Aaiseya 6 - Ojibwe Kihcimasina'ikan

Aaiseya Kiihkanoonintc Cikanootamawaatc Kishemanitoon

¹ I'i ahpii eh⁠pipooninik hsa kaakii ishkwaa pimaatisitc kihciokimaa Yoosaaya (Uzziah), mii hsa 'i ahpii kaakii waapamak kaaTipenciketc e⁠namatapitc kihciokimaawapiwinink, e⁠ishpentaakositc, eh⁠kihci inentaakositc kaye. I'iweni tahsh otookimaawayaan kaakiih kinwaapiikaninik kii⁠mooshkineni kihci anami'ewikamikonk.

² Weti tahsh ishpimink kaakii ishi apitc kii⁠ayaawa' Serapii' entahso peshikonitc ekii neninkotwaahcininikin oninkwiikanini. Niishin tahsh oninkwiikanini kii⁠onci aakawiinkwenintisowan, ini tahsh kotak niishin oninkwiikanini kii⁠onci aakawisitenintisowan. Iniweniwan tahsh kotak niishin oninkwiikanini okiih pimihsewaakeni.

³ Miitahsh o'o kaa⁠ihkitowaatc e⁠shaahshaakowaanitiwaatc, “Maawac iko kihtentaakosi, maawac iko kihtentaakosi, maawac iko kihtentaakosi kaaTipenciketc kaa⁠Maawaci maskawentaakositc, okihci inentaakosiwin hsa wiinke mooshkineni misiwe ahkiink.”

⁴ Kaa‑ahpiihci kishiiwewaatc tahsh e⁠shaakowaanitiwaatc kiih⁠koshkohseni kaakii ishi patahkitenik kihci anami'ewikamik, miitahsh kaye wiinke kaakii mooshkineyaapahtenik kihci anami'ewikamik.

⁵ Miitahsh o'o kaa⁠inatemoyaan, “Wiinke ninkoohpaasinaakos! Mii maawiin i'i ci⁠nihshiwanaatisiyaan aaniihsh entahswaa kakiikitoyaan maci'ishikiishwewin nintoonink onci saaka'amoomakan. Niwiicitaamaakanak kaye wiinawaa pishihshik maci'ishikiishwewak. Shaakooc tahsh niin iko nishkiishikonk ninkii onci waapamaa kihciokimaa kaaTipenciketc kaaMaawaci mashkawisiitc.”

⁶ Miitahsh peshik kaa⁠ishkotewitc kiih⁠piicihse eshi'ayaawak ekiih pi tahkonank ishkwaahkisheni kaakii ishkotewaninik. I'imaa hsa okii ontinaan kaashi pakitinaahsonk ekii aapacihtootc piiwaapihkomaakwancikanan.

⁷ Mii hsa i'iweni kaapi saamihsitootc nintoonink o'o ekii'ishitc, “Inashke o'o kikiih saamishkaakon kitoonink; i'i hsa kimaci'ishiwepisiwin kitootaahpinamaako, kimacitootamowinan kaye poonencikaatewan,” ninkii'ik.

⁸ Miitahsh i'i kaakii noontawak kaaTipenciketc e⁠ihkitotc, “Awenen tahsh ke⁠ishinisha'wak? Awenen tahsh inaa ke⁠ishaahtamawinankipan?” O'o tahsh ninkii ishi nahkwehtam, “Niin hsa ninka ishaa, niin ishinisha'ohshin!”

⁹ Miitahsh o'o kaa'ishitc, “Maacaan, o'oweni wiintamaw oko pemaatisiwaatc, ‘Aaniin hsa minihk aana pisintamek, mahshi tahsh e⁠nihsitohtansiwek. Aaniin iko minihk kaye aana inaapiyek, kaawiin hsa kanake kikihkentansiim kaa⁠waapatamek.’

¹⁰ Ishi' iki pemaatisiwaatc ci⁠nihsitawentansikwaa ote'iwaank ci⁠kakiipihtewaatc, ci⁠kakiipwaapiwaatc kaye. Kiishpin iitok oshkiishikowaank onci waapiwaatc, ohtawakiwaank kaye onci noontamowaatc, nihsitohtamowaatc kaye ote'iwaank, maakishaa hsa tapi kwehkiiwak ci⁠antawi'akwaapan.”

¹¹ Miitahsh o'o kaa'inak, “Aaniin tahsh minihk o'o ke⁠ishihsek?” Miihsh o'o kaa'ishitc, “Paanimaa hsa ini ootenawan tahtakohsinkin, awiya kaye i'imaa kihkentaakosihsik, waahkaa'ikanan kaye wiinke pishihshikwaakin, paanimaa wiinke nihshiwanaasinaakwahk taapishkoo eh⁠pikwatahkamikowank i'i ahki.

¹² Waahsa hsa ninka ishinisha'waak pemaatisiwaatc, i'i tahsh ahki wiinke ta⁠nihshiwanaasinaakwan.

¹³ Mihsawaa ko hsa peshik awiya ishkohsetc entahso mitaahciwintc, kewiin hsa ta⁠nihshiwanaaci'aa. Mii hsa 'i ke⁠ishinaakositc taapishkoo ohk tinowaahtik kemaa kaye kotak kihci mihtik kaa⁠kawa'ontc. Mii hsa iwe kiishkata'ikanink ke⁠onci maacii ayaanitc Kishemanitoo opimaatisiima'.”