ishipimaatisiwak itahsh kaye ekii kohtaanenimaawaatc kaaTipencikenitc.

Piitar kii'ishaatc Lita kapehshiwinink, Caahpa ootenaank kaye

³² Kii'ani ayishihseni tahsh Piitar (Peter) misiwe ekii'-ishaatc i'imaa ahkiink, ekii'ani otihsaatc otepwehtamoo' Kishemanitoon tepenimikonitc Lita (Lydda) kaapehshiwinink eyaanitc.

³³ Okii'-otihsaan tahsh peshik ininiwan Iiniiyahs (Aeneas) eshinihkaasonitc emamaancikwaahpinenitc. Aasha nihshwaahso pipoon (8) i'i kiishi ayaawan ekiimihci pimihshininitc ehpimohsesinik.

³⁴ Piitar tahsh okii'inaan: “Iiniiyahs, Ciisahs Christ kiminoayaa'ik. Wanishkaan, cina'iikihsitooyan kinipewin,” okii'inaan. Shemaak tahsh kii'wanishkaawan.

³⁵ Kahkina tahsh i'imaa pemaatisinitc kaakii'-ishitaanitc Lita kapehshiwinink, i'i kaye Sheranink (Sharon) o'o e'ishi waapantaminitc, okii kwehkiinotawaani kaaTipencikenitc.

³⁶ Weti tahsh ootenaank Caahpa ecikaatek, kii'ayaa peshik ihkwe otepwehtamoo Taapihta (Tabitha) e'ishinihkaasotc. Kariihkak (Greeks) otishikiishwewiniwaank Twaarkas (Dorcas) kii'ihkitowak, Waawaashkeshi ekii'-icikaatenik. Mii 'awe ihkwe mooshak kiinihtaa minohcike, ekii nihtaa wiici'aatc kaye ketimaakisinitc.

³⁷ Miitahsh i'i ahpii kii'ani aahkosi a'a ihkwe, ekii'ani nipotc. Owiiyaw itahsh kiihkisiisipacikaateni, ishpimink eshi pahkehcikaatenik waahkaa'ikan ekii'ishi ahcikaatenik.

³⁸ Lita ayaawinink itahsh kii'onci pehshowan i'imaa onci Caahpa (Joppa) ootenaank. Ahpii hsa otepwehtamook e'noontamowaatc Piitaran (Peter) e'ayaanitc weti Lita kapehshiwinink, niishin 2 ininiwa' okii'-ishinisha'waawaa' o'o ci'awi'inaanitc: “Keko ayontamiihken cipi naasihkawiyaank,” ci'inaanitc.

³⁹ Shemaak itahsh Piitar kii'oshiihtaa ekii'ani wiiciiwaatc. Ahpii tahsh ehtakohshink, kii'ishiwicikaniwi pahkehcikanink ishpimink. Kahkina tahsh kiiwaacihkwewa' okii'-waahkaashkaakoo' ekihci mawinitc ewaapanta'ikotc naapishkikanan, kikishkikanan kaye kaakii'-oshihtoonihpan mekwaa ehpimaatisinitc.

⁴⁰ Miihsh Piitar kaa'ishi kanoonaatc kahkina cisaaka'aminitc. Miitahsh kaa'ishi ociciinkwanapihtaatc ekii'-anami'aatc. Kiihkwekii tahsh eshi ahtenik i'i wiiyawimaa ekii'-ihkitotc: “Taapihta wanishkaan.” Miihsh kaa'ishi paahkaapinitc. Ewaapamikotc itahsh, mii 'i kaaishi mayaawapinitc.

⁴¹ Okiih sakinihkenaan tahsh ewiici'aatc ekiih pasikwii'aatc. Miitahsh kaa'ishi antomaatc otepwehtamoo', i'i kaye kiiwaacihkwe' ekii'-waapanta'aatc ehpimaatisinitc.

⁴² Misiwe tahsh i'imaa Caahpa ootenaank kiikihkentaakwan o'o. Niipiwa' tahsh pemaatisiwaatc okiih tepwehtawaawaan kaaTipencikenitc.

⁴³ Kinweshiihsh tahsh iko i'imaa Piitar kii'ayaa Caahpa ootenaank, ekiiwiiciayaamaatc kaapashkwekinohkenitc Saaiman (Simon) eshinihkaasonitc.