Aaiseya 7 - Ojibwe Kihcimasina'ikan

Ehtashintenik Kaakii'inaawintipanen Ehaas

¹ Ehaas (Ahaz) hsa kii⁠kihciokimaawi i'imaa Coota (Judah) ahkiink, kaakii otetetc Coohtamoon (Jotham), omihshoomihsan tahsh Yoosaaya (Uzziah) kaakii ishinihkaasonitc. Mii hsa 'i ahpii kaakii kihciokimaawinitc Siiriya (Syria) ahkiink Oresin (Rezin) kaakii ishinihkaasonitc, ini kaye Piika (Pekah) kaakii otetenitc Oremalaayawan (Remaliah) kaakii kihciokimaawinitc i'imaa Isriyalahkiink, Ceroosalamink ehpi naasihkaakotc ewii miikaanikotc. Kaawiin tahsh okii shaakooci'ikohsii'.

² Ahpii tahsh Cootawi kihciokimaa kaa⁠noontank shimaakanihsha' Siiriya ahkiink wenciinitc ekii wiiciiwaanitc Iihpariyam (Ephraim) ootenaank kaakii onciinitc wiinke hsa kiih⁠sekisi, i'i kaye opimaatisiima'. Kaa‑ahpiihtaanimisiwaatc hsa kii⁠nininkishkaawak taapishkoo mihtikook kaa⁠kihci ishiwepaashiwaatc.

³ Aaiseya (Isaiah) tahsh okii'ikoon kaaTipencikenitc, “Maacaan, maaciihsh a'a kikosihs Shiaar Ceshap (Shear Jashub) ci⁠anta nakishkawatc Ehaas kihciokimaa. Weti hsa kika ishi mihkawaa miihkanaank kaashi ayaanitc kaa⁠ishiikinohkenitc, kaashi poonihsek pahsaanihkaan kaa⁠pimi ishiciwaank nipi onta'ipaaniink kaa⁠onciciwaank.

⁴ Miihsh o'o ke'inatc, ‘Ayaankwaamisin, kohshkwaawaatentan, keko sekisihken, keko kaye mikoshkaatentanken.’ A'a hsa kihciokimaa Oresin i'i kaye oshimaakanihshiima' Siiriya kaa⁠onciinitc, a'a kaye kihciokimaa Piika wiinke nishkaatisiwak. I'i hsa tahsh kaashi nishkaatisiwaatc kaawiin nawac naniisaanentaakwahsinini ahpiihc wiin i'i kaa⁠paashkineyaapahtek mihtikohkaank kaa⁠onci noohsotenik.

⁵ Iki hsa shimaakanihshak Siiriya wenciiwaatc, iki kaye Isriyal wenciiwaatc, ini tahsh kaye Isriyal okihciokimaamiwaan kii⁠onentamok maci kekoonini ewiih tootawinekwaa. Miihsh o'o ehkitowaatc,

⁶ ‘Taka hsa ishaataa ci⁠awi miikaatamank Coota ahki, awi seki'aataanik kaye weti kaa‑ayaawaatc, kiinawint iko ci⁠nenaawinamaatiyank. Taka hsa Tepiil (Tabeel) okosihsan kihciokimaawi'imaataanin.’ ”

⁷ Miitahsh o'o kaaTipenciketc Kishemanitoo ehkitotc, “Kaawiin hsa 'i ta⁠ishihsehsinoon, kaawiin kaye i'i ta⁠ishiwepahsinoon,

⁸ onsaam aaniihsh kaye Siiriya kaawiin nawac soonkentaakwahsinoon ahpiihc wiin i'i Timaaskahs (Damascus) kaa⁠niikaanentaakwahk ootena. Timaaskahs itahsh kaye kaawiin awahshime soonkentaakwahsinoon ahpiihc wiin a'a kihciokimaa Oresin (Rezin). Iki tahsh kaye Isriyalak ninkotwaahsimitanashinaanopipoon (65) ishihsek wiinke ta⁠piikonaakosiwak, kaawiin hsa aapiinc iko awiya ta⁠ishkohcikaniwihsii.

⁹ Isriyal hsa kaye kaawiin nawac soonkentaakwahsinoon ahpiihc wiin i'i Sameriya (Samaria) ootena kaa⁠niikaanentaakwaninik, Sameriya tahsh kaye kaawiin nawac soonkentaakwahsinoon ahpiihc wiin a'a kihciokimaa Piika.” “Kiishpin itahsh tepweyentansiwek, kaawiin hsa kika niipawihsiim.”

Ehtashimintc Imaaniyo'el

¹⁰ KaaTipenciketc tahsh miinawaa okiih kanoonaan Ehaasan (Ahaz) ekii'inaatc,

¹¹ “Taka kakwecim kaaTipenciketc kiKishemanitoom kekoonini ci⁠kihkinawaacihtamawihk ci⁠onciinik kihci waahsa anaamiink kaashi ayaanitc neponitc, komaa kaye kihci waahsa ishpimink.”

¹² Ehaas tahsh kii‑ishi nahkwehtam, “Kaawiin i'i niwii ishihcikehsii, kaawiin niwiih kakweci'aahsii kaaTipenciketc!”

¹³ Aaiseya tahsh o'o kii‑ihkito, “Pisintamok Tepitihkaank (David) wentahkaanesiyek, kaawiin ina teminihk kitinentansiim eh⁠kakwe noontehshimekwaa ininiwak, aanciko tahsh kaye eh⁠kakwe noontehshimek Kishemanitoo?

¹⁴ KaaTipenciketc hsa wiin iko kika waapanta'ik ke⁠kihkinawaasaapantamowatc: Kaa⁠pehkisitc hsa oshkiniikihkwe ta⁠kikishkawaawaahso, kwiiwisenhsan tahsh oka nihtaawiki'aan, Imaaniyo'el (Immanuel) oka ishinihkaanaan.

¹⁵ A'a hsa tahsh kwiiwisenhs oka miicin coocoohshaapo pimiteni, aamoowi siinsipaahkwatoni kaye ahpii te'ahpiihtaatisitc ci⁠kihkentank i'i kaa⁠onishihshininik, i'i kaye kaa⁠maanaataninik.

¹⁶ A'a hsa kwiiwisenhs cipwaa kihkentank ci⁠aanawentank kaa⁠maanaataninik, ci⁠otaahpinank kaye kaa⁠onishihshininik, iki hsa niishin kihciokimaak kaa⁠kohsekwaa aasha ta⁠manshashkwaaniwan otahkiimiwaan.”

¹⁷ “Kiin hsa, iki kaye pemaatisiwaatc, kitete kaye owaahkaa'ikanink kaa⁠ontahkaanesinitc, kiwiih tootaakowaa hsa kaaTipenciketc wiinke ci⁠maanshihsewek. Awahshime hsa kika ishihsem kaakii ishihsenaaniwaankipan Isriyalink kaakii onciiwaatc Coota ahkiink kii⁠onci pahkewaakopanen. Kihciokimaan hsa Ahsiiriya (Assyria) kaa⁠onciinitc o'oweni kikatootaakowaa kaashi ayaawek.”

¹⁸ “Miitahsh i'i ahpii kiishikaninik kaaTipenciketc ci⁠kwiishkohshiimaatc Iicip kaatinowinitc ci⁠piishaanitc. Waahsa ihsa weti Iicipahkiink kaashi sasiipiihkaanink tapi onciiwa' oociinsink ci⁠ahpiihci paahtiinonitc. I'i tahsh kaye Ahsiiriya ahkiink kaa⁠onciinitc taapishkoo aamoonk ta‑ahpiihci paahtiinowa'.

¹⁹ Kahkina hsa tahsh ta⁠piishaawak cishi kapehshiwaatc kaashi papahsatinaanik, kaashi tahtaashkaapihkaanik, kashi kakawiminakishiihkaanik, misiwe kaye kaashi mashkohsiihkaanik.”

²⁰ “I'i hsa ahpii kiishikaninik kaaTipenciketc oka inwaanaan kaashkipaasoniink ini kihciokimaan akaamisiipi Iyoohparetiis (Euphrates) wenciinitc, Ahsiiriya (Assyria) kihciokimaan. Miiwan tahsh ini ke⁠aapaci'aatc ci⁠kaashkipaatoonitc kiinihsihsiwaan, kimiishaahkokaataaniwaan, kimiishitoonaaniwaan kaye.”

²¹ “Miihsh i'i ahpii kiishikaninik inini oka kashkihtoon ci⁠kanawenimaatc peshik pishihkiinsan, niishin kaye maanatihkwa'.

²² I'i tahsh ke⁠ahpiihci wenoocihsetc i'i coocoohshaapooni wiinke tahsh iko ta⁠tepihse coocoohshaapo pimiteni. Iki tahsh kaye ke⁠ishkwiiwaatc i'imaa ahkiink ta⁠tepihsewak ci⁠miiciwaatc coocoohshaapo pimite i'i kaye aamoowi siinsipaahkwat.”

²³ “I'i hsa tahsh ahpii kiishikahk kihtikewahkamikoon shoominak kaashi kihtikaasowaatc, memitaahswaahk shoominaahtikook eh⁠tatahshiwaatc mitaahswaahk waapaapihko shooniyaank e⁠ahpiihtentaakwahkin. Ini hsa wiikwapiin, kaawiminakashiin kaye meshkwac i'imaa ta⁠kipokinoon kihtikewahkamikonk.

²⁴ Ke⁠ahpiihci wiikwapiihkaanik tahsh kaye ke⁠ahpiihci kaawiminakashiihkaanik, i'imaa misiwe ahkiink. Miitahsh imaa ininiwak ke⁠ishiwinaawaatc omihtikwaapiiwaa', opihkwaahkowaan kaye ci⁠antawencikewaatc.

²⁵ Iniweniwan tahsh kaye kaa⁠papiihkwatinaakin, kaakii ishi nihtaa kihtikenaaniwankipan kaawiin hsa weti ta⁠ishaaniwansinoon ke⁠ahpiihci wiikwapiihkaak, ke⁠ahpiihci kaawiminakashiihkaak kaye. Mii hsa weti meshkwac pishihkiwak ke⁠papaatanancikewaatc, misiwe maanahcaanihshak ke⁠ishi papaamohsewaatc. ”