ᐃᔑᒋᑫᐎᓇᓐ 18 - Ojibwe Kihcimasina'ikan

Pwaal kiiayaatc Kwaarint ootenaank

¹ Ahpii tahsh o'o kaa'ishkwaa ishihsek, Pwaal (Paul) okii'-nakataan Aahtins (Athens) ootena. Weti tahsh kii'ishi takohshin Kwaarint (Corinth) ootenaank.

² Miitahsh kaakii waapamaatc peshik Coowan Ahkwila (Aquila) eshinihkaasonitc Paantahs (Pontus) ahkiink wenciinitc. Noomayiihke Itali (Italy) ahkiink kiihpiionci takohshinoon ekiihpi wiiciiwaanitc wiiwini Parihsila (Priscilla) eshinihkaasonitc. Maawac Kihciokimaan Kalaatiyahsan (Claudius) iitok kii'inaahkonikewan kahkina Coowa' ninkoci Oroom ootenaank ci'onci'-ishaanitc.

³ Miiwan itahsh ini kaa'wiiciayaamaatc ekii'-wiitanohkiimaatc aaniihsh peshikwan kii'inanohkiiwak ekii'-oshihtoowaatc pakwaanekamikoon.

⁴ Entahso Anwepiiwi kiishikaninik tahsh anami'ewikamikonk okiih tashikakwe kashkimaa' Coowa', i'i kaye Kariihk (Greek) tenowinitc.

⁵ Ahpii tahsh Saailahsan (Silas), Timahtiin (Timothy) kaye Maahsitooniya ahkiink (Macedonia) kaahpi'onci takohshininitc, Pwaal mii 'i pishihshik kaa'ishihciketc ekiih tashintamawaatc Coowa' otihkitowinini kaaTipencikenitc, ekii'-wiintamawaatc Ciisahsoon ayaawinitc kaakii'-Onaapamikonitc Kishemanitoon.

⁶ Ahpii tahsh enanaahkwehtaakotc Coowa', noociko kaye e'ikotc, miihsh kaa'ishi paahpaawiwepinank okikishkikanan o'o ekii'inaatc: “Kiinawaa hsa piko kika naasihkaakom kekashkihtamaasoyek, kaawiin kekoon i'i ninka papaamisihsii. Miitahsh intawaa meshkwac cinaasihkawakwaa kaaCoowiwihsikwaa,” okii'inaa'.

⁷ Miitahsh i'imaa kaa'ishi nakanaatc. Ininiwan itahsh Tiitiyahs Castahs (Titius Justus) eshinihkaasonitc okiih piintikawaan owaahkaa'ikaniniink pehsho eshitaanitc anami'ewikamikonk. Miiwan ini kaakii'-anami'ehtawaanitc Kishemanitoon.

⁸ Karispahs (Crispus) tahsh kaatipentank anami'ewikamik okiih tepweyenimaan kaaTipencikenitc, kahkina kaye eyaanitc otaawinink. Niipiwa' tahsh Kwaarint ootenaank wenciinitc kaakii'-noontaminitc kiihtepwehtamoo', kiihsiika'antaasowa' kaye.

⁹ Ehtipihkaninik tahsh Pwaal ishinamowinink okii'onci kanookikoon kaaTipencikenitc ekii'ikotc: “Keko sekisihken, maano ko kaakiikiton, keko noontepakiciihken.

¹⁰ Niin ohsha kiwiiciiwin, kaawiin awiya kika miikaanikohsii ciwiihsakaahpinanihk, niipiwa' ohsha o'omaa ootenaank ayaawak awiyak tepenimakwaa,” okii'ikoon.

¹¹ Pwaal i'imaa kii'ayaa peshiko aapihta pipoon ekiih kihkino'amawaatc pemaatisinitc Kishemanitoon otihkitowinini.

¹² Ahpii tahsh Kaalio (Gallio) kiionahshowewikimaawitc Ahkeya (Achaia) ahkiink, Coowa' okiimaamawi otihtinikoo' Pwaal ekii'-ishiwinikotc onahshowewikamikonk

¹³ ekii'-ihkitonitc: “Wa'a hsa inini okakwe kashkimaa' awiya' nahpaac inahke cishi anami'ehtawaanitc Kishemanitoon, kaawiin eshihsininik onahshowewin,” kii'ihkitowa'.

¹⁴ Pwaal tahsh iko ewii'ani kiikitotc, Kaalion kii'onci kiikitowan e'inaanitc Coowa': “Kiishpin ihsa 'owe noociko kekoon, komaa kaye mamaanshiiwin tinowankipan, taakii'-ishinaakwanoopan iitok cikiih pisintawinakookipan.

¹⁵ Kiishpin tahsh wiin ehta ihkitowinan, wiinsowinan kaye, i'i kaye otoonahshowewiniwaa onci kiihkaantiyek, kiinawaa piko wiin i'i nana'ahtook. Kaawiin niin kekoon niwii'-inaahkonikehsii,” okii'inaa'.

¹⁶ Miitahsh kaa'ishi saakicinisha'waatc i'imaa onahshowewikamikonk.

¹⁷ Okii'-otihtinaani tahsh Saastiniisan (Sosthenes) kaatipentaminitc anami'ewikamik ekiih pahpahkihte'waawaatc i'imaa akwaciink onahshowewikamikonk. Kaawiin Kaalio awaac okiih papaapisiskenimaahsii'.

Pwaal kiishikiiwetc Entiyaahk inahke

¹⁸ Kinwesh tahsh i'imaa Kwaarint (Corinth) ootenaank Pwaal (Paul) kii'ayaa. Miitahsh kaa'ishi nakanaatc otepwehtamoo' ekii'-inaahshitc weti Siiriya (Syria) ahkiink, ekii'-wiiciiwikotc Ahkwilawan (Aquila), Parihsilawan (Priscilla). Cipwaa maaciiyaahshitc tahsh weti Senkariiya (Cenchreae) okiipashkoshaan ohtikwaan, aaniihsh kii'ishi ahpimonotawaakopan Kishemanitoon.

¹⁹ Kiihpi takohshinook tahsh i'imaa Ehpihsahs (Ephesus) ootenaank ecikaatenik. Miitahsh i'imaa kaakii'ishi nakanaatc Ahkwilawan, Parihsilawan kaye. Wiin tahsh wiin kiihpiintike Coowi'-anami'ewikamikonk ekiih tashintamawaatc Coowa' kekoonan.

²⁰ Ahpii tahsh ehkakwecimikotc keyaapi kinwesh i'imaa cikii'-ayaahpan, kaawiin kii'inentansii.

²¹ Ahpii tahsh kaahpooshoo'aatc okii'inaa': “Miinawaa kika pianta waapamininim kiishpin Kishemanitoo inentank,” okii'inaa'. Ehpihsahsink tahsh kii'onci maaciiyaahshi.

²² Ahpii tahsh kaahkapaatc Sehsariiyaink (Caesarea) kiikohpii ekii'-ishaatc weti Ceroosalamink (Jerusalem) ekiih pooshoo'aatc otepwehtamoo' kaamaawaci'itinitc. Miihsh kaa'ishi'-ishaatc weti Entiyaahk (Antioch) ootenaank.

²³ Kinweshiihsh itahsh iko i'imaa kii'ayaa. Miitahsh kaakii'-maacaatc misiwe ekiihpapaa ishaatc Kalehshiya (Galatia) ahkiink, Pariciyahkiink (Phrygia) kaye, ekiihpapaa mashkawisii'aatc kahkina otepwehtamoo'.

Apaalahs ehtashimintc

²⁴ Peshik tahsh Coo Apaalahs (Apollos) eshinihkaasotc, Aalikihsaantariya (Alexandria) ootenaank e'onciitc kiihpi takohshin i'imaa Ehpihsahs ootenaank. Wiinke kiinihtaa kakito, niipiwa' kaye okii kihkentaan Kihcimasina'ikan.

²⁵ Wa'a hsa inini kiihkihkino'amawaawintipan inahke keshi naasihkawimintc kaaTipencikenitc, wiinke tahsh kiiaahkohcike ehtashintank, ekihkino'amaaketc enaacimimintc Ciisahsoon. Cwaanan tahsh kaakii'ishi siika'antaakenitc ehta okii kihkentaan.

²⁶ Kii'maacii kakiihkwe tahsh i'imaa anami'ewikamikonk ekiih soonkite'etc. Ahpii tahsh Ahkwilawan (Aquila), Parihsilawan (Priscilla) kaye enoontaakotc okiihkiiwe wiishaamikoo' eshitaanitc awahshime ekiihpehte wiintamaakotc inahke kaashi naasihkawimintc Kishemanitoon.

²⁷ Apaalahs tahsh kii'inentam ci'ishaatc Ahkeya akiink (Achaia), otepwehtamoo' tahsh okiih kakaansomikoo' pisaan ci'ishaatc, ekii'-oshipii'amawaanitc otepwehtamoo' weti eyaanitc cipiintikanikotc. Ahpii tahsh weti kaahtakohshink okiikihci wiici'aa' i'i kaakii'onci tepwehtaminitc Kishemanitoon okishewaatisiwininiink.

²⁸ Wiinke tahsh kiimashkawikiishwe ekiih shaakoosomaatc Coowa' eshi paahtiinonaaniwaninik, Kihcimasina'ikanink ekii'onci pehtenaakohtootc Ciisahsoon eyaawinitc Kishemanitoo otoOnaapancikanan ciPimaaci'iwenitc.