ᐃᔑᒋᑫᐎᓇᓐ 7 - Ojibwe Kihcimasina'ikan

Istiipin kaakii'ishikakitotc

¹ Kihcianami'ewikimaan tahsh okiih kakwecimikoon: “Tepwewak ina 'i kaa'inihkwaa?” okii'ikoon.

² Miihsh Istiipin (Stephen) kaa'ihkitotc: “Nintinawemaakanak, kehciaya'aawiyek kaye! Kishemanitoo kehci'-inentaakositc okii'-naakosiihtawaan kikehteya'aaminaapaniin Eparahaaman (Abraham) mekwaa Mesopohtemiyahkiink (Mesopotamia) kiiayaanitc, cipwaa ishitaanitc ootenaank Heranink (Haran).

³ Miihsh o'o kaa'inaakopanen: ‘Nakatan i'i kitahkiim, nakash kaye kitinawemaakanak ci'ishaayan weti ahkiink kaawii'waapanta'inaan.’

⁴ Miitahsh i'i tepwe kaakii'-nakatank Kaaltiya (Chaldea) ahkiini ekii'awi ishi kapehshitc weti Heranink (Haran). Ahpii tahsh Eparahaam oteten kaaniponitc, Kishemanitoon okiih piicikosii'ikoon o'omaa ahkiink, kiinawaa noonkom kaataanotamek.

⁵ Kaawiin tahsh kekoon okii'-miinikohsiin citipinawewisitc, kaawiin iko kanake eni kohkositetc citahkohkaatank okii'ishi miinikohsiin. Okii'-ahshotamaakoon itahsh ewiimiinikotc citipinawewisitc, i'i kaye keni opiiwesiimitc, aanawiin mahshi ekii'-ayaawaahsik apinoonciishan.

⁶ Miitahsh o'o kaa'ikotc Kishemanitoon: ‘Kipiiwesiimak hsa tapiiwitewiwak mayakiahkiink, miitahsh weti ketashi kakwaatakanohkii'intwaa, pehkihsh cikakwaataki'intwaa niiwaahk (400) tahsopipoon minihk.

⁷ Ninka nana'ahsimaa' tahsh pemaatisinitc kekakwaatakanohkii'ikowaatc, miitahsh cinakatamowaatc i'i ahki, cipiishaawaatc o'omaa cipi anami'ehtawiwaatc.’

⁸ Miitahsh i'i kaakii miinikotc kihkinawaatashakeshokoowin ekihkinawaacihtoonitc aaniin kaa'ishi ahshotamaakotc. Eparahaam tahsh kii'ani okosihsi Aaisikoon (Isaac), nihshwaahsokiishik (8) tahsh e'ishihsenik okiikihkinawaatashakeshwaan. Aaisik tahsh kii'ani okosihsi Cekapoon (Jacob), miihsh peshikwan kaahtootawaatc. Cekap tahsh kewiin mii peshikwan kaahtootawaatc mitaahshiniishin (12) okosihsa'. Miiwak iitok iki kikehteya'aaminaapaniik.

⁹ “Miiwak itahsh iki kikehteya'aaminaapaniik kaakii'-ayaashenimaawaatc peshik wiicihkiweyiwaan Coosap (Joseph) kaakii'-ishinihkaasonitc. Kii'ishiataawaakewak tahsh weti ci'ishitipenimimintc Iicipahkiink (Egypt). Shaakooc itahsh Coosap okii'-wiiciiwikoon Kishemanitoon.

¹⁰ Miitahsh i'i kaakii naatamaakotc aaniin kahkina kaakii'ishi wahsitaawihsetc. Okiihkakiihtaawentamo'ikoon itahsh kaye, ekiih tootawaanitc kaye ciminwaapamikotc ini Peroon (Pharaoh) kaakiih kihciokimaawinitc i'imaa Iicipahkiink. Miitahsh kaakii'-ishi'ikotc citipentank kahkina Iicipahkiini, kahkina kaye owaahkaa'ikanini.

¹¹ Mii hsa 'i kaakii noontehsek miicim misiwe Iicipahkiink, misiwe kaye Kenan ahkiink, wiinke tahsh kiikihci kakwaatakashkatenaaniwan. Kikehteya'aaminaapaniik tahsh kaawiin inkoci okii'-mihkansiinaawaa miicim.

¹² Ahpii tahsh Cekap kaanoontank e'ayaanitc pahkweshikanan Iicipahkiink, mii 'i kaakii'-ishinisha'waatc okosihsa' kikehteya'aaminaapani' ci'ishaanitc. Mii 'i nihtam i'i ekii'-ishaanitc.

¹³ Miinawaa tahsh e'ishaanitc Coosap okiih kihkentamo'aa' wiicihkiweya' wiin e'owiicihkiwemikotc. Miitahsh i'i Coosap kaakiih kihkenimikotc Peroon kihciokimaan aanti wentahkaanesitc.

¹⁴ Coosap tahsh okii'-antomaan oteten Cekapoon, i'i kaye kahkina otinawemaakana', niishwaahsimitanahshinaanaan (75) ekiih tahshinitc.

¹⁵ Miitahsh Cekap kaakii'-ishaatc Iicipahkiink. Miihsh weti kaahtashi ishkwaa pimaatisitc, iki kaye kikehteya'aaminaapaniik.

¹⁶ Owiiyawiwaan tahsh kii'ishiwicikaateniwan weti Shehkam (Shechem) ahkiink eshi ayaanikin na'initiiwikamikoon ekii'awi na'inikaatenikin. Mii iitok o'o ahkiini Eparahaam kaakii'-ataamaakopanen okosihsimaa' wetetenitc Hemoran (Hamor) shooniyaan ekii'-ataawaakekopanen.

¹⁷ “Ahpii tahsh aasha e'ani pehshonaakwaninik Kishemanitoo citootank kaakii'ishi ahshotamawaatc Eparahaaman (Abraham), wiinke hsa Isriyalak (Israel) kii'ani paahtiinowak i'imaa Iicipahkiink (Egypt).

¹⁸ Mii hsa 'iwe ahpii kii'ani ayaa kotak kihciokimaa Iicipahkiink kaakiih kihkenimaahsik Coosapoon (Joseph).

¹⁹ Miitahsh a'awe kaakiih kayeshitootawaatc kiwiici onciimaakaninaanii'. Kaawiin tahsh kaye sesik okiih tootawaahsii' kikehteya'aaminaapanii', ekii'-ishihcike'aatc cipahkopii wepinaanitc otooshkapinoonciishimini cinihsaapaawenitc.

²⁰ Mii hsa 'i ahpii Moosihs (Moses) kaakii'-nihtaawikitc, wiinke tahsh kii'minonaakosi enaahsamiinitc Kishemanitoon. Nihsokiisihs (3) itahsh okiih kanawenimikoo' oniiki'ikoo' otaawininink.

²¹ Ahpii tahsh kaa'nakanintc akwaciink, okii'-otaahpinikoon otaanihsini Peroon (Pharaoh) kihciokimaan. Miiwan tahsh ini kaa'ompiki'ikotc ehkanawenimikotc ekii'-okosihsimikotc.

²² Moosihs tahsh misiwe kii'ishi kihkino'amawaa eshi kakiihtaawentaminitc Iicipahkiink wenciinitc. Kii'ani tinowi hsa inini kaamashkawikiishwetc, kaamashkawihciketc kaye.

²³ “Ahpii tahsh niimitana (40) ehtahso pipoonwetc kii'inentam ci'anta waapamaatc owiici onciimaakana' Isriyala'.

²⁴ Okii'-waapamaan tahsh peshik Iicipahkiink wenciinitc kwayahk ehtootaakohsinik. Miitahsh kaa'ishi naatamawaatc ekiih tipa'ikehtamawaatc, miihsh kaa'ishi nihsaatc ini Iicipihshiwininiwan.

²⁵ Moosihs maawiin kii'inentam cikihkentaminitc owiici onciimaakana' Kishemanitoon ewii'-aapaci'ikotc cinaatamawimintc, kaawiin tahsh okii'onci kihkentansiini.

²⁶ E'ani waapaninik tahsh okii'-otihsaa' niishin (2) emiikaatinitc. Miihsh kaa'ishi kipihtinaatc emiikaatinitc o'o ekii'inaatc: ‘Aaniin inaa onsosaamahkamik, kitoowiicihkiwentim iitok! Wekonen tahsh wenci miikaatiyek?’ okii'inaa'.

²⁷ Iniweniwan tahsh mayaa kaakii'-miikaanaanitc wiici pimaatisiini, inkoci okii'ishi kaanci wepinikoon ekii'ikotc: ‘Awenen kaa'ishi'ihk citipenimiyaank, cinaanaakaci'iyaank kaye?

²⁸ Kiwii'nihshish ina taapishkoo kaakii'ishi nihsatc Iicipahkiink wenciitc piciinaako?’ okii'ikoon.

²⁹ Miitahsh Moosihs kaakiih tapasiitc o'o e'noontank e'inintc. Mitiyan (Midian) ahkiink tahsh kii'ahpa'iwe, miiweti kaa'ishi kapehshitc. Niishin (2) okosihsa' weti kiihtashi nihtaawikiwa'.

³⁰ Ahpii tahsh niimitana (40) tahso pipoon kaa'ishihsenik, encalan okii'-naakosiihtaakoon mekwe pihkohkopaank ehpihskanenik i'imaa pikwatahkamik ciikaya'ii Saainai (Sinai) kihciwaciink.

³¹ Ahpii tahsh Moosihs ewaapantank okii maamahkaatetaan i'i kaakii'-ishinank. Pehsho tahsh kii'ani ishaa ewii waapantank. Okii'onci noontawaan tahsh kaaTipencikenitc ehkanoonikotc:

³² ‘Niin oKishemanitoomiwaan kaakii'-okehteya'aamiyan, Eparahaam, Aaisik kaye, a'a tahsh kaye Cekap.’ Moosihs tahsh kii'naninkaanimisi, kaawiin tahsh awahshime kiiwii'-inaapihsii.

³³ Miitahsh o'o kaa'ikotc kaaTipencikenitc: ‘Kiihtahkisinen! I'imaa ohsha kaashi niipawiyan, wiinke kihtentaakwan.

³⁴ Tepwe hsa niwaapantamowaan eshi kakwaataki'intwaa nimpimaatisiimak Iicipahkiink kaa'ayaawaatc, ninoontawaak kaye kaashi moohkonewaatc. Miitahsh kaapionci naashiyaan ewiih pimaaci'akwaa. Haw hsa ampe, kiin tahsh kiwii'-ishinisha'on ci'ishaayan Iicipahkiink.’

³⁵ Mii hsa wa'a Moosihs kaakii'-aanawenimikotc Isriyala' o'o ekii'ikokopanen: ‘Awenen kiin kaa'ishi'ihk citipenimiyaank, cinaanaakaci'iyaank kaye?’ Mii 'awe Kishemanitoon kaakii'-ishinisha'okotc citipenimiwetc, cinaatamaaketc kaye ekii wiici'ikotc encalan kaakii naakosiihtaakotc weti pihkohkopaank.

³⁶ Mii hsa 'awe inini kaakiih saakiciwinaatc Isriyala' Iicipahkiink. Kiimamaantaawihcike, kiimaamahkaacihcike kaye weti Iicipahkiink, KihciMiskokamiink tahsh kaye, weti tahsh kaye pikwatahkamik niimitana (40) tahso pipoon.

³⁷ Miitahsh o'o Moosihs kaa'inaatc Isriyala': ‘Kitinawemaakaniwaank kikaonci miinikowaa peshik Kishemanitoo kekanootamaakotc, taapishkoo niin tino,’ kii'inaakopan.

³⁸ Mii hsa 'awe kaakii'-wiiciiwaatc kiimaawaci'itinitc Isriyala' pikwatahkamik; ekii'-wiiciiwaatc kikehteya'aaminaapanii', ini kaye encalan kaakiih kanoonikotc weti waciink Saainai (Sinai). Miitahsh i'i kaakii miinikoowisitc tipaacimowin mooshak ke'⁠ayaanik, miihsh o'o kaakiihpi ayaanihke miinikooyank.

³⁹ Kaawiin tahsh kikehteya'aaminaapaniik kii'inentansiiwak cina'ihtawaawaatc, miitahsh kaakiih pahke wepishkawaawaatc Moosihsoon. Tekwac itahsh ekii'-mihsawentamowaatc Iicipahkiink cishi kiiwewaahpan.

⁴⁰ Miitahsh o'o kaakii'-inaawaatc Eranoon (Aaron): ‘Oshihtamawihshinaam manitoohkaanak keniikaaniihtamawiyamintwaa. A'awe wiin Moosihs kaakiih saakiciwishiyamintc Iicipahkiink kaawiin ninkihkenimaahsiwaanaan aaniinti eyaakwen,’ okii'inaawaan.

⁴¹ Miihsh i'i ahpii kaakii'-oshi'aawaatc pishihkihkaanan, ekiih piitoowaatc kepakitinaahsohtamawaawaatc manitoohkaanan, wiinke kaye ekiihkihci ciihkahkamikisiwaatc ekiihkihci'-inentamowaatc oninciiwaank kaakii'onci oshihtoowaatc.

⁴² Kishemanitoo tahsh kiihkwehkihtaa, pisaan ekiihpakitinaatc ci'anami'ehtawaanitc kaapaahtiinonitc wanankohsha' kiishikonk eyaanitc. Miitahsh mayaa eshipii'ikaatenik omasina'ikaniwaa Kishemanitoon kaakanootamawaawaatc: ‘Kiinawaa hsa Isriyalak! Kaawiin ina kikii'-nihtaa piitamawihshim kaakii'nihsekwaa aya'aawihshak epakitinaahsohtamawiyek niimitana (40) tahso pipoon weti pikwatahkamik?

⁴³ Tekwac iitok kikii'-maaciitaawaam Moolehk opakwaanekamik, kimanitoohkaaniwaa wanankohshink enwaanek Orehpan kaainek. Kikii'-oshi'aawaak manitoohkaanak keanami'ehtawekwaa, miihsh kaawii'onci tootawinakook waahsa awahsinahke Paapilan ci'ishiwinikooyek.’

⁴⁴ Kikehteya'aaminaapaniik tahsh kiipimi ayaawaatc pikwatahkamik okiih pimiwitoonaawaa kihci pakwaanekamikoni ekii naakohtoowaatc ewiiciiwikowaatc Kishemanitoon. Mayaa kii'ishihcikaateni Kishemanitoo kaakii'ishi wiintamawaatc Moosihsoon ci'ishihtoonitc, mayaa ekii'-ishinaakwaninik i'i kaakii'ishi waapanta'aatc.

⁴⁵ Mii 'iweni peshikwan kihci pakwaanekamikoni kitehteya'aaminaapaniik kaakii'-aanihke miinikowaatc kaakii'-okehteya'aamiwaatc. Miitahsh i'i kaakiih piintikatoowaatc mekwaa ewiiciiwaawaatc Caahshowaan (Joshua), ahpii kiimahkamaawaatc otaahkiimini i'imaa kaakii'-ayaanitc kaapepahkaanwewaanakisinitc pemaatisinitc. Kishemanitoon hsa okiisaakitaama'waani ahpii kiinipiintikeshkaawaatc Isriyalak. Miitahsh i'imaa kaa'ayaanik i'i pakwaanekamik piinihsh kiini ayaanitc Tepitoon (David).

⁴⁶ Miitahsh a'a Tepit kaakii'-minwaapamikotc Kishemanitoon, okiih kakwecimaan kaye cipakitinikotc cioshihtamawaatc kihcianami'ewikamik ketanentaakosinitc oKishemanitoomini Cekapoon.

⁴⁷ Swaalaman (Solomon) tahsh mayaa kaakii'-oshihtamawaatc kihcianami'ewikamik.

⁴⁸ Shaakooc itahsh Maawac Eshpentaakositc Kishemanitoo kaawiin ayaahsii waahkaa'ikanink ininiwan weshihtoonitc. Mii 'owe Kishemanitoo kenootamaakotc kaa'ihkitonitc:

⁴⁹ ‘Kihcikiishik ohsha nintookimaawapiwin ahki tahsh nintahpisitepiwin. Wekonen tahsh inaa tino waahkaa'ikan ke'oshihtamawiyekipan? Aanti tahsh keshi anwepiyaan?

⁵⁰ Kaawiin ina niin nininciink ninkii'onci osihtoohsiinan ono kahkina kekoonan?’ ihkito Kishemanitoo.”

⁵¹ “Etatawe kiinawaa kinihtaa shashiipihtaam, e'ishi ayaahsiwek kite'iwaank ciwiih tepwehtamek, enoontansiwek kaye tepwewin. Pishihshik kinakaashkawimaawaan Kishemanitoo otAhcaahkwan, e'ishihcikeyek mayaa kaakii'-ishihcikewaatc kikehteya'aamiwaapaniik.

⁵² Konike tahsh kii'ayaatokwenan Kishemanitoo kenootamaakotc kaakiih kakwaataki'aahsikwaa kikehteya'aamiwaapaniik? Okii'-nihsaawaa' iitok i'i niiyaak kaakii wiintamaakenitc citakohshininitc Kishemanitoon kepiicinisha'waanitc oKwayahkwaatisiimini. Miiwan ini oKwayahkwaatisiiman kiinawaa kaakii'-mamishi'imek, miihsh kaa'ishi nihsimek.

⁵³ Kiinawaa iitok kaakii miinikooyek Moosihs otoonahshowewin encalak kaakii anihke miikiwewaatc, kaawiin itahsh awaac kikii na'ihtansiim,” okii'inaa'.

Istiipin kiipapiimwahsina'intc

⁵⁴ Ahpii tahsh onahshowewininiwak enoontamowaatc o'o, wiinke kiinishkimaawak, ekii'-matwentamowaatc wiipitiwaan kaa'ahpiihci nishkimikowaatc.

⁵⁵ Istiipin (Stephen) tahsh emooshkineshkaakotc Kishemanitoon otAhcaahkoni, ishpimink kihcikiishikonk kii'ishi kihciwaapi. Miitahsh kaakii'-waapantank Kishemanitoon okihci'-inentaakosiwinini, Ciisahsoon kaye eniipawinitc okihcinihkiniink inahke Kishemanitoon.

⁵⁶ Miihsh o'o kaa'ihkitotc: “Inashke niwaapantaan kihcikiishik epaahkishkaak, niwaapamimaan Inini oKosihsan eniipawinitc okihcinihkink inahke Kishemanitoo,” kii'ihkito.

⁵⁷ Kahkina tahsh onahshowewininiwak kiishaakowewak, ekiih kipihtenintisowaatc, miitahsh kaa'ishi moohkiihtawaawaatc.

⁵⁸ Miitahsh kaa'ishi saakiciwepinaawaatc i'imaa ootenaank, ekiimaacii papiimwahsina'aawaatc. Iki tahsh kaakiih kakiinawishkaacimowaatc okiih kiicikoshkaanaawaan okashkiikiiwiniwaan ekii'ishi pakitinamowaatc eshi sitekaapawinitc oshkiniikiwan Swaal (Saul) eshinihkaasonitc.

⁵⁹ Istiipin tahsh mekwaa epapiimwahsina'intc okii'-anami'ehtawaan kaaTipencikenitc ekii'-ihkitotc: “Tepencikeyan Ciisahs, otaahpin nintahcaahk!”

⁶⁰ Kii'ociciinkwanapi tahsh ekiih kishiiwetc ekii'-ihkitotc: “Tepencikeyan, keko akintamawaahken o'o maci'-ishihcikewin kaaishihcikewaatc,” kii'ihkito. O'o tahsh kaa'ishkwaa ihkitotc, mii 'i kaa'ishi'-ishkwaa pimaatisitc.