Aaiseya 55 - Ojibwe Kihcimasina'ikan

Kishemanitoo Enaakohtootc Kaashikoohpaatenimiwetc

¹ Mii ehkitotc Kishemanitoo, “Ampeyohk, kahkina kaa⁠tahshiyek kaa⁠noontayaapaakweyek, o'omaa piishaak nipi kaashi ayaak; piishaak kiinawaa kaa‑ayaawaahsiwek shooniyaa, ataawek, ci⁠wiihsiniyek! Piishaak kaa⁠oshooniyaamihsiwek ci⁠ataaweyek shoominaapo, coocoohshaapo kaawiin memwehc kekoon kika tipa'ansiim.

² Wekonen wenci inaapaci'ek kishooniyaamiwaa e⁠ataaweyek kekoon ke⁠minoshkaakohsiwek? Wekonen kaye wenci caakinamek kikashkihcikewiniwaan e⁠ayaayek kekoon ke⁠teinamanci'oshkaakohsiwek? Inashke weweni pisintawihshik eninakook, miicik miicim wenishihshik, miihsh wiinke weweni ci⁠tewiihsiniyek.”

³ “Pisintawihshik eninakook, pi⁠naasihkawihshik kaye; pisintawiyek itahsh mii 'i ci⁠pimaatisiyek. Kika oshihtamawininim hsa ahshotamaatiwin wiihkaa ke⁠poonihsehsinok, tepwe ewii ishi shawenimininakook kaakii ishi ahshotamawakipan Tepit (David).

⁴ Ninkii ishi'aa hsa ci⁠tashimitc eshi'ayaanitc pemaatisinitc ci⁠niikaaniihtamawaatc, ci⁠tipenimaatc kaye pemaatisinitc.

⁵ Tepwe hsa kika antomaawaak pahkaanwewaan pemaatisiwaatc kaa⁠piiwitewenimekwaa, iki tahsh kaye pahkaanwewaan pemaatisiwaatc kaa⁠kihkenimihsinowinekwaa kika pi naacipa'iwaanikowaak. Aaniihsh kaaTipenciketc kiKishemanitoomiwaa oKihtentaakosiimiwaan Isriyalak (Israel) kika ishi'ikowaa ci⁠kihci inentaakosiwek.”

⁶ Nanaantone'ohk kaaTipenciketc mekwaa e⁠ishihsenik cikii mihkawintipan, kanoonihk kaye mekwaa pehsho eh⁠tanentaakositc.

⁷ Taka hsa kaa⁠maci'ishiwepisitc oka nakataan otishi pimaatisiwin, a'a kaye maci'inini oka nakataan eshi naanaakatakwentank. Taka meshkwac oka kwehkiihtawaan kaaTipencikenitc kiKishemanitoominaanin, miiwan iitok ini ke⁠koohpaasinaakotc, miiwan kaye ini kaa⁠wenoocihtoonitc ke⁠onci poonentamaakotc.

⁸ O'o hsa kaaTipenciketc ihkito, “Kaashi naanaakatawentamaan hsa kaawiin kiinawaa kitishi naanaakatawentansiim, i'i hsa kaye kaa⁠ishihtwaayek kaawiin niin i'i nintishihtwaahsii.

⁹ Kiishikoon hsa kaa‑ahpiihci waahsa ishpimink tanentaakwahkin o'omaa ahkiink, mii hsa peshikwan nintishihtwaawinan enentaakwahkin ahpiihc kiinawaa kitishihtwaawiniwaan, nintinentamowinan kaye ahpiihc kitinentamowiniwaan.”

¹⁰ “Nintihkitowin hsa mii 'i enentaakwahk taapishkoo kiishikonk kaa⁠onci kimiwank, kaa⁠onci sookihpohk kaye. Miitahsh i'imaa kahkina kekoon ahkiink kaa‑ayaak wenci shaapopiik, kekoonan kaye kaa⁠onci nihtaawikihkin. Kihtikaanenhsan e⁠onci oshi'oomakahkin keyaapi ke⁠onci kihtikenk, miihsh i'imaa ke⁠ontancikewaatc kaa⁠wiihsiniwaatc.

¹¹ Mii hsa 'i mayaa nintihkitowin enentaakwahk, kaawiin wiihkaa nanawisiimakahsinoon. E⁠ishihcikemakahk kaashi antawentamaan, aaniinti piko eshinisha'amaan nintihkitowin mii hsa ko 'i eshinaakwahk kaashi antawentamaan.”

¹² “Kika minwentaam hsa ahpii nakatamek Paapilan (Babylon) ahki; pisaan hsa ko weweni kika saakiciwinikoom. Kihci waciin, kaa⁠papiihkwatinaakin kaye hsa ta⁠onci sesakooci maacii nikamoomakanoon. Kahkina kaye mihtikook mihshawahkamik kaa⁠patahkisowaatc ta⁠papahsinincii'otisowak ke⁠ahpiihci minwentamowaatc.

¹³ Saaipares (Cypress) tinowaahtikook hsa meshkwac ta⁠nihtaawikiwak kaashi sasaki okawiminakashiihkaak, mwetal (myrtle) tinowaahtikook kaye ta⁠nihtaawikiwak wiinke kaashi kaawiminakashiihkaanik. Mii hsa 'iwe kaaTipenciketc okihkinawaacihcikan nehpic ke⁠ayaanik, miitahsh i'imaa ke⁠onci maamihkawiyek aaniin kaakiih pi tootawinakook.”