ᐃᔑᒋᑫᐎᓇᓐ 17 - Ojibwe Kihcimasina'ikan

Pwaal kii'ishaatc Tehsalanaihka

¹ Pwaal (Paul), a'a tahsh kaye Saailahs (Silas) ehpimi ayaawaatc kiihshaaposhkaawak ootenawan Aampihpalihs (Amphipolis), Aahpalooniya (Apollonia) eshinihkaatenikin. I'imaa tahsh ootenaank Tehsalanaihka (Thessalonica) eshinihkaatenik kii'ishi takohshinook. Kii'ayaani 'imaa Coowak otanami'ewikamikowaa.

² Pwaal tahsh kaakii nihtaa ishihciketc, nihso Anwepiiwi kiishik kiihpiintike Coowi anami'ewikamikonk, ekiih tashintamaatiwaatc Kihcimasina'ikan,

³ weweni ekii'-wiintamawaatc, ekii'-waapanta'aatc kaye aaniin kaakii'onci'-ishihsenik cikakwaataki'imintipan Kishemanitoo kaakii'-Onaapamaatc cikiiwe pimaatisinitc itahsh onci nipowinink, o'o ekii'inaatc: “Mii hsa wa'a Ciisahs kaatashintamawinakook, Kishemanitoon kaakii'-Onaapamikotc ciPimaaci'iwetc.”

⁴ Aaninta tahsh Coowak kiikashkimaawak citepwehtamowaatc, miihsh kaakii'-wiiciiwaawaatc Pwaalan, Saailahsan kaye. Miihsh peshikwan kaa'ayintiwaatc kaakiih paahtiinowaatc kaaniikaanisiwaatc ihkwewak. Iki kaye kiihpaahtiinowak kaakiih kohtaanenimaawaatc Kishemanitoon Kariihkak (Greek) tenowiwaatc.

⁵ Coowak itahsh kii'aayaahshentamook. Kaakii nihtaa tanataawenk tahsh okii'ishi naasihkawaawaa' awiya' kekoon enentaakosihsinik ekii'-ohkwiino'aawaatc, miihsh kaa'ishi ompwehkamikisiwaatc i'imaa ootenaank. Kii'ishi mawine'ikewak tahsh owaahkaa'ikaniniink Cehsanan (Jason) ekii'-antone'waawaatc Pwaalan, Saailahsan kaye, ewii'-ishiwinaawaatc eshi paahtiinonitc awiya'.

⁶ Ahpii tahsh emihkawaahsikwaa, Cehsanan hsa i'i kaye kotak otepwehtamoo' okii'ishi waawiihkopinaawaa' eshi ayaanitc ootenaawikimaa' o'o ekii'ishi shaahshaakowewaatc: “Iki hsa ininiwak misiwe ahkiink kaapapaa ompehkamikisiwaatc kitootihsikonaanik.

⁷ Wa'a tahsh Cehsan okiih piintikanaa' owaahkaa'ikanink. Nahpaac inahke ishikihkino'ikewa' kaa'inahtenikin Maawac Kihciokimaan enahshowenitc, e'ihkitonitc kotak kihciokimaan e'ayaanitc Ciisahs e'ishinihkaasonitc,” kii'ishi shaakowewa'.

⁸ Iki tahsh kaakiih paahtiinowaatc awiyak, iki kaye ootenaawikimaak ahpii enoontamowaatc o'o, wiinke kiinihshiwanaatentamook.

⁹ Okiih tipa'ike'aawaan itahsh Cehsanan minihk kaakii'-nihtaa tipa'ikewintc, i'i kaye kaakii'-wiiciiwikonitc, miihsh payish kaa'ishi pakitinaawaatc.

Niipiwa' kiitepwehtamowaatc i'imaa Piriiya ootenaank

¹⁰ Shemaak tahsh ehtipihkaninik otepwehtamoo' Pwaal (Paul), Saailahs (Silas) kaye okii'-ishinisha'okowaa' ci'ishaawaatc Piriiya (Berea) ootenaank. Ahpii tahsh tekohshinowaatc weti kiihpiintikewak Coowi anami'ewikamikonk.

¹¹ Nawac tahsh i'i Piriiya eyaanitc kiihpisintamoo', ekii'-moocikentaminitc kaye enoontaminitc i'i tipaacimowin ahpiihc wiin i'i Tehsalanaihka (Thessalonica) eyaanitc. Entahso kiishik Kihcimasina'ikanink okii'ishi antakihkentamini taka citepwewaninikwen Pwaal kaakii'-ihkitotc.

¹² Niipiwa' tahsh Coowa' kiihtepwehtamoo', i'i kaye kaakii'-niikaanentaakosinitc ihkwewa', niipiwa' kaye kaaininiiwinitc Kariihka' (Greek) tenowinitc.

¹³ Coowak tahsh Tehsalanaihka kaakii'-ayaawaatc kiinoontamook Pwaalan Piriiya ootenaank ehtashintaminitc Kishemanitoon otihkitowinini. Kii'ishaawak tahsh weti ekii'awi ompwe'aawaatc kaakiih paahtiinonitc awiya' ekii mikoshkaatentamo'aawaatc.

¹⁴ Shemaak tahsh ehtipihkaninik otepwehtamoo' Pwaal, okii'-ishinisha'oko' ci'ishaatc kihcikamiink inahke. Saailahs itahsh wiin a'a kaye Timahti (Timothy) kii'apiwak i'maa Piriiya ootenaank.

¹⁵ Ininiwa' tahsh kaakii'-wiiciiwikotc Pwaal okii'ishi pakamiwiiciiwikoo' Aahtins (Athens) ootenaank. Miihsh i'imaa kaa'onci kiiwenitc ekii'inaatc ciwiintamawaanitc Saailahsan, ini kaye Timahtiin wiipa cipi naasihkaakotc.

Pwaal kii'ayaatc Aahtins ootenaank

¹⁶ Mekwaa tahsh Pwaal (Paul) epapii'otc, aahpici kii'onci mikoshkaatentam ewaapantank i'i ootena misiwe e'ayaanitc manitoohkaana'.

¹⁷ Miitahsh kaakiih kakanoonaatc Coowa' otanami'ewikamikoniink, i'i kaye kaaCoowiwihsinik kwehtaanenimaanitc Kishemanitoon. Entahso kiishik tahsh kaye okiih kakanoonaa' i'i kaakii'-mayaashkaanitc i'imaa kaakiih tanataawenk.

¹⁸ Aaninta tahsh kihkino'amaakewininiwa' kaakii'-inimintc Ehpihkoriiyawak (Epicureans) (Epicureans) i'i kaye Istooihkwak (Stoics), okii'maacii kakwe shaakoosomikoo'. Aaninta tahsh kii'ihkitowa': “Aaniin tahsh inaa ehkitotc a'a kaakihkentamoohkaasotc?” kii'ihkitowa'. Aaninta tahsh kaye kii'ihkitowa': “Mii 'i enihtaakositc ehtashimaatc mayaki manitoo,” kii'ihkitowa'. Miitahsh kaakii'onci ihkitonitc aaniihsh Pwaal okiih tashimaan Ciisahsoon, okiih tashintaan kaye kiiwe pimaatisii'ikoowin.

¹⁹ Okii'maacii wiishaamikoo' tahsh ekii'-ishiwinikotc ootenaawi onahshowewininiwa' kaakii'ishi nihtaa maawaci'itinitc, Eriyaahpakahs (Areopagus) Pihkwatinaa ecikaatenik. Miitahsh i'imaa kaa'ishi kakwecimikotc: “Niwii kihkentaamin o'o oshki kihkino'ikewin kaawiintamaakeyan.

²⁰ Aaninta hsa kekoonan kaawiintaman pahkaan nintinihtaamin, niwii kihkentaamin tahsh aaniin ehkitoomakanokwenan,” okii'ikoo'.

²¹ Kahkina hsa Aahtins wenciiwaatc, iki tahsh kaye pahkaan wenciiwaatc i'imaa kaakii'ishi ootenaahkewaatc kaawiin kekoon okii'-noocihtoohsiinaawaa, mii ehta ko ekiih tashintamowaatc, ekiih pisintamowaatc kaye oshki kekoonan.

²² Miihsh Pwaal kaakiih pasikwiitc enaahsamapinitc kaakii'-maawaci'itinitc i'imaa Eriyaahpakahsink o'o ekii'-ihkitotc: “Kiinawaa Aahtins wenciiyek! Misiwe hsa nahke nintishiwaapantaan e'anami'ewi'-ishiayaayek.

²³ Ehpapaamohseyaan hsa, e'waapantamaan kaye iniweniwan aanti entashi anami'aayek, niwaapantaan kaye kaashi pakitinaahsoyek o'o e'ishipii'ikaatek: ‘Kaapakitinamawintc kehkencikaniwihsik Manitoo.’ I'i hsa tahsh kekoon kaa'anami'ehtamek kehkentansiwek, mii 'iwe kaawiih tashintamawinakook.

²⁴ Kishemanitoo okii'-oshihtoon ahkiini, kahkina kaye kekoon i'imaa eyaanik, otipentaan kiishik, ahkiini kaye. Kaawiin ishitaahsii anami'ewikamikonk oninciimaank kaaonci oshihcikaatenik.

²⁵ Kaawiin awiyan noontehsehsii cipami'ikohpan, taapishkoo kekoon enoontehsetc. Wiin iitok kaamiinaatc kahkina awiyan pimaatisiwin, pakitanaamowin kaye, wiin kaye kahkina kekoon kaamiikiwetc.

²⁶ Peshik tahsh ininiink okii'onci oshiaa' kahkina kaatahswewaanakisinitc pemaatisinitc misiwe o'omaa ahkiink citashi pimaatisinitc. Wiin okii'-onahtamawaa' aaniin mayaa ahpii, aaniinti kaye mayaa keshi kapehshinitc.

²⁷ Miitahsh kaakii'onci'-ishihciketc, aanti piko eshi antone'okotc, cimihkaakotc. Kaawiin iitok waahsa tenentaakosihsii.

²⁸ O'o hsa awiya kii'ihkitokopan: ‘Wiin iitok onci kaa'onci pimaatisiyank, kaaonci wahkawiiyank kaye, kaye tahsh kaa'onci ayaayank.’ Miihsa'i kaa'ihkitowaakopanen kinikamoowininiimiwaak: ‘Kiinawint hsa kitooniicaanihsimikonaan,’ kiihkitoowaakopan.

²⁹ “Kishemanitoo tahsh e'oniicaanihsiminank, kaawiin kitaa inenimaahsiwaanaan ehtinowitc osaawaapihkonk, komaa kaye waapaapihkonk kaaonci oshihcikaniwitc, komaa kaye ahsin kaamasinaapihka'okotc ininiwa' eshi wawiishiinitc.

³⁰ Kaawiin iitok Kishemanitoo kiihpapaapisiskentansii otaanank ekii kihkenimaahsiwintc. Noonkom tahsh wiin okanoonaa' kahkina pemaatisinitc misiwe eyaanitc cikwehki pimaatisinitc.

³¹ Aasha ohsha okii'-onahtoon kiishikan okwayahkwaatisiwinink ewii'onci tipaahkonaatc kahkina awiya' eyaanitc ahkiink, ewii yaapaci'aatc ini ininiwan kaakii'-Onaapamaatc. Wiinke okiihpehtaa naakohtamawaan kahkina awiyan i'i ewii'-ishihciketc, miihsh kaakii'onci kiiwe pimaatisii'aatc Ciisahsoon nipowinink onci,” okii'ishi kakanoonaa'.

³² Aahpii tahsh Pwaal enoontaakotc ehtashintank kiiwe pimaatisiwin, aaninta tahsh okiih paahpinotaakoo'. Aaninta tahsh wiin okii'ikoo': “Miinawaa hsa kiwii'-noontaakoo o'o citashintaman,” okii'ikoo'.

³³ Miitahsh i'imaa Pwaal kaa'onci maacaatc.

³⁴ Aaninta tahsh awiya' okii'-wiiciiwikoo', ekiih tepwehtaminitc kaye. Ini tahsh kaye peshik kaakii'onci tipentaakosinitc onahshowewinink Eriyaahpakahs (Areopagus) kaashi maawaci'itinitc, ini kaye ihkwewan Taamarihs (Damaris) eshinihkaasonitc, kotak kaye awiya' okii'-wiiciiwikoo'.