Aaiseya 60 - Ojibwe Kihcimasina'ikan

Ceroosalam Piciinak Cikihci'inentaakwahk

¹ KaaTipenciketc hsa ihkito, “Ceroosalam (Jerusalem), mayaawiin, taka saakaahson ci‑ishinaakosiyan kiisihsonk; kaaTipenciketc ohsha okihci inentaakosiwin kika saakaahsokowaan.

² Misiwe ohsha ta⁠kashkiitipihkan o'omaa ahkiink, kaa⁠kashkiitipihkaninik hsa oka aakooshkaakonaawaa pemaatisiwaatc. Kiinawaa tahsh wiin, kaaTipenciketc hsa kika waahseshkaakowaa, okihci inentaakosiwin kika aakooshkaakowaam.

³ Kaa⁠pepahkaanwewaanakisiwaatc pemaatisiwaatc hsa ta⁠piishaawak kaashi waahsenaakosiyek, kihciokimaak kaye ta⁠piishaawak waapantamowaatc kaashi waahseyaanik kaa⁠onci oshki maacihtaayek.”

⁴ “Ceroosalam, inashke misiwe waahkaaya'ii ayinaapin ci⁠waapantaman aaniin enahkamikahk; pemaatisiwaatc hsa ohkwiinowak ewiih pi naasihkawihkwaa. Kikosihsak hsa waahsa tapi onciiwak ci⁠pikiiwewaatc; kitaanihsak kaye ta⁠pimiwicikaniwiwak taapishkoo apinoonciishak kaa⁠tootawintwaa.

⁵ O'o hsa tahsh waapantaman, wiinke hsa kika mooshkineshkaakon ciihkentamowin; kika nininkishkaa hsa ke⁠ahpiihci ciihkentaman. Kaashi wenootisiwaatc hsa kaa⁠pepahkaanwewaanakisiwaatc kika otihsikowaan, owenootisiwiniwaan akaamink kihcikamiink ta⁠pionci aashawishkaaniwan.”

⁶ “Aahpici hsa ta⁠kinwaapiikamowak pihkwaawikane mihtatimok kepi otihsihkwaa, oshki pihkwaawikane mihtatimok cipi onciiwaatc Mitiyan (Midian) ahkiink, Iipah (Ephah) ahkiink kaye. Kahkina hsa Shiipa (Sheba) ootenaank kaye tapi onciiwak, ci⁠piinaawaatc osaawi shooniyaan, ci⁠piitoowaatc kaye minaahsikanan. Pemaatisiwaatc hsa ta⁠wiintamaakewak kaashi miikwehciwentaakosinitc kaaTipencikenitc.

⁷ Kahkina hsa maanahcaanihshak Ketarink (Kedar) kaa⁠onciiwaatc, iki kaye aape maanahcaanihshak Niipeyohtink (Nebaioth) kika piitamaakoo ci‑inwaanatwaa pakitinaahsowinink. Mii hsa i'iweniwa' kaaTipenciketc pakitinamawintc ke⁠minwaapamaatc. KaaTipenciketc hsa oka ishihtoon awahshime ci⁠kihci inentaakwaninik otanami'ewikamik,” kii‑ihkito kaaTipenciketc.

⁸ “Wekonen itahsh ini tino ciimaanan kaa⁠pimiwepaahsinkin wakicipiik wahkwiink enentaakwahkin, taapishkoo omiimiik kaa⁠pikiiwehsewaatc.

⁹ Miiwan hsa ini kihci ciimaanan waahsa kaa⁠onciikin, ini hsa ciimaanan Taarshish (Tarshish) wenciikin tapi niikaanii mishakaamakanoon. Miitahsh i'imaa kiniicaanihsak keshi takohshinowaatc ci⁠tako piinaawaatc waapaapihko shooniyaan, osaawi shooniyaan kaye, ci⁠kihtenimaawaatc kaaTipencikenitc kiKishemanitooman, Isriyalak oKihtentaakosiimiwaan. Miiwan iitok ini Isriyalak kaa⁠tootaakowaatc ci⁠kihci inentaakosiwaatc.”

¹⁰ “Piiwitek hsa oka kiiwe naapihtoonaawaa kiwaahkaayaapihkinikan, okihciokimaamiwaa' hsa tahsh kika pamiihtaakook. E⁠nishkaatisiyaan hsa kikii ishi nana'ahsin, noonkom tahsh wiin kiwii waapanta'in e⁠minwaapaminaan, e⁠koohpaateniminaan kaye.

¹¹ Mooshak hsa entahso kiishik, entahso tipihk kaye ta⁠paahkintehsinoon kikihci ishkwaanteman. Pemaatisiwaatc tahsh kaa⁠pepahkaanwewaanakisiwaatc ci⁠piitoowaatc owenootisiwiniwaan shikwa okihciokimaamiwaa' cipi niikaaniihtamaakenitc.

¹² Iki tahsh wiin pahkaanwewaan pemaatisiwaatc ke⁠pami'ihsinowihkwaa, iki kaye pahkaan kaa⁠tashikimaawiwaatc wiinke hsa piko ta⁠nihshiwanaacihcikaniwiwak.”

¹³ “Weti hsa Lepanan (Lebanon) ahkiink kaashi wenooci mihtikohkaak ta⁠pionci piinaawak ohkihkak, mina'ikook, iki kaye Saaipares (Cypress) tinowaahtikook maawac iko kaa⁠onishihshiwaatc. Niwii ishihtoon nintanami'ewikamik wiinke ci⁠minonaakwahk, ewii ishi'inaan kiin Ceroosalam wawiinke ci⁠onishihshiyan keshi anwesitepiyaan.

¹⁴ I'i hsa okosihsiwaa' kaakiih kakwaataki'ihkwaa ta⁠piishaawa' ci⁠animihkohtaanitc ci⁠naakohtoonitc e⁠kihtenimimihk. Kahkina hsa awiyak kaa⁠shiinkenimihkwaa ta‑animihkohtaawak kaa⁠ishisitekaapawiyan. Mii hsa 'i ke⁠ishinihkaanihkwaa, ‘KaaTipenciketc hsa i'iweni otootenaam, Saayan (Zion) otootenaam oKihtentaakosiimiwaan Isriyalak.’ ”

¹⁵ “Aana hsa wiin ekii wepinikooyan, ekiih shiinkenimikooyan kaye, kaawiin kaye awiya kika mayaashkaakohsii, shaakooc itahsh kiwii ishi'in nehpic iko ci⁠kihci inentaakosiyan, ke⁠ani onci minwentamowaatc keni pimaatisiwaatc.

¹⁶ Kaa⁠pepahkaanwewaanakisiwaatc pemaatisiwaatc, kihciokimaak kaye kika naanaakaci'ikowaak taapishkoo omaamaamaa kaashi nooni'aatc oniicaanihsan. Miitahsh i'i ci⁠kihkentamek niin kaaTipenciketc eh⁠tinowiyaan kaa⁠pimaaci'inek, kaa⁠shaapwi'inek, kaa⁠mashkawisiiyaan Isriyalak (Israel) oKishemanitoomiwaan.”

¹⁷ “Tekwac hsa osaawi shooniyaa waapihk kika piitamawin ahpiihc wiin i'i kaa⁠osaawaapihkahk, tekwac hsa kaye kika piitamawin waapaapihko shooniyaa waapihk ahpiihc wiin piiwaapihk, osaawaapihk hsa kika piitamawin ahpiihc wiin mihtik. Piiwaapihk kika piitamawin ahpiihc wiin ahsin. Ke⁠tipenimihkwaa hsa kaawiin awahshime kika wehsaani'ikohsiiwaak; ninka ishi'aak hsa weweni ci‑inaahkonikewaatc, ci⁠pisaanentaakwaninik kaye keshi tipencikewaatc.

¹⁸ Kaawiin hsa miinawaa wiihkaa ta⁠noontaakaaniwansinoon ompwehkamikisiwin kitaahkiimiink, kaawiin kaye miinawaa nihshiwanaacihcikewin, piikonikewin ta⁠kihkentaakwahsinoon kaashi ayaayan. Niin hsa ko kika naatamawin, kika miikaasohtamawin kaye taapishkoo waahkaayaapihkinikan kaashi naatamaakemakahk. Miitahsh i'i ci⁠miikwehciwenimiyan aaniihsh kika pimaaci'in.”

¹⁹ “Kiisihsonk hsa kaawiin awahshime ta⁠onci waahseyaahsinoon kiishikahk, tipihkahk kaye kaawiin tipihkikiisihsonk ta⁠onci waahseyaahsinoon. KaaTipenciketc ohsha wiin iko nehpic kika waahseshkamaakowaa, kiKishemanitoomiwaa okihci inentaakosiwin kika waahseshkamaakowaam.

²⁰ Kaawiin hsa kiisihs miinawaa ta⁠pankihshimohsii, tipihkikiisihs kaye kaawiin ta⁠saakaasikehsii; kaaTipenciketc ohsha nehpic iko kiiwii waahseshkamaakowaa, miitahsh i'i kaashi moohkoneyek ci⁠poonihsek.

²¹ Kipimaatisiimak hsa tahsh i'imaa Ceroosalamink ke⁠ayaawaatc ta⁠kwayahkwaatisiwak, wiinawaa kaye oka tipentaanaawaa i'i ahkiini kaakike. Miiwak hsa iki kaakiih kihtikaanakwaa, niin ekii oshi'akwaa, ewii naakohtooyaan ninkihci inentaakosiwin.

²² Maawac hsa kaa‑akaahsentaakosiyek, kekoon kaye aapiinc kaa⁠inentaakosihsiwek, mii hsa i'imaa keni onciiwaatc keni mashkawentaakosiwaatc pemaatisiwaatc. Ahpii hsa na'ihsek tipa'ikan mii hsa 'i wewiip ke⁠ishihcikeyaan. Niin iitok kaaTipenciketc,” kii‑ihkito Kishemanitoo.