ᐃᔑᒋᑫᐎᓇᓐ 8 - Ojibwe Kihcimasina'ikan

¹ Swaal (Saul) tahsh okii'-minwaapantaan enihsimintc. Miitahsh i'i ahpii ehkiishikahk kaakii'-maacihsek ekiikihci kakwaataki'intwaa otepwehtamook Ceroosalamink (Jerusalem) eyaawaatc. Kahkina kaye otepwehtamook misiwe kii'ishi ayohswetapasiiwak Cootiiya (Judea) ahkiink, Sameriya (Samaria) ahkiink kaye. Ishinisha'waakanak ehta kaawiin kiihtapasiihsiiwak.

Swaal kiikakwaataki'aatc Otepwehtamoo'

² Aaninta tahsh weweni enami'ewaatisiwaatc okii na'inaawaan Istiipinan (Stephen), wiinke tahsh okiihkihci moohkawaanaawaan.

³ Swaal tahsh wiin okii'-wesaani'aa' otepwehtamoo' ekiih paapiintiketc kahkina waahkaa'ikanihkaank, ekii'-otihtinaatc ininiwa', ihkwewa' kaye kipa'otiiwikamikonk ekii'ishi piinciwepinaatc.

Minwaacimowin kiihtipaatotek Sameriya ahkiink

⁴ Ikiweniwak tahsh kaakii'-ohswe tapasiiwaahpan misiwe kiihpapaa ishaawak ekii'-wiintamaakewaatc minwaacimowin.

⁵ Pilap (Philip) itahsh kii'ishaa weti kaashi niikaanentaakwaninik ootenaank Sameriyahkiink ekiih tashimaatc Christan (Christ).

⁶ Kiihpaahtiinowa' ihsa kaakii'-noontaakotc Pilap, ewaapantaminitc kaye maamahkaacihcikewinan kaakiih tootank, miihsh kahkina weweni kaa'ishi pisintaminitc aaniin kaa'ihkitotc.

⁷ Niipiwa' aaniihsh kaakiih kikishkaakonitc maciahcaahkwa' okii'-nakanikoni ekiih shaakowenitc ehkishiiwenitc. Niipiwa' kaye memaancikwaahpinenitc, kaakii'-maahkishkaanitc kaye kii'minoayaawa'.

⁸ Ahpici tahsh kiihpaatinat minwentamowin i'imaa ootenaank.

⁹ Kii'ayaa tahsh peshik inini i'imaa ootenaank Saaiman (Simon) ekii'-ishinihkaasotc, mewisha ekiih pi'onci aapacihtootc mitewiwin. Okii'-maamahkaatentamo'aa' itahsh pemaatisinitc Sameriyahkiink (Samaria) eyaanitc, aaniihsh kii'inwaanintiso ekihci'-inentaakositc.

¹⁰ Kahkina tahsh pemaatisinitc kehci'-inentaakosinitc, tepahsentaakosinitc kaye okiikihci inihtaakoo' o'o ekii'-ihkitonitc: “Mii hsa wa'a inini kaainintc okihci mashkawisiiwin Kishemanitoo.”

¹¹ Aahpici tahsh okiihkihci inihtaakoo' aaniihsh aasha mewisha okiihpi onci maamahkaatentamo'aa' i'i kaakii'ishi mitewihciketc.

¹² Ahpii tahsh kaahtepwehtamowaatc Pilapoon eshi tashintaminitc eshi minwaatotenik Kishemanitoon otipencikewinini, owiinsowinini kaye Ciisahs Christan, mii hsa 'i kaa'ishi siika'antaasowaatc ininiwak, ihkwewak kaye.

¹³ Kewiin tahsh Saaiman kiihtepwehtam, miihsh kaa'ishi siika'antaasotc. Misiwe okii'ishi papaa wiiciiwaan Pilapoon. Kiimaamahkaatentam ekii'-waapantank eshihcikenitc mamaantaawihcikewinan, maamahkaacihcikewinan itahsh kaye.

¹⁴ Ahpii tahsh Ishinisha'waakanak Ceroosalamink eyaawaatc enoontamowaatc Sameriya wenciinitc ehtepwehtaminitc Kishemanitoon otihkitowinini, miihsh kaa'ishi ishinisha'waawaatc Piitaroon, Cwaanan kaye ci'anta waapamaanitc Sameriya wenciinitc.

¹⁵ Ahpii tahsh e'ani takohshininitc okii'-anami'ehtawaani kaakiih tepwehtaminitc cimiinikoowisinitc Kishemanitoon otAhcaahkoni.

¹⁶ Kaawiin mahshi i'i ahpii cikii'-otihsikonitc Kishemanitoon otAhcaahkoni, kii'ishi siika'antaasowa' ehta owiinsowininiink Tepencikenitc Ciisahsoon.

¹⁷ Piitar tahsh, a'a kaye Cwaan okiih saaminaawaa', miihsh kaa'ishi otihsikonitc Kishemanitoon otAhcaahkoni.

¹⁸ Ahpii tahsh Saaiman ewaapamaatc ishinisha'waakana' ehsaaminaanitc otepwehtamoo' i'imaa tahsh e'onci miinikoowisinitc Kishemanitoon otAhcaahkoni, mii 'i kaakii'-miinaatc shooniyaan Piitaroon, Cwaanan kaye,

¹⁹ ekii'-ihkitotc: “Keniin miishihshik i'i kashki'ewisiwin, awiya piko kesaaminak ciotihsikotc Kishemanitoon otAhcaahkoni,” okii'inaa'.

²⁰ Piitar tahsh o'o oki'inaan: “Kishinooyaam kika kikinihshiwanaatis, e'inentaman shooniyaank ci'onci ataawewatc Kishemanitoo omiikiwewin!

²¹ Kaawiin kanake kitakwakimikoohsii, pooshke kaawiin kiwiitoohkaasohsii o'o anohkiiwin, aaniihsh kaawiin kwayahkonaakwahsinoon kite' enaahsamiitc Kishemanitoo.

²² Inashke kwehkaatisin cinakataman i'i kikihcimaci ishiwepisiwin. Anami'ehtaw kaaTipenciketc maakishaa ta'inentam ciwiih poonentamawihk enentamowatc kite'ink.

²³ Niwaapantaan ohsha emooshkineshkaakoyan nishkentamowin eminciminikoyan kaye maci ishiwepisiwin,” okii'inaan.

²⁴ O'o tahsh Saaimanan kii'ishi nahkwehtam: “Taka anami'ehtawihk kaaTipenciketc niin onci kekoon ci'ishihsehsiwaan i'i kaaihkitoyan,” okii'ikoon.

²⁵ Ahpii tahsh kaa'ishkwaa tipaacimaawaatc kaaTipencikenitc, kaa'ishkwaa wiintamaakewaatc kaye otihkitowinini, kii'ani kiiwewak Ceroosalamink. Kii'ani wiintamaakewak itahsh minwaacimowin niipiwa' eshi ayayaanikin ootenawan Sameriya ahkiink.

Pilap kiikanoonaatc Iihtiyoohpiya ahkiink wenciinitc wekimaawentaakosinitc

²⁶ Pilap (Philip) ihsa okiih kanoonikoon kaaTipenciketc otencalimini: “Taka shaawanonk inahke ishimaacaan, cimekwaashkaman weti i'i miihkana kaainamok Ceroosalamink (Jerusalem) piinihsh weti Kesa (Gaza).” I'i iitok miihkana pikwacaya'ii ishipimamon.

²⁷ Miitahsh kaa'ishi oshiihtaatc ekii'ani maacaatc. Miihsh kaakii'-mekwaashkawaatc wekimaawentaakosinitc ininiwan Iihtiyoohpiya (Ethiopia) ahkiink wenciinitc. Aahpici ekiihtakimikonitc kihciokimaahkwen Kaantahs (Candace) kaaishinihkaasonitc kaakiih tipenimaanitc Iihtiyoohpiya ahkiink wenciinitc. Miiwan ini kaye kaakiih kanawentamawaanitc owenootisiwinini. Ceroosalamink (Jerusalem) ekiih piishaanitc ekiipianami'ehtawaanitc Kishemanitoon.

²⁸ Kiihpimi kiiwewan tahsh enamatapinitc otootaapaanaahkoniink, e'anamihtoonitc kaakii'-ishipii'ikenitc Aaiseyawan (Isaiah) kaakiih kanootamawaanitc Kishemanitoon.

²⁹ Kishemanitoon otAhcaahkoni tahsh Pilap o'o okii'ikoon: “Pehsho naasihkaw a'a kaapimitaapaasotc, aniwiiciw itahsh kaye,” okii'ikoon.

³⁰ Miihsh Pilap pehsho kii'ahpahtoo piinihsh ekii'-noontawaatc e'anamihtoonitc kaakii'-ishipii'ikenitc Aaiseyawan okanootamaaken. Miihsh o'o kaaishi kakwecimaatc: “Kinihsitohtaan ina ehkitoomakahk kaa'anamihtooyan?” okii'inaan.

³¹ Miitahsh kaa'ikotc: “Aaniin tahsh keshi nihsitohtamaampaan, kaawiin iitok awiya ninkihkino'amaakohsii?” okii'ikoon. Miihsh kaakii'-ishikanoonikotc cipoositc ciwiitapimaatc.

³² I'imaa tahsh kaakii'ishi anamihtoonitc Kihcimasina'ikan o'o kii'ishipii'ikaateni: “Taapishkoo hsa maanahcaanihsh kaaishiwinintc waahtashi nihsintc, taapishkoo maanahcaanihshenhs kaanootaatihsik epashkoshontc, kaawiin awaac kekoon kii'onci ihkitohsii.

³³ Kii'akacitootawaakaniwi tahsh, kaawiin kii'ayaahsinini inaahkonikewin kekii'onci naatamawintipan, kaawiin awiyan tatipaacimohsiiwan citashimaanitc opiiwesiima', aaniihsh aasha kii'ishkwaahseni opimaatisiwin o'omaa ahkiink.” Mii 'i kaa'ishipii'ikaatenik kaakii'-anamihtoonitc.

³⁴ Ini tahsh wekimaawentaakosinitc okii'ikoon: “Kinantawenimin ciwiintamawiyan awenenan o'o kaainaatc wa'a okanootamaake. Wiin ina 'i kaaitisotc, komaa kaye pahkaan awiyan kaatashimaatc?” okii'ikoon.

³⁵ Miitahsh Pilap (Philip) kaa'ishi maacii kakitotc, ekiimaacii tashintank eshi anamihtoonitc i'i kihcioshipii'ikan, ekii'-wiintamawaatc eshi minwaacimimintc Ciisahsoon.

³⁶ E'anipimi ayaawaatc tahsh miihkanaank okii'-otihtaanaawaa enipiihkaanik. Ini tahsh wekimaawentaakosinitc okii'koon: “Inashke kiniin inaa o'o nipi! Kekoon ina tahsh ayaa ke'onci siika'antaasohsiwaampaan?”

³⁷ Pilap tahsh okii'inaan: “Kiishpin misiwe kite'ink ishitepwehtaman, pisaan kika siika'antaas,” okii'inaan. O'o tahsh okii'ikoon: “Nintepwehtaan Ciisahs Christ eokosihsimikotc Kishemanitoon,” kii'ihkitowan.

³⁸ Miitahsh kaa'ishi anoonaanitc wetaapa'iwenitc cikipihtinaanitc tihtipitaapaanan. Minciniish tahsh kiipahkopiiwak Pilap, a'a kaye wekimaawentaakositc. Miihsh kaa'ishi siika'antawaatc.

³⁹ Ahpii kaahpi akwaasiiwaatc, Kishemanitoon otAhcaahkoni Pilap ketahto okii'-maaciinikoon. Kaawiin tahsh awahshime okii'-waapamikohsiin wekimaawentaakosinitc, miihsh kaa'ani ishimaacaanitc ekihci minwentaminitc.

⁴⁰ Pilap tahsh ketahto okiikihkentaan Asootahs (Azotus) ootenaank e'onci ayaatc. Miitahsh i'imaa kaaonci maacaatc ekiiani waawiintamaaketc minwaacimowin kahkina taawinihkaank piinihsh Sehsariiya (Caesarea) ootenaank ekii'ani takohshink.