ᐃᔑᒋᑫᐎᓇᓐ 14 - Ojibwe Kihcimasina'ikan

Minwaacimowin kiitashintek i'imaa Aaihkooniyam

¹ I'imaa tahsh Aaihkooniyam (Iconium) ootenaank, Pwaal (Paul) a'a kaye Paarnapahs (Barnabas), kiihpiintikewak ekii nihtaa'-ayintiwaatc otanami'ewikamikoniink Coowa'. Kaa'ahpiihci weweni tahsh kakitowaatc kiihpaahtiinowa' Coowa', i'i kaye kaaCoowiwihsinik kaakiih tepwehtaminitc.

² Iniweniwa' tahsh Coowa' kaakiih tepwehtansinik okii'-ompwe'aani kaaCoowiwihsinik ekiih shaakoosomaanitc cimaci'-inenimaanitc otepwehtamoo'.

³ Kinwesh tahsh i'imaa kii'ayaawak ekiih soonkite'ewaatc ekiih tashimaawaatc kaaTipencikenitc. Miiwan hsa ini kaa'miinikowaatc cikashkihtoowaatc citootamowaatc maamahkaacihcikewinan, meyaamahkaatentaakwaninikin kaye, kaaTipencikenitc ekii'-naakohtoonitc ehtepwemakaninik enwaatotamowaatc okishewaatisiwinini.

⁴ Kahkina tahsh awiyak kii'nenaawi'itiwak; aaninta Coowa' ekii'-wiiciiwaawaatc, aaninta tahsh kaye ishinisha'waakana'.

⁵ Coowa' itahsh i'i kaye kaaCoowiwihsinik i'i kaye tako kaaniikaanihtamaakonitc kiimaawaci'itiwa' ewii'-mamaanshiihkantaakowaatc, ewiih papiimwahsina'ikowaatc kaye.

⁶ Okii kihkentaanaawaa tahsh i'i ewiih tootawintwaa, weti tahsh kii'ahpa'iwewak Lihkeyooniya (Lycaonia) ahkiink, eshi ayaanikin ootenawan Listara (Lystra), Tarpi (Derbe) eshinihkaatenikin, ishiwaahkaaya'ii kaye weti.

⁷ Miitahsh weti kaa'ishi waawiintamowaatc minwaacimowin.

Pwaal, Paarnapahs kiikakwaataki'intwaa Listara ootenaank, Tarpi ootenaank kaye

⁸ Weti tahsh Listara (Lystra) ootenaank kiinamatapiwan peshik ininiwan ekii maahkisinitc ositiniink, ekii'ishi nihtaawikinitc i'i nahke wiihkaa ekiih pimohsehsinik.

⁹ Pwaal (Paul) tahsh okiih pisintaakoon ehkakitotc ini ininiwan. Okiih kanawaapamaan tahsh, enihsitawinawaatc tahsh e'ayaanitc tepweyentamowin ciminoayaa'imintc,

¹⁰ miihsh kaa'inaatc: “Pasikwiin ciniipawiyan!” okii'inaan. Shemaak tahsh iko kiihpasikwiiwan, ekii'maacii pimohsenitc.

¹¹ Ahpii tahsh kaakii maamawi ayaanitc ewaapantaminitc Pwaal kaakii'-ishihciketc, Lihkeyooniya ishikiishwewin hsa okii yaapacihtooni e'ihkitonitc: “Manitook kitootihsikonaanik ininiink e'ishinaakosiwaatc,” kii'ihkitowa'.

¹² Paarnapahsan (Barnabas) tahsh Soohs (Zeus) okii'-ishinihkaanaawaan. Pwaalan (Paul) tahsh Armiis (Hermes) okii'-ishinihkaanaawaan aaniihsh kii'niikaanikakitowan.

¹³ Kii'ayaawan tahsh i'imaa ininiwan kaakii'-anami'enohkiihtawaanitc manitoon Zoohs enimintc. Otanami'ewikamikoni tahsh akwaciink ootenaank kii'ishi patahkiteni. Miiwan tahsh ini kaakiih piinaanitc aape pishihkiinsan, kaakiih piitoonitc kaye i'imaa eshi'-ishkwaantemiwaninik ootena. Okii'-antawentamini, i'i kaye kaapaahtiinonitc ewiih pakitinaahsoohtamaakowaatc.

¹⁴ Ahpii tahsh Paarnapahs (Barnabas), a'a kaye Pwaal (Paul) enoontamowaatc waa'ishihcike'intwaa, okii taashkiikipitoonaawaan okikishkikaniwaan ekii'-onsonsaamentamowaatc. Kii'ahpahtoowak tahsh mekweya'ii eshi maamawi ayaanitc ekii'ishi shaakowewaatc:

¹⁵ “Aaniin inaa onsonsaamahkamik eshihcikeyek! Nimihci'-ininiiwimin ohsha keniinawint taapishkoo kiinawaa kaaishi ayaayek. Kipi wiintamaakoom ohsha minwaacimowin ewiintamaakooyek cipoonihtooyek kekoon enentaakwahsinohkin, meshkwac itahsh cinaasihkawekipan Kishemanitoo kaapimaatisitc, kaakii'-oshihtootc kiishik, ahki, kihcikam kaye, kahkina kaye i'imaa eyaanikin.

¹⁶ Inashke otaanaank okiih pakitinaa' kaapepahkaanwewaanakisinitc pemaatisinitc pisaan iko nahke waa'ishipimaatisinitc ci'ishihcikenitc.

¹⁷ Inashke kaawiin kekoon kii'ishko ishihcikehsii kehcinaac iko ke'onci kihkentaakositc e'minohciketc. Wiin iitok kiishikonk kaaonci kimiwanohketc, kaamiininek kaye kihtikaanan kemanishamowek, wiin kaye kaamiininek miicim, ke'onci minwentamowek kaye,” okii'inaawaa'.

¹⁸ O'oweni tahsh aanakii'-ihkitowaatc, akaawaa okiih kashkimaawaa' kaamaamawiinonitc cipakitinaahsohtamaakohsikwaa.

¹⁹ Aaninta tahsh Coowa' kiihpitakohshinoo' Entiyaahk (Antioch) ootenaank, Aaihkooniyam (Iconium) ootenaank kaye ekiihpi'-onciinitc. Okiih shaakoosomaani itahsh kaamaamawiinonitc. Miitahsh Pwaal kaakiih papiimwahsina'ikotc ekiih saakici taapiipa'ikotc i'imaa ootenaank, nipowitok maawiin ekii'-inenimikotc.

²⁰ Otepwehtamoo' itahsh kaa'ishwaa waahkaakaapawihtaakotc, kii'wanishkaa ootenaank ekiihkiiwe'-ishaatc. E'ani waapaninik tahsh okiimaacii wiiciiwaan Paarnapahsan (Barnabas) Tarpi (Derbe) ootenaank ekii'-ishaawaatc.

Kii'ishikiiwewaatc weti Entiyaahk i'imaa Siiriya ahkiink

²¹ Ahpii tahsh kaawiintamaakewaatc i'i minwaacimowin i'imaa kihci ootenaank, niipiwa' awiya' kiimaacii tepwehtamoo'. Weti tahsh inahke kii'ishi ashe kiiwewak Listara (Lystra) ootenaank, Aaihkooniyam ootenaank, weti kaye Entiyaahk ootenaank.

²² Miitahsh i'imaa kaahtashi wiiciiwaawaatc otepwehtamoo' keyaapi cimashkawentaminitc, cipakiciihsinik i'i kaakii'ishi tepwehtaminitc ekii'-ihkitowaatc: “Oncitako ishinaakwan niipiwa' wahsitaawihsewin cinakishkamank wiihpiintikeyank Kishemanitoo Otipencikewin.”

²³ Ahpii tahsh kaa'onakimaawaatc keniikaanisinitc kaashi maamaawaci'itinitc otepwehtamoo', kii'anami'aawak tako kaye kiimantawii'itisowak ekiih pakitinamawaawaatc kaaTipencikenitc cikanawenimaanitc i'i kaakiih tepwehtaakonitc.

²⁴ Kii'ani shaaposhkaawak itahsh Pihsitiya (Pisidia) ahkiink, i'imaa tahsh Paampiliya (Pamphylia) ahkiink kii'ishi takohshinook.

²⁵ Miitahsh i'imaa Perka (Perga) ootenaank kaahtashi wiintamaakewaatc minwaacimowin. Kii'ani'-ishaawak tahsh weti Ataaliya (Attalia) eshitaaniwaninik.

²⁶ Miitahsh i'imaa kihci ciimaanink kii'onci kiiweyaahshiwak Entiyaahk inahke ekii'-ishaawaatc. Mii iitok i'imaa kaakii'onci maacaawaahpan kaakiih pakohsenimimintc Kishemanitoon okishewaatisiwininiink cishi kanawenimikowaatc citootamowaatc i'i anohkiiwin noonkom kaakiih kiishihtoowaatc.

²⁷ Ahpii tahsh kaatakohshinowaatc okiimaamaawiantomaawaa' otepwehtamoo' ekiih tipaacimowaatc aaniin kahkina kekoon kaakii'-ishihcikenitc Kishemanitoon ewiitanohkiimikowaatc, aaniin kaye kaakii'ishi paahkinamawaanitc i'i kaaCoowiwihsinik citepweyentaminitc.

²⁸ Kinwesh tahsh i'imaa kii'ayaawak ekii'-wiiciiwaawaatc otepwehtamoo'.