ᐃᔑᒋᑫᐎᓇᓐ 5 - Ojibwe Kihcimasina'ikan

Aananaayahs a'a kaye Sapaira ehtashimintwaa

¹ Peshik tahsh inini Aananaayahs (Ananias) eshinihkaasotc, wiiwan tahsh ewiiciiwikotc Sapaira (Sapphira) eishinihkaasonitc, okii'-ataawaakenaawaa aaninta otahkiimiwaa tepentamowaatc.

² Wiiwan tahsh ekii'wiici'-inentamoomikotc kiihkanawentamaaso aaninta shooniyaan kaakii'-ontisitc. Minihk itahsh kaa'ishkohsenitc okii'-ishiwinaan ekiih pakitinaatc eshi ayaanitc ishinisha'waakana'.

³ Piitar (Peter) tahsh okii'inaan Aananaayahsoon: “Wekonen tahsh wenci pakitinamawatc Setan (Satan) citipentank kite'ini ekiiwanimohtawimatc Kishemanitoo otAhcaahkwan, ekiih kihciwinamaasoyan aaninta shooniyaa kaakii'-inakintek kitahkiim.

⁴ Kiin iitok kikiih tipinawewihs i'i ahki cipwaa ataawaakeyan. Kii'ishkwaa ataawaakweyan tahsh, kiin kikihtipenimaa a'a shooniyaa. Wekonen tahsh kaa'onci inentaman sesik ewii'-ishihcikehsiwan? Kaawiin wiin inini kaakiiwanimohtawatc, Kishemanitoo ohsha,” okii'inaan.

⁵ Ahpii tahsh Aananaayahs enoontank aaniin ecikaniwitc, mii 'i kaa'ishi kawihsetc ekii'-nipotc. Kahkina tahsh kaakii'-noontamowaatc o'o wiinke kiihsekisiwak.

⁶ Oshkiniikiwak tahsh kiihpipiintikewak ekiih titipeyiikinamowaatc i'i wiiyaw. Miitahsh kaa'ishi saakisihtoowaatc ekii'awi na'inamowaatc.

⁷ Paanimaa tahsh ninkoci ko nihsotipa'ikan (3) e'ishihsenik, kiihpipiintikewan Aananaayahs wiiwan ekiih kihkentasinik aaniin kaakii'-inahkamikaninik.

⁸ Piitar tahsh okii'inaan ini ihkwewan: “Wiintamawihshin, mii na 'owe minihk kaa'ontisiyek kiiataawaakeyek kitahkiimiwaa?” O'o tahsh okii'ikoon: “Eha', mii 'iwe minihk kaa'ontisiyaank,” okii'ikoon.

⁹ Piitar tahsh okii'inaan: “Wekonen tahsh minciniish kaa'onci inentamek ewiih kotenimimek kaaTipenciketc otAhcaahkwan? Inashke iki ininiwak kaakii'awi na'inaawaatc kinaapeman aasha o'omaa ishkwaantenk pimi'ayaawak, kekiin tahsh kika saakisi'ikook,” okii'inaan.

¹⁰ Shemaak itahsh kiihkawihsewan eshi sitekaapawitc ekii'-niponitc. Oshkiniikiwak ehpipiintikewaatc okii'-waapamaawaan eniponitc. Miitahsh kaa'ishi saakisi'aawaatc ekii'awi na'inaawaatc ishiohpime onaapemipanini kaakii'-ishi na'inimintc.

¹¹ Sekisiwin tahsh okii'-otihsikonaawaa kahkina otepwehtamook kaashi maawaci'itiwaatc, iki kaye kahkina kaakii'-noontamowaatc o'o.

Kihkinawaasaapanta'iwewinan, maamahkaacihcikewinan Ishinisha'waakanak kaakii'ishihcikewaatc

¹² Ishinisha'waakanak tahsh okiih tootaanaawaan niipiwa' maamahkaacihcikewinan, kihkinawaasaapanta'iwewinan eshi ayaanitc pemaatisinitc. Kahkina tahsh otepwehtamook kii'ishi maawaci'itiwak i'imaa Swaalaman (Solomon) otapinawihcikan eicikaatenik.

¹³ Iniweniwa' itahsh wiin pehkaanisinitc kaawiin kiihtepakenimohsiiwa' ciwiiciiwikowaatc. Shaakooc hsa ko pemaatisinitc okiikihtakimikowaa'.

¹⁴ Awahshime hsa kii'ani paahtiinowak otepwehtamook kaakiih tepwehtawaawaatc kaaTipencikenitc, ininiwak, ihkwewak kaye.

¹⁵ Miitahsh kaa'ishihcikewaatc ekii'-ishiwinaawaatc kaa'aahkosinitc miihkanaahkaank. Ekii'ishi pimihshimaawaatc nipewinink, ahpishimonink kaye, kanake hsa ko cisaamishkaakonitc otakawaahteshinowinini Piitaroon i'imaa pimohsenitc.

¹⁶ Kiihpaahtiinowa' hsa pemaatisinitc kaakiih piishaanitc, waahkaaya'ii ootenawan eyaanikin Ceroosalamink (Jerusalem) ekii'-ayonciinitc. Okiihpiinaani kaakii'-aahkosinitc, kaakiih kakwaataki'ikonitc kaye maciahcaahkwa', kahkina tahsh kii'minoayaawaa'.

Ishinisha'waakanak kiikakwaataki'intwaa

¹⁷ Miitahsh a'a kihcianami'ewikimaa, i'i kaye kahkina kaakii'-wiiciiwikotc Saacahsiikaank (Sadducees) kaakii'ishi wiicihtwaanitc, wiinke hsa okii'-ayaashenimaawaa' ishinisha'waakana'. Kekoon itahsh okii'-wiihtootawaawaa'.

¹⁸ Okii'-otihtinaawaa' itahsh ishinisha'waakana' ekiih tahkonaawaatc, ekii'ishi piinciwepinaawaatc nehtaatashiayaanitc kaakipa'omintc kotak awiya'.

¹⁹ Ehtipihkanink tahsh kaaTipenciketc otencaliman kiihpiishaawan ekiih paahkintenaminitc kipa'otiiwi ishkwaantem. Miitahsh kaa'ishi saakiciwinaatc ishinisha'waakana' ekii'inaatc:

²⁰ “Maacaak, awiniipawik kihcianami'ewikamikonk ciwiintamawekwaa pemaatisiwaatc, cimooshkineyaatotek o'o oshki pimaatisiwin,” okii'inaa'.

²¹ Kii'ishihcikewak kaakii'-inintwaa. Kiihtipihkinaawaanini piko ehpiintikewaatc kihcianami'ewikamik, miihsh kaa'ishi maacii kihkino'ikewaatc. Kihcianami'ewikimaa tahsh, kaawiiciiwikotc kaye, okii'-maamawi antomaawaa' i'i kahkina kaaonahshowenitc, i'i kaye kaaniikaanisinitc Coowa' ci'onaahkonikewaatc. Kii'ishinisha'owewak tahsh kiipa'otiiwikamikonk cipiinimintc tahkonikana'.

²² Shimaakanihshak tahsh e'ishaawaatc, kaawiin okii'-mihkawaahsiwaawaa' ishinisha'waakana'. Kiihkiiwewak itahsh e'awi tipaacimowaatc ekii'-ihkitowaatc:

²³ “Nikii'waapantaamin kipa'otiiwi'-ishkwaanteman eyaayiici kipaapihka'ikaatekin, okanawencikek kaye eniipawiwaatc ishkwaantemihkaank. Ahpii tahsh epaahkintenamaank, kaawiin awiya piintik ninkii'-mihkawaahsiwaanaan,” kii'ihkitowak.

²⁴ Ahpii tahsh kanawencikewi shimaakanihshiiwikimaa kihcianami'ewikamikonk, a'a tahsh kaye kihcianami'ewikimaa enoontamowaatc o'o e'ihkitonitc, wiinke kii'mikoshkaatentamook ekiih kihkentansikwaa aaniin keni'-ayishiwepanokwen.

²⁵ Peshik itahsh awiyan okiihpi wiintamaakowaan: “Inashke naa iki ininiwak kaakiih tahkonekwaa kipa'otiiwikamikonk, kiimatwe niipawiwak inaa kihcianami'ewikamikonk ehkihkino'amawaawaatc pemaatisinitc,” okii'ikowaan.

²⁶ Kii'ishaa tahsh a'awe shimaakanihshiiwikimaa ekii'-wiiciiwaatc oshimaakanihshiima'. Miitahsh kaa'ishi piinaawaatc ishinisha'waakana' weweni ekiih tootawaawaatc aaniihsh okiih kohsaawaa' pemaatisinitc cipapiimwahsina'ikowaatc.

²⁷ Ahpii tahsh kaahpiinaawaatc, okii'-inaahsamikaapawi'aawaa' eshi apinitc onahshowewininiwa'. Kihcianami'ewikimaa tahsh okiih kakwecimaa',

²⁸ ekii'-ihkitotc: “Wiinke iitok kitaanakii'-ayenkwaamimikoom awahshime cishi kihkino'amaakehsiwek Ciisahs owiinsowinink. Inashke tahsh misiwe ayaamakan i'i kikihkino'amaakewiniwaa i'imaa Ceroosalamink (Jerusalem). Miitahsh kekwetootawiyaank niinawint cianaamentaakosiyaank i'i kaakii'-ishinihsintc,” kii'ihkito.

²⁹ Piitar (Peter) tahsh, iki kaye kotak ishinisha'waakanak kii'ishi nahkwehtamook ekii'-ihkitowaatc: “Nawac taaishinaakwaan cina'ihtawankitipan Kishemanitoo ahpiihc ininiwak.

³⁰ Kaakii'oKishemanitoomiwaatc kikehteaya'aaminaapaniik ohsha okiihkiiwe pimaatisii'aan Ciisahsoon, kiinawaa kaakii'-nihsimek aashiteyaahtikonk.

³¹ Miiwan itahsh ini Kishemanitoo kaakii'ishi pakitinaatc okihcinihkinink inahke ekii'-inakimaatc Oniikaaniihtamaake, kaye tahsh Opimaaci'iwe cimiinikoowisinitc Isriyala' cikwehkaatisinitc cipoonentamawimintc eshi macitootaminitc.

³² Niinawint tahsh nintipaatotaamin iniweniwan kaawaapantamaank, Kishemanitoo otAhcaahkwan kaye tipaacimowan. Miiwan ihsa ini kaamiikiwaaketc emiinaatc i'i kaana'ihtaakotc,” kii'ihkitowak.

³³ Iki tahsh kaaonahshowewaatc ahpii enoontamowaatc i'i, wiinke hsa okii'-nishkimikowaa' ekii'-inentamowaatc cinihsaawaatc ishinisha'waakana'.

³⁴ Peshik tahsh Perahsii (Pharisee) Kameliyal (Gamaliel) eshinihkaasotc ekii'-nihtaa kihkino'amaaketc onahshowewin, kahkina kaye awiya' okiikihtenimikoo'. Miitahsh a'a kaakiih pasikwiitc ekii'-anoohkiitc pinamaa cisaakisi'imintc ishinisha'waakana'.

³⁵ Miitahsh o'o kaa'inaatc: “Kiinawaa Isriyalak (Israel), ayenkwaamisik aaniin kaawiih tootawekwaa oko ininiwak.

³⁶ Inashke mewishayiishko kiihpi'ayaa Tiyootahs (Theudas) ekiihkihci inwaanintisotc, kekaa maawiin niiwaahk ininiwa' okiih piminisha'okoo'. Miitahsh i'i kaakii'-nihsintc, kaakiih piminisha'okotc itahsh kii'ohsweyaamohkaasowa'. Kaawiin tahsh kiikihkentaakwahsinini otishihcikewin.

³⁷ Kaa'ishkwaa nihsintc tahsh a'a inini, Cootahs (Judas) kewiin kiihpi'ayaa Kaalaliwiahkiink (Galilee) ekii'-onciitc ahpii kii'akimintwaa kahkina awiyak. Niipiwa' itahsh awiya' okiikashkiaa' cipiminisha'okotc. Kewiin tahsh kiinihcikaniwitc, kahkina kaakiih piminisha'okotc kii'oswepa'iwewa'.

³⁸ O'o tahsh noonkom kaainahkamikahk, mii 'owe eninakook, keko kekoon tootawaahkekwaanik iki ininiwak. Kiishpin hsa i'i enentamowaatc, eshihcikewaatc kaye, ininiink wenciimakaninikwen, kaawiin tani kihkentaakwahsinini.

³⁹ Kiishpin tahsh wiin Kishemanitoonk wenciimakaninikwen kaawiin kika shaakoociaahsiwaawaak. Miitahsh i'i cikoshkwentamek Kishemanitoo iinsan emiikaanek,” Kameliyal kii'ihkito. Kii'ishihcikewak itahsh kaakii'-inintwaa.

⁴⁰ Miihsh kaa'ishi kiiwepiintikanaawaatc ishinisha'waakana' ekiih pahshanshe'waawaatc, ekiihkishii kanoonaawaatc kaye awahshime ci'onci kaakiikitohsinik owiinsowininiink Ciisahsoon. Miitahsh kaa'ishi pakitinaawaatc.

⁴¹ Ishinisha'waakanak tahsh kii'onci maacaawak eshi ayaanitc onahshowewininiwa', wiinke ekii'-minwentamowaatc ekii'-inakimintwaa ehte ahpiihtentaakosiwaatc ci'onci akaci'intwaa owiinsowininiink Ciisahsoon onci.

⁴² Kaawiin tahsh cikiihkipihciiwaatc entahsokiishik ekiih kihkino'amaakewaatc, ekiih kakiihkwewaatc kaye i'imaa kihcianami'ewikamikonk, eyishitaanitc kaye pemaatisinitc ekii'-ihkitowaatc: “Ciisahs ohsha mii 'awe Kishemanitoon kaakii'-onaapamikotc cipimaaci'iwetc.”