ᐃᔑᒋᑫᐎᓇᓐ 4 - Ojibwe Kihcimasina'ikan

Piitar a'a kaye Cwaan kiitahkonintwaa

¹ Mekwaa tahsh ehkanoonaawaatc pemaatisinitc okiihpi otihsikowaan anami'ewikimaan, ini kaye kaakii'-okimaahkantawaanitc kenawentaminitc kihcianami'ewikamik, i'i tahsh kaye Saacahsii' (Sadducees).

² Kaawiin okii'-minohtaakohsiiwaa' ekii'onci mikoshkaatentaminitc ekihkino'amawaawaatc pemaatisinitc. Aaniihsh okiih tashintaanaawaa ekiihkiiwe pimaatisinitc Ciisahsoon, awiyan kaye nipowinink e'onci kiiwe pimaatisinitc.

³ Miitahsh kaa'ishi otihtinikowaatc ekiih kipa'okowaatc kapetipihk, aaniihsh aasha kii'onaakohshinini.

⁴ Niipiwa' itahsh kaakii'-noontaminitc i'i tipaacimowin kiihtepwehtamoo', ninkociko naaniink mitaahswaahk (5,000) ekiih tahshinitc.

⁵ E'ani waapaninik tahsh iki wekimaawiwaatc Coowak, kaaniikaanisiwaatc kaye, iki tahsh kaye kehkino'amaakewaatc onahshowewin kiimaawaci'itiwak i'imaa Ceroosalamink (Jerusalem).

⁶ Aanas (Annas) kihcianami'ewikimaa tahsh kaye i'imaa kii'ayaa, Keyahpahs (Caiaphas) kaye, a'a kaye Cwaan (John), a'a tahsh kaye Aalikihsaantar (Alexander). Iki tahsh kaye kahkina enawemaawaatc kihcianami'ewikimaan.

⁷ Naawaya'ii tahsh eshi ayaawaatc okii'ishi niipawi'aawaa' ishinisha'waakana' o'o ekii'ishi kakwecimaawaatc: “Wekonen tino mashkawisiiwin o'o wenci tootamek, awenen itahsh kaye owiinsowin kaayaapacihtaawek?” okii'inaawaa'.

⁸ Piitar tahsh emooshkineshkaakotc Kishemanitoon otAhcaahkoni o'o okii'ishi nahkwehtam: “Kiinawaa wekimaawiyek Isriyalak, kaaniikaanisiyek kaye,

⁹ kiishpin wiihkakwecimiyaank o'owe noonkom kaakiishikahk kaakii'-minotootawintc wa'a inini kaamaahkisitc aaniin kaa'ishi minoayaa'intc,

¹⁰ taka hsa kihkentamok o'o kahkina kaatahshiyek, kekiinawaa tahsh Isriyalak (Israel): wa'a inini kaaniipawitc o'omaa wiinke kii'onci minoayaa owiinsowininiink Ciisahs Christan Naasaritink (Nazareth) kaakii'-onciinitc. Miiwan ini kaakii'-akosaka'omek, Kishemanitoon itahsh kaakiih kiiwe pimaatisii'ikotc.

¹¹ Ciisahs hsa kaatashimintc o'o kaaishipii'ikaatek Kihcimasina'ikan: ‘A'a hsa ahsin kaakii'-aanawenimek kaawaahkaa'ikeyek, mii'awe mayaa kepi maacii kihci'-inentaakositc ahsin,’ ishipii'ikaate.

¹² Kaawiin iitok kotak awiya otayaahsiin pimaaci'iwewin, aaniihsh kaawiin kotak ayaahsinoon ishinihkaasowin o'omaa ahkiink awiya ke'onci pimaaci'ikoowisihpan.”

¹³ Ahpii tahsh ewaapantamowaatc aaniin ehpiihci soonkite'enitc Piitaroon, ini kaye Cwaanan, mii 'i kaakii kihkentamowaatc kekoon ekii'-inakisohsinik, ekiih kihkino'amawaahsiwimintc itahsh kaye, wiinke kiikihci maamahkaatentamook. Miitahsh kaakii kihkenimaawaatc ekii'-wiiciiwaanitc ini Ciisahsoon.

¹⁴ Ewaapamaawaatc itahsh kaye ini ininiwan kaakii'-minoayaa'imintc ewiicikaapawihtaakonitc, mii 'i wiinke kaa'ishi kwenawi'ihkitowaatc.

¹⁵ Miitahsh kaa'ishi kanoonaawaatc ohpimeya'ii ci'ishaanitc kaakii'ishi maawaci'itiwaatc onahshowewikamikonk, miihsh kaa'ishi maacii kakanoonitiwaatc.

¹⁶ Miihsh kaa'ihkitowaatc: “Aaniin tahsh ketootawankwaa oko ininiwak. Kahkina awiya' kaataanitc Ceroosalamink (Jerusalem) okihkentamini o'o kaakii'-ishihcikewaatc kihci maamahkaacihcikewin, kaawiin tahsh kika kashkihtoohsiimin ciyaanotamank.

¹⁷ O'o tahsh awahshime cimisihteshkaamakahsinok eshi ayaawaatc pemaatisiwaatc, taka hsa kihci nooci'aataanik miinawaa citashintamawaahsikwaa awiya' o'o wiinsowin.”

¹⁸ Okiihkiiwe antomaawaa' itahsh miinawaa ishinisha'waakana' cipiintikenitc, miihsh kaa'ishi ayenkwaamimaawaatc awahshime citashintansinink, cikihkino'ikehsinik otishinihkaasowininiink Ciisahsoon.

¹⁹ Piitar tahsh, a'a kaye Cwaan kii'ishi nahkwehtamook: “Kiinawaa onentamok aaniin eshi minonamokwen Kishemanitoo. Maakishaa kiinawaa cina'ihtaakooyek, komaa kaye Kishemanitoo cipisintawankipan.

²⁰ Kaawiin ohsha niinawint nintaa kashkihtoohsiimin cipooni tashintamaank kaakii'-waapantamaank, kaakii'-noontamaank itahsh kaye,” kii'ihkito.

²¹ Aahpii kaa'ishkwaa ayenkwaamimintwaa awahshime ewiih kakwaataki'intwaa, miitahsh kaa'ishi pakitinintwaa. Kaawiin kekoon kii'mihkikaatehsinini ke'onci onaahkonintwaapan aaniihsh kahkina pemaatisinitc okii'-nanaahkomaani Kishemanitoon o'o onci kaakii'-ishihsenik.

²² A'a tahsh kaye inini kaakii'-maamahkaaciminoayaa'intc awahshime niimitana (40) kiitahsopipoonwe.

Kaakii'ishianami'aawaatc otepwehtamook

²³ Ahpii kaa'ishkwaa pakitinintwaa kii'ishi kiiwewak eshi ayaanitc owiici otepwehtamoomiwaa' ekiih tipaacimowaatc kahkina kekoon aaniin kaa'ikowaatc i'i kihcianami'ewikimaa', i'i kaye kaaniikaanisinitc Coowa'.

²⁴ Ahpii otepwehtamook enoontamowaatc o'o, okii'-maamawi anami'ehtawaawaan Kishemanitoon e'ihkitowaatc: “Oo Tepencikeyan, kiin kaakii'-oshihtooyan kihcikiishik, ahki, kihcikam kaye, kahkina kaye i'imaa eyaakin,

²⁵ Kiin Kishemanitoo kitAhcaahk kikii'-aapaci'aa kiiminatc kitanohkii'aakan Tepit (David) ninkehteya'aaminaapan o'o kii'ihkitokopanen: ‘Wekonenini wenci kitaasowaatc pahkaan wenciiwaatc ahkiink, wekonenini hsa kaye ishianihshaa wenci'-inentamowaatc i'i ewii'-ishihcikewaatc.

²⁶ Kihciokimaak o'omaa ahkiink kii'oshiihtaawak, tepenimiwewaatc kaye kiimaawaci'itiwak ewii'-miikaanaawaatc kaaTipencikenitc, iniweniwan kaye kaakii'-onaapamaanitc.’

²⁷ O'omaa hsa otenaank tepwe tashi maawaci'itiwak a'a Herat (Herod), Paantiyahs Paailat (Pontius Pilate) kaye, iki tahsh kaye kaaCoowiwihsikwaa. Ewii'maanshi tootawaawaatc kaana'entami'imihk kehtentaakosinitc kitAnohkii'aakanan Ciisahsoon kaakii'-onaapamimatc.

²⁸ Ekii'-ishihcikewaatc kimashkawisiiwinink, kitinentamowinink kaye niiyaak kaakii'onci onahtoowampanen ci'ishihsek.

²⁹ Inashke tahsh noonkom Tepencikeyan, waapantamow eshi ahshotamawiyamintwaa ewiih tootawiyamintwaa. Taka hsa tahsh miishihshinaam soonkite'ewin e'otanohkii'aakanimiyaank ciwiintamaakeyank kitihkitowin.

³⁰ Waapanta'iwen kashki'ewisiwin e'ayaayan ciminoayaa'iweyan. Pakitinan kaye kihkinawaacihcikewinan, maamahkaacihcikewinan kaye citoocikaatekin owiinsowinink kaakihtentaakositc kitAnohkii'aakan Ciisahs.”

³¹ Ahpii tahsh kaaishkwaa anami'aawaatc kiikoshkohseni i'imaa eshi ayaawaatc. Kahkina tahsh okii'-mooshkineshkaakowaan Kishemanitoon otAhcaahkoni, miihsh kaa'ishi waawiintamowaatc Kishemanitoon otihkitowinini ekiih soonkite'ewaatc.

Kaashiwiici'itiwaatc otepwehtamook

³² Emaamawi ayaawaatc tahsh otepwehtamook peshikwan kii'inentamook, peshikwan kii'ishite'ewak. Kaawiin tahsh awiya cikii'ihkitotc kekoonan e'ayaatc wiin ehta ehtipinawewisitc, kahkina hsa ko kekoonan kiimaamawihcikewak.

³³ Aahpici tahsh kiihkihci mashkawihcikewak ishinisha'waakanak ehtipaatotamowaatc kaakii'ishi kiiwepimaatisinitc kaaTipencikenitc Ciisahsoon. Kahkina tahsh kaye kaatahshiwaatc okii'-otihsikonaawaa Kishemanitoon okihci shawencikewinini.

³⁴ Kaawiin tahsh awiya kiihkitimaakisihsii eshi ayaawaatc, aaniihsh kahkina kaakiih tipentamowaatc ahkiin, waahkaa'ikanan itahsh okii'-ataawaakenaawaan. Shooniyaan tahsh kaakiih tipa'amawintwaa okiih piinaawaan,

³⁵ ekii'ishi pakitinaawaatc eshi ayaanitc ishinisha'waakana'; miitahsh kaakii'ishi maamaata'ohkiinitc.

³⁶ Miitahsh o'o Coosap (Joseph) kaa'ishihciketc, anami'e anohkii'aakan Liipait (Levite) kaatinowitc kaakii'-onciitc Saaiparahs (Cyprus) minihsink, Paarnapahs (Barnabas) kaakii'-ishinihkaanikotc ishinisha'waakana'. Owiinsowin tahsh “Menwentami'iwetc” kii'ihkitoomakanini.

³⁷ Kihtikewahkiini okii'ayaan, miihsh kaa'ishi ataawaaketc ekiih piinaatc shooniyaan kaakiih tipa'amawintc i'imaa eshi ayaanitc ishinisha'waakana'.