Aaiseya 63 - Ojibwe Kihcimasina'ikan

KaaTipenciketc Eshishaakooci'aatc Kotak Pemaatisinitc

¹ “Awenen hsa tahsh a'a kaa⁠pionci takohshink Paasra (Bozrah) ootenaank, Iitam (Edom) ahkiink kaa⁠miskwatihtenikin okikishkikanan. Awenen hsa 'a kaa⁠pinaakositc kaa⁠minohkonayetc, kaa⁠kihci mashkawentaakositc kaye?” “Niin ohsha a'a kaa⁠kwayahko kiishweyaan, kaa⁠mashkawentaakosiyaan ci⁠pimaaci'iweyaan.”

² “Wekonen itahsh wenci miskwaakin kikikishkikanan, taapishkoo iki kaa⁠shikoshkawaawaatc shoomina'?”

³ Miihsh o'o kaaTipenciketc eshi nahkwehtank, “Nikii shikoshkawaak hsa kotak pemaatisiwaatc taapishkoo kaa⁠toocikaasowaatc shoominak, kaawiin itahsh awiya ninkii wiici'ikohsii. E⁠nishkaatisiyaan hsa ninkiih shikoshkawaak, omiskwiimiwaa tahsh ninkikishkikanink kii‑ishisihswehseni, miihsh kaa⁠onci miskwekahkin ninkikishkikanan.

⁴ Kii‑ishi kiishikan hsa ekii inentamaan aasha e⁠ocihcihsek ci⁠nana'ahcikeyaan, e⁠ishi kihkinoonowank aasha ci⁠pimaaci'iweyaan.

⁵ Wiinke hsa ninkii maamahkaatentam ekii waapamaahsiwak awiya ekii ayaahsik cikii wiici'ihpan. Nimashkawisiiwinink ekii onci shaakoocihtwaayaan, ninishkaatisiwinink ekii onci soonkisiyaan.

⁶ Miihsh e⁠nishkaatisiyaan eshi shikoshkawakwaa pemaatisiwaatc. E⁠nishki'iwaatc ninkii mina'aak ci⁠kihkentamowaatc ninishkaatisiwin, ninkiih siikinamowaan omiskwiimiwaa mihtahkamikonk.”

KaaTipenciketc Eshiminotootawaatc Isriyala'

⁷ Ninka tashintamowaan hsa kaaTipenciketc eshi minotootaaketc; ninka miikwehciwenimaa hsa i'i kahkina kaakii ishihcikehtamawinankitc. Tepwe hsa paahtiinatininiwan ominohcikewinan entootawaatc Isriyala', aaniihsh koohpaatenimiwe, nihtaa minotootaake kaye.

⁸ Miitahsh kaaTipenciketc ehkitotc, “Tepwe hsa wiinawaa nimpimaatisiimak, kaawiin hsa ninka kayeshi'ikohsiik.” Miiwan hsa ini iki pemaatisiwaatc kaa⁠opimaaci'iwemiwaatc.

⁹ Kahkina hsa ko eshi kakwaatakihtoonitc, mii hsa ko kewiin eshi kakwaatakihtootc. Otencaliman hsa eyaanitc kaashi ayaatc, miiwan hsa ini kaa⁠naatamaakonitc. Eh⁠saaki'aatc, e⁠koohpaatenimaatc kaye ohsha kaa⁠onci pimaaci'aatc. Mooshak ihsa ko otaanaank opionci kanawenimaa'.

¹⁰ Miitahsh kaakiih shashiipihtaakotc, ekii maanentamo'ikotc kaye Kishemanitoo otAhcaahkonk; miitahsh kaakii ani tinowitc kaa⁠shiinkenimaatc, ekii ani miikaanaatc kaye.

¹¹ Miitahsh opimaatisiima' otaanaank kaakii ishi maamihkawinitc ahpii Moosihs (Moses) kii⁠pimaatisikopanen, opimaatisiima' kaye, ekii ihkitonitc, “Aaniinti tahsh eyaatc a'a kihcikamiink kaakiih shaapowinaatc, i'i kaye kaakii niikaaniihtamawaanitc opimaatisiimini? Aaniinti tahsh inaa eyaatc a'a kaakiih miinaatc Moosihsoon tipinawe otAhcaahkwan.

¹² Aaniinti tahsh eyaatc a'a kaakii kihci mashkawihciketc kii⁠aapaci'aatc Moosihsoon, kaakiih tootank nipiini ci⁠tawipiishkaanik, kaakii ontinamaasotc ke⁠onci nehpici kihci inentaakositc.

¹³ Awenen itahsh kaah⁠shaapowinaatc eshi kiishkaayawaanik?” Taapishkoo hsa kaa⁠na'iitc mihtatim kaa⁠pimohsetc mihshawahkamik, kaawiin cikiih pisokehshinowaatc?

¹⁴ Taapishkoo hsa pishihkiwak kaa⁠ishaawaatc pahsatinaank, mii hsa 'i eshi anwepi'ikowaatc kaaTipencikenitc otAhcaahkoni. Mii hsa 'iwe nahke eshi kihkinowinatwaa kipimaatisiimak ke⁠onci ayaayan kaa⁠kihci inentaakwahk wiinsowin.

Ehkakwetwenk Wiici'ikoowisiwin

¹⁵ KaaTipenciketc, kihcikiishikonk onsaapamihshinaam kaashi kohtaanentaakwahk, kaashi kihci inentaakwahk kaye kitaawin. Wekonen keyaapi wenci naanaakatawenimihsiwaank? Aaniinti tahsh i'i kimashkawisiiwin? Wekonen itahsh keyaapi wenci saaki'ihsiwaank, kaye wenci koohpaatenimihsiwaank? Keko hsa aanwaapamihshinaahkaank.

¹⁶ Kiin iitok kitootetemikoo, aanawiin Eparahaam (Abraham) e⁠kihkenimihsiyamintc, Isriyal kaye e⁠nihsitawinawihsinowankitc. Tepencikeyan, kiin iitok kaa⁠ootetemikooyan, mewisha hsa piko nimPimaaci'iweminaan kipionci ishinihkaanikoo.

¹⁷ Tepencikeyan, wekonen itahsh wenci pakitiniyaank ci⁠nakatamaank kitishihtwaawinan? Wekonen kaye wenci tootawiyaank ci⁠shashiipihtamaank miihsh eshi kihtenimikoohsiwan? Pikiiwenotawihshinaam, niinawint iitok kitanohkii'aakanak, kaa⁠tipinawewisiyan entahswewaanakisiyaank.

¹⁸ Acina hsa ehta kehtenimatwaa kipimaatisiimak okiih tipentaanaawaa entashi anami'ehtaakooyan, iki tahsh kaa⁠shiinkenimiyamintwaa okiih piikoshkaanaawaa i'i kitanami'ewikamik.

¹⁹ Mii hsa 'i entootawiyaank taapishkoo wiihkaa eh⁠tipenimihsinowiyaank, e⁠inentaakosiyaank iki tino wiihkaa kaa⁠naapinihkaasohsikwaa i'i kiwiinsowin.