Aaiseya 49 - Ojibwe Kihcimasina'ikan

Isriyalak Ewaahseshkawaawaatc Kaatahswewaanakisinitc Pemaatisinitc

¹ Pisintawihshik, pepahkaan minihsink, pepahkaan ahkiink kaa‑ayaayek, kiinawaa wewaahsa kaa⁠onciiyek. KaaTipenciketc ohsha ninkii antomik, ninkii wiinik kaye cipwaa nihtaawikiwak.

² Okii ishihtoonan hsa nintihkitowinan ci⁠mashkawi kiishwemakaninikin, oninciink kaye nintoonci kanawenimik. Miitahsh kaa⁠ishi'itc taapishkoo pihkwahkoni kaa⁠kaahshaanik, ekiih kwayaanci'itc ewii aapaci'itc.

³ Miitahsh o'o kaa'ishitc, “Isriyal (Israel), kiin ohsha nintanohkii'aakan; pemaatisiwaatc ohsha ninka onci kihci inenimikook kiin onci.”

⁴ Miitahsh o'o kaa⁠ihkitoyaan, “Anihshaa ohsha ninkihci anohkii'itis. Wiinke iitok inaa ishi anihshaa ninkiih caakii. Shaakooc itahsh ninka ahpenimonotawaa kaaTipenciketc ci⁠wiici'itc kwayahk ci‑inaahkonikoowak; wiin kaye ninka tipa'amaak aaniin entahso ishihcikewak.”

⁵ Miitahsh o'o kaaTipenciketc eni'ihkitotc, cipwaa nihtaawikiwak kaakii onaapamitc ci⁠otanohkii'aakanimitc ci⁠pikiiwewinimak opimaatisiima', ci⁠pikiiwewinimak i'i Cekapoonk (Jacob) kaa⁠ontahkaanesinitc misiwe nooci kaa⁠papaa ayaanitc. KaaTipenciketc ohsha ninKishemanitoom, wiin kaa⁠miishitc kihtentaakosiwin, wiin kaye kaa⁠miishitc ke⁠onci mashkawisiiwak.

⁶ Miitahsh kaaTipenciketc kaa'ishitc, “Nintanohkii'aakan, keyaapi hsa nintayaan nawac ke⁠kihci inentakwak kaawii inanohkii'inaan. Kaawiin wiin ehta kika kashki'aahsiik ci⁠kiiwe kihci inentaakosiwaatc iki Isriyalak pemaatisiwaatc kaakiih shaapwiiwaatc, kiin hsa kiwii ishi'in ci⁠waahseshkamawatwaa kaa⁠pepahkaanwewaanakisiwaatc pemaatisiwaatc, kahkina hsa tahsh pemaatisiwaatc o'omaa ahkiink kaa‑ayaawaatc ci⁠pimaaci'ikoowisiwaatc.”

⁷ Isriyalak iitok wiinke kaakii aanawenimintwaa, ekiih shiinkenimikowaatc kaye kaa⁠pahkaanwewaanakisinitc pemaatisinitc. Wiinke kaye ekii wehsaani tipenimikowaatc. Miitahsh o'o kaaTipenciketc kaakii onci'inaatc kaakiih pimaaci'aatc Isriyala', kaa⁠kihtenimikotc kaye, “Kihciokimaak hsa kika waapamikowaak pakitinikowek, miitahsh keshi animihkohtaawaatc ci⁠kihteniminekwaa. Aanihkewikimaak kaye waapaminekwaa ta‑animihkohtaawak ci⁠kihteniminekwaa.” Miitahsh o'o ke⁠onci ishihsek kaaTipenciketc aaniihsh okii onaapamaan ke⁠anohkii'aatc; Kishemanitoo kaa⁠tipenimaatc Isriyala' hsa okanawentaanan kaashi ahshotamaaketc.

Ceroosalam Cikiiwe'oshihcikaatek

⁸ Mii hsa o'oweni kaaTipenciketc enaatc opimaatisiima', “Ahpii hsa minwaapamininakook kika nahkwehtawininim, kika wiici'ininim kaye ahpii ishi kiishikahk wiih⁠pimaaci'ininakook. Kika kanawenimininim, kika naatamawininim kaye, kiinawaa kaye kiwii ishi'ininim ke⁠onci oshihtamawakwaa ahshotamaatiwin kahkina pemaatisiwaatc. Kiwiih pakitinininim kaye pisaan miinawaa ci⁠kiiwe kapehshiyek kitahkiimiwaank noonkom wiinke kaa⁠nihshiwanaasinaakwahk.

⁹ Miitahsh kaye ke⁠inakwaa kaa⁠kipa'ontwaa, ‘Haw, maacaak aasha ohsha kikiih pakitinikoom.’ Iki kaashi kashkiitipihkaninik kaa‑ayaawaatc ninka'inaak, ‘Kaashi waahseyaak ishaak.’ Miitahsh i'i taapishkoo maanahcaanihshak ci⁠papaa wiihsiniwaatc ayohpimehkana, oka mihkaanaawaa kaye mashkohsiin i'imaa kaashi papiihkwatinaanik kekoonini awaac kaakii ishi nihtaawikihsininikipan.

¹⁰ Kaawiin hsa wiihkaa ta⁠noonteskatehsiiwak, kaawiin kaye ta⁠noontayaapaakwehsiiwak. Kaa⁠ishi kishitenik pikwatahkamik ayaawaatc, kiisihsoon kaye kishaasikenitc kaawiin i'imaa ta⁠onci wiihsakentansiiwak. Ini hsa kaa⁠koohpaatenimikowaatc oka kihkinowinikowaan, oka ishiwinikowaan kaye kaashi moohkiciwaninik nipi.”

¹¹ “Ninka oshihtoon hsa kihci miihkana mekwe kihci waciihkaank ci‑inamohk, ninka kwayaancihtaawaan kaye miihkana keshi pimi ayaawaatc nimpimaatisiimak.

¹² Waahsa hsa tapi onciiwak ci⁠pikiiwewaatc, aaninta kiiwetinonk tapi onciiwak, aaninta kaye ninkaapii'anonk. Aaninta tahsh kaye nahke Saainim (Sinim) ecikaatenik ahkiink tapi onciiwak.”

¹³ Kiishik taka ta⁠shaakowemakan ke⁠ahpiihci minwentamoomakahk; taka kaye ahki ta⁠ciihkentamoomakan. Taka kaye waciin ta⁠maacii nikamoomakanoon! KaaTipenciketc ohsha owii minwentamo'aa' opimaatisiima', wiin kaye kaa⁠koohpaatenimaatc kaa⁠kakwaatakihtoonitc awiya'.

¹⁴ Miitahsh o'o ehkitowaatc Ceroosalamink (Jerusalem) eyaawaatc, “KaaTipenciketc hsa ninkii wepinikonaan, ninkii waniihkenotaakonaan kaye.”

¹⁵ Miihsh ehkitotc kaaTipenciketc, “Ihkwe na otaa waniihkenotawaan kaa⁠nooni'aatc, ci⁠koohpaatenimaahsikipan kaakii nihtaawiki'aatc? Mihsawaa hsa omaamaamaa waniihkenotawaatc oniicaanihsan, kaawiin niin kika waniihkenotawihsinooninim.

¹⁶ Oo Ceroosalam ninakaahkiinincaanink hsa kitishi oshipii'on, mooshak hsa niwaapantaan kaashi waahkaayaapihkinikooyan.”

¹⁷ “Iki hsa tapi weyiipishkaawak kikosihsak ci⁠kiiwe oshi'ihkwaa, iki tahsh kaakii nihshiwanaaci'ihkwaa tani maacaawak ci⁠nakanihkwaa.

¹⁸ Inashke ayinaapin waahkaaya'ii eshi'ayaayan; kahkina hsa pemaatisiwaatc ohkwiino'itiwak ehpi naasihkawihkwaa! O'o kehcinaac kaa⁠pimaatisiyaan eh⁠Kishemanitoowiyaan, mii hsa 'i peshikwan keshi kihci inenimatwaa kipimaatisiimak taapishkoo kaa⁠kihci wiitiketc ihkwe kaashi kihci inentank owaweshi'onan.”

¹⁹ “Aana tahsh wiin ekii nihshiwanaasinaakosiyan, ahki kaye eshi'ayaayan pikwacaya'iink ekii inentaakwahk, meshkwac itahsh onsaam ta‑akaahsentaakwan ke⁠ishitaawaatc kipimaatisiimak. Iki tahsh wiin kaakii nihshiwanaaci'ihkwaa waahsa ta‑ayaawak.

²⁰ Iki hsa kipimaatisiimak kaakii nihtaawikiwaatc mekwaa kii⁠ayaayek pahkaan ahkiink, ninkotink kiishikaninik o'o kika'ikook, ‘Onsaam ihsa naa akaahsin o'o ahki; taka nankinan aanti ke⁠ishitaayaank.’

²¹ Miitahsh o'o ke'itisoyan, ‘Awenen itahsh inaa kaa‑ayaawaatc o'o apinoonciisha'? Ninkii wani'aak iitok niin niniicaanihsak, ekii kashkihtoohsiwaan kaye keyaapi ci⁠ayaawakwaapan. Awenehsh kaa⁠nihtaawiki'aatc o'o apinoonciisha'? Pahkaan hsa ahkiink ninkii ishiwinikoonaapan. Niin ehta o'omaa ninkii eshihkanikoo. Aaniinti tahsh inaa oko apinoonciishak wenciiwaatc?’ ”

²² Miitahsh o'o Kaa⁠Maawaci mashkawisiitc kaaTipenciketc ehkitotc, “Inashke ninka waahta'amawaak kotak pemaatisiwaatc; miiwak itahsh iki ke⁠pikiiwewinaawaatc kiniicaanihsiwaa'.

²³ Kihciokimaak hsa kika naanaakaci'ikowaak, kihciokimaahkwek kaye ta⁠inentaakwan ci⁠nooni'inekwaa. Mihtahkamik hsa tashi animihkohtaawak eshi'ayaawek, ci⁠kisiiyaata'amowaatc kisitiwaan. Miitahsh ci⁠kihkentamek niin ehTipencikeyaan; iki hsa ehpenimonotawiwaatc kaawiin ta⁠wahsitaawentansiiwak.”

²⁴ Ta⁠mahkamaawak ina miikaasowininiwak kaakii mahkantwewaatc? Ta⁠naatamawaawak ina tahkonikanak eshi'ayaanitc kaa‑aahkwentaakosinitc?

²⁵ Miitahsh kaaTipenciketc ehkitotc, “Tepwe hsa miikaasowininiwak ta⁠mahkamaawaak otahkonikaniwaa', ta⁠mahkamaawak kaye iki omahkantwewiniwaan kaa‑aahkwentaakosiwaatc. Niin hsa ninka miikaanaak kaa⁠miikaaninekwaa, ninka pimaaci'aak kaye kiniicaanihsiwaak.

²⁶ Mii hsa ke⁠tootawakwaa kaa⁠wehsaani'inekwaa ci⁠amotisowaatc, ci⁠kiiwashkwepiinotamowaatc kaye omiskwiimiwaa taapishkoo shoominaapo. Miitahsh kahkina pemaatisiwaatc ci⁠kihkentamowaatc niin eh⁠Tipencikewak, eh⁠tinowiwak kaye kiPimaaci'iwemiwaa, kaa⁠naatamawinek, Isriyalak meshkawentaakosinitc oKishemanitoomiwaan.”