Aaiseya 62 - Ojibwe Kihcimasina'ikan

Saayan Otoshkiwiinsowin

¹ I'i hsa onci Saayan (Zion), Ceroosalam kaa'icikaatek, kaawiin ninka onci poonwewitansii, paanimaa hsa inaahsahkwanenik owaahsahkonencikan kii⁠tipihkaninik okwayahkwaatisiwinink shaakoocihtwaawinink kaye.

² Kotak hsa pahkaanwewaan pemaatisiwaatc oka waapantaanaawaa kikwayahkwaatisiwin. Kihciokimaak oka waapantaanaawaa keshi kihci inentaakosiyan. Oshki wiinsowin hsa ta‑aapatan wiinikooyan, aaniin iko kaaTipenciketc keshi onentank.

³ Mii hsa 'i ke⁠inentaakosiyan kaa⁠onishihshininik kaaTipenciketc otookimaawaanohkwaan.

⁴ Kaawiin hsa miinawaa wiihkaa kika'ikoohsii, “Nakacikan.” Kaawiin kaye kitahkiim ta⁠icikaatehsinoon, “Pikwaci'ahki.” O'o hsa tahsh kika'ikoo, “Kaa⁠minwentami'intc.” Kitahkiim kaye ta⁠icikaate, “Kaa⁠wiitikemakahk,” aaniihsh kaaTipenciketc kika minwaapamik, kitahkiim itahsh kaye ta⁠inentaakwan e⁠wiitikemakahk.

⁵ Taapishkoo hsa oshkiniiki kaa⁠wiitikemaatc oshkiniikihkwen, mii hsa peshikwan kaakii oshi'ihk keshi wiitikemihk. Taapishkoo kaa⁠oshkihkwewetc kaashi minwaapamaatc otooshkihkwewaanan, mii hsa 'i nahke peshikwan kaaTipenciketc keshi minwaapamihk.

⁶ Oo Ceroosalam, i'imaa kiwaahkaayaapihkinikanink, ninkii ahsaak ke⁠ahshawaapiwaatc; kaawiin hsa ta⁠poonwewitansiiwak kapekiishik, kapetipihk kaye. Keko onci anwepihkek ci⁠mihkootamawek kaaTipenciketc eshi ahshotank.

⁷ Keko anwepi'aahkek, paanimaa hsa kii⁠naapi ayiitahtootc Ceroosalam (Jerusalem), kii‑ishihtootc kaye ci⁠kihci inencikaatenik o'omaa ahkiink.

⁸ KaaTipenciketc hsa ishi ahshotam omashkawisiiwinink ewii onci ishihciketc e⁠ihkitotc, “Kaawiin hsa miinawaa wiihkaa ninka miikiwehsii kipahkweshikaniminiwaan ci⁠amwaawaatc kaa⁠shiinkeniminekwaa. Kaawiin kaye meyakisiwaatc ta⁠minihkwehsiiwak kitoshki shoominaapoomiwaan kaakii kihci anohkaatamowek.

⁹ Kiinawaa tahsh wiin kaa⁠manishamek pahkweshikaniminan kika miicim, ci⁠miikwehciwenimek kaaTipenciketc. Kiinawaa tahsh kaye kaa⁠mooshakinekwaa shoominak kika minihkwem i'imaa entashi anami'ehtawintc kaaTipenciketc.”

¹⁰ Pemaatisiyek eyaayek Ceroosalamink, saaka'amok saaka'amok i'imaa ootenaank ci⁠kwayaancihtooyek miihkana kepi ishaawaatc pemaatisiwaatc! Oshihtook kihci miihkana, tawihshimihkwak ahsiniik. Ompaapihkepitook kahkiiwe'on ke⁠onci kihkeniminekwaa kotak pemaatisiwaatc.

¹¹ Inashke hsa kaaTipenciketc misiwe ahkiink otipaatotaan o'o e⁠ihkitotc, “Wiintamawihkwak pemaatisiwaatc eyaawaatc Ceroosalamink kaaTipenciketc ewiih piishaatc ci⁠pimaaci'inek! Tapi kikii hsa otipa'amaakewin, okwayahkohcikewin kaye.”

¹² Miitahsh ke⁠ishinihkaanikooyek, “KaaTipenciketc okihtenimaakana', kaaTipenciketc opimaaci'aakana'.” Mii hsa 'i ke⁠icikaatek Ceroosalam, “Kaa⁠kakwe mihkikaatek, ootena awahshime Kaa⁠wepinikaatehsinok!”