ᐃᔑᒋᑫᐎᓇᓐ 11 - Ojibwe Kihcimasina'ikan

Piitar kiitipaacimohtawaatc otepwehtamoo' Ceroosalamink eyaanitc

¹ Ishinisha'waakanak tahsh, otepwehtamook kaye Cootiiyahkiink (Judea) kaa'ayaawaatc kiinoontamook i'i kaaCoowiwihsinik ekii'-otaahpinaminitc Kishemanitoon otihkitowinini.

² Ahpii tahsh Piitar (Peter) kaatakohshink Ceroosalamink (Jerusalem) okii'-aanwaapamikoo' i'i kaakihkinawaatashakeshwaahsowimintc otepwehtamoo' ekii'ikotc,

³ “Kikiih piintikawaak i'i kaakihkinawaatashakeshwaahsowintwaa, kikiiwiici wiihsiniimaak itahsh kaye,” okii'ikoo'.

⁴ Piitar tahsh kii'maacii kakito ekii wiintamawaatc aaniin mayaa kaa'ishihsenik ekii'-ihkitotc:

⁵ “Mekwaa Caahpa (Joppa) ootenaank e'ayaayaan e'anami'aayaan, kekoon ninkii'-ishinam. Ninkii waapantaan kekoon kiishikonk ehpiinaakwahk e'ishinaakwahk ishiikinonk kaashi naniiwikiihkeyiikahk ehpi'onci niihsaapiikinikaatek. Niin ninkiihpi naasihkaakon.

⁶ Ehkanawaapantamaan tahsh, ninkii waapamaak kaaniiwi kaatewaatc aya'aawihshak, pikwaciaya'aawihshak kaye, kinepikook kaye, pinehshiinshak kaye ishpimink pemaamihsewaatc.

⁷ Ninkiinoontawaa tahsh awiya ehkanooshitc e'ihkitotc: ‘Wanishkaan Piitar! Nihshi ci'amwatwaa,’ ninkii'ik.

⁸ O'o tahsh ninkii'inaa: ‘Kaawiin Tepencikeyan! Kaawiin wiihkaa nimpimiicihsiin kaawiinentaakwahk, kaamanaa miicinaakaatek miicim.’

⁹ Miinawaa tahsh kihcikiishikonk awiya ninkii'-onci kanoonik: ‘Kekoo itanken ewiinentaakwahk Kishemanitoo kaapehkihtootc,’ ninkii'ik.

¹⁰ Nihswaa o'o kiihtoocikaate, miitahsh kiishikonk kaa'ishi kiiwe ishpipicikaatek.

¹¹ Inashke mii 'i ahpii nihsin ininiwak kiihtakohshinook kaakiih piicinisha'ontwaa. Kiihpiniipawiwak i'imaa waahkaa'ikanink kaakii'ishi kapehshiyaan, Sehsariiya (Caesarea) ootenaank kiihpi'onciiwak ekiihpi naasihkawiwaatc.

¹² Kishemanitoo otAhcaahkwan tahsh ninkii'-wiintamaak cipwaahtawiihsiwaan ciwiiciiwimak. Oko tahsh kaye ninkotwaahso niici otepwehtamook ninkii wiiciiwikook. Miihsh kaakiih piintikeyaank Kwaarniiliyahs (Cornelius) owaahkaa'ikan.

¹³ Ninkii'-wiintamaakonaan tahsh kaa'ishi waapamaatc encalan eniipawinitc owaahkaa'ikanink ekii'ikotc iinsan: ‘Ishinisha'owen Caahpa ootenaank Saaiman Piitar kaaishinihkaasotc ci'antomatc.

¹⁴ Miitahsh a'awe kewiintamawihk ihkitowinan ke'onci pimaaci'ikoowisiyan, iki kaye kahkina eyaawaatc i'imaa kaashi'-ayaayan,’ okii'ikoon iinsan.

¹⁵ Ahpii tahsh kaa'maacii kaakiikitoyaan, Kishemanitoon otAhcaahkoni okii'-otihsikowaan taapishkoo kiinawint nihtam kaakii'ishi otihsiyamintc.

¹⁶ Miitahsh kaakii'-maamihkawiyaan o'o kaakii'-ihkitohpan kaaTipenciketc: ‘Cwaan (John) nipiini okii yaapacihtoon siika'antaaketc, kiinawaa tahsh wiin siika'antaakooyek, Kishemanitoon otAhcaahkwan tayaapatisiwan,’ kii'ihkitopan.

¹⁷ Kiishpin tahsh Kishemanitoo miinaatc i'i kaaCoowiwihsinik i'i peshikwan tino miikiwewin kaakii'ishi miinikoowisiyank ahpii kiitepweyenimank Ciisahs Christ, awenen tahsh niin ketinowiyaampaan cikakwe nakaaskawakipan Kishemanitoo,” kii'ihkito Piitar.

¹⁸ Ahpii tahsh kaanoontaakotc o'o enaacimotc kaawiin kii'noontaatihsiiwa'. Miitahsh kaa'ishi nanaahkomaanitc Kishemanitoon e'ihkitonitc: “Kishemanitoo ohsha iinsan opakitinamawaa' i'i kaaCoowiwihsinik cikwehkaatisinitc, ci'onci pimaatisinitc kaye,” kii'ihkitowa'.

Otepwehtamook ehtashimintwaa Entiyaahk kaakii'ayaawaatc

¹⁹ Ahpii tahsh Istiipin (Stephen) kiinihsintc, mii 'i ahpii kaakii'-maacii kakwaataki'intwaa otepwehtamook. Aaninta tahsh otepwehtamook kaakiih piiwipa'iwewaatc kii'ishaawak Piniihshiya (Phoenicia), minihsink kaye Saaiparahs (Cyprus) eshinihkaatenik, Entiyaahk (Antioch) ootenaank kaye ekiihpapaa minwaacimowaatc, Coowa' ehta ekii'-wiitamawaawaatc.

²⁰ Aaninta tahsh otepwehtamook kiihpii'-onciiwak Saaiparahs, Saairiini (Cyrene), Entiyaahk ootenaank ekii'ishi takohshinowaatc. KaaCoowiwihsinik itahsh Kariik (Greek) tino okii'-wiintamawaawaa' i'i eshi minwaacimimintc kaaTipencikenitc Ciisahsoon.

²¹ Okashki'ewisiwinini tahsh kaaTipencikenitc okii wiiciiwikonaawaa, niipiwa' tahsh pemaatisinitc kiihtepwehtamoo' ekiih kwekiinotawaanitc kaaTipencikenitc.

²² Otepwehtamook tahsh Ceroosalamink (Jerusalem) kaa'ayaawaatc kiinoontamook o'o e'ishihsenik. Miitahsh kaakii'-ishinisha'waawaatc Paarnapahsan (Barnabas) ci'ishaanitc weti Entiyaahk ootenaank.

²³ Ahpii tahsh Paarnapahs ehtakohshink okii waapamaa' otepwehtamoo' ekiih shawenimikonitc Kishemanitoon. Wiinke tahsh kiihciihkentam ekii'-ayaankwaamimaatc kaye mooshak iko tepwe cipiminisha'waanitc Kishemanitoon.

²⁴ Aahpici hsa kiihsasekaa ininiiwi, ekii'-mooshkineshkaakotc Kishemanitoon otAhcaahkoni, tepwehtamowin kaye. Kii'ani nanki paahtiinowak tahsh kaakiih tepwehtawaawaatc Kishemanitoon.

²⁵ Kii'ishaa tahsh Taarsahs (Tarsus) ootenaank ekii'-antone'waatc Swaalan (Saul).

²⁶ Ahpii tahsh kaamihkawaatc okiih piinaan i'imaa Entiyaahk ootenaank. Peshiko pipoon tahsh i'imaa kii'ayaawak ekii'-maamaawaci'aawaatc otepwehtamoo', niipiwa' kaye ekiih kihkino'mawaawaatc. Miitahsh i'imaa ootenaank Entiyaahk otepwehtamook nihtam kaakii'-ishinihkaanintwaa Christ opiminisha'waakana'.

²⁷ Miitahsh i'i ahpii aanintaa kaakiih takohshinowaatc kaakanootamawaawaatc Kishemanitoon i'imaa Entiyaahk, ekii'-onciiwaatc Ceroosalamink.

²⁸ Peshik tahsh inini Aakapahs (Agabus) eshinihkaasotc kiihpasikwii. Kishemanitoon otAhcaahkoni tahsh okiimiinikoon ciwiintank ewii'-noontehsenik miicim misiwe ahkiink. Miitahsh tepwe kaa'ishiwepaninik mekwaa ahpii Kalaatiyahsan (Claudius) kiikihciokimaawinitc.

²⁹ Otepwehtamook tahsh pepeshik kii'inentamook ehko kashkihtoowaatc ci'ishinisha'amawaawaatc wiici'iwewin otepwehtamoo' eyaanitc Cootiiyahkiink (Judea).

³⁰ Miitahsh o'o kaa'ishihcikewaatc ekii'-ishinisha'amawaawaatc kaaniikaanentaakosinitc anami'aawinink. Paarnapahs tahsh, Swaal (Saul) kaye kii'anoonaawak ci'ishiwitoowaatc i'i wiici'itiwin.