Aaiseya 53 - Ojibwe Kihcimasina'ikan

¹ Kaanaka awekwen kaah⁠tepwehtamokwen kitipaacimowininaan? Kaanaka kaye awenenan kaaTipenciketc o'oweni kaa⁠waapanta'aakwen?

² Enaahsamiinitc hsa kii‑ishi ompiki ekii ishinaakositc taapishkoo oshki mihtik kaapi⁠saakikitc. Kii‑ishinaakosi kaye taapishkoo watap kaapi⁠saakikitc kaashi paahtehkamikaanik. Kaawiin hsa kii⁠minonaakosihsii, kaawiin kaye kii⁠okimaawinaakosihsii ci‑ishi wiihkoshkaawinkitipan eshi'ayaatc kaawiin kaye awaac iko kii‑ishinaakosihsii kekii onci mihsawenimintipan.

³ Kiih⁠shiinkencikaniwi, okii aanawenimiko' kaye ininiwa'. Wiin hsa kaakii wiihsakentank, wiinke kaye okii nakatentaan kakwaatakihtoowin. Kaawiin hsa awiyan okii kashkihtoosiini ci⁠kanawaapamikotc, ekii aanawenimintc, kaawiin kaye kikii kihci inenimaahsiwaanaan.

⁴ Tepwe hsa wiin kikiih pimiwitamaakonaan kekii ishi wiihsakentamowankipan, wiin kaye okiih pimiwitoonan kika kwaatakihtoowininaanin. Miitahsh enentamank Kishemanitoon e⁠nana'ahsikotc i'i kaa⁠onci kakwaatakihtootc, kaa⁠onci wiihsakentank.

⁵ Kimacitootamowininaanin ohsha kaakii onci maahkihcikaniwitc, kii⁠onci pahpahkihte'ikaniwi kimamaashiiwininaanin; i'i hsa kaakii ishi nana'ahsintc mii 'imaa wentinamank pisaanisiwin. I'i hsa kaakii ishi pahpahshanshe'ontc mii hsa i'imaa wenci antawi'ikooyank.

⁶ Kahkina hsa kaa⁠tahshiyank kikii ishinaakosimin taapishkoo maanahcaanihshak kaa⁠wanihshinowaatc, kiinawint iko e⁠ishaayank wa⁠ishaayank. KaaTipencikenitc ohsha okii ahtamaakoon ci⁠pimiwitootc kahkina kaa⁠tahshiwankitc kimacitootamowininaanin.

⁷ Wiinke hsa kii⁠wehsaani'aa, kiih⁠kakwaataki'aa kaye, shaakooc itahsh kaawiin kekoon kii‑ihkitohsii. Ekiih toocikaniwitc taapishkoo maanahcaanihshenhs kaawii nihsintc. Ekiih toocikaniwitc taapishkoo maanahcaanihsh kaawiih pashkoshontc, kaawiin awaac kekoonini cikii ihkitotc.

⁸ Kii⁠wehsaani'aa ekii onaahkonikaniwitc miihsh kaa⁠ishi maaciinintc. Kaawiin awiyan opapaapisiskenimikohsiin aaniin ke⁠ishihsetc. Kii⁠nihcikaniwi ci⁠pimaatisihsik o'omaa ahkiink eshi'ayaanitc pemaatisinitc, ekii nipoohtamawaatc niicipimaatisiima' omacitootamowininiink onci.

⁹ Kii‑ishi ahsaa hsa ci⁠wiici na'inikoomaatc omacaatisii', kaa⁠wenootisinitc kaye kii⁠nipotc aanawiin wiihkaa kekoon ekii ishi mamaashiihsik, wiihkaa kaye otihkitowinink ekii onci wayeshihtaakosihsik.

¹⁰ Shaakooc tahsh kaaTipencikenitc kii‑ishi minwaapantamoon ci⁠wehsaani'ikotc, ekii ishi'ikotc kaye ci⁠kakwaatakihtootc. Aanawiin opimaatisiwin ekii inwaatenik pakitinaahsowinink ke⁠onci poonencikaatenik macitootamowinan. Shaakooc hsa oka waapamaa' opiiwesiima', kinwesh kaye ta⁠pimaatisi. Opimaatisiwinink hsa ta⁠ishi minohseni kaaTipencikenitc otinentamowinini.

¹¹ Ahpii tahsh kii‑ishkwaa kakwaatakihtootc opimaatisiwinink, miitahsh miinawaa ci⁠ayaatc minwentamowin, ci⁠kihkentank ishi anihshaa ekiih kakwaatakihtoohsik. I'i tahsh e⁠ishi kihkentank a'a nintanohkii'aakan kaa⁠kwayahkwaatisitc, niipiwa' hsa awiya' oka ayishi'aa' ci⁠minwakinsonitc, wiin aaniihsh kaawiih pimiwitamawaatc omacitootamowinini.

¹² Miitahsh i'i kaawii onci ishi'ak kewiin peshikwan ci‑inentaakositc eshi'ayaanitc kaa⁠kihci inentaakosinitc, kewiin hsa ta⁠onci miinaa tipa'amaatiwinan nenaawa'ohkaanitinitc eshi'ayaanitc kaa⁠soonkentaakosinitc. Wiin iitok kaakiih pakitinank opimaatisiwin ci⁠nihsintc, ekii inakintisotc kewiin e⁠wiiciiwaatc omacitootamoo'. Wiin ohsha piko okiih pimiwitamawaa' kaakii ishi macitootaminitc kaa⁠paahtiinonitc pemaatisinitc, wiin kaye kaakiih kiikitohtamawaatc omaci'ishihcike'.