ᐃᔑᒋᑫᐎᓇᓐ 23 - Ojibwe Kihcimasina'ikan

¹ Pwaal (Paul) tahsh ekihci kanawaapamaatc onahshowewininiwa' o'o ekii'inaatc: “Niici onciimaakanak, weti hsa piko kaaonci naanaakatawentamaan nintoocikihkentaan kwayahk iko ekiihpi'-ishipimaatisiwak enaahsamiitc Kishemanitoo piinihsh noonkom kaakiishikaak.”

² Iniweniwan tahsh kihcianami'ewikimaan Aananaayahs (Ananias) eshinihkaasonitc okiih kanoonaani i'i kaawiicikaapawihtaakonitc cipahsitoonekanaamikotc a'a Pwaal.

³ Pwaal tahsh okii'inaan: “Kishemanitoo kika pahkihte'ok, kiin kaawaapishkipii'ikaatek ahsinimenikan. Kimihci namatap weti ewii'-onaahkoniyan enahtek onahshowewin, kiin tahsh iko ehpiikonaman onahshowewin e'anoohkiiyan cipahsitoonekanaamikooyaan,” okii'inaan.

⁴ Iniweniwa' tahsh i'imaa pehsho kaakii wiicikaapawihtaakotc Pwaal kii'ihkitowa': “Kaawiin iitok ishinaakwahsinoon Kishemanitoo okihcianami'ewikimaaman noociko ci'inimintipan,” kii'ihkitowa'.

⁵ Miitahsh Pwaal kaa'ihkitotc: “Niwiici onciimaakanak, kaawiin ninkiih kihkentansiin ekihcianami'ewikimaawitc aaniihsh mii 'owe eshipii'ikaatek: ‘Kaawiin noociko kika'-inaahsiwaawaa kaaniikaanihshkawaatc kiwiici pimaatisiimaakanini,’ ” okii'inaa'.

⁶ Ahpii tahsh Pwaal kaakihkentank peshikwewaan Saacahsiiwa' (Sadducees) ehtinowinitc, kotak tahsh Perahsii' (Pharisees) ehtinowinitc, o'o kii'ishi shaakowe i'imaa eshi maawaci'itiwintc: “Niwiici onciimaakanak, keniin ohsha Perahsii nintinow, niniiki'ikook kaye Perahsiik kihtinowiwak. Miitahsh kaa'onci tipaahkonikooyaan epiihtooyaan ehkehcinaa'oyaan kaanipowaatc cikiiwe pimaatisiwaatc,” kii'ihkito.

⁷ Ahpii tahsh o'oweni kaa'ihkitotc kiimaacii kakanoonitiwa' i'i Perahsii', i'i kaye Saacahsiiwa' kaakii maawaci'itinitc miihsh kaa'ishi nenaawi'itinitc.

⁸ Saacahsiiwak aaniihsh kii'ihkitowak e'ayaahsininik kiiwe pimaatisiwin, kii'ihkitowak kaye encala' (angels) e'ayaahsinik, ahcaahkwa' kaye e'ayaahsinik. Perahsiik itahsh wiin okiih tepwehtaanaawaan kahkina ono.

⁹ Kii'ani kishiiwewak ehkakanoonitiwaatc. Aaninta tahsh kaakihkino'amaakewaatc onahshowewin Perahsiihkaank kaakii'onci tipentaakosiwaatc kiihkakwe shaakoosohtaakosiwak ekii'-ihkitowaatc: “Kaawiin kekoon nimihkamowaahsiimin ci'ishi ayaatc wa'a inini, komaahsh kaye tepwe ahcaahkwan kaahkanoonikokwen, komaa kaye encalan,” kii'ihkitowak.

¹⁰ Ahpii tahsh wiinke e'anikihci kiihkaantinaaniwaninik, a'a kihci shimaakanihshiiwikimaa okii'-naniisaanenimaan Pwaalan cipiihsipicikaniwinitc. Miitahsh kaakii'-anoonaatc oshimaakanihshiima' ci'ishaanitc kaakii'ishi maamawi'itinitc maano ko cinaasihkawaanitc Pwaalan i'imaa tahsh cishi piinaanitc shimaakanihshiiwikamikonk.

¹¹ Ehtipihkaninik ihsa Pwaal okii'-wiicikaapawihtaakoon kaaTipencikenitc o'o ekii'ikotc: “Keko sekisihken, mashkawentan. Kaakii'ishi tipaacimiyan weti Ceroosalamink (Jerusalem), mii hsa 'i peshikwan keishi tipaacimiyan Oroomink (Rome),” okii'ikoon.

Coowak kiionentamowaatc ewii'-nihsaawaatc Pwaalan

¹² E'ani kishepaawakaninik tahsh aaninta Coowa' kiihkihci ahshotamaatiwa' ekii'-ihkitonitc ewii'onci wiihsinihsinik, ewii'onci minihkwehsinik kaye paanimaa kii'nihsikotc Pwaal.

¹³ Awahshime tahsh niimitana (40) kiihtahshiwa' i'i kaakii'ishi kiimooci ahshotamaatinitc.

¹⁴ Okii'anta waapamaani tahsh kihcianami'ewikimaa', ini kaye kaaniikaanentaakosinitc Coowa' o'o ekii'inaanitc: “Ninkii'-ishihcikemin hsa ninkiihkihci ahshotamaatimin kekoon ewii'onci miicihsiwaank paanimaa piko Pwaal kiinihsankitc.

¹⁵ Kiinawaa tahsh, iki kaye otoonahshowek wiintamawihk kihci shimaakanihshiiwikimaa cipi niihsaatawewinaanitc Pwaalan i'imaa eshi ayaayek ci'ishihcikehkaasoyek awahshime ewiih kihkentamowek kaa'ishi mamaanshiinitc. Niinawint tahsh wiin aasha ninkiih kiishiimin ewiinihsankitc cipwaa'otihtank o'omaa,” kii'ihkitowa'.

¹⁶ Pwaal tahsh otawemaan okosihsini okii'-noontawaani i'imaa e'ahkamawintc. Miitahsh kaakiih piishaanitc i'imaa shimaakanihshiiwikamikonk ekiihpi wiintamaakotc.

¹⁷ Pwaal tahsh okii'-antomaan peshik shimaakanihshiiwikimaan o'o ekii'inaatc: “Ishiwish wa'a oshkiniiki ciwaapamaatc kihci shimaakanihshiiwikimaan, kekoonini ohsha otayaan kewiintamawaatc,” okii'inaan.

¹⁸ Tepwe tahsh okii'-ishiwinaani weti eshi ayaanitc kihci shimaakanihshiiwikimaan o'o ekii'inaanitc: “Pwaal kaatahkonintc ninkii'-antomik ekiih kakwecimitc cipiinimak ono oshkiniikiwan e'ayaanitc kekoon ciwiintamawimihk,” okii'inaani.

¹⁹ Kihci shimaakanihshiiwikimaa tahsh okiih sakinihkenaan pahkaan ekii'-ishiwinaatc ekiih kiimooci kakwecimaatc ekii'inaatc: “Wekonen i'i eyaayan kaawii'-wiintamawiyan?” okii'inaan.

²⁰ O'o tahsh okii'ikoon: “Kaaniikaanisiwaatc Coowak kii'onentamook cikakwecimihkwaa waapaninik cipiinimatc Pwaalan kaashi onahshowenk, ewii'-ishihcikehkaasowaatc awahshime kekoon ewiihkakwe kihkenimaawaatc aaniin kaa'ishi mamaanshiinitc.

²¹ Keko tahsh tepwehtawaahken. Awahshime ohsha niimitana (40) tahshiwak ininiwak kaa'ahkamawaawaatc. Kiimaamawi kihci ahshotamaatiwak ewii'onci wiihsinihsikwaa, ewii'onci minihkwehsikwaa kaye paanimaa kii'nihsaawaatc. Aasha tahsh kiihkiishiiwak i'i ewii'-ishihcikewaatc, miihsh emihci pii'ihkwaa aaniin ke'ihkitowatc,” okii'ikoon.

²² Kihci shimaakanihshiiwikimaa tahsh okii maacinisha'waan ini oshkiniikiwan ekii'-ayenkwaamimaatc ekii'inaatc: “Keko awiya wiintamawaahken ono ekiihpi wiintamawiyan,” okii'inaan.

Pwaal kii'ishinisha'ontc eshiayaanitc Piilikihs eshinihkaasonitc

²³ Kihci shimaakanihshiiwikimaa tahsh okii'-antomaa' niishin shimaakanihshiiwikimaa' ekii'-anoonaatc: “Taka takwayaanciiwak niishwaahk (200) shimaakanihshak ci'ishaawaatc Sehsariiya (Caesarea) ootenaank. Niishwaahsimitana (70) kaye mihtatimoo' kaapimiwanepa'ikowaatc, niishwaahk (200) kaye shimaakanihshak ciipowepinikanan kaayaapacihtoowaatc ci'oshiihtaawaatc cimaacaawaatc shaankahso (9) tipa'ikaneyaanik noonkom onaakohshininik.

²⁴ Ontinamawihk kaye mihtatimoo' a'a Pwaal (Paul) keni aayaanihke pimiwanaanikotc kehcinaac iko weweni ci'ishiwinek eshi ayaanitc Piilikihsan (Felix) kaakii'-aanihkewikimaawinitc,” kii'ihkito.

²⁵ Miitahsh o'onahke kaa'ishipii'iketc emaaciipii'iketc:

²⁶ “Niin Kalaatiyahs Lihsiyahs (Claudius Lysias) kitooshipii'amawin, kiin Piilikihs Keci'inentaakosiyan kaatipentaman Cootiiya ahki, pooshoo kitinin.

²⁷ Wa'a hsa inini okii'-otihtinikoo' Coowa' kekaa tahsh okii'-nihsikoo'. Ekiih kihkentamowak tahsh Oroomink (Rome) e'onci tipentaakositc, ninkii'-ishaawaan ekii'-ishiwinimak ninshimaakanihshiima' ekii'awi naatamawak intawaa.

²⁸ Ninkiiwiih kihkentamowaan tahsh aaniin kaakii'ishi anaamimintc, miihsh kaakii'-ishiwinak eshi'-ayaanitc onahshowewininiwa'.

²⁹ Miitahsh kaakiih kihkentamowak kaawiin kekoon kii'ishihcikehsii kekii'onci tahkonintipan, kekii'onci nihsintipan kaye. I'i hsa kaakii'ishi anaamimintc enahshowenitc ehta kii'onciimakanini.

³⁰ Ahpii tahsh kaakiih kihkentamowak aaniin waahtootawintc ewiih kiimooci nihsintc wa'a inini, shemaak tahsh ninkii'-inentam ci'ishinisha'wak eshi ayaayan. Ninkii'-wiintamawimaa' tahsh kaye i'i kaamamishimikotc ciwiintamawimihk aaniin eshi anaamimikotc.”

³¹ Shimaakanihshak tahsh kii'ishihcikewak i'i kaakii'-inintwaa, ekii maaciinaawaatc Pwaalan mekwaa etipihkaninik ekii'-ishiwinaawaatc Antiihpatarihs (Antipatris) kaaicikaatenik ootena.

³² Weyaapaninik tahsh iki kaamihtohsewaatc shimaakanihshak kii'ashe kiiwewak ekii'-ishaawaatc shimaakanihshiiwikamikonk, iki tahsh wiin kaapimiwanepa'ikowaatc shimaakanihshak keyaapi okii'ani wiiciiwaawaan Pwaalan.

³³ Ahpii tahsh oko kaatakohshinowaatc Sehsariiyaink, okii'-miinaawaan oshipii'ikan ini kaatipentaminitc i'i ahki, miihsh kaye 'imaa kaa'ishi pakitinaawaatc Pwaalan eshi ayaanitc.

³⁴ Ahpii tahsh Piilikihs kaa'anamihtootc i'i oshipii'ikan okiih kakwecimaan Pwaalan aaniin eshinihkaatenik ahki wenci tipentaakosinitc. Ahpii tahsh kaawiintamawintc Silihshiya (Cilicia) ahkiink e'onci tipentaakosinitc,

³⁵ o'o tahsh okii'inaan: “Ninka noontaan ihsa aaniin ekoowanen ahpii takohshinowaatc ikiweniwak kaamamishimihkwaa.” Kii'ihkito tahsh Pwaalan cishi kanawenimimintc Heratan (Herod) okihci waahkaa'ikaniniink.