Aaiseya 61 - Ojibwe Kihcimasina'ikan

Pimaaci'ikoowin Ehtashintek

¹ KaaMaawaci mashkawisiitc kaaTipenciketc otAhcaahkwan niwiiciiwimik. Niin aaniihsh ninkii onenimik ci⁠piitamawimak minwaacimowin i'i kaa⁠koohpaatisinitc. Ninkiih piicinisha'ok ci⁠antawi'imak kaa⁠piikote'enitc, ci⁠wiintamawimak tahkonikana' ci⁠pakitinimintc, kaye ci⁠paahkinamawimintc ci⁠saaka'aminitc kipa'waakana'.

² Ninkii ishinisha'ok ohsha ci⁠tipaacimowak aasha tipa'ikan e⁠ocihcihsenik ahpii kaaTipenciketc ewiih pimaaci'aatc opimaatisiima', ewiih shaakoocihtamawaatc kaye kaa⁠shiinkenimikonitc. Ninkiih piicinisha'ok ci⁠minote'e'imak kaa⁠piikwentaminitc,

³ ci⁠minwentamo'imak kaye kaa⁠maanentaminitc i'imaa Saayanink (Zion) eyaanitc. Kaawiin onantawenimaahsii' ci⁠maanentaminitc; ci⁠ciihkentaminitc, ci⁠moocihkentaminitc ohsha otishi antawenimaa'. Mihtikonk hsa inentaakosiwa' kaaTipenciketc wiin iko kaakii kihtikaanaatc. Kwayahk hsa tahsh ta⁠ishihcikewa', miihsh i'imaa Kishemanitoo ke⁠onci miikwehciwentaakositc aaniin kaakii ishihciketc.

⁴ Miitahsh ci⁠kiiwe oshihtoonitc kihci ootenawan mewisha kaa⁠onci piikoshkaanikin, ini kaye kaakii nihshiwanaacihcikaatenikopanen ootenawan mewisha.

⁵ Piiwitek ohsha kika naanaakacihtamaakowaak kimaanahcaanihshimiwaa'. Miiwak hsa kaye iki ke⁠naanaakacihtoowaatc kikihtikewiniwaan, kaashi kihtikaanimek kaye shoomina'.

⁶ Miitahsh ke'ikooyek e⁠anami'ewikimaawiyek ini onci kaaTipenciketc, kika ishinihkaanikoom kaye kaa‑anohkiihtawaawaatc kiKishemanitoominaanin. Wiinke hsa kika wenoocihtoom owenootisiwiniwaan kaa⁠pahkaanwewaanakisiwaatc pemaatisiwaatc, wiinke kaye kika onci kihci inenintisom e⁠ayaawek owenootisiwiniwaan.

⁷ Miitahsh i'i ci⁠poonihsek kaashi nihtaa akaci'ikooyek, kaashi koohpaasinaakosiyek kaye. Kitahkiimiwaank hsa piko kika ishitaam, ta⁠naponikaatewan kaye kaashi wenootisiyek. Miitahsh ci⁠nehpici minwentamek.

⁸ Miihsh ehkitotc kaaTipenciketc, “Niminwentaan hsa weweni inaahkonikewin, nishiinkentaan itahsh wiin kiimootiwin, maci'ishihcikewin kaye. Eh⁠tepweyentaakosiyaan hsa piko ninka onci tipa'amawaak aaniin kaa⁠ishihcikewaatc, ci⁠oshihtamawakwaa kaye ke⁠nehpici ayaanik ahshotamaatiwin.

⁹ Opiiwesiimiwaa' hsa tahsh misiwe ta⁠kihkenimaawa' mekweya'ii eshi'ayaanitc pahkaanwewaan awiya'. Kahkina hsa ko kaa⁠waapamikowaatc oka kihkenimikowaa' ta⁠ihkitowa' kaaTipencikenitc e⁠shawenimikowaatc.”

¹⁰ Ceroosalam ta⁠onci minwentamoomakan aaniin kaa⁠ishihcikenitc kaaTipencikenitc. Mii hsa 'i eshihkonayeyaan taapishkoo inini kaa⁠ishi'otc kiiwii kihci wiitiketc kaye ihkwe kaashi waaweshi'otc kiiwii kihci wiitiketc. Kishemanitoo nintishi konaye'ik ci⁠kikishkamaan pimaaci'ikoowisiwin, shaakoocihtwaawin kaye.

¹¹ Kehcinaac hsa ko taapishkoo ahkiink kaa⁠onci nihtaawikihkin kihtikaanenhs, kihtikaanahkamikonk e⁠onci maaciikinkin, mii hsa 'i nahke Kaa⁠Maawaci mashkawisiitc kaaTipenciketc keshi pimaaci'aatc opimaatisiima', kahkina hsa tahsh pemaatisinitc oka miikwehciwenimikoo'.