ᐃᔑᒋᑫᐎᓇᓐ 6 - Ojibwe Kihcimasina'ikan

Niishwaahso kii'onaapamintwaa kewiici'iwewaatc

¹ Mekwaa hsa ahpii kiini paahtiinowaatc kihkino'amawaakanak kaakiih tepwehtawaawaatc Ciisahsoon. Kariik (Greek) tahsh kaakii'-ishikiishwewaatc Coowak okii'-aanwaapamaawaa' Hiiparoo (Hebrew) eshikiishwenitc Coowa'. Mii 'i kaa'ihkitowaatc ehpapaa pisiskencikaniwihsinik okiiwaacihkwemiwaa' ahpii kiiahshantinaaniwaninik i'i miicim kaakii nihtaa pakitinikaatenik entahsokiishik.

² Iki tahsh kaamitaahshiniishiwaatc (12) ishinisha'waakanak okii'-antomaawaa' emaamawi ayaanitc otepwehtamoo' o'o ekii'inaawaatc: “Kaawiin hsa tamino naakwahsinoon niinawint cikipihciiyaankipan ewiintamaakeyaank Kishemanitoo otihkitoowin, cikiih tipentamaankipan eshi naanaakaci'intwaa kaanoontehsewaatc.

³ Haw hsa niici otepwehtamook, kiinawaa hsa onaapamihkwak niishwaahso (7) kaaminwaatisiiwakimintwaa, kekiihtaawentamowaatc, kaamooshkineshkaakowaatc kaye Kishemanitoon otAhcaahkoni. Miiwak itahsh iki kenaanaakacihtoowaatc i'i anohkiiwin.

⁴ Niinawint tahsh wiin mooshak iko ninka'-anami'aamin, ci'inanohkiiyaank kaye ciwiintamaakeyaank Kishemanitoo otihkitowin.”

⁵ Kaamaamawinowaatc otepwehtamook tahsh okii'-minohtaanaawaa kaakii'-inintwaa. Miitahsh o'o kaakii'-ishinihkaasonitc ininiwa' kaakii'-onaapamaawaatc, Istiipin (Stephen) eshinihkaasonitc kaakii'-mooshkine tepweyentaminitc, kaakii'-mooshkineshkaakonitc kaye Kishemanitoon otAhcaahkoni. Pilap (Philip), Paraahkorahs (Prochorus), Nihkenar (Nicanor), Taaiman (Timon), Paarminahs (Parmenas), Nihkalahs (Nicolaus) kaye KaakiihCoowiwihsik kii'otaahpinamokopanen Coowianami'aawin Entiyaahk (Antioch) ootenaank ekii'-onciitc.

⁶ I'i tahsh kaakii'-onaapamaawaatc ininiwak, okiih piinaawaa' eshi ayaanitc ishinisha'waakana'. Miitahsh kaa'ishi anami'ehtamawaanitc ehsaaminaanitc.

⁷ Keyaapi tahsh Kishemanitoo otihkitowin kii'ani misihteshkaamakanini. Aanciihke kii'ani paahtiinowak otepwehtamook Ceroosalamink (Jerusalem). Kii'ani paahtiinowak itahsh kaye anami'ewikimaak kaakii'ani tepwehtamowaatc.

Istiipin kiiotihtinintc

⁸ Istiipin (Stephen) iitok wiinke okiimooshkineshkaakoon Kishemanitoon okishewaatisiwinini, okashki'ewisiwinini kaye. Miitahsh kaakii'-ishihciketc niipiwa' maamahkaacihcikewinan, maamahkaaciwaapanta'iwewinan kaye mekweya'ii eshi ayaanitc pemaatisinitc.

⁹ Aaninta tahsh Coowa' kaawiin okii'-minwaapamikohsii' i'imaa peshik anami'ewikamikonk kaakii'-onciinitc, Kaatatipenintisoomakahk Anami'ewikamik ecikaatek. Miiwa' ihsa 'i Coowa' kaakii'-onciinitc Saairiini (Cyrene), Aalikihsaantariya (Alexandria), i'i tahsh kaye Coowa' kaakii'-onciinitc Silihshiya (Cilicia) ahkiink weti kaye Eshiya (Asia) ahkiink. Miiwaa' itahsh i'i kaakiih kakwe shaakoosomikotc.

¹⁰ Kaawiin itahsh okiikashkihtoohsiini cishaakoosomikotc kaa'ahpiihci kakiihtaawentank, i'i kaye kaakii'ishi miinikotc Kishemanitoon otAhcaahkoni ci'shi kaakiikitotc.

¹¹ Miitahsh kaa'ishi kiimooci tipa'amawaanitc aaninta ininiwa' o'o ci'ihkitonitc: “Ninkii'noontawaanaan Istiipin (Stephen) ehpaahpinotawaatc Moosihsoon (Moses), Kishemanitoon kaye.”

¹² Miitahsh i'i kaakii'onci ompwe'aanitc pemaatisinitc, i'i kaye kaaniikaanisinitc Coowa', i'i kaye kaakihkino'amaakenitc onahshowewin. Miiwa' itahsh i'i Istiipin kaakiih pi'anta waapamikotc ekii'-otihtinikotc ekii'-ishiwinikotc eshi ayaanitc onahshowewininiwa'.

¹³ Miihsh kaakiih piinimintc iniweniwa' noociko ke'inaacimikotc o'o ekii'ikotc: “Kaawiin hsa wa'a inini onci kipihciihsii ehpaahpinotank o'o kihcianami'ewikamikoni Kishemanitoon tepentaminitc, i'i kaye Moosihsoon enahshowenitc.

¹⁴ Ninkii'-noontawaanaan kaye e'ihkitotc a'awe Ciisahs Naasaritink (Nazareth) kaaonciitc oka nihshiwanaacihtoon o'oweni kihcianami'ewikamik, oka yaancihtoonan kaye ishihcikewinan Moosihsoon kaakii'-miininimank,” kii'ihkitowa'.

¹⁵ Kahkina tahsh i'imaa kaakii'-apiwaatc kaatashi onahshowenk okiihkihci kanawaapamaawaan Istiipinan (Stephen), miitahsh kaakii'-waapamaawaatc e'ishiinkwenitc taapishkoo e'ishinaakosinitc encalan.