Aaiseya 52 - Ojibwe Kihcimasina'ikan

Kishemanitoo Okanaatamawaataan Ceroosalam

¹ Oo Ceroosalam (Jerusalem) kehtentaakwahk kihci ootena, taka koshkwentan, pihsihkan kimashkawisiiwin Saayan (Zion) ekooyan, pihsihkan kaye wenishihshinkin kikikishkikanan. Kaawiin hsa miinawaa kehkinawaatashakeshwaahsiwintwaa, kaa⁠pehkentaakosihsikwaa kaye kika piintikaakohsiik.

² Ceroosalam eyaayek wahkawipani'ok ci⁠aapiskohseyek! Taka onci pasikwiik mihtahkamik, ci⁠namatapiyek okimaawapiwinink! Aapa'amok ini sakaapaaneyaapiin kaa⁠tahkopinikoyek, kaa⁠tahkonikooyek pemaatisiyek Saayanink wenciiyek.

³ Miitahsh o'o kaaTipenciketc ehkitotc, “Kaawiin hsa kekoon kikii inakinsohsiim kii⁠maaciinikooyekipan, kaawiin itahsh kaye shooniyaa ta‑aapatisihsii ahpii naatamaakooyek.”

⁴ Miihsh owe ehkitotc kaaMaawaci mashkawisiitc kaaTipenciketc, “Nimpimaatisiimak hsa nihtam kii‑ishaawaatc Iicipahkiink (Egypt), kii⁠awi ishitaawak weti. Miitahsh naanaake Ahsiiriya (Assyria) wenciinitc ishi anihshaa kaakii wehsaani'ikowaatc.

⁵ Inashke tahsh noonkom weti Paapilan (Babylon) ahkiink mii 'i peshikwan eshihsewaatc ishi anihshaa piko ekii maaciinintwaa. I'i tahsh kaye tepenimikowaatc kakihcikiishwewa'. Kekapekiishik hsa kaawiin pooni maanencikaatehsinoon niwiinsowin!

⁶ Miitahsh nimpimaatisiimak ci⁠kihkentamowaatc niwiinsowin; miihsh i'i ahpii kiishikaninik ci⁠kihkentamowaatc niin iitok o'o kaakii niikaani wiintamowak. Tepwe hsa niin Kishemanitoo.”

⁷ Etatawe hsa minonaakosi a'a kaapi tipaacimotc, kihci waciink kaapi ishaatc ehpi minwaacimotc. Kaapi tashintank pisaanisiwin, kekoonan kaye kaa⁠onishihshininikin, kaa⁠tipaatotank pimaaci'ikoowin, o'o kaa'inaatc eyaanitc Saayanink, “KiKishemanitoomiwaa ohsha tipencike.”

⁸ Antohtawihkok, kitahshawaapiiwininiimiwaak i'imaa ootenaank eyaawaatc, maamawi shaakowewak ohsha ehpiihci ciihkentamowaatc. Wiinawaa piko oka waapamaawaan kaaTipencikenitc pikiiwe takohshininitc i'imaa Saayanink.

⁹ Kiin tahsh ootena Ceroosalam wiinke kaa⁠nihshiwaasinaakosiyan nikamon ke⁠ahpiihci ciihkentaman, kaaTipenciketc iitok kiwii naatamaak, owii minwentamo'aa' kaye opimaatisiima'.

¹⁰ KaaTipenciketc ohsha kaa⁠tipinawewisitc kaa⁠kihtentaakwaninik omashkawisiiwin oka aapacihtoon ci⁠pimaaci'aatc opimaatisiima', kahkina o'omaa misiwe ahkiink eyaanitc ci⁠waapantaminitc i'i otishihcikewin.

¹¹ Weti tahsh Paapilan ahkiink onci maacaak, keko papaamentankek kekoon kaa⁠wiinatahk! Wiinke pehkentaakosiik weti onci maacaayek, kiinawaa kaa⁠pimiwitooyek aapacihcikanan kihci anami'ewikamikonk kaa⁠onci tipentaakwahkin.

¹² Kaawiin hsa 'i ahpii kika ayoncaanimipa'iwehsiim wii⁠maacaayek; kaaTipenciketc ohsha kika niikaaniihtamaakowaa, Isriyalak oKishemanitoomiwaan otaanaank kaye ta⁠pimi'ayaa cipi kanaweniminek.

Anohkii'aakan Kaawiihkakwaatakihtootc Ehtashinsotc

¹³ Mii 'owe ehkitotc kaaTipenciketc, “Inashke, waapamihk nintanohkii'aakan ewii minohsetc, aahpici hsa tani ishpakimaa ci⁠ani ishpentaakositc, wiinke kaye tani kihci inentaakosi.

¹⁴ Kiih⁠paahtiinowak hsa pemaatisiwaatc kaakiih kihci maamahkaasinawaawaatc; aaniihsh kaawiin sesik kii‑ishinaakosihsiiwan owiiyawinink. Wiinke hsa kii⁠kihci inaahpinanaakaniwiwan, miihsh awiyawink kaakii onci ishinaakosihsinik.

¹⁵ Aahpici hsa ta⁠paahtiinwewaanakisiwa' pemaatisinitc ke⁠maamahkaatenimikotc, kihciokimaa' tahsh kaawiin oka kashkihtoohsiini ci⁠kiikitonitc ke⁠ahpiihci maamahkaatentaminitc. I'iweni tahsh kaakii wiintamawaahsiwimintipan mii 'i payesh ci⁠waapantaminitc; i'iweni kaye kaakii noontansinik, mii 'i payesh ci⁠nihsitohtaminitc.”