Aaiseya 8 - Ojibwe Kihcimasina'ikan

Aaiseya Okosihsan Ehtashinsonitc

¹ Miitahsh o'o kaaTipenciketc kaa'ishitc, “Taka otaahpinan i'i kaa⁠mihciikahk kaashi oshipii'ikenaaniwank, miitahsh o'o ke⁠ishipii'ikeyan ci⁠mamaankipii'ikeyan: Kitaahtapiwenootisiwin kitaahtapi kacishkaanimi'iwewin (Maher Shalal Hash Baz).

² Miitahsh ishi antomaahkan Yoraaya (Uriah) anami'ewikimaa, Sehkaraaya (Zechariah) kaye kaa⁠otetetc Ceperohcaayawan (Jeberechiah), ci⁠niishiwaatc ke⁠waapankewaatc.”

³ Ninkii anta waapamaa tahsh niwiiw. Miitahsh kaa⁠ishi kikishkawaawaahsotc kwiiwisenhsan ekii nihtaawiki'aatc. Miihsh o'o kaaTipenciketc kaa'ishitc, “Kitaahtapiwenootis Kacishkaanimi'iwe hsa ishinihkaash a'a kwiiwisenhs.

⁴ A'a tahsh kwiiwisenhs cipwaa kihkentank ci‑ihkitotc ‘Nimaamaa,’ i'i hsa kaashi wenootahk ootena Timaaskahs (Damascus), keshi kacishkaanimi'iwetc kaye ootenaank Sameriya (Samaria), mii hsa 'i aasha ci⁠caaki maaciitootc a'a kihciokimaa Ahsiiriya (Assyria) ahkiink kaa⁠onciitc,” ninkii'ik.

Ahsiiriya Kihciokimaa Kiihpiishaatc

⁵ Miitahsh o'o miinawaa kaaTipenciketc kaa'ishitc,

⁶ “Onsaam hsa iki pemaatisiwaatc ekii aanawentamowaatc i'i nihshihkaac pemiciwaninik siipi Shaailoa (Shiloah) ecikaatek e⁠nininkaanimi'ikowaatc itahsh kaye kihciokimaan Oresin (Rezin) eshinihkaasonitc, ini kaye wekosihsimikonitc Oremalaayawan (Remaliah),

⁷ Niin hsa tahsh Tepencikeyaan, ninka piinimaan Ahsiiriya kihciokimaan, kahkina kaye oshimaakanihshiini ci‑inentaakosinitc taapishkoo kaa⁠mooshka'ank kaa⁠piicicinank meshkawentaakwaninik Iyoohparetiis (Euphrates) siipi eshi'ayaawaatc. Misiwe hsa tashi mamooshka'an eshi sasiipiihkaak, wiinke ci⁠ayaamipiik ehkopiihkaak.

⁸ Taapishkoo eni nihkipiik Coota (Judah) ahkiink ehpiihci paahtiinonitc oshimaakanihshiima' ohkwekanimaank kaani ahpiihtaayawaak. Kahkina kaye kekoon ta⁠nihkipii.” Kishemanitoo hsa e⁠wiiciiwinank ta⁠tehsininkwiini ci⁠naatamawaatank kitahkiiminaan.

⁹ Pisaan ihsa ishi shaakowek ciwii miikaasoyek kiinawaa kaa⁠pepahkaanwewaanakisiyek pemaatisiyek! Nawac iko kohtaanentamok! Pisintamok kahkina waahsa eyaayek! Oshiihtaak ciwii miikaasoyek, nawac itahsh iko kohtaacik!

¹⁰ Onentamok aaniin waa⁠ishihcikeyek. Ta⁠wanashkwehse ohsha mihsawaa. Wiintamok waa⁠ishihcikeyek, kaawiin ta⁠kihkentaakwahsinoon, Kishemanitoo iitok niwiici'ikonaan!

KaaTipencikenitc Kaakii'ishi ayaankwaamimikotc Aaiseya

¹¹ KaaTipenciketc hsa tahsh ninkii mashkawi kanoonik ekii ayaankwaamimitc ci‑ishihcikewaahsiwak eshihtwaanitc o'o pemaatisinitc. Miihsh o'o kaa'ishitc,

¹² “Keko wiin wiiciiwaahken kaa⁠ishi kiimooci onaahkonikewaatc oko pemaatisiwaatc, keko kaye kohtamowaahken kekoon kaa⁠kohtamowaatc, keko kaye kakwaanihsakentamowaahken.

¹³ KaaTipenciketc kaaMaawaci mashkawisiitc ohsha ke⁠inenimekipan e⁠kihtentaakositc. Mii ohsha a'a ke⁠kohtaanenimekipan, ke⁠kohsekipan kaye.

¹⁴ Mii 'awe kaa⁠kihtentaakwahk ahpa'iwewikamik, shaakooc itahsh ikiweniwak pemaatisiwaatc Isriyal shikwa Coota taapishkoo ahsiniin ta⁠tinowiwan kaaTipencikenitc ke⁠pisokeshkaakowaatc, miiwan kaye ini ke⁠kawiwepishkaakowaatc. Pemaatisiwaatc itahsh Ceroosalam ootenaank eyaawaatc inentaakosiwan taapishkoo nakwaakan ke⁠onci kahcitinintwaa.

¹⁵ Ta⁠paahtiinowak hsa i'imaa keshi pisokehshinowaatc, pankihshinowaatc hsa mii 'i keshi piikohshinowaatc ci⁠nakwaasowaatc, ci⁠kaahcitinintwaa tahsh kaye.”

E'onci'itink Cikanoonaahsiwintwaa Kaanipowaatc

¹⁶ Kiinawaa hsa kehkino'amawinakook ishinaakwan ci⁠kanawentamek, ci⁠naakacihtooyek kaye i'i inaacimowin Kishemanitoo kaakii miishitc.

¹⁷ Ninka pii'aa hsa niin kaaTipenciketc kaa⁠kaasohtawaatc Cekapoonk (Jacob) wentahkaanesinitc. Wiinke hsa ko ninka aaskoni nanaantawaapamaa, wiin hsa kaa⁠tepweyenimak.

¹⁸ Inashke tahsh niin o'omaa nintayaa, e⁠wiiciiwakwaa apinoonciishak kaaTipenciketc kaakii miishitc. Mii hsa 'i enentaakosiyaank taapishkoo kihkinawaacihcikanink. KaaTipenciketc kaaMaawaci mashkawisiitc kaashi kihciokimaawapitc Saayan (Zion) ecikaatenik hsa ninkiih piicinisha'okonaan ci⁠tinowiwankitc ke⁠onci kihkencikaatenik otipaacimowin i'imaa Isriyalihkaank.

¹⁹ Ahpii hsa ininekwaa, “Kanoonihkwahk kaa⁠kanoonaawaatc kaa⁠niponitc, shikwa iki kaa⁠nooci'aawaatc ciipaya' enishikaaci naanasaapowewaatc e⁠kiimooci kakanoonaawaatc. Mii iitok eshinaakwaninik pemaatisiwaatc Kishemanitoon ci⁠kanoonaawaahpan. Wekonenini tahsh ke⁠onci kanoonaawaahpan kaa⁠niponitc ci⁠wiitoohkaakowaatc?

²⁰ O'o tahsh kika ishi nahkwehtawaawaak, ‘Pisintamowaahk aaniin eshi kihkino'amawinek kaaTipenciketc! Keko pisintawaahkekwaanik kaa⁠kanoonaawaatc kaa⁠niponitc. Kaawiin ohsha kekoon inaapatahsinini aaniin ke'ininekwaa.’ ”

Maanshihsewin Ci'ayaamakahk

²¹ Pemaatisiwaatc hsa wahsitaawihsewaatc, noonteskatewaatc kaye misiwe ahkiink ta⁠papaami ayaawak. Ahpii tahsh kakwaatakaskatewaatc mii hsa 'i ci⁠ani nishkentamowaatc. Ishpimink itahsh inaapiwaatc oka maci'inaahpinemaawaan okihciokimaamiwaan, oKishemanitoomiwaan kaye.

²² Miitahsh ci⁠kanawaapantamowaatc o'o ahkiini, wahsitaawentamowin, wanitipihkan, siipiskaatentamowin kaye hsa ehta oka waapantaanaawaa. Miihsh keshi ishiwepinintwaa eshi kashkiitipihkaninik.