Aaiseya 66 - Ojibwe Kihcimasina'ikan

KaaTipenciketc Enaahkonaatc Pemaatisinitc

¹ Miitahsh o'o kaaTipenciketc ehkitotc, “Kihcikiishik hsa nintookimaawapiwin, i'i hsa ahki mii 'iwe nintahpisitepiwin. Aaniinti tahsh i'i waahkaa'ikan kaawii oshihtamawiyek? Aaniinti tahsh keshi anwepiyaan.

² Niin iitok inaa nininciink ono kahkina ninkii onci oshihtoonan, miihsh kaakii ayaakin. Mii hsa wa'a kaa⁠ishpenimak, awiya kaa⁠tapahsenimotc, kaa⁠piikote'eyentank, kaa⁠nininkishkaatc e⁠noontank nintihkitowin.”

³ “Wiinawaa tahsh piko otoonaapantaanaawaa aaniin waa⁠ishihcikewaatc. A'a hsa awiya kaa⁠nihsaatc aape pishihkiwan ewii pakitinaahswaaketc, mii hsa enenimak taapishkoo awiya kaa⁠nihsaatc ininiwan. A'a hsa kaye kaa⁠pakitinaahswaaketc maanahcaanihshenhsan mii hsa eshinaakositc taapishkoo awiya kaa⁠poohkokwenaatc animoon. A'a hsa kaye kaa⁠pakitinank pahkweshikaniminan mii hsa 'i enentaakwaninik eh⁠pakitinank koohkoohshiwi miskwiini. A'a hsa kaye kaa⁠minaahsiketc mii hsa 'i enentaakwaninik eshihciketc taapishkoo e⁠anami'ehtawaatc manitoohkaanan. Wiinke hsa piko minwentamook e⁠ishihcikewaatc kekwaanihsakentaakwaninikin.

⁴ Niin itahsh iko ninka onentamowaan aaniin keshi nana'ahsakwaa, ci‑ishihsewaatc iniweniwan kaa⁠naniisaanentamowaatc. Nintaanakiih kanoonaak aaniihsh, kaawiin itahsh awiya ninkii nahkwehtaakohsii, aanakiih kiikitoyaampaan, kaawiin awiya ninkiih pisintaakohsii. Mii hsa kaa⁠ishi maci'ishihcikewaatc enaahsamiiwak. Okii onentaanaawaa ewii ishihcikewaatc kaa⁠shiinkentamowak,” ihkito kaaTipenciketc.

⁵ Noontamowaahk kaaTipenciketc eninek, kiinawaa kaa⁠kohtaanentamowek otihkitowin, “Kiicihkiweyiwaak kaa⁠shiinkeniminekwaa, kaa⁠wiiciiwihsinowinekwaa kaye aaniihsh kikihtentamowaam kaaTipenciketc owiinsowin. Miihsh o'o eninekwaa, ‘Taka hsa kaaTipenciketc takihci inenimaa ci⁠waapantamaank kiminwentamowiniwaa!’ Wiinawaa hsa wiin ta‑akaci'aawak.

⁶ Inashke tahsh antohtamok enihtaakwahk weti kihci ootenaank, kihci anami'ewikamikonk hsa tanihtaakwan! Mii hsa 'iwe kaa⁠inihtaakwahk kaaTipenciketc eh⁠kiiwe tipa'amawaatc kaa⁠shiinkenimikotc aaniin eshi kashkihtamaasonitc!”

⁷ “Ceroosalam (Jerusalem) hsa mii 'i eshinaakwahk taapishkoo ihkwe kaa⁠nihtaawikinaawahsotc cipwaa wiihsakentank kwiiwisenhsan kaa‑ayaawaatc.

⁸ Wiihkaa na awiya onoontaan o'o ci‑ishihsenik, kekoonan kaye ci⁠waapantank ci‑ishihsenikin? Konike hsa peshikwewaan pemaatisiwaatc ahkiink eyaawaatc peshiko kiishik ta⁠ohkonihtaawikiwak? Inashke hsa wiin Saayan (Zion) kaawiin kinwesh ta⁠wiihsakentamoomakahsinoon, mii 'i aasha ci⁠nihtaawiki'aatc oniicaanihsa'.

⁹ Mii na tahsh e⁠ishihcikeyaan awiya e⁠otihsaapantamo'ak ci⁠nihtaawikinaawahsotc, ci⁠pakitinaahsiwakipan itahsh pisaan ci⁠nihtaawikinaawahsotc?” ihkito kaaTipenciketc.

¹⁰ “Wiici minwentamoontamok hsa Ceroosalam ci⁠ciihkentamek kiinawaa kahkina kaa⁠saakihtooyek. Wiinke onci ciihkentamok kiinawaa kaakii mawintamek.

¹¹ Mii hsa 'i ke⁠inentaakwahk i'imaa ocoocoohshimink e⁠onci nooniyek, ci⁠tepinawesiyek, wiinke hsa piko ci⁠tepi nooniyek kaashi wenoocihtootc coocoohshaapooni.”

¹² Mii hsa o'oweni kaaTipenciketc ehkitotc, “Kika miinininim hsa pisaanisiwin taapishkoo siipi pisaan kaa⁠pimiciwank. Kaashi wenootisiwaatc kaye kotak pemaatisiwaatc kika tepinaam ci‑inentaakwahk taapishkoo kaa⁠piiciciwank siipi. Mii hsa 'i ke⁠inentaakosiyek taapishkoo apinoonciish kaa⁠nooni'ikotc omaamaan, kaa⁠papaamiwinintc kaye, kaa⁠tatahkonintc kaye onciinkwanimaank.

¹³ Taapishkoo hsa omaamaamaa kaa⁠na'entamo'aatc oniicaanihsan mii hsa inahke peshikwan keshi na'entami'inakook i'imaa Ceroosalamink.

¹⁴ Ahpii tahsh o'o waapantaman ishihsek wiinke hsa kika minwentaam kite'iwaank, miihsh ci⁠ani maaciikiyek taapishkoo mashkohsiin. Miitahsh kaaTipenciketc ci⁠kihkentaakositc e⁠wiici'aatc otanohkii'aakana', ci⁠kihkentaminitc kaye i'i kaa⁠shiinkenimikotc onishkaatisiwin.”

¹⁵ KaaTipenciketc hsa tahsh piishaatc ta⁠ishkotewentaakosi, otootaapaanaahkwan pishipicicoohshink enentaakosinitc ewii nana'ahsaatc i'i neshki'ikotc otishkotem ewii aapacihtootc.

¹⁶ Ishkoteni hsa, pashipa'ikewihkomaan kaye oka aapacihtoon ahpii kaaTipenciketc onaahkonaatc kahkina pemaatisinitc. Aahpici hsa ta⁠paahtiinowa' ke⁠nihsaatc.

¹⁷ Mii 'owe ehkitotc kaaTipenciketc, “Mii ohsha 'i aasha e⁠ocihcihsenik iki kaa⁠pehki'itisowaatc ewii anami'ehtawaawaatc pahkaan manitoo' ci⁠nihshiwanaaci'intwaa. Kaa⁠piminisha'waawaatc i'i eshaanitc eshi kihtikewintc kaa‑amwaanitc koohkoohsha', kihci waapikoshiihsha' kaye, ini kaye kekoonan kaa⁠manaa miicinaakaatenikin. Ta⁠nihshiwanaaci'aawa' hsa kaye i'i.

¹⁸ Ninkihkenimaak iitok aaniin eshihcikewaatc, aaniin kaye eshi naanaakatawentamowaatc.” “Aasha ohsha ocihcihseni ci⁠maawantoonakwaa kahkina kaa⁠pepahkaanwewaanakisiwaatc pemaatisiwaatc entahso ishikiishwewaatc. Miihsh ci⁠waapantamowaatc ninkihci inentaakosiwin ahpii piishaawaatc.

¹⁹ Aaninta tahsh ninka pimaaci'aak. Miiwak itahsh iki ke⁠ishinisha'wakwaa eshi'ayaanitc kotak pemaatisinitc waahsa kaye minihsink kaa‑ayaanitc mahshi kaa⁠noontansinik eshi kihtentaakosiwak, mahshi kaye kaa⁠waapantansinik ninkihci inentaakosiwin, eshi mashkawentaakosiwak kaye. Miitahsh weti ke⁠ishaawaatc Taarshish (Tarshish) kaye Lipiya (Libya) ahkiink, shikwa Litiya (Lydia) kaatinowinitc kaa⁠nakaci'aanitc mihtikwaapiin, kaye Toopal (Tubal) shikwa Kariihs (Greece) ahkiink. Miitahsh weti keshi tashintamowaatc ninkihci inentaakosiwin mekweya'ii eshi'ayaanitc kotak pemaatisinitc.

²⁰ Miiwak hsa iki ke⁠pikiiwewinaawaatc kiicipimaatisiiwa' ci⁠onciwinaawaatc eshi'ayaanitc kotak pemaatisinitc. Miiwa' itahsh i'i ke⁠inwaanaawaatc ke⁠miinikoowak. Mihtatimoo' hsa oka aapaci'aawaa', shoonshoomihtatimoo' kaye, pihkwaawikane mihtatimoo' kaye, miikaasowi otaapaanaahkwa', otaapaanaahkwa' iko kaye ci⁠piinaawaatc i'imaa kaa⁠ishi kihtentaakwaninik waciink Ceroosalamink. Mii hsa 'i ke⁠ishinaakosiwaatc taapishkoo tino Isriyalak kaa⁠piitoowaatc pahkweshikaniminan i'imaa kihci anami'ewikamikonk kaashi anami'e pehkakintenikin ahcikanink.

²¹ Ninka kakiikinaak hsa aaninta ci⁠anami'ewikimaawiwaatc, aaninta kaye Liipaai kaa⁠ontahkaanesiwaatc ci‑inakinsowaatc,” ihkito kaaTipenciketc.

²² “Taapishkoo hsa oshki ahki, oshki kiishikoon kaye keshi shashiipi'ayaakin nimashkawisiiwinink enaahsamiiwak, mii hsa 'i peshikwan inahke kiwiinsowin, iki kaye kipiiwesiimak keshi shashiipi ayaawaatc.”

²³ Mii hsa 'o kaaTipenciketc ehkitotc, “Entahso oshkakoocininitc hsa tipihkikiisihsoon, entahso Anwepiiwi kiishikaninik kaye kahkina entahswewaanakisiwaatc pemaatisiwaatc ninkapi naasihkaakook ci⁠animihkohtaawaatc eshi'ayaawak.

²⁴ O'omaa tahsh ani onci maacaawaatc oka waapamaawaa' kaa⁠niponitc ci⁠pimihshininitc i'i kaakii shashiipihtawimitc. Ohkwe' kaye kaa‑amokonitc kaawiin ta⁠nipohsiiwa', kaawiin ta‑aahtawehsinini ishkoteni kaashi caakisonitc. Wiinke hsa ko okakwaanihsakinaakoni i'i ke⁠waapamikonitc Kaa⁠tahswewaanakisinitc pemaatisinitc,” ihkito kaaTipenciketc.