ᐃᔑᒋᑫᐎᓇᓐ 13 - Ojibwe Kihcimasina'ikan

Paarnapahs, a'a kaye Swaal kiionaapamintwaa kiimaacinisha'ontwaa

¹ I'imaa tahsh Entiyaahk (Antioch) otepwehtamook kiimaawaci'itiwak. Kii'ayaawak tahsh i'imaa aaninta tino kaakanootamawaawaatc Kishemanitoon, kaamiinikoowisiwaatc kaye cikihkino'amaakewaatc. Miiwak hsa iki Paarnapahs (Barnabas), Simiyan (Simeon) Mahkatewis kaa'ishinihkaacikaniwitc, a'a tahsh Loohshiyahs (Lucius) Saairiini (Cyrene) ootenaank kaaonciitc. A'awe tahsh kaye Manehan (Manaen) kaakii wiicinihtaawikiimaatc ini kotak Heratan (Herod), a'a tahsh kaye Swaal (Saul).

² Mekwaa tahsh otepwehtamook e'anami'ehtawaawaatc kaaTipencikenitc, emantawii'itisowaatc kaye, okii'onci kanoonikowaan Kishemanitoon otAhcaahkoni: “Onakimihk Paarnapahs, a'a kaye Swaal ci'inanohkiiwaatc i'i anohkiiwin kaashi antomakwaa,” okii'ikowaan.

³ Keyaapi tahsh kimantawii'itisowak, kii'anami'aawak tahsh kaye. Miihsh kaa'ishi saaminaawaatc ekii'-maacinisha'waawaatc.

Paarnapahs, Swaal kaye kii'ishaawaatc Saaiparahs minihsink

⁴ Paarnapahs tahsh, Swaal kaye kaaishkwaa maacinisha'okowaatc Kishemanitoon otAhcaahkoni, kii'ishaawak hsa weti Silooshiya (Seleucia) ootenaank. Miitahsh weti kaa'onci maaciiyaahshiwaatc ekii'-ishaawaatc minihsink Saaiparahs (Cyprus).

⁵ Ahpii tahsh ehtakohshinowaatc Saalamihs (Salamis) ootenaank, kii'wiintamaakewak Kishemanitoon otihkitowinini otanami'ewikamikoniink Coowa'. Cwaanan (John) hsa okii'-wiiciiwaawaan ekii'-wiici'ikowaatc.

⁶ Kii'ani kahkiiwewak itahsh i'i minihs piinihsh ekii'ani takohshinowaatc ootena Pehpahs (Paphos). Miihsh kaakii'-nakishkawaawaatc Coowi'ininiwan memaantaawisinitc, e'inwaanintisonitc kaakanootamawaatc Kishemanitoon, Paar ciisahs (Bar jesus) eishinihkaasonitc.

⁷ Okiihsaaki wiiciiwaani tahsh ini wekimaahkantaakenitc Sarciyahs Pwaalahs (Sergius Paulus) kaainimintc kaakiih kihkentaahsonitc. Miiwan itahsh ini Paarnapahs, Swaal kaye kaakii'-antomikowaatc ekii'-antawentaminitc cinoontaminitc Kishemanitoon otihkitowinini.

⁸ Iniweniwan tahsh memaantaawisinitc okiihkakwe kipihtinikowaan Elimahsan (Elymas) eshinihkaasonitc, mii 'i kaa'ishinihkaasotc Kariihk (Greek) otishikiishwewininiink. Okiihkakwe wanishkwe'an itahsh kaye kaaokimaahkantaakenitc citepweyenimaahsinik Ciisahsoon.

⁹ Swaal tahsh, Pwaal (Paul) kaainintc, emooshkineshkaakotc Kishemanitoon otAhcaahkoni, okiih kanawaapamaan Elimahsan,

¹⁰ miihsh kaa'inaatc: “Kiin tepenimihk Maciaya'aa, kaashiinkentaman kaye kaakwayahkonaakwahk! Kimooshkineshkaakon kaye kahkina kakayenisiwin, maci'-ishiwepisiwin kaye. Mooshak kikakwe kwehkinamowaan cipahkaaninaakwaninik Kishemanitoo otihkitowin!

¹¹ Inashke tahsh kaaTipenciketc oninc kikamaakoshkaakon. Kaawiin tahsh kika waapihsi, acina kaawiin kikaonci waapamaahsii kiisihs,” okii'inaan. Shemaak tahsh ekashkii tipihki'ishi ayaanik kekoon okii'-otihsikoni, miihsh kaa'ishi papaa nanaantone'waanitc kepapaa sakinihkenikonitc.

¹² Ahpii tahsh a'a wekimaahkantaaketc e'waapantank i'i kaakii'-ishihsenik kiihtepwehtam emaamahkaatentank kaakii'ishi kihkino'amawintc onci kaaTipencikenitc.

Pwaal kii'ishaatc Entiyaahk ootenaank eshi'ayaanik Pihsitiya ahkiink

¹³ Pwaal (Paul) tahsh i'i kaye kaakii'-wiiciiwikotc kii'onci maaciiyaahshiwak i'imaa Pehpahs (Paphos) ekii'ishi takohshinowaatc Perka (Perga) ootenaank Pempiliya (Pamphylia) ahkiink. Cwaan Maarhkan (John Mark) tahsh i'imaa okii'-nakanikowaan, Ceroosalamink (Jerusalem) ekii'ishi kiiwenitc.

¹⁴ I'imaa tahsh Perka kii'onci maacaawak ekii'-ishaawaatc Entiyaahk (Antioch) ootenaank Pihsitiya (Pisidia) ahkiink. Kii'Anwepiiwi kiishikanini tahsh kiipiintikewaatc anami'ewikamikonk, miihsh kaa'ishi onapiwaatc.

¹⁵ Kaa'ishkwaa anamihcikaatenik tahsh otonahshowewin Moosihs (Moses), i'i kaye kaakii'-ishipii'ikenitc kaakiih kanootamawaanitc Kishemanitoon, miihsh kaakii niikaanishkaminitc anami'aawin okiih piicinisha'waani awiyan o'o ekiih pi'ikowaatc Pwaal, Paarnapahs: “Niici otepwehtamonaanik, kiishpin eyaawekwen ihkitowin ke'onci mashkawentamowaatc oko awiyak, pisaan iko kakitok,” kiihpi'inaawak.

¹⁶ Pwaal kiihpasikwii, ekii'-ayishinihkenitc cipisintawintc, miihsh kaa'ihkitotc: “Kiinawaa Isriyal (Israel) kaatinowiyek, kekiinawaa kaye kaaCoowiwihsiwek enami'ehtawek Kishemanitoo, pisintawihshik!

¹⁷ Kishemanitoo tahsh weKishemanitoomikotc pemaatisinitc Isriyala' okii'-onaapamaa' kikehteya'aaminaapanii', okii'-ishi'aa' kaye cimashkawentaakosinitc mekwaa Iicipahkiink (Egypt) kiitashi piiwitewentaakosinitc. Okihci mashkawisiiwinink itahsh okii'onci saakiciwinaa' weti ahkiink.

¹⁸ Niimitana (40) tahsh tahso pipoon okiih shashiipenimaa' kaakii'-ishihcikenitc mekwaa pikwatahkamik kiiayaanitc.

¹⁹ Miihsh kaakii'-nihshiwanaaci'aatc kaakii'-niishwaahswewaanakisinitc (7)pemaatisinitc Kenan (Canaan) ahkiink kaakii'-ayaanitc. Meshkwac itahsh ekii'-miinaatc opimaatisiima' Isriyala' citipinawewisinitc i'i ahkiini.

²⁰ Niiwaahk naanimitana (450) tahso pipoon tahsh kiihpimihse o'o ci'ishihsek. Miihsh kaakii'-miinaatc keonaahkonikonitc piinihsh kiiniayaanitc Saamiyoon (Samuel) Kishemanitoon kaakiih kanootamawaanitc.

²¹ Pemaatisinitc tahsh okiih kakwecimikoo' cimiinaatc kihciokimaan. Swaalan (Saul) tahsh kiimiikiwe cikihciokimaawinitc kaakii'-otetenitc Kihshan (Kish) Pencimanink (Benjamin) kaakii'-ontahkaanesinitc. Niimitana (40) tahso pipoon tahsh kiikihciokimaawiwan.

²² Ahpii tahsh kaa'ishihciketc awahshime cikihciokimaawihsinik, Tepitoon tahsh okiih kihciokimaawi'aan. Miiwan tahsh ini kaakiih tashimaatc o'o kii'ihkitokopanen: ‘Nikii'mihkawaa hsa Tepit (David) wekosihsimikotc Cehsiin (Jesse), menwentami'ishitc, mii hsa 'awe ketootank kahkina enentamowak.’

²³ Miitahsh i'imaa Tepitink kaakii'-ontahkaanesitc Ciisahs, Kishemanitoon kaakii'-ahshotamaakenitc cipimaaci'aanitc pemaatisinitc Isriyala'.

²⁴ Cipwaa takohshininitc tahsh Ciisahsoon, Cwaan wiin niikaan okiih kakiihkimaa' pemaatisinitc Isriyala' cikwehki pimaatisinitc, cisiika'antaasonitc itahsh kaye.

²⁵ Cwaan tahsh e'ani kiishihtootc otanohkiiwin okii'inaa' kaakiihpi naasihkaakotc: ‘Awenen kiinawaa enenimihshiyek? Kaawiin niin nintaawihsii kaapi'ek! Kii'ishkwaa'-ayaayaan hsa kotak tapi'ayaa. Kaawiin tahsh ninte'ahpiihtentaakosiwaahsiin omahkisinan ciyaapa'amowakipan,’ Cwaan kii'ihkitokopan.

²⁶ Niici onciimaakanak, Eparahaamink (Abraham) wentahkaanesiyek, kekiinawaa tahsh kaaCoowiwihsiwek kaakohtaanenimek Kishemanitoo, kiinawint ohsha kaakiihpi'-ishinisha'amaakoyank o'o Kishemanitoo otipaacimowin keshi pimaaci'ikooyank.

²⁷ Inashke iki Ceroosalamink (Jerusalem) kaataawaatc, iki tahsh kaaokimaahkantaakewaatc kaawiin okii'-nihsitawinawaahsiwaawaan Ciisahsoon. Kaawiin kaye okii nihsitohtansiinaawaa kaakii'-ishipii'ikenitc Kishemanitoon kenootamawaanitc aanawiin entahso Anwepiiwi kiishik ekii'-anamihtamawintwaa. Miitahsh o'o mayaa kaakii'-ishihsenik kaakiihpi'-ihkitonitc ahpii kii'inaawaatc Ciisahsoon cinihsimintc.

²⁸ Ekii'-mihkansikwaa tahsh wiinawaa kekoonini ke'onci nihsaawaatc, Paailatoon (Pilate) hsa okiih kakwecimaawaan ci'inaahkonaanitc cinihsimintc Ciisahsoon.

²⁹ Kaa'ishkwaa ishihcikenitc tahsh kahkina eshipii'ikaatenik ini onci, ashiteyaahtikonk tahsh okii'onci pina'waawaan, miihsh kaa'ishi na'inaawaatc na'initiiwikamikonk.

³⁰ Kishemanitoon tahsh okiihkiiwe pimaatisii'ikoon.

³¹ Niipiwa' itahsh tahsokiishik okii'-naakosiihtawaa' i'i kaakii'-wiiciiwikonitc i'imaa Kaalaliiwahkiink (Galilee) piinihsh weti Ceroosalamink. Miiwa' itahsh i'i noonkom kaakiishikaninik kaatipaacimikotc, ewiintamawaanitc Isriyala'.

³² Noonkom tahsh kiwiitamaakoom i'i minwaacimowin: aaniin Kishemanitoon kaakii'ishi ahshotamawaakopanen i'i kikehteya'aaminaapanii',

³³ kiinawint ekii'-otihsaapantamowankitc ekiihkiiwe pimaatisii'aatc Ciisahsoon. Mii 'i iitok o'o nahke eshi tashinsonitc i'imaa Nikamonink: ‘Kiin ninkosihs. Noonkom kaakiishikahk kitookosihsiimin.’

³⁴ Ahpii tahsh Kishemanitoon kiikiiwe pimaatisii'ikotc nipowinink onci kaawiin miinawaa wiihkaa tawaanaatisihsii na'initiiwikamikonk, mii 'owe kaakii'-itaminitc o'o kii'ihkitonikopanen: ‘Tepwe hsa kika miinikoowisim kehtentaakwahk, kaakehcina'wentaakwahk kaye kaakii'ishi ahshotamawakipan Tepit.’

³⁵ Miinawaa tahsh pahkaan nikamonink ishipii'ikaate: ‘Kaawiin kika pakitinaahsii kaatipenimatc kitanohkii'aakan cinihshiwanaataninik owiiyaw i'imaa nipowinink.’

³⁶ Inashke wiin Tepit (David) kaa'ishkwaa ishihciketc kaakii'-inenimikotc Kishemanitoon citootank, mii 'i kaakii'-ishkwaa pimaatisitc. Kii'ishi na'inikaateni tahsh owiiyaw kaakii'ishi na'inimintc okehteya'aama', miihsh kaakii'-wanaataninik owiyaw na'initiiwikamikonk.

³⁷ A'awe tahsh kaakiih kiiwe pimaatisii'ikotc Kishemanitoon kaawiin miinawaa wiihkaa tanipohsii cikii'-wanaataninikipan owiiyaw.

³⁸ Kinantawenimininim tahsh kiinawaa nintinawemaakanak cikihkentamek, mii 'awe Ciisahs kaawiintamaakooyek, wiin onci e'onci poonencikaatekin macitootamowinan.

³⁹ Inashke awiya kiikanawentank Moosihsoon (Moses) otoonahshowewinini, kaawiin i'imaa ta'onci pakitinikaasohsii. Mii ehta ko awiya tepweyenimaatc Ciisahsoon ke'inakimintc emino wiiciiwaatc Kishemanitoon.

⁴⁰ Ayenkwaamisik tahsh kiinawaa ci'ishiwepisihsiwek o'o kaakii'-ihkitowaakopanen iki Kishemanitoon kenootamawaawaatc:

⁴¹ ‘Pisintamok, kiinawaa kaanihtaa maanencikeyek, wewaanentamek, kaye tahsh kaanipoyek! Kekoon hsa niwii'-ishihcike noonkom kaakiishikahk mekwaa ehpimaatisiyek ketepwehtansiwek, mihsawaa ko awiya aana waawiintamawinek,’ ” Pwaal kii'ihkito.

⁴² Pwaal tahsh, a'a kaye Paarnapahs e'ani saaka'amowaatc i'imaa anami'ewikamikonk, pemaatisinitc miinawaa okii'-antomikowaa' Anwepiiwi kiishikanink cipitashintamowaatc ini aasha kaakii'-wiintamaakewaatc.

⁴³ Ahpii tahsh ehsaaka'aminitc kaakii'ishi piintikenk, niipiwa' Coowa', i'i kaye kaakiih Coowiwihsinik kaakii'-otaahpinaminitc Coowianami'aawin, okiih piminisha'okowaa' a'a Pwaal, a'a kaye Paarnapahsan. Miitahsh kaakii wiintamawaawaatc wiihka cipoon iahpenimontansinik eshi kishewaatisinitc Kishemanitoon.

⁴⁴ Miinawaa tahsh e'Anwepiiwi kiishikaninik, kekaa kahkina ootenaank eyaanitc kiihpiishaawa' ewii'-noontaminitc kaaTipencikenitc otihkitowinini.

⁴⁵ Ahpii tahsh Coowak ewaapankewaatc ehpaahtiinonaaniwaninik, wiinke kii'moshkinewi ontentamook. Okii'-aanwehtawaawaan kaye Pwaalan kaakii'-ihkitonitc, noociko kaye ekii'-ayinaawaatc.

⁴⁶ Miihsh Pwaal, a'a kaye Paarnapahs kaakiih soonkite'e nahkwehtamowaatc ekii'-ihkitowaatc: “Kiinawaa iitok nihtam kaaCoowiwiyek kii'ishinaakwanoopan cikii'-wiintamaakooyekipan Kishemanitoo otipaacimowin. E'aanawentamowek tahsh, ehte ahpiihtenintisohsiwek kaye cikii'ayaayekipan pimaatisiwin wiihkaa kepoonihsehsinok, meshkwac tahsh noonkom kaaCoowiwihsikwaa ninka naasihkawaanaanik.

⁴⁷ Aaniihsh mii 'oweni kaaTipenciketc kaa'inanooshiyamintc o'o kii'ihkitotc: ‘Kika'ishi'ininim hsa ciwaahseshkamawekwaa kaaCoowiwihsikwaa, kahkina pemaatisiwaatc kaa'ayaawaatc o'omaa misiwe ahkiink ci'onci pimaaci'ikoowisiwaatc,’ ” okii'inaa'.

⁴⁸ Ahpii tahsh kaaCoowiwihsikwaa enoontamowaatc o'o wiinke kiikihci ciihkentamook, okiihkihci'-inentaanaawaa kaye Kishemanitoon otihkitowinini. Kahkina tahsh kaakii kiishaaci'-onakimintwaa ci'ayaawaatc pimaatisiwin kepoonihsehsininik kii'ani tepwehtamook.

⁴⁹ KaaTipenciketc tahsh otihkitowin misiwe kii'ani misihteshkaani i'imaa nahkehkamik.

⁵⁰ Coowak tahsh okii'-ompwe'aawaa' ihkwewa' kaakiih kihtaanenimaanitc Kishemanitoon, i'i kaye ininiwa' kaakii niikaanentaakosinitc i'imaa ootenaank. Okii'-ompwe'aawaa' kaye awiya' cimaanshi tootawaanitc Pwaalan (Paul), ini kaye Paarnapahsan (Barnabas). Miitahsh kaakiih saakici wepinaawaatc i'imaa otahkiiwaank onci.

⁵¹ Ishinisha'waakanak tahsh kiihpaapaawisitehshimoonowak cikihkentaminitc ekii'-macitootaminitc. Kii'ani'-ishaawak tahsh weti Aaihkooniyam (Iconium) ootenaank.

⁵² Otepwehtamook tahsh i'imaa Entiyaahk (Antioch) eyaawaatc wiinke okii'-mooshkineshkaakonaawaa ciihkentamowin, okii'-mooshkineshkaakowaan kaye Kishemanitoon otAhcaahkoni.