ᐃᔑᒋᑫᐎᓇᓐ 22 - Ojibwe Kihcimasina'ikan

¹ “Niici onciimaakanak, kehtaatisiyek tahsh, pisintawihshik o'o noonkom kaawii'-ininakook ewii'-naatamaasoyaan,” okii'inaa'.

² Ahpii tahsh enoontaakotc Hiiparoo (Hebrew) ishikiishwewinink e'ishi kanoonaatc, kaawiin kii'ani noontaatihsiiwa'. Miitahsh o'o kaa'ihkitotc:

³ “Keniin hsa Coo nintinow, ekiih tashi nihtaawikiyaan Taarsahs (Tarsus) ootenaank Silihshiya (Cilicia) ahkiink, o'omaa tahsh ootenaank Ceroosalamink (Jerusalem) ninkiih tashi ompik. Kameliyal (Gamaliel) ohsha ninkii kihkino'amaak, ekiih sanakaninik ekihkino'amawitc eshihsininik onahshowewin kaakii miinimintc kikehteya'aaminaapanii'. Wiinke tahsh kaye ninkii'-aahkwentaan ekiihkakwe na'entamiak Kishemanitoo taapishkoo kahkina kekiinawaa o'omaa kaa'ayaayek noonkom kaakiishikahk.

⁴ Ninkiih kakwaataki'aak hsa iki kaapiminisha'amowaatc ishaawin piinihsh ekii'-ani onci nihsakwaa, ekiih tahkonakwaa ihkwewak, ininiwak kaye. Miitahsh kaa'⁠ishi piinciwepinakwaa kipa'otiiwikamikonk.

⁵ Kihcianami'ewikimaa ohsha taatipaacimo ehtepwewak, iki kaye kahkina Coowi onahshowewininiwak. Miiwak ohsha iki kaakii miishiwaatc oshpii'ikanan cimiinimak kiwiici Coowiminaani' Timaaskahs (Damascus) ootenaank kaakii'-ayaanitc. Niin tahsh ninkii'-ishaa weti ekii'-nanantone'wakwaa ikiweniwak ekiih piinakwaa o'omaa Ceroosalamink cikakwaataki'intwaa piiwaapihkweyaapiink ekii'ishi mamaancikwahpisowaatc.”

Pwaal kiitipaatotank kaakii'ishikwehkaatisitc

⁶ “Kekaa tahsh e'ani naawahkwek pehsho e'ani pimi ayaayaan Timaaskahs ootenaank, mii 'i kwetahto kihcikiishikonk kaakii'onci aahkwahtek waahkaaya'ii i'imaa eshi ayaayaan.

⁷ Mihtahkamik tahsh ninkii'ishi pankihshin ekii'-noontawak awekwen ehkanooshitc e'ishitc: ‘Swaal, Swaal (Saul), wekonen wenci kakwaataki'iyan?’ ekii'ishitc.

⁸ ‘Awenen tahsh kiin, Tepencikeyan?’ ninkii'ishi nahkwehtawaa. Miihsh kaa'ishitc: ‘Niin Ciisahs Naasaritink (Nazareth) kaaonciiyaan, kaakakwaatakentami'iyan,’ ninkii'ik.

⁹ Ikiweniwak tahsh kaakii wiiciiwiwaatc okii'-waapantaanaawaa ewaahseyaanik, kaawiin tahsh okii'-noontawaahsiwaawaan awekwenan kaakiih kanooshimitc.

¹⁰ ‘Tepencikeyan, aaniin tahsh ke'ishihcikeyaan?’ ninkii'inaa. O'o tahsh ninkii'ik: ‘Pasikwiin, animaacaan ci'ishaayan Timaaskahs ootenaank, miitahsh weti kahkina keshi wiintamaakooyan aaniin eshi onahtamaakooyan ci'ishihcikeyan,’ ninkii'ik.

¹¹ Kaawiin tahsh ninkii'-waapihsii kaa'ahpiihci yaahkwahtek. Niwiiciiwaakanak tahsh ninkii'ishi sakinihkenikook Timaaskahs (Damascus) ootenaank.

¹² “Peshik tahsh inini Aananaayahs (Ananias) eshinihkaasotc, kwayahk kaakii'-anami'ehtawaatc Kishemanitoon, kaakiih kanawentank kaye onahshowewin, kaakiih kihtenimikotc kaye kahkina Coowa' i'imaa kaakii'-ishitaanitc.

¹³ Mii 'awe kaakiih pianta waapamitc ekiihpi niipawitc eshi ayaawak ekii'-ihkitotc: ‘Swaal (Saul) niici otepwehtamoo, taka miinawaa waapin,’ kii'ihkito. Shemaak tahsh ninkii'waap, ekii'-waapamak.

¹⁴ O'o tahsh kii'ani'-ihkito: ‘OKishemanitoomiwaan kikehteya'aaminaapaniik ohsha kikii'-onakimik cikihkentamowatc otinentamowin, ciwaapamimatc kaye kwayahk Otanohkii'aakanan, cinoontawimatc itahsh kaye kanoonimihk.

¹⁵ Mii hsa 'i ke'inanohkii'ihk citipaacimatc, citipaacimohtawatwaa kahkina awiyak aaniin kaakii'ishi waapantaman, aaniin kaye kaakii'-inihtaman.

¹⁶ Wekonen tahsh noonkom keyaapi payaahtooyan? Pasikwiin, cisiika'antaasoyan, cipehki'ikooyan kaye kimacitootamowinink onci, cikanoonatc kaaTipenciketc cinaatamawihk,’ ninkii'ik.”

Pwaal kiitipaatotank kaakii'ishi'antomintc cikakiihkimaatc kaaCoowiwihsinik

¹⁷ Miihsh kaa'‑ani ihkitotc: “Ahpii tahsh kaahpikiiweyaan o'omaa Ceroosalamink (Jerusalem), mekwaa e'anami'aayaan kihcianami'ewikamikonk, ishinamowin ninkii'-otihsikon.

¹⁸ Miitahsh kaakii waapamak kaaTipenciketc ekii'ishitc: ‘Weyiip, ninkoci o'omaa Ceroosalamink oncimaacaan aaniihsh kaawiin kika tepwetaakohsiik aaniin enaacimiyan,’ ninkii'ik.

¹⁹ O'o tahsh ninkii'inaa: ‘Tepencikeyan, wiinawaa iitok okihkentaanaawaa ekiihpapaa ishaawak anami'ewikamikohkaank ekiih kipa'wakwaa, kaye tahsh ekiih pahpahkihte'wakwaa iki kaatepwehtawihkwaa.

²⁰ Ahpii kaye kiiniiwano'ontc Istiipin (Stephen) kaakiih tipaacimihk, ninkii'-niipaw weti ekii'-minwaapantamaan kaakiih tootawintc, ekiih kanawentamowak okashkiikiiwinini i'i kaakii niiwana'okotc.’

²¹ O'o tahsh ninkii'ik: ‘Mii 'i ishimaacaan, waahsa ohsha kiwii'-ishinisha'on ci'anta waapamatwaa kaaCoowiwihsikwaa,’ ninkii'ik.”

²² O'o tahsh ekii'-ihkitotc, mii 'i kaawiin awahshime okiih pisintaakohsii' aaniin kaakii'inaatc. Miitahsh kaa'ishi maacii shaahshaakowenitc ekii'-ihkitonitc: “Ninkoci ishiwinihk, awinihsihk! Kaawiin inentaakwahsinini cipimaatisihpan!” kii'ihkitowa'.

²³ Kiihshaahshaakowewa' tahsh ekiih kiihcikowepishkaminitc okashkiikiiwinini, mihtaawank kaye ekii'-ayishpi wepinaminitc.

²⁴ Kihci shimaakanihshiiwikimaan tahsh kii'anoohkiiwan Pwaal cipiintikanintc shimaakanihshiiwikamikonk, ekii'-ihkitonitc cipahpahshanshe'ontc, cikakwecimintc kaye wekonen i'i nahke kaa'onci shaahshaakowaanikotc pemaatisinitc.

²⁵ Ahpii kaamamaancikwahpinintc ewii pahpahshanshe'ontc, Pwaal okii'inaan shimaakanihshiiwikimaan i'imaa kaaniipawinitc: “Inahte na inaahkonikewin cipahpahshanshe'ontipan awiya Oroomink wenci tipentaakositc, mahshi kota kaatipaahkonaahsiwintc cimihkikaatenikipan aaniin kaa'ishi mamaanshiitc?”

²⁶ Ahpii tahsh shimaakanihshiiwikimaan kaanoontaminitc o'o, okii'anta waapamaani kihci shimaakanihshiiwikimaan ekii'inaanitc: “Aaniin tahsh waa'ishihcikeyan? Oroomink ohsha a'a onci tipentaakosi,” okii'inaani.

²⁷ Kihci shimaakanihshiiwikimaan tahsh okiih pianta waapamikoon ekii'ikotc: “Wiintamawihshin, Oroomink ina kitoonci tipentaakos?” okii'ikoon. “Eha',” tahsh okii'ishi nahkwehtawaan.

²⁸ Kihci shimaakanihshiiwikimaan tahsh kii'ihkitowan: “Niipiwa' hsa niin ninkiih tipa'ike i'imaa Oroomink ci'onci tipentaakosiyaan,” okii'ikoon. Pwaal kii'ihkito: “Niin tahsh wiin ninkii'ishi nihtaawik i'imaa ci'onci tipentaakosiyaan,” okii'inaan.

²⁹ Iniweniwa' tahsh kaawiih kakwecimikohpan shemaak okiih pooni'ikoo'. Iniweniwan tahsh wiin kihci shimaakanihshiiwikimaan wiinke kiihsekisiwan ahpii enoontamintc Oroomink e'onci tipentaakositc aaniihsh piiwaapihkweyaapiin okii yaapacihtooni ekii'-mamaancikwahpinikotc.

Pwaal kiikanootamaasotc enaahsamiinitc otoonahshowe'

³⁰ E'ani waapaninik tahsh kihci shimaakanihshiiwikimaan okii'wiih kakwe kihkentamini wekonenini mayaa Coowa' kaakii'ishi anaamimikotc. Okiih pakitinikoon tahsh ekii'-inaahkonikenitc kihci'anami'ewikimaa', i'i kaye kahkina Coowa' otoonahshowewininiimini cimaamawapinitc. Pwaal tahsh kii'ishiwicikaniwi i'imaa ekii'ishi niipawi'intc enaahsamiinitc.