ᐃᔑᒋᑫᐎᓇᓐ 21 - Ojibwe Kihcimasina'ikan

Pwaal kii'ishaatc Ceroosalamink

¹ Ahpii tahsh kaa'nakanankitwaa ninkii'-maaciiyaahshimin, kwayahk ekii'-inaahshiyaank weti minihsink Koohs (Cos) kaaicikaatek. E'ani waapank tahsh Orootis (Rhodes) minihs ninkii'-otihtaamin, miihsh weti kaa'onci tepishkaayaank ekii'ishi pakamaahshiyaank Paatara (Patara) ootenaank.

² Ninkii'-mihkaamin tahsh i'imaa ciimaan ewii'ishi aahshawikaameyaahsink Piniihshiya (Phoenicia) ahkiink inahke, miihsh i'imaa kaa'ishi poosiyaank ekii'-maaciiyaahshiyaank.

³ Ahpii tahsh kaahtepaapantamaank Saaiparahs (Cyprus) minihs shaawanonk inahke ninkii'-ishipimi'-ayaamin piinihsh ekii'-otihtaahshiyaank Siiriya (Syria) ahkink. I'imaa tahsh Tayar (Tyre) ootenaank ninkii'ishi kapaamin ekii'-akwaasicikaatekin poosihtaahsonan.

⁴ Kaa'mihkawankitwaa tahsh i'imaa otepwehtamook, niishwaahso kiishik (7) ninkii wiiciayaamaanaanik. Miiwak itahsh iki otepwehtamook kaakii'-wiintamaakowaatc Kishemanitoon otAhcaahkoni cikakaansomaawaatc Pwaalan (Paul) ci'ishaahsinik Ceroosalamink (Jerusalem).

⁵ Ninkii'ani maacaamin tahsh ahpii e'ocihcihsek cimaacaayaank ekii'ani pimi'-ayaayaank. Kahkina Otepwehtamook, owiiwiwaa' kaye, iki kaye apinoonciishak ninkii'-ishi wiiciiwikonaanik saakicaya'ii ootenank. I'imaa tahsh ciikipiik ninkii'-ishi animihkohtaamin ekii'-anami'aayaank.

⁶ Ninkiih papooshoo'itimin tahsh, niinawint ekiih poosiyaank ciimaanink, wiinawaa tahsh wiin ekii'ani kiiwewaatc.

⁷ Ninkii'ani maacaamin tahsh Tayar ootenaank ekii'onci maaciiyaahshiyaank, weti ekii'ishi pakamaahshiyaank Toolimeyihs (Ptolemais) ecikaatek ootena. Ninkiih pooshoo'aanaanik tahsh otepwehtamook i'imaa eyaawaatc, peshiko kiishik tahsh ninkii'-wiiciayaamaanaanik.

⁸ E'ani'-waapank tahsh ninkii'ani maacaamin ekii'ani takohshinaank Sehsariiya (Caesarea) ootenaank ecikaatek. Ninkiih piintikewaamin tahsh Pilap (Philip) Ominwaacimoowinini owaahkaa'ikanink ekii'-wiiciayaamankitc. Mii wa'a peshik inini kaakii'-niishwaahciwaatc (7) kaakii'-inakimaawintwaapanen cinaakacihtoowaatc miicim i'imaa Ceroosalamink.

⁹ Wa'a tahsh inini kiiniiwiwa' otaanihsa' e'oshkiniikihkwewinitc mahshi ewiitikehsinik kii'ishi miinikoowisiwa' cikanootamawaanitc Kishemanitoon.

¹⁰ Niipiwa' tahso kiishik i'imaa ninkii'-ayaamin. Peshik inini kaakanootamawaatc Kishemanitoon Aakapahs (Agabus) e'ishinihkaasotc ninkii'-otihsikonaan Cootiiya (Judea) ahkiink ekiihpi onciitc.

¹¹ Ekiihpi naasihkawiyamintc tahsh okii'-otaahpinaan Pwaalan (Paul) okihcihpisonini ekiih tahkopitootc ositan, oninciin kaye. Miihsh o'o kaa'ihkitotc: “O'o hsa ihkitowan Kishemanitoo otAhcaahkwan, mii 'owe ketootaakotc Coowa' Ceroosalamink (Jerusalem) eyaanitc kaatipentank o'o kihcihpison, ci'ishi miikiwaaniwitc citepinikotc kaaCoowiwihsinik citahkonikotc,” kii'ihkito.

¹² Enoontamaank tahsh o'o, iki kaye kaakii'-ayaawaatc i'imaa nintaanakiih kakwe kashkimaanaan Pwaal (Paul) ci'ishaahsik weti Ceroosalamink.

¹³ O'o tahsh kii'ishi nahkwehtam: “Wekonen wenci'-ishihcikeyek emawiyek, emaanentami'iyek kaye. Kaawiin wiin ehta nintishi kiishentansii cimamaancikwahpinikooyaan weti Ceroosalamink, pisaan hsako kaye ci'onci nihsikooyaan owiinsowinink kaaTipenciketc Ciisahs,” kii'ihkito.

¹⁴ Ekiih waapamankitc tahsh, intawaa ninkiih poonimaanaan ekii'-ihkitoyaank: “KaaTipenciketc otinentamowin tawii'-ishihseni,” ninkii'-ihkitomin.

¹⁵ Kinweshiihsh tahsh iko weti kaa'ishkwaa'-ayaayaank, ninkii'-oshiihtaamin ekii'-ishaayaank Ceroosalamink (Jerusalem).

¹⁶ Aaninta tahsh otepwehtamook Sehsariiya (Caesarea) wenciiwaatc ninkii'-wiiciiwikonaanik, ekii'-ishiwishiyamintwaa eshi ayaanitc ini Nehsanan (Mnason) ciwiiciayaamimankitc. Saaiparahs (Cyprus) kii'onciiwan aasha kinwesh ekii'onci tepweyentaminitc.

Pwaal kiiantawaapamaatc Ciimisan

¹⁷ Ahpii tahsh kaahtakohshinaank Ceroosalam (Jerusalem) ootenaank, otepwehtamook kii'minwentamook e'otihsankitwaa.

¹⁸ E'ani waapank tahsh Pwaal (Paul) ewiiciiwankitc okiih piintikawaan Ciimisan (James), kahkina kaye kaakii'-niikaanentaakosinitc otepwehtamoo' i'imaa kii'ayaawa'.

¹⁹ Okiihpooshoo'aa' tahsh weweni ekii wiintamawaatc aaniin Kishemanitoon kaa'ishihcike'aanitc kaaCoowiwihsinik otanohkiiwinink onci.

²⁰ Ahpii tahsh enoontaminitc okii'-nanaahkomaani Kishemanitoon, o'o kaye ekii'ikotc: “Niiciinaan Pwaal, inashke ehpiicini niipiwa'-mitaahswaahk Coowak pemi tepwehtamowaatc, weweni tahsh kaye kakwe ishihcikewak enahtenik onahshowewin.

²¹ Kiihwiintamawaawak tahsh kiin e'ishi kihkino'amawatwaawen kahkina Coowak kaa'ayaawaatc eshi ayaanitc kaaCoowiwihsinik cinakatamowaatc Moosihsoon (Moses) otoonahshowewinini. E'ishi kihkino'ikewanen kaye cikihkinawaatashakeshwaahsikwaa oniicaanihsiwaa', ci'ishihcikehsikwaa kaye Coowi'-ishihtwaawin.

²² Aaniin tahsh keishihcikenaaniwank? Kehcinaac maawiin tanoontamook ekiih takohshinan.

²³ Ishihciken tahsh kaa'ikooyan. Niiwin ohsha nintayaawaanaanik ininiwak ekiihkihci ahshotamawaawaatc Kishemanitoon kekoon.

²⁴ Maacaan ishiwiiciw oko, kekiin ciwiitoohkaasoyan kaashi anami'e pehki'itisonk. Kaye tahsh citipa'amowatc pehki'itisowaatc, cipashkoshamowaatc kaye ohtikwaaniwaan. Miihsh kahkina cikihkentamowaatc ehtepimikoohsiwan iinsan i'i kahkina kaa'⁠inaacimikoowatc. Kekiin itahsh piko ewiih tootaman, ehkanawentamowatc Moosihs otoonahshowewin.

²⁵ Ikiweniwak tahsh wiin kaaCoowiwihsikwaa kaatepwehtamowaatc ninkii'-oshipii'amawaanaanik ekii'-ishi onentamaank cipapaamentansikwaa miicim kaapakitinamawimintc manitoohkaana'. Cipapaamentansikwaa kaye miskwiini, kekoon kaye kaakipinewe'oocikaatenik, cinoocihtoohsikwaa kaye pihshikwaatisiwin,” mii'i kaa'ikotc.

²⁶ Miihsh e'⁠ani waapaninik Pwaal kaakii'-ishiwinaatc i'i ininiwa' kewiin ekii'-wiitoohkaasotc e'⁠anami'e pehki'itisonitc. Kiihpiintike tahsh anami'ewikamikonk ekiih tipaacimotc aaniin ahpii ishi kiishikaninik keishkwaahsenik opehki'itisowiniwaa, ahpii kaye kepakitinaasoohtamawaatc entahso peshikonitc kaakii'-wiiciiwikotc.

Pwaal kiitahkonintc i'imaa Kihcianami'ewikamikonk

²⁷ Ahpii tahsh kekaa e'⁠ani'-ishkwaahsenik niishwaahso kiishik, Coowa' Eshiya (Asia) ahkiink kaakii'-onciinitc okii'-waapamikoo' i'imaa anami'ewikamikonk e'ayaatc. Okii'-ompwe'aani tahsh kaakiih paahtiinonitc awiya', miihsh kaa'ishi otihtinikotc,

²⁸ o'o ekii'ishi shaakowenitc: “Mii ohsha wa'a inini misiwe kaapapaa kihkino'amaawaatc kahkina awiya' cimacenimimintc Isriyala' (Israel), cimacencikaatenik kaye Moosihsoon (Moses) otoonahshowewin, o'o tahsh kaye kihcianami'ewikamik. Pehkihsh tahsh kaye ekiih piintikanaatc Kariihka' (Greek) o'omaa kihcianami'ewikamikonk, ekii'-wiinentaakohtoonitc o'o kaatanentaakosinitc Kishemanitoon,” kii'ihkitowa'.

²⁹ Aaniihsh kii'waapamaawaakopan i'imaa ootenaank Pwaalan e'wiiciiwaanitc Caroohpimahsan (Trophimus) Ehpihsahs (Ephesus) ootenaank kaakii'-onciinitc, miihsh iinsan kaa'inentamowaatc ekiih piintikanaanitc i'imaa kihcianami'ewikamikonk.

³⁰ Kahkina tahsh i'imaa ootenaank awiyak kaakii ayaawaatc kii'ompwe'aawak. Kiimaamawahpa'itiwak tahsh ekii'-otihtinaawaatc Pwaalan, kihcianami'ewikamikonk ekii'onci saakici taapiipa'aawaatc. Shemaak tahsh ishkwaanteman kiihkipa'ikaatewan.

³¹ Mekwaa tahsh ekakwe nihsaawaatc, kii'awi wiintamawaawaan Oroomink (Rome) kaaonciinitc tepenimaanitc shimaakanihshaa' ekii'inimintc misiwe Ceroosalamink (Jerusalem) ekii'-ompwehkamikisinaaniwaninik.

³² Shemaak tahsh okiih pimaaciinaani aaninta shimaakanihsha', shimaakanihshiiwikimaa' ekiihpi takohshininitc eshi'-ayaawaatc. Ewaapamaawaatc tahsh shimaakanihshiiwikimaan, shimaakanihsha' kaye, okiih pooni'aawaan Pwaalan epahpahkihte'waawaahpan.

³³ Shimaakanihshiiwikimaa tahsh okii'-naasihkawaan Pwaalan ekiih tahkonaatc, ekii'-anoohkiitc cimamaancikwahpisonitc piiwaapihkweyaapiin ciyaapataninikin. Kiihkakwetwe kaye awenenan tenowinitc, aaniin kaye kaa'ishihcikenitc.

³⁴ Pepahkaan tahsh kii'ishi shaahshaakowewa' kaakiih paahtiinonitc. Ahpii tahsh emihkansik tepwe kekoon kaa'onci ompwehkamikaninik, kii'anoohkii Pwaalan ci'ishiwinimintc shimaakanihshiiwikamikonk.

³⁵ Ahpii tahsh e'ocihciwinaawaatc kaashi maacii yaantawemoninik tahkohkiiwinan, kii'ishinaakwanini shimaakanihshak cipimiwinaawaatc onsaam aaniihsh kiiyaahkwentaakosiwa' kaakiih paahtiinonitc.

³⁶ Kaakiih paahtiinonitc tahsh ehpiminisha'ikenitc kii'ishi shaakowewa': “Maaciinihk ci'awi nihsek,” okii'ihkitowa'.

Pwaal kiinaatamaasotc

³⁷ Pwaal (Paul) kekaa e'ani piintikanikotc shimaakanihsha' shimaakanihshiiwikamikonk, okiih kanoonaan shimaakanihshiiwikimaan ekii'inaatc: “Konike kekoon kitaa'inin?” okii'inaan. Miihsh kaa'ikotc: “Kikihkentaan ina Kariihk (Greek) ishikiishwewin?

³⁸ Kaawiin iinsan kiin kitaawihsiinaatok a'a Iicipihshiwinini (Egyptian) kaakiihpi'-ompwehkamikisitc mewisha cimiikaanimintc wekimaawinitc, kaye tahsh kaakii'-ishiwinaatc pikwatahkamik niiwiink mitwaahswaahk (4,000) kaanihshiweshkinitc,” okii'ikoon.

³⁹ Pwaal o'o okii'inaan: “Niin ohsha Coo nintinow. Taarsahs (Tarsus) ootenaank Silihshiya (Cilicia) ahkiink nintooncii. Kihci'-inentaakwan ootena kaa'onciiyaan. Taka pakitinihshin pisaan cikakanoonakwaa kaapaahtiinowaatc,” okii'inaan.

⁴⁰ Ahpii tahsh kaahpakitinikotc shimaakanihshiiwikimaan cikakitotc, Pwaal kiiniipawi tahkohkiiwinink ekii'-inaahta'amawaatc cinoontaatihsinik; ahpii tahsh kaanoontaatihsinik okiih kanoonaa' Hiiparoo (Hebrew) ishikiishwewin ekii yaapacihtootc: