ᐃᔑᒋᑫᐎᓇᓐ 27 - Ojibwe Kihcimasina'ikan

Pwaal kii'ishinisha'ontc Oroomink

¹ Ahpii tahsh kaakiishencikaatek Itali (Italy) ahkiink ci'inaahshiyaank, Pwaal (Paul) i'i kaye kotak kipa'waakanak kii'ishi pakitinikaniwiwak cikanawenimikowaatc shimaakanihshiiwikimaan Cooliyahs (Julius) eshinihkaasonitc. Kii'onci tipentaakosiwan kaaohkwakimintwaa shimaakanihshak, Maawac Kihciokimaan Oroomink kaa'ayaanitc kaatipenimikowaatc.

² I'imaa tahsh kihciciimaanink Aataramitiyam (Adramyttium) wencimakahk ninkii'-ishi poosimin ewii'-ani naaneweyaahshiwaatc weti ewii'-ani kakaapihciiwaatc pepahkaan ayaawinink Eshiya (Asia) ahkiink. Miitahsh kaakii maaciiyaahshiyaank. Ninkii'-wiiciiwikonaan tahsh Eristaarhkahs (Aristarchus) kaaishinihkaasotc ekii'-onciitc Maahsitooniya ahkiink (Macedonian) weti Tehsalanaihka (Thessalonica) ootenaank.

³ Eni waapank tahsh ninkii'-ishi pakaamaahshimin Saaitan (Sidon) ootenaank. Cooliyahsan tahsh wiinke okii'-minotootakoon a'a Pwaal, ekiih pakitinikotc ci'anta waapamaatc kaakihkenimaatc cimino pami'ikonitc aaniin eshi noontehsetc.

⁴ Miitahsh i'imaa kaa'onci niminaaweyaahshiyaank eshi tapinawaak inahke ninkii'ani'-inaahshimin shaawanonk Saaiparahs (Cyprus) minihsink, aaniihsh onsaam kiikihci nootin e'oncishkawa'amaank.

⁵ Miitahsh kaa'ishi aashawakaame yaahshiyaank kihcikamiink Silihshiya (Cilicia) ahkiink inahke, Paampiliya (Pamphylia) ahkiink kaye. I'imaa tahsh ninkii'ishi pakamaahshimin Maira (Myra) ootenaank Lihshiya (Lycia) ahkiink.

⁶ Miitahsh i'imaa shimaakanihshiiwikimaa kaakii mihkank kihci ciimaan Aalikihsaantariya (Alexandria) e'onciimakaninik, Itali ahkiink ewii'-ishaamakaninik. Amiitahsh i'imaa kaa'ishi aanci poosi'ikooyaank.

⁷ Niipiwa' tahsh tahso kiishik ninkiihpimi ayaamin, ekiih petaahshiyaank ekii'-nanakaayaahshiyaank. Kekahpii tahsh ninkii'-otihtaahshimin eshi'-ayaak Naitahs (Cnidus) ootena. Wiinke kiikihci nootin ekiih sanakahk cikii'-oncishkawa'amaankipan. Intawaa tahsh weti ninkii'ani'-inaahshimin ciikaya'ii kaashi neyaahshiwank Salmooni (Salmone) eshi tapinawaak shaawanonk inahke Kariiht (Crete) minihsink ekiiani'-inaahshiyaank.

⁸ Aahpici pehsho ninkiih cikeweyaahshimin ekiih sanakahk epimaahshiyaank. Ninkii'-otihtaamin tahsh eishinihkaatek Wenishihshik Tapinawihshimoonowin, pehsho imaa Lahsiiya (Lasea) ootenaank eshi ayaak.

⁹ Onsaam tahsh kinwesh i'imaa ninkii'-ayaamin, aasha ekii'-ocihcihsek onsaam enaniisaanentaakwahk keyaapi cipimaahshink aaniihsh aasha kii'ahpiihci takwaakin. Aasha kaye kii'ishkwaa ishikiishikan Coowak kaashi nihtaa maawaci'itiwaatc i'i kaapoonentamawintwaa omacitootamowiniwaan. Miitahsh Pwaal okii'-ayenkwaamimaa' pimaahshiiwininiwa'.

¹⁰ Miitahsh owe kaa'inaatc: “Niwaapantaan owe kaapimi ayaayank aahpici enaniisaanisiyank, cikihci wanihcikeyank kaye. Poosihtaahsonan tanihshiwanaacihsewan, kihci ciimaan kaye. Kipimaatisiwininaanin hsa kaye naniisaanentaakwanoon.”

¹¹ Ini tahsh shimaakanihshiiwikimaan nawac okiih pisintawaani kihci ciimaaniiwikimaan, ini kaye kaatipentaminitc i'i kihci ciimaan, ahpiihc wiin i'i kaakii'-ihkitotc Pwaal.

¹² I'imaa Tapinawihshimoonowinink kaawiin aahpici kii'onishihshisinoon citashi pipoonihshinaaniwank. Miitahsh nawac niipiwa' kaakii'-inentamowaatc ciniminaawe yaahshinaaniwaninik ewiikakwe tetakohshinowaatc weti ootenaank Ihpiinikihs (Phoenix) kaaicikaatenik. I'i tahsh tapinawihshimowin Kariiht (Crete) minihsink kii'‑ishi ayaa, ekii nihtaa aahsama'ank shaawanoninkaapii'anonk, kiiwetino ninkaapii'anonk kaye.

Kiihkihci'ishiwepahk i'imaa kihcikamiink

¹³ Ahpii tahsh nihshihkaac ehpakaminoowenik ehshaawaninootink, mii 'i ciminohseyaank e'inentamowaatc, okii'-akwaasipinaawaan kihciwaamihka'ikanan. Aahpici tahsh ciikew kii'ishi pimaahshiwak i'imaa Kariiht minihsink.

¹⁴ Kaawiin itahsh tashinaanaake kii'ishihsehsinoon mii 'i aasha noohpimink inahke kaakii'onci pakamaanimahk nootin Kiiwetino waapaninoowehse kaakii'-icikaatek.

¹⁵ Ahpii tahsh kaamekwaashkamaank i'i ehkihci nootink, ekiih kashkihtoohsiwaank tahsh ci'oncishkawa'amaank, intawaa tahsh ninkii'-naamiwana'aamin, ekii'mihci pimaa'okoyaank.

¹⁶ Ekiih tapinawaak tahsh minihsehsink Kwaata (Cauda) eshinihkaatek, ninkiikihci anohkiimin ekiih kashkihtooyaank ciwanihtoohsiwaank mihtiko ciimaanenhs kaasakahpitek.

¹⁷ Ahpii tahsh kaa'ihkwaapiikipitoowaatc i'i mihtiko ciimaanenhs, wiinke okii'-aayiitahpitoonaawaa ekii titipahpitoowaatc kihci ciimaan. Ekiih sekisiwaatc tahsh cimishahkiihshinaank kaaishi paakwaantaawankaak pehsho i'imaa Lipiya (Libya) ahkiink. Okii'-niihsaapiikipitoonaawaan tahsh pimaahshiiwekinoon miitahsh kaa'ishi mihci pimaa'okoyaank.

¹⁸ Wiinke tahsh ninkiikihci ocaanimaa'okomin. Weyaapaninik tahsh okiimaacii papaahkopii wepinaanaawaan poosihtaahsonan.

¹⁹ Nihso kiishik 3 tahsh eshihsenik, okiih papaahkopii wepinaanaawaan kihci ciimaaniwi aapacihcikanan.

²⁰ Ekii'onci naakosihsik tahsh kiisihs, wanankohshak kaye niipiwa' tahso kiishik, ekii'onci anwaanoowehsinok kaye, mii 'i kekahpi kaakiih pakiciiyaank cipimaatisihsiwaank.

²¹ Aasha tahsh kinwesh ekii'onci wiihsinihsinik ininiwa', Pwaal kii'antawi niipawi mekweya'ii eshi ayaanitc ekii'inaatc: “Ininiwak kitaakii'-ohsa pisintawihshim kaakii'-ininakook cimaaciiyaahshihsiwankipan weti Kariiht (Crete) minihsink. Kaawiin tahsh o'o kitaakii'-ishi wahsitaawihsehsiimin, kaawiin kaye kitaakii'-wanihcikehsiimin.

²² Maano tahsh kikakaansomininim cimashkawentamek cipakitenimohsiwek, aaniihsh kaawiin awiya kaatahshiyek oka wanihtoohsiin opimaatisiwin. Kihci ciimaan ehta tanihshiwanaatan.

²³ Tipihkonk ohsha ninkii niipawiihtaakowaan otencaliman Kishemanitoo kaaTipenimitc kaa'anohkiihtawak.

²⁴ O'o ekii'ishimitc: ‘Pwaal, keko sekisihken! Oncita ko ishinaakwan ci'oncishkawi kaapawihtawatc Maawac Kihciokimaa citipaahkonihk, inashke tahsh Kishemanitoo kiminotootaak ehpakitinaatc kahkina iniweniwa' kaawiiciiwimihk cipimaatisinitc.’

²⁵ Kiinawaa tahsh ininiwak mashkawentamok! Aaniihsh nintepwehtawaa Kishemanitoo mayaa ci'ishihsenik kaakii'ishitc.

²⁶ Shaakooc tahsh ninkoci ko minihsink kika mishakaameyaa'okomin,” okii'inaa'.

²⁷ Ahpii tahsh mitaahshiniiwikon (14) eshihsek keyaapi ninkiih pimaa'okomin i'imaa Etariyaa (Adria) kihcikamiink. Ninkoci kekaa e'ani aapihtaa tipihkaak ciimaaniiwininiwak okii'onci kihkentaanaawaa pehsho maawiin ehpimakaameyaanik.

²⁸ Miitahsh kaakiih kotahkii'ikewaatc ninkociko niishtana (20) tahsonihk kii'ahpiihtaayawaani. Miinawaa tahsh naake kiihkotahkii'ikewak ninkociko tahsh mitaahshinaanaan (15) tahsonihk kii'ahpiihtaayawaani.

²⁹ Ekii'-naniisaanentamowaatc tahsh eshi ahsiniihkaanik cishi'-akwaayaa'okowaatc okii pahkopii'aanaawaan niiwin kihciwaamihka'ikanan otaahkeyoonak inahke. Wiinke okii'-noonte antawentaanaawaa ciwaapaninik.

³⁰ Ciimaaniiwininiwak tahsh kii'inentamook ewiih kiimooci maaciipa'iwewaatc. Okii'-niisaapiikinaanaawaa tahsh mihtiko ciimaanenhs e'ishihcikehkaasowaatc epahkopii'amowaatc kihciwaamihka'ikanan nimihtaamoonak inahke.

³¹ Pwaal tahsh okii'inaan shimaakanihshiiwikimaan i'i kaye shimaakanihsha': “Kiishpin iki ininiwak ayaahsikwaa o'omaa kihci ciimaanink, kaawiin kekiinawaa kika pimaatisihsiim,” okii'inaan.

³² Shimaakanihshak tahsh okiih pahkishaanaawaa kaaonci sakahpitenik mihtiko ciimaanenhs pisaan citashi maaciiyaa'aninik.

³³ Ahpii tahsh e'ani waahseyaapaninik Pwaal okiih pakohsenimaa' kahkina ciotaahpinaminitc miicim ciwiihsininitc ekii'-ihkitotc: “Mii 'i noonkom kaakiishikahk aasha mitaahshiniiwikiishik (14) e'ishihsek emihci pii'oyek, e'onci wiihsinihsiwek kekoon cikii'-miiciyekipan.

³⁴ Kimihsawenimininim tahsh ci'otaahpinamek miicim aaniihsh mii 'imaa ke'onci pimaatisiyek. Kaawiin ohsha kanake peshik awiya owiinisihs ohtikwaanink ta'onci nihshiwanaatahsinini o'omaa kaatahshiyek,” okii'inaa'.

³⁵ Ahpii tahsh i'i kaa'ishkwaa ihkitotc okii'-otaahpinaan pahkweshikanan ekii'-nanaahkomaatc Kishemanitoon. Kahkina tahsh okiih kanawaapamikoo'. Miihsh kaa'ishi pahkwepinaatc pahkweshikanan ekii'maacii wiihsinitc.

³⁶ Kahkina tahsh kii'onci soonkite'ewa', miihsh kahkina kaa'ishi wiihsininitc.

³⁷ Kahkina tahsh maamaw kaakiih poosiyaank i'imaa kihci ciimaanink niishwaahk niishwaahsimitanahshi ninkotwaahso (276) ninkiih tahshimin.

³⁸ Ahpii tahsh kaahte wiihsiniwaatc okiih papaahkopii wepinaawaan pahkweshikaniwi kihtikaanan kaaonci oshi'imintc pahkweshikanan cinaankwakontenik kihci ciimaan.

Kiipiikwa'ank kihciciimaan

³⁹ Ahpii tahsh e'ani piitaapaninik kaawiin okii'-nihsitawinansiinaawaa i'i ahkiini. Okii'-waapantaanaawaa tahsh wiin eshi waaninikamaanik ematwe mihtaawankaanik. Miitahsh kaakii'-inentamowaatc kiishpin kashkihtoowaatc cikiihcehkihsitoowaahpan kihci ciimaanini i'imaa.

⁴⁰ Okii pahkishaanaawaan tahsh ini kihciwaamihka'ikanan nipiink iko ekii'ishi nakatamowaatc. Okii'-aapa'waawaan kaye tahkwa'ikanan etahkopisonihpan. Okii'-ihkwaapiiki pitoonaawaa tahsh pimaahshiiwekin nimihtaamoonak kaakii'-ayaanik niikaanaya'ii nahke cimaaciiyaahshiwaatc. Miihsh kaakii naatakaameyaahshiyaank.

⁴¹ Kiinoonte mishahkiihsin tahsh i'i kihci ciimaan eshi paakwaak. Nimihtaamoonak tahsh kiikihciwataawankihse. Otaahkeyoonak tahsh kii'ani piikwa'an kaa'ahpiihci soonkaashkaak.

⁴² Shimaakanihshak tahsh kii'inentamook cinihsaawaatc kipa'waakana' ekii'-naniisaanentamowaatc cikiimooci maaciiyaatakenitc cishipaninaawaatc itahsh.

⁴³ Shimaakanihshiiwikimaa tahsh ewiih pimaaci'aatc Pwaalan okiih kipihtinaa' kaawii'-ishihcikenihpan. Kii'ihkito tahsh i'i nehtaawaatakenitc niikaan cipahkopii kwaashkwaninitc cinaatakaameyaatakenitc.

⁴⁴ Ini tahsh kotak cishimincimiinitc napakihsakonk kekoonan kaye kaapiiwa'aninikin ciminciminaminitc. Kii'ishihse tahsh kahkina awiya ekii'-mishakaameyaataketc, kekoon ekii'-ishihsehsik.