ᐃᔑᒋᑫᐎᓇᓐ 28 - Ojibwe Kihcimasina'ikan

Minihsink Maalta kiiayaawaatc

¹ Ahpii tahsh kahkina kaa'akwaasiiyaank mii 'i kaakii'-wiintamaakooyaank i'i minihs Maalta (Malta) inakwana e'ishinihkaatek.

² Kaakiih tashiihkewaatc tahsh i'imaa wiinke ninkii'-minotootaakonaanik. Kiihpootawewak ci'awasoyaank aaniish kiihkimiwan, kiikihsinaa kaye. Kii'ihkitowak kaye e'minwentamowaatc kahkina ewaapamiyamintwaa.

³ Pwaal (Paul) tahsh okii'-maamooshakinaanan mihtikoonhsan. Epakitinihsetc kinepikoon kiihsaakaapiikipani'owan e'ani kishitenik i'i pootawaan, okii'-maakwamikoon tahsh kinepikoon oninciink ekii kihciwamikotc.

⁴ Ahpii tahsh i'imaa kaakiih tashiihkenitc ewaapamikotc kinepikoon e'akoocininitc oninciink kii'ihkitowa': “Wa'a inini tepwe kiinihshiwetok! Aanawiin ekiih shaapwiitc kihcikamiink onci, shaakooc tahsh okiiwe naasihkaakon otishihcikewin, enana'ahsikotc. Kaawiin tahsh inentaakosihsii cikiih pimaatisihpan,” kii'ihkitowa'.

⁵ Ishkotenk tahsh okii'ishi wepinaan ini kinepikoon, kaawiin tahsh kekoon kii'ishi ayaahsii.

⁶ Okii'-ahkawaa'ikoo' tahsh cipaakihsenitc, komaa kaye kwetahto cikawihsetc cinipotc. Ahpii tahsh kinwesh kaahpii'ikotc, e'waapamikotc tahsh kekoon e'ishi ayaahsik, pahkaan kii'inentamoo' e'ihkitonitc: “Manitoowi iinsan wa'a,” kii'ihkitowa'.

⁷ Pehsho tahsh i'imaa kii'ayaani ahkiini ehtipentank kaaokimaahkaaniwitc i'imaa minihsink Papiliyahs (Publius) e'ishinihkaasotc. Ninkiih piintikanikonaan otaawinink, nihsokiishik (3) wiinke ninkiimino pami'ikonaan.

⁸ Kii'ani ayishihse tahsh Papiliyahs oteten ekiih pimihshininitc ehkishisowaahpinenitc kaye tahsh kiimiskwiiwanini okishiwashkateyaahpinewinini. Miiwan iniweniwan Pwaal kaakiih piintikawaatc ekii'-anami'aatc. Ehsaaminaatc tahsh kii'minoayaawan.

⁹ Ahpii tahsh o'o kaa'ishihsek kotak awiyak aahkosiwinan kaa'ayaawaatc i'imaa minihsink kiihpiishaawak miihsh kaa'ishi minoayaa'intwaa.

¹⁰ Niipiwa' tahsh kekoonan ninkii'-miinikonaanik enaakohtoowaatc ekihtenimiyamintwaa. Ahpii kaahkiishiiyaank cimaaciiyaahshiyaank, ninkii'-maaciinta'ikonaanik kekoon keyaapacihtooyaank.

Kiinakatamaank Maalta eishaayaank Oroomink

¹¹ Nihso kiisihs (3) tahsh i'imaa kaa'⁠ishkwaa ayaayaank ninkiih poosimin kihci ciimaan ekii'-maaciiyaahshiyaank. I'i hsa kihci ciimaan kiih⁠tashi pipoonihshiimakan i'imaa ekii'-onciimakahk Aalikihsaantariyaahkaank. Niishotewi manitoohkaanak kiimasinihshinook i'imaa kihci ciimaanink.

¹² Sirahkiyoos (Syracuse) ootenaank tahsh ninkii'ishi takohshinimin. Nihsokiishik (3) tahsh i'imaa ninkii'-ayaamin.

¹³ Miitahsh i'imaa miinawaa kaa'onci maaciiyaahshiyaank piinihsh ekii'-otihtamaank Oriiciyam (Rhegium) kaaicikaatek ootena. E'ani waapank tahsh kii'maacii shaawaninootin. Miinawaa e'ani waapank ninkii'-otihtaahshimin Potiyali (Puteoli) tapinawihshinowinink.

¹⁴ Ninkii'-mihkawaanaanak tahsh i'imaa otepwehtamook. Ninkii'ikonaanik tahsh ciwiici ayaamankitwaa peshikotawahte. Miitahsh kaakii'ani takohshinaank weti Oroomink (Rome).

¹⁵ Otepwehtamook tahsh Oroomink kaakii'-ayaawaatc kii'noontamook iinsan ewiihpi takohshinaank. Ninkiih pianta nakishkaakonaanik tahsh waahsa ekiihpi onciiwaatc ootenawan kaaicikaatenikin otAtaawewikamik Aapiyahs, i'i tahsh kaye Nihso kapehshiwin. Ahpii tahsh Pwaal kaa'waapamaatc okii'onci miikwehciwenimaan Kishemanitoon, kii'onci mashkawiayaa kaye.

Pwaal kaakii'ishihciketc Oroomink

¹⁶ Ahpii tahsh kaatakohshinaank Oroom ootena, Pwaal (Paul) kiihpakitinamawaa pisaan cinishihkeayaatc waahkaa'ikanink. Shimaakanihshan tahsh i'imaa okiih kanawenimikoon.

¹⁷ Nihso kiishik (3) e'ani'-ishihsenik Pwaal okii maamawi antomaa' kaaniikaanisinitc Coowa'. Ahpii tahsh kaapi maamawi piishaanitc okii'inaa': “Niwiici onciimaakanak, aanawiin kekoon e'kii'ishi mamaanshiihkantawaahsiwakwaa kiwiici onciimaakaninaanik, ishihtwaawinan kaye kaakiihpi miininankwaa kikehteya'aaminaapaniik, miitahsh kaakiih kipa'okooyaan weti Ceroosalamink (Jerusalem), ekii'ishi pakitinikooyaan citahkonimitc Oroomink kaaonciinitc.

¹⁸ Miiwak tahsh iki kaakii'anta kihkenimiwaatc. Kii'inentamook tahsh cikiih pakitinikoowakipan, aaniihsh kaawiin kekoon ninkii'ishi mamaanshiiwaahsiin keonci nihsikoowakipan.

¹⁹ Ahpii tahsh Coowak kaa'inentansikwaa cipakitinikoowak, intawaa tahsh ninkii'-ihkit maawac kihciokimaa citipaahkonitc, kaawiin wiin kekoon e'ayaayaan keonci maci'inakwaapan niin ko niwiici onciimaakanak.

²⁰ Miitahsh kaakii'onci antominakook ewii'-waapamininakook, ewiih kakanooninakook kaye. Aaniihsh nintepwehtawimaan Isriyalak (Israel) kaa'ahpenimonotawaawaatc, mii 'i kaaonci tahkopisoyaan ono piiwaapihkweyaapiin,” okii'inaa'.

²¹ O'o tahsh okii'ikoo: “Kaawiin Cootiiya (Judea) ahkiink nintonci oshipii'amaakoohsiimin citashimikooyan. Iki kaye weti Coowak kaakiihpi onci takohshinowaatc kaawiin kekoon cikii'-inaacimowaatc, kaawiin kaye noociko awiya kitikohsii.

²² Kiwii'-noontaakoo tahsh aaniin enentaman, aaniihsh ninkihkentaamin misiwe awiyak emaci tashintamowaatc i'i ishihtwaawin wenci tipentaakosiwatc,” okii'ikoo'.

²³ Okii'-onahtooni tahsh ahpii kiishikaninik kepi'anta waapamikotc. Kiihpaahtiinowa' tahsh kaakiih pianta waapamikotc i'imaa eshi ayaatc. Ekishepaawakaninik tahsh piinihsh e'ani onaakohshininik kwayahk ekii'-waawiintamawaatc ehtipaacimohtawaatc aaniin eshinaakwaninik Kishemanitoo otookimaawiwin. Okiihkakwe kashkimaa' tahsh kaye citepwehtaakotc ehtashimaatc Ciisahsoon ekii'-wiintank eshihsininik otoonahshowewinini Moosihsoon, kaakii'-ishipii'ikenitc kaye kenootamawaanitc Kishemanitoon.

²⁴ Aaninta tahsh okiih tepwehtamini i'i kaakii wiintamawaatc, aaninta tahsh kaawiin kiihtepwehtansiiwa'.

²⁵ Kaawiin tahsh taapishkoo kii'inentansiiwa' e'ani maacaanitc o'o Pwaal kaa'⁠ishkwaa ihkitotc: “Peshik kekoon nintayaan ci‑ininakook: Tepwe kwayahk kii'ihkitonikopan Kishemanitoo otAhcaahkwan kiiyaapaci'aanitc kenootamaakotc Aaiseyawan (Isaiah) kiikanoonaakopanen kikehteya'aaminaapanii':

²⁶ ‘Maacaan antawaapam iki pemaatisiwaatc o'o ci'inatwaa: Mihsawaako mooshak aana noontamek, kaawiin tahsh kikanihsitohtansiim. Mihsawaako kaye mooshak aana waapantamek, kaawiin tahsh kikanihsitawinansiim.

²⁷ Aaniihsh otinentamowiniwaan aahpici peci nihsitohtamoomakaniniwan, okipinaanaawan tahsh kaye ohtawakaawaan. Akawaapinintisowak tahsh kaye. O'o tahsh e'ishihcikewaatc mii 'i kaa'onci waapihsikwaa, mii kaye kaa'oncinoontansikwaa, mii kaye 'i kaa'oncinihsitohtansikwaa otinentamowiniwaank. Pikwehkiinotawiwaatc tahsh nintaapimaaci'aak,’ kii'ihkitokopan Kishemanitoo.”

²⁸ Pwaal tahsh kii'ani'-ihkito: “Kihkentamok itahsh o'o minwaacimowin kaashi tashintenik Kishemanitoo opimaaci'iwewin kewiinawaa kaaCoowiwihsikwaa e'ishinisha'amawintwaa, tanoontamook tahsh wiinawaa!” okii'inaa'.

²⁹ Ahpii tahsh o'owe kaa'ishkwaa ihkitotc, Coowa' kii'ani maacaawa', wiinke ehkihci kakanoonitinitc.

³⁰ Niisho pipoon (2) tahsh i'imaa kii'ayaa waahkaa'ikanink kaakii'-awi'aasotc, kahkina kaye ekiih piintikanaatc kaakiihpi naasihkaakotc.

³¹ Kiihsoonkite'e tahsh, kaawiin kaye awiyan okiih kipihtinikohsiin ewiintamaaketc Kishemanitoon otookimaawinini, ekiih kihkino'amaaketc kaye ini kaashi tipaacimimintc kaaTipencikenitc Ciisahs Christan.