ᐃᔑᒋᑫᐎᓇᓐ 19 - Ojibwe Kihcimasina'ikan

Pwaal kiitipaacimaatc Ciisahsoon Ehpihsahs ootenaank

¹ Mekwaa tahsh Apaalahsan (Apollos) e'ayaanitc Kwaarint (Corinth) ootenaank, Pwaal (Paul) kiihshaaposhkaa i'imaa ahkiink, Ehpihsahs (Ephesus) ootenaank tahsh kii'ishi takohshin. Okii'-mihkawaa' tahsh aaninta otepwehtamoo'.

² Miitahsh kaa'inaatc: “Kikii'-miinikoowisim ina Kishemanitoo otAhcaahkwan ahpii kiihtepweyentamek?” Miihsh kaa'ikotc: “Kaawiin kanake ninoontansiimin e'ayaanikwen Kishemanitoo otAhcaahkwan,” okii'ikoo'.

³ Okii'ishi kakwecimaa' itahsh: “Aaniin tahsh kaa'ishi siika'antaakooyek?” “Cwaan osiika'antaakewinink,” okii'ikoo'.

⁴ Pwaal tahsh okii'inaa': “Cwaan hsa okiih siika'antawaa' i'i kaakiih kwehkiinotaminitc omacitootamowinini. Cwaan okii wiintamawaa' pemaatisinitc kii'ishkwaa'-ayaatc citepweyenimaanitc ini kepi takohshininitc, Ciisahsoon tahsh ini kaakii'inaatc,” okii'inaa'.

⁵ Ahpii tahsh o'o enoontaminitc, kiihsiika'antaasowa' owiinsowininiink kaaTipencikenitc Ciisahsoon.

⁶ Ahpii tahsh Pwaal kaahsaaminaatc okii'-otihsikoni Kishemanitoon otAhcaahkoni, miihsh pepahkaan kaaishi ayiishikiishwenitc, ekii'-wiintamaakenitc kaye Kishemanitoon otihkitowinini.

⁷ Ninkoci ko kiimitaahshiniishiwa' (12) tahsh i'i ininiwa'.

⁸ Pwaal kiihpiintike Coowi anami'ewikamikonk. Nihsokiisihs (3) tahsh minihk okiihkakwe shaakoosomaa' ekiih tashintank enahtenik Kishemanitoon otipencikewinini.

⁹ Aaninta tahsh kiimamayehciwiwa', ekiih shashiipihtaminitc kaye, mohshe tahsh eshi paahtiinonaaniwaninik okii'-maci'itamini wenci naasihkawimintc inahke Kishemanitoon. Miitahsh kaa'ishi nakanaatc, ekii'-maaciinaatc otepwehtamoo'. Entahso kiishik tahsh kiihtashi kakanooshiwe i'imaa waahkaa'ikanink Tairaanahsan (Tyrannus) kaakii nihtaa tashi kihkino'amaakenitc.

¹⁰ Niisho pipoon tahsh i'i kii'ishihse, kahkina tahsh Coowak, Kariihk (Greek) kaye tino kaakii'-ishitaawaatc i'imaa Eshiya (Asia) ahkiink okii'-noontaanaawaa otihkitowinini kaaTipencikenitc.

Siipa okosihsa' ehtashinsonitc

¹¹ Kishemanitoo tahsh niipiwa' maamahkaacihcikewinan kii'ishihcike Pwaalan (Paul) ekii'-aapaci'aatc.

¹² Naapihkaakanenhsa', aakoopisonan kaye kaakiih saamishkaakotc Pwaal kii'ishiwitawaawa' otaahkosii', miihsh kaakii'-nakanikonitc enaahpinenitc, maciahcaahkwa' kaye ekii'-nakanikonitc.

¹³ Aaninta tahsh Coowak kiihpapaami ayaawak ekiihpapaa saakicinisha'waawaatc maciahcaahkwa'. Okiihkakwe aapacihtoonaawaa owiinsowinini kaaTipencikenitc Ciisahsoon cikashki'aawaatc iniweniwan kaakiih kikishkaakonitc maciahcaahkwan, o'o ekii'-ihkitowaatc: “Kitoonci kanoonin Ciisahs owiinsowinink, Pwaal kaakakiihkwaanaatc, ci'onci saaka'aman i'imaa,” kii'ihkitowak.

¹⁴ A'a tahsh Coowianami'ewikimaa Siipa (Sceva) kaakii'-ishinihkaasotc, okosihsa' kaakii'-niishwaahcinitc (7) o'o kii'ishihcikewa'.

¹⁵ Maciahcaahkwan tahsh okii'ikowaan: “Ciisahs ninkihkenimaa, Pwaal kaye ninkihkenimaa. Awenenak tahsh kiinawaa?” okii'ikowaan.

¹⁶ Iniweniwan tahsh ininiwan kaakiih kikishkaakonitc maciahcaahkwan okii'-otihtinikowaan ekii miikaanikowaatc, kahkina ekiih shaakooci'ikowaatc. Waahkaa'ikanink tahsh kii'onci maaciipa'iwewak ekii maahkaahpinanikowaatc, wiinke ekii'-waahsaahkona wepinikowaatc.

¹⁷ Kahkina tahsh Coowak, kahkina kaye kaaCoowiwihsikwaa Ehpihsahs (Ephesus) ootenaank kaa'ayaawaatc enoontamowaatc o'o, wiinke kiihsekisiwak. KaaTipenciketc Ciisahs tahsh owiinsowin kiikihtencikaateni.

¹⁸ Niipiwa' tahsh kaakiih tepwehtaminitc kiihpiishaawa' mohsheya'ii ekiih tipaatotaminitc, ekii'-wiintaminitc kaye aaniin kaakii'nihtaa ishihcikenihpan.

¹⁹ Niipiwa' kaye kaakii noocihtoonitc mitewiwin okii maamawi piitooni omasina'ikanini ekiih sahka'aminitc mohsheya'ii. Ekiih sakahkakintamowaatc tahsh enakintenikin ini masina'ikanan, naanimitana tahsink mitaahswaahk 50,000 tahso waapaapihko shooniyaanhs kii'ishihseniwan.

²⁰ Miitahsh o'o nahke kaaTipenciketc otihkitowin kaa'anishi awahshime misihteshkaanik, niipiwa' kaye pemaatisinitc ekii'ani tepwehtaminitc.

Kiikihci'-inahkamikisinaaniwank Ehpihsahs ootenaank

²¹ O'o tahsh kaahpoonihsenik Pwaal (Paul) kii'inentam ewii'-ishaatc Ceroosalamink (Jerusalem) ewii'ani shaaposhkaatc Maahsitooniya ahkiink (Macedonia) kayesh Ahkeya (Achaia) ahkiink. O'o tahsh kii'ihkito: “Ahpii weti kii'ishkwaa ishaayaan, miihsh eshinaakwahk cikii'-waapantamaampaan Oroom (Rome) ootena,” kii'ihkito.

²² Niishin itahsh kaakii'-wiici'ikotc, Timahtiin (Timothy), ini kaye Iiraastahsan (Erastus) okii'-ishinisha'waa' Maahsitooniyaa ahkiink ci'ishaanitc. Wiin tahsh keyaapi kii'ayaa i'imaa Eshiya (Asia) kihci ahkiink.

²³ Miitahsh i'i ahpii kaakii'maacii ompwehkamikahk Ehpihsahs ootenaank i'i onci kaashi naasihkawintc inahke kaaTipenciketc.

²⁴ Peshik inini kii'ayaa i'imaa Timiitariyahs (Demetrius) ekii'-ishinihkaasotc ekiih piiwaapihkohkewi ininiiwitc. Waapaapihko shooniyaa waapihkonk hsa okii'onci oshitoonan enami'ewikamikoonhsan ekii'-ishinaakwaninikin taapishkoo anami'ewikamikonk kaakiih tashi anami'ehtawimintc ihkwewi manitoohkaanan Aartimahs (Artemis) eshinihkaanimintc. Niipiwa' hsa i'imaa kii'onci kihci shooniyaahkewa' otanohkii'.

²⁵ Miihsh kaakii'-maamawi antomaatc i'i peshikwan inahke kaakii'-inanohkiinitc ekii'inaatc: “Kiinawaa, kikihkentaam iitok o'o anohkiiwin e'onci sasekaa kashkihcikeyank.

²⁶ Inashke tahsh kiwaapantaam, kinoontaam kaye, kaawiin wiin ehta 'omaa Ehpihsahs ootenaank, misiwe hsako Eshiya ahkiink, aaniin a'a inini Pwaal eshi shaakoosomaatc pemaatisinitc. Niipiwa' ehtepwehtaakotc i'i kaa'ihkitotc: ‘Oninciimaank kaa'onci oshi'intwaa kaawiin tepwe manitoowihsiiswak,’ eihkitokwen.

²⁷ Kaawiin wiin ehta kitanohkiiwininaan naniisaanentaakwahsinoon noociko ci'icikaatek, i'i hsa kaye anami'ewikamik kaawiin kekoon ta'ahpiihtentaakwahsinoon kaatashi anami'ehtawintc ihkwewi manitoo Aartimahs eshinihkaasotc. Kewiin tahsh a'a ihkwewi manitoo enami'ehtawintc misiwe Eshiya ahkiink, misiwe kaye ahkiink, kaawiin kekoon tani ahpiihtentaakosihsii,” okii'inaa'.

²⁸ Ahpii tahsh enoontaminitc o'o kiihkihci nishkaatisiwa', o'o ekii'ishi shaakowenitc: “Kihci'inentaakosi Aartimahs Ehpihsahsink kaatashi anami'ehtawintc,” kii'ihkitowa'.

²⁹ Misiwe tahsh i'imaa ootenaank kii'ayaa wawaanentamowin. Miitahsh kaa'ishi otihtinaawaatc Keyaahsan (Gaius), ini kaye Eristaarhkahs (Aristarchus) kaakii'-onciinitc Maahsitooniyaa ahkiink, Pwaalan owiiciiwaakanini. Weti tahsh okii'ishi kaahkaanciwepinaawaa' kaakii'ishi nihtaa maamawishkaank otaminowikamikonk.

³⁰ Pwaal tahsh kii'inentam cikiih piintikehpan i'imaa eshi ayaaniwaninik ewii'awi'-inaahsamikaapawihtawaatc ewiih kakanoonaatc Otepwehtamoo' itahsh kaawiin okiih pakitinikohsii'.

³¹ Aaninta hsa kaakii'-niikaanentaakosinitc i'imaa ahkiink kehkenimikotc, kaasaaki wiiciiwikotc kaye, kiihpiicinisha'owewa' emihsawenimikotc cipiintikehsik i'imaa kaakii'ishi nihtaa maamawishkaank kiiotaminonk.

³² Iki tahsh i'imaa kaakii'-maamawi ayaawaatc kii'wawaanentamook. Aaninta peshikwan kii'ishi shaakowewak, kotak itahsh kaye pahkaan kewiinawaa kii'ishi shaakowewak. Kekaa kahkina i'imaa kaakii'-ayaawaatc kaawiin okiih kihkentansiinaawaa wekonen kaakii'onci maamawi ayaawaatc.

³³ Aaninta tahsh i'imaa kaakii'-ayaawaatc kii'inentamook Aalikihsaantaran (Alexander) maawiin i'i kaakii'onci'-inahkamikaninik, aaniihsh Coowa' okii'ishi kaanciwepinaani i'imaa niikaanaya'ii. Miihsh Aalikihsaantar kaakii'-ishinihkepani'otc cinoontaatihsinik ewiih kakitotc ewiih kanootamawaatc Coowa'.

³⁴ Ahpii tahsh ewaapantamowaatc ehCoowiwinitc kahkina kiipeshikohtaakosiwak ekii'ishi shaakowewaatc niishotipa'ikan minihk: “Kihci'-inentaakosi Aartimahs Ehpihsahsink kaatashi anami'ehtawintc.”

³⁵ Ootenaawikimaa tahsh okii kashkimaa' kaakiih paahtiinonitc pisaan ciayaanitc ekii'inaatc: “Kiinawaa 'omaa Ehpihsahsink wenciiyek, kahkina iitok awiya okihkentaan Ehpihsahs ootenaank e'onci kanawentaakwahk i'i anami'ewikamik kaatashi anami'ehtawintc kehci'-inentaakositc Aartimahs, a'awe ahsin enami'ehtawintc kihcikiishikonk kaakii'onci pankihshink.

³⁶ Kaawiin tahsh awiya otaayaanwehtansiinan ono. Miitahsh i'i pisaan ishi kakwe ayaak, ci'ishihcikehsiwek kekoon kemincinawe'ikoyek.

³⁷ Kikiih piinaawak tahsh oko ininiwak, anawiin ekii'onci kimootihsikwaa anami'ewikamikonk, kekoon kaye ekii'ishi maci inaahsikwaa kitihkwe manitoominaanin.

³⁸ Kiishpin tahsh Timiitariyahs (Demetrius) i'i kaye kaawiitanohkiimikotc kekoon wa'ishi anaamimaawaakwen awiyan, paahkihsininiwan ohsha onahshowewikamikoon, ayaawa' kaye onahshowewikimaa', pisaan tahsh tamamishihtaakosiwak.

³⁹ Kiishpin tahsh keyaapi kekoon eyaakwen waahtashintamek, mii 'i eshinaakwahk inaahkonikewinink ci'onci nana'ahcikaatekipan.

⁴⁰ Inashke wiinke kinaniinsaani'itisomin cimamishi'itisoyank ci'inaahkonikooyank kiinawint e'ompwehkamikisiyank o'o kaa'inahkamikahk noonkom kaakiishikahk. Kiishpin tahsh i'i ishihsek, kaawiin kekoon kitaa ihkitohsiimin ke'onci shaakoosohtaakosiyankipan, aaniihsh anishaa o'o kitishihcikemin,” okii'inaa'.

⁴¹ Ahpii tahsh o'o kaa'ishkwaa ihkitotc, okiih kanoonaa' ci'ani maacaanitc.