ᐃᔑᒋᑫᐎᓇᓐ 2 - Ojibwe Kihcimasina'ikan

Kishemanitoo otAhcaahkwan kiiotihsikowaatc otepwehtamook

¹ Ahpii tahsh e'ocihcihsenik i'i Pentikwaast (Pentecost) Kiishikan kaakii'-icikaatenik, peshikwanonk kahkina kii'ishi maawaci'itiwak otepwehtamook.

² Ketahto itahsh kekoon kihcikiishikonk kiihpi'onci noontaakwan taapishkoo ekihci matwenoowek ekii'-inihtaakwahk, misiwe i'imaa waahkaa'ikanink kiimooshkinehtaakwan kaakii'ishi apiwaatc.

³ Miitahsh kaakii'-waapantamowaatc kekoonan taapishkoo ishkotewitenaniwimaank e'ishinaakwaninikin, eniikateshkaanikin. Pepeshik tahsh okiihpi naasihkaakonaawaa ekiih saamishkaakowaatc kaakiih tahshiwaatc.

⁴ Kahkina tahsh okii'-mooshkineshkaakowaan Kishemanitoon otAhcaahkonini. Miitahsh kaa'ishi maacii kakitowaatc pepahkaan ekii'-ishikiishwewaatc Kishemanitoon otAhcaahkoni ekii'-miinikowaatc o'o cishi kashkihtoowaatc.

⁵ I'imaa tahsh Ceroosalamink (Jerusalem) kii'ishitaawa' Coowa' (Jews) ekii'-anami'ewaatisinitc misiwe e'onciinitc eshi pepahkaanwewaanakisinitc pemaatisinitc o'omaa ahkiink.

⁶ Ahpii tahsh enoontaaminitc aaniin enihtaakwaninik, pemaatisinitc kaakiih paahtiinonitc kiimaamawi piishaawa' ekii'-wawaanentaminitc. Aaniihsh kahkina kaakiih tahshinitc okii'-noontaakowaa' e'ishikiishwewaatc tipinawe otishikiishwewininiink.

⁷ Kahkina hsa ko kii'maamahkaatentamoo', ekii'-wawaanentaminitc e'ihkitonitc: “Kaawiin ina kahkina okoweniwak Kaalaliiwininiwak (Galilee) kaakaakiikitowaatc?

⁸ Aaniin itahsh wenci noontawankitwaa e'ishikiishwewaatc kahkina okoweniwak pepahkaan kiinawint tipinawe kaaishi kiishweyank?

⁹ Pepahkaan iitok kita'ayonciiwaamin: Paarhtiya (Parthia), Miitiya (Media), Iilam (Elam), iki kaye kaakii'-onciiwaatc Mehsopohtemiya (Mesopotamia), Cootiiya (Judea), Kaahpatoohsha (Cappadocia), Paantahs (Pontus), Eshiya (Asia),

¹⁰ Pariciya (Phrygia), Paampiliya (Pamphylia), Iicip (Egypt), i'imaa kaye pepahkaan kaashi ayaaniwank pehsho Saairiini (Cyrene) ootenaank Lipiya (Libya) ahkiink. Iki tahsh kaye Oroomink (Rome) kaakiihpi onci kiiyootewaatc. Iki kaye aaninta Coowak kaakiih kwehkinintwaa cipiminisha'amowaatc Coowi anami'aawin.

¹¹ Aaninta tahsh Kariihtink, Arepiya ahkiink e'onciiyank. Wawiinke tahsh kinisitohtawaanaanik mayaa kitishikiishwewininaanink e'ishi tashintamowaatc Kishemanitoon eshi mashkawihcikenitc,” kii'ihkitowak.

¹² Kahkina tahsh kiimaamahkaatentamook ekii'-wawaanentamowaatc kaye. Miitahsh kaa'ihkitowaatc: “Kaanaka wekotokwen o'o wenci ishihsekwen?”

¹³ Aaninta tahsh kiihpaahpinotaakewak ekii'-ihkitowaatc: “Onsaam ohsha niipiwa' minihkwewak oshki shoominaapooni,” kii'ihkitowak.

Piitar kaakii'ishikakiihkwetc

¹⁴ Piitar (Peter) tahsh kiihpasikwii kaakii wiiciiwaatc i'i kotak mitaahshipeshik ishinisha'waakana'. Kiihkishiiwe tahsh o'o ekii'inaatc kaakiih paahtiinonitc: “Kiinawaa niiciCoowak, kahkina kaye o'omaa Ceroosalamink (Jerusalem) eshitaayek! Weweni pisintawihshik o'owe kaawii'wiintamawinakook.

¹⁵ Kaawiin ohsha kiiwashkwepiihsiwak okoweniwak kiiwashkwepiiwak kaa'inenimekwaa. Payish iitok inaa shaankahso tipa'ikaneyaa ehkishepaawakahk.

¹⁶ Mii hsa 'oweni kaa'ihkitokopanen Coowal (Joel) Kishemanitoon kaakiih kanootamawaatc:

¹⁷ ‘Tayishihse ishkwaac anikakiishikahk, ihkito Kishemanitoo, cisiikinamawakwaa nintAhcaahkwan kahkina pemaatisiwaatc. Kikosihsiwak, kitaanihsiwak itahsh kaye oka kanootamawaawaan Kishemanitoon kitooshkiniikimiwak tahsh kekoonan oka waapantaanaawaan ishinamowinan, kikihciaya'aamiwak tahsh wiin tapawaacikewak.

¹⁸ Iki hsa kaye kitanohkii'aakanak kaaininiiwiwaatc, kaaihkwewiwaatc itahsh kaye, weti anikakiishikaninik ninka miinaak kahkina cinaasihkaakowaatc nintAhcaahkwan. Kahkina tahsh oka kanootamawaawaan Kishemanitoon.

¹⁹ Ninka ishihcike tahsh kekoonan cimaamahkaasinaakwahkin ishpimink tapahsaya'ii kaye ahkiink. Tawaapancikaate miskwi, ishkote, takihci'-inaapahte tahsh kaye.

²⁰ Kiisihs tahsh takashkiitipihki'aa, tipihkikiisihs miskwiink tashi miskonaakosi. Mii'iwe tahsh keishiwepahk cipwaa ocihcihsenik ahpii kaaTipenciketc okiishikanom kaawiikihci'-inentaakwaninik, kaawiimashkawentaakwaninik kaye.

²¹ Ta'ishihse tahsh, awenen iko kekanoonaatc kaaTipencikenitc cinaatamaakotc tapimaaci'aa.’

²² “Kiinawaa Isriyalak (Israel), pisintamok kaawii'-ihkitoyaan: Ciisahs (Jesus) Naasaritink (Nazareth) kaakii'-onciitc ininiink kii'inentaakosi ekii'-onaapamikotc Kishemanitoon. Kishemanitoo tahsh kikiih peteyaapanta'ikowaa ekii'-onaapamaatc Ciisahsoon, ekii aapaci'aatc cimaamahkaacihcikenitc, cimamaantaawihcikenitc, cikihkinawaacihcikenitc kaye. Kahkina iitok kikihkentaam o'o.

²³ Kishemanitoo iitok niiyak kii'ishi onentamokopan, niiyak kaye kiikihkentamokopan pisaan cikaahcitinimintc. Kiinawaa tahsh kaakii'-akosaka'omek aashiteyaahtikonk ekii'-nihsimek, ekii'-wiici'inekwaa iki ininiwak peminisha'ansikwaa eshi antawentaminitc Kishemanitoon.

²⁴ Kishemanitoo tahsh okiihkiiwe pimaatisii'aan, ekiih kipihtinank cikakwaataki'ikohsinik i'i nipowin. Aaniihsh kaawiin kekoon otaa kashki'ikohsiini cikihciwinikonitc i'imaa nipowinink.

²⁵ Tepit (David) tahsh wiin kii'ihkitokopan ehtashimaatc onoweniwan: ‘Nikanawaapamaa kaaTipenciketc mooshak e'oncishkawishkawitc. Nikihcinihkink inahke e'ishi wiici'itc, kaawiin tahsh awiya ninka wahkawinikohsii.

²⁶ Miitahsh i'iwe wiinke misiwe ninte'ink wenci moocikentamaan, maawac iko ehciihkentamaan o'o kaakakitoyaan. Mihsawaa piko niwiiyaw cinipoomakahk, tepwe hsa ninkehcina'aa Kishemanitoo i'iwe ci'ishihcike'itc.

²⁷ Kaawiin iitok awaac kikaishi nakashihsii anaamahkamik weti onipook kaaishi ayaawaatc. Kaawiin kaye kiin Kishemanitoo kika pakitinihsii kaana'entami'inaan citashiwanaatahk niwiiyaw i'imaa nipowinink.

²⁸ Kikiih kihkentamoo'ish keni'ina'atooyaan tepwe cipimaatisiyaan, wiinke hsa kika tepimoocikentamo'ish e'wiiciiwiyan.’

²⁹ “Niici otepwehtamook, oncita iko kiwii'-wiintamawininim kikehteya'aaminaapan kaakiih kihtentaakositc Tepit (David) ekii'-nipotc, kaye tahsh ekii'-ninkwa'ontc. Kaakii'-ishi na'inintc keyaapi o'o ishiahpii e'ayaanik o'omaa.

³⁰ Kewiin iitok kiihtinowi kaakanootamawaatc Kishemanitoon. Okiikihkentaan kaakii'ishi ahshotamaakotc Kishemanitoon, peshik opiiwesiiman ciani kihciokimaawinitc, taapishkoo Tepit kaakii'-ishikimaawitc.

³¹ Tepit niiyak okii'-waapantaan aaniin waa'ishihcikenitc Kishemanitoon. Miitahsh kaakiih tashintank keshi kiiwe pimaatisi'imintc ini oPimaaci'iwen Kishemanitoonk kepi'-onciinitc. Miitahsh Tepit kaakii'-ihkitotc: ‘Kaawiin kii'nakanaahsii cinehpiciayaatc anaamahkamik eshi ayaanitc kaaniponitc, kaawiin itahsh kaye owiiyaw tawanaatahsinini.’

³² Miitahsh Kishemanitoon kaakiih kiiwe pimaatisi'ikotc. Niinawint iitok ninkii waapamaanaan a'a Ciisahs.

³³ Miitahsh kaakii'-ompinintc i'imaa nahke okihcinihkiniink Kishemanitoon cishikihci inentaakositc. Miihsh i'i kaakii'-miinikoowisitc Weyoosimimintc otAhcaahkoni kaakii ahshotamawintipan. Miitahsh i'iweni omiinikoowin kaasiikinank kiinawaa noonkom kaawaapantamek, kaanoontamek kaye.

³⁴ Kaawiin iitok wiin Tepit (David) kihcikiishikonk kaakii'-ishi ompishkaatc, o'owe tahsh wiin kii'ihkito: ‘KaaTipenciketc okii'inaan ini kaaTipenimimitc: I'imaa ishinamatapin ninkihcinihkink inahke,

³⁵ paanimaa hsa kika ishi'in cishaakooci'atwaa kaanishkenimihkwaa.’

³⁶ “Taka tahsh kahkina kiinawaa Isriyalak (Israel) kaatinowiyek kehcinaac kihkentamok, mii 'awe Ciisahs kaatashimak kaakii'-akosaka'wek aashiteyaahtikonk, okii'-onahsikoon Kishemanitoon cimaamawi Tipenciketc, wiin kaye okii'-onaapamikoon ciPimaaci'iwetc.”

³⁷ Aahpii tahsh pemaatisiwaatc enoontamowaatc o'o, kii'onci mikoshkaatentamook ekii'inaawaatc Piitaroon, i'i kaye kotak ishinisha'waakana': “Niici otepwehtamoominaanik, aaniin tahsh keishihcikeyaank?”

³⁸ Piitar (Peter) tahsh okii'ishi nahkwehtawaa': “Kwehkipimaatisik, siika'antaasok itahsh kaye kahkina kaatahshiyek otishinihkaasowinink Ciisahs, cipoonencikaatekin kimacitootamowiniwaan; miitahsh i'i cimiinikoowisiyek Kishemanitoo otAhcaahkwan.

³⁹ Mii 'oweni Kishemanitoo kaakii'-ahshotamawinek ewiimiininek, i'i kaye kiniicaanihsiwaa', i'i kaye waahsa eyaanitc. Kahkina hsa ko awiya' kaaTipenciketc kiKishemanitoominaan ke'antomaatc cipinaasihkaakotc,” kii'ihkito.

⁴⁰ Niipiwa' tahsh Piitar kii'ayihkito ekii'-ayenkwaamimaatc ekiih kakwe kashkimaatc: “Tapasiinotamowahk otishiwepisiwiniwaan kaamacaatisiwaatc, ci'-ishihsehsiwek keshihsewaatc.”

⁴¹ I'i tahsh kaakiih tepwehtaakotc ehkitotc kiisiika'antaasowa' nihsink mitaahswaahk (3,000) ekiih tashinitc. Miihsh kaa'ishi takwakimimintc i'imaa eshi ayaanitc otepwehtamoo'.

⁴² Miitahsh iko mooshak i'imaa kaa ayaanitc ekiih pisintaminitc eshi kihkinoamaakewaatc ishinisha'waakanak. Ekii'ishi wiitoohkaasonitc itahsh kaye eshi wiihsininaaniwaninik pehkihsh ekii'-anami'enaaniwaninik.

Otepwehtamook kaakii'ishiwaawiici'itiwaatc

⁴³ Kahkina tahsh pemaatisiwaatc kiimaamahkaatentamook ishinisha'waakana' niipiwa' ekiih tootaminitc maamahkaacihcikewinan, ini kaye kihkinawaacihcikewinan.

⁴⁴ Kahkina tahsh otepwehtamook kiimaamaawi'itiwak. Kahkina kaye otaya'iimiwaan pehpeshikwan ekii'ishi maamawihcikewaatc.

⁴⁵ Okii'-ataawaakenaawaan tahsh otaya'iimiwaan, tepentamowaatc kaye. Miitahsh kaa'ani ishi ayaanihke maamaawata'oonitiwaatc aaniin hsa ko awiyan eshi noontehsenitc.

⁴⁶ Entahsokiishik itahsh kii'nihtaa maawaci'itiwak piincaya'ii kihcianami'ewikamikonk. Otaawiniwaank ekiihtashi pahkwepinaatc pahkweshikanan ekii'-maamawi wiihsiniwaatc, wiinke ekiih ciihkentamowaatc ote'iwaank.

⁴⁷ Ekii'-nanaahkomaawaatc Kishemanitoon, kahkina kaye awiya' ekii'-minwaapamikowaatc. KaaTipenciketc tahsh okii'ani takwakimaa' i'i entahsokiishik kaakiih pimaaci'imintc.