Aaiseya 9 - Ojibwe Kihcimasina'ikan

Ke'anikihciokimaawitc Ehtashinsotc

¹ Kaawiin hsa awahshime keyaapi ta⁠piikiskaatentansiiwak iki kaa⁠wahsitaawihsewaatc. Iki hsa ahkiink Sepiyolan (Zebulun), Naapihtalaai (Naphtali) kaye kaa⁠onciiwaatc wiinke otaanaank kiih⁠tapahsentaako'aawak. Piciinak tahsh otahkiimiwaan ta⁠kihtentaakohcikaateni i'imaa eyaanikin ishi nahsawaya'ii Kihcikamiink, piinihsh tahsh weti akaamisiipink Cwaartan (Jordan) ecikaatenik. I'i hsa kaye Kaalaliwi ahki (Galilee) ta⁠kihkentaakwan eshi'ayaawaatc kaa⁠Coowiwihsikwaa.

² Pemaatisiwaatc hsa kaashi pimohsewaatc kaashi kashkiitipihkaninik oka waapantaanaawaa kaa⁠kihci waahseyaanik. Iki hsa kaa⁠ishitaawaatc ahkiink kaashi kashkiitipihkaninik, kaa⁠waahseyaanik hsa i'imaa tashi saakaahteni.

³ Pemaatisiwaatc kaye kitani paahtiino'aak, e⁠ani ishi'atwaa aanciihke ci⁠minwentamowaatc. Onci minwentamook hsa 'i kaakii ishihcike'atwaa taapishkoo kaashi minwentamonaaniwank kii⁠manishikenk, taapishkoo kaye awiyak kaashi minwentamowaatc kii⁠nenaawa'oonitiwaatc omahkantwewiniwaan.

⁴ Kikiih piikonamowaan kaye i'i pimiwanaanaahk keyaapi ci⁠kosikowanehsikwaa i'i kaye mihtikoni kaakiih pahpahkihte'okowaatc otinimaakaniwaank. Kikiih shaakooci'imaa' hsa kaye kaakiih kakwaataki'ikowaatc, kaakiih koohpaaci'ikowaatc pemaatisinitc taapishkoo kaakii ishi shaakooci'imatc Mitiyan kaatinowinitc (Midianites) mewisha.

⁵ Kahkina hsa omahkisiniwaan shimaakanihshak, kahkina kaye okikishkikaniwaan kaa⁠miskwiiwaninikin ta‑ankwaakisikaateniwan mihshink ci‑inwaatenikin.

⁶ Kii⁠onci nihtaawiki apinoonciish kiinawint onci. Okosihsimaa kikii miinikoomin! Wiin hsa kika tipenimikonaan. Mii hsa 'i ke⁠ishinihkaasotc, “Kaamaamahkaatentaakositc Owiici'iwe, Kaamashkawentaakositc Kishemanitoo, Kaanepici'ayaatc Otetemaa, Kaatipentank Pisaanisiwin.”

⁷ I'i hsa kaawi ishi tipenciketc mooshak iko tani nankihseni, pisaanisiwin kaye mooshak ta‑ayaani keshi tipenciketc. Tepitoon (David) hsa otookimaawapiwininiink tashi'api ci⁠naapishkawaatc kaakii ishi tipencikenitc. Oka ishihsitoon hsa otipencikewin kwayahk cishi anohkiimakaninik, weweni kaye ci‑inaahkoniwemakaninik, ahpii maacihsenik wiihkaa ci⁠poonihsehsininik. KaaTipenciketc kaaMaawaci mashkawisiitc ishi mashkawentam o'o ewii ishihciketc.

KaaTipenciketc Ewiinana'ahsaatc Isriyala'

⁸ KaaTipenciketc hsa kii‑ihkito ewii onaahkonaatc Cekapoon (Jacob) opiiwesiimini, Isriyalak hsa oka pakamishkaakonaawaa.

⁹ Kahkina hsa pemaatisiwaatc oka kihkentaanaawaa, iki Iihpariyamiink (Ephraim), Sameriyank (Samaria) kaye kaa⁠onciiwaatc. Miiwak iitok iki kehci inenintisowaatc, e⁠ishpenintisowaatc kaa⁠onci ihkitowaatc,

¹⁰ “Ahsinii waahkaa'ikanihkaanan hsa wiinke kii⁠niisihsewan, wencitoo tahsh iko ahsiniik ninka aapaci'aanaanik ci⁠kiiwe oshihtooyaank ini waahkaa'ikanan. Sikamwar (Sycamore) tinowaahtikook kaye aasha caaki kawa'waawak, nawac e⁠minwaahkosiwaatc kiishkaahtikook hsa meshkwac ninka aapaci'aanaanik.”

¹¹ KaaTipenciketc tahsh kaye oka inahsitamawaa' Isriyala' (Israel) ci⁠miikaanikonitc kaa⁠shiinkenimikonitc Oresinan (Rezin) otininiimini.

¹² Waapanonk hsa inahke Siiriya ahkiink tapi onciiwa', ninkaapii'anonk itahsh inahke Pilistii (Philistines) kaatinowinitc tapi onciiwa' ke⁠miikaanikowaatc ewii caaki'ikowaatc. Shaakooc tahsh kaawiin mahshi kaaTipenciketc poonikitaasohsii; keyaapi eh⁠shiipinihkehtaatc ewii nana'ahshiwetc.

¹³ Pemaatisiwaatc tahsh kaawiin okiih kiiwe naasihkawaahsiwaawaan ini kaakii nana'ahsikowaatc, kaawiin kaye onanaantone'waahsiwaawaan kaaTipencikenitc kaaMaawaci mashkawisiinitc.

¹⁴ Miitahsh kaaTipenciketc ke⁠onci nana'ahsaatc kaa⁠niikaanisinitc Isriyala' peshiko kiishik ci⁠tashiiwe'aatc. Mii hsa 'i ke⁠inentaakwaninik taapishkoo eh⁠kiishkikwe'waatc, eh⁠kiishkaanowe'waatc kaye, taapishkoo kaa⁠ishi kawa'ontc Paam tinowaahtik shikwa mashkohsiiwaahtik.

¹⁵ Iki hsa kaa⁠niikaanisiwaatc, kehci inentaakosiwaatc kaye, miiwak hsa iki kaa'inintwaa ohtikwaanimaak. Iki tahsh wiin kaa⁠kanootamaakewaatc kaa⁠kiiwanimowaatc, miiwak hsa iki kaa'inintwaa osowimaak.

¹⁶ Iki hsa kaa⁠kihkinowinaawaatc pemaatisinitc owaniwinaawaa', iki tahsh kehkinowinintwaa waniwinaawak!

¹⁷ Miitahsh kaaTipenciketc kaa⁠onci minwaapamaahsik oshkiniikiwa', wenci koohpaatenimaahsik kaye kwiiwahshishaana' kiiwaacihkwewa' kaye. Onsaam aaniihsh entahso peshikonitc pemaatisinitc maci'ishiwepisiwa', kaawiin kaye ishi pimaatisihsiiwa' Kishemanitoo eshi mihsawentank, noociko kaye ishikiishwewa'. Shaakooc itahsh kaawiin ta⁠poonikitaasohsii kaaTipenciketc, e⁠niiminihkenitc e⁠ahshwiitc ewii nana'ahshiwetc.

¹⁸ Tepwe hsa maci'ishiwepisiwin ishkotenk inentaakwan. Mii hsa i'imaa wenci ankwaahkitekin wiikwapiin, kaawiminakashiik kaye. Mii hsa kaye i'imaa kaa⁠noohpimiiwank wenci sahkitek, ishpimink inahke kaani onci kihci inaapahtek.

¹⁹ KaaTipenciketc hsa tahsh e⁠nishkaatisitc, kaashi nana'ahshiwetc hsa ishkotenk inentaakwanini, misiwe ahkiink e⁠ishi sahkitenik. Pemaatisiwaatc hsa mihshink inentaakosiwak. Kaawiin tahsh awiyan oka manaaci'aahsiin kaakii wiicinihtaawikiimaatc.

²⁰ Misiwe hsa ko i'imaa ahkiink pemaatisiwaatc aaniinti piko ishi mamanipicikewak e⁠miiciwaatc aaniin iko tino miicim ke⁠mihkamowaatc. Kaawiin itahsh shaakooc tewiihsinihsiiwak. Mii hsa piko pisaan eshi amwaawaatc oniicaanihsiwaa'.

²¹ Manaahsahkaank (Manasseh) hsa wentahkaanesiwaatc, Iihpariyam itahsh wentahkaanesiwaatc ta⁠maamawine'otiwak. Miitahsh minciniishwewaan keshi miikaatamowaatc Coota ahkiini. Shaakooc itahsh kaawiin kaaTipenciketc ta⁠poonikitaasohsii, niiminihkeni e⁠ahshwiitc ewii nana'ahshiwetc.