Aaiseya 5 - Ojibwe Kihcimasina'ikan

Nikamon Kaa'ishihsink Ehtashintek Kaashikihtikaasowaatc Shoominak

¹ Niwii nakamohtawaa hsa peshik kaa⁠saaki'ak ewii inohtamowak kaashi kihtikaanaatc shoomina'. Kaa⁠saaki'ak hsa okii ayaan peshik i'i tino kihtikewahkamik i'imaa aahsamatin kaashi minokininik kekoon.

² Kii⁠pikishkahkamikipicike hsa ekii maamooshakinaatc ahsinii', miitahsh kaa⁠ishi kihtikaanaatc maawac iko wenishihshinitc shoominaahtikoo'. Okii oshihtoon kaye onsaapiwin waa⁠onci kanawentank kaakiih kihtikaatank, kii⁠waanihke kaye aaniinti ke⁠ishi shikoshkikaasonitc kaakiih kihtikaanaatc. Miitahsh kaa⁠ishi pii'aatc wiinke ci⁠mino nihtaawikinitc, wiinke hsa tahsh kii⁠wiihsakihpokosiwa'.

³ Miitahsh o'o ehkitotc kaa⁠saaki'ak, “Kiinawaa kaa⁠ishitaayek i'imaa Ceroosalamink (Jerusalem), i'imaa kaye Coota (Judah) ahkiink, taka anta kihkenimihshik, anta kihkentamok kaye i'i kaashi kihtikaasowaatc shoominak.

⁴ Aaniin tahsh awahshime kekiih tootamaampaan i'i ninkihtikewahkamik? Wekonen tahsh kaa⁠onci nihtaawikiwaatc kaa⁠wiihsakisiwaatc shoominak, kaa⁠onishihshiwaatc shoominak tahsh aanakiih⁠pii'akwaa?”

⁵ “Kiwii wiintamawininim hsa tahsh aaniin waah⁠tootamaan i'i kaashi kihtikaanakwaa shoominak. Niwii niniskopitoon hsa 'i kaa⁠waahkaahsink ewiih piikonamaan kaa⁠onci aacihshinonaaniwank. Miitahsh i'i pisaan iko ci⁠tahtahkohkaatek wiinke ci⁠piikoshkikaatek.

⁶ Pisaan ihsa ko niwiih pakitinaan i'i kihtikewahkamik ci⁠nihshiwanaatahk. Kaawiin hsa niwii maamiinoshwaahsiik shoominaahtikook, kaawiin kaye niwiih pamihtoohsiin i'i mihtahkamik. Pisaan hsa kaye anoocikowaahtikoon, kaawiminakashiik kaye ta⁠nihtaawikiwak. Niwiih kanootaanan kaye awaac wahkwiin i'imaa cishi kimiwansinok.”

⁷ Isriyalak hsa mii 'i eshinaakosiwaatc i'i kihtikewahkamik kaaTipenciketc kaaMaawaci mashkawisiitc kaa⁠tipentank, iki tahsh wiin shoominaahtikook kaakiih kihtikaasowaatc miiwak hsa iki pemaatisiwaatc Coota ahkiink kaa⁠onciiwaatc. Okiih pakohsenimaa' hsa ci⁠minotootaminitc, tekwac itahsh kii⁠nihsitiwa'. Kwayahko ishiwepisiwin tahsh ekiih pakohsentank, tekwac itahsh okii noontawaa' awiya' e⁠inatemonitc e⁠antawentaminitc weweni ci⁠tootawimintc.