Aaiseya 43 - Ojibwe Kihcimasina'ikan

Kishemanitoo Kii'ahshotamawaatc Ewiinaatamawaatc Opimaatisiima'

¹ Miitahsh o'o kaaTipenciketc ehkitotc, kaakii oshi'aatc Cekapoon, Isriyala' kaye, “Keko sekisihkek, niin ohsha kaakiih pimaaci'inakook; kitishinihkaasowiniwaank hsa kikii ishi'antomininim, niin ohsha kaa⁠tipeniminakook!

² Ahpii hsa shaaposhkaayek nipiihkaank, niin hsa piko kika wiiciiwininim, ahpii kaye siipiin aashawishkaayek, kaawiin kika maaciiyaapokohsiim, ahpii hsa kaye shaaposhkaayek ishkotenk, kaawiin kika caakisohsiim, kaawiin kika nawatisohsiim.

³ Niin ohsha kaaTipenciketc kiKishemanitoomiwaa, kaa⁠Kihtentaakositc Kishemanitoo i'imaa Isriyalihkaank, kipimaaci'iwemiwaa; ninkiih pakitinaan ohsha Iicipahki (Egypt) ekiih tipa'onakook, Koohsh (Cush) kaye, Siipa (Seba) kaye kiinawaa onci.

⁴ E⁠onishihshinawinakook hsa tahsh, e⁠kihteniminakook kaye, tako tahsh e⁠saaki'inakook, mii hsa 'i meshkwac ke⁠onci pakitenimakwaapan kahkina entahswewaanakisiwaatc pemaatisiwaatc kiinawaa ci⁠pimaatisiyekipan.

⁵ Keko tahsh sekisihkek, kiwiiciiwininim iitok!” “Weti hsa waapanonk inahke ninka onci piinaak kiniicaanihsiwaak, ninkaapii'anonk kaye inahke kika onci maawantoonininim.

⁶ Ninka kanoonaak hsa kiiwetinonk eyaawaatc ci⁠pakitinaawaatc nimpimaatisiima', ninka kanoonaak kaye shaawanonk eyaawaatc ci⁠kihciwinaahsikwaa nimpimaatisiima'. Pakitinihkwak nimpimaatisiimak misiwe ahkiink ci⁠pionci kiiwewaatc.

⁷ Niin ohsha iki nimpimaatisiimak, ekii oshi'akwaa ke⁠onci kihci inentaakosiwak kaa‑ahpiwiinsowaatc eshinihkaasowak.”

KaaTipenciketc Ci'oncikihkenimintc Isriyala' Onci

⁸ Piinihkwahk iki kaa⁠waapihsikwaa aanawiin e⁠oshkiishikowaatc, kaa⁠onsihtehsikwaa kaye aanawiin e⁠ohtawakaawaatc.

⁹ Kahkina hsa kaa⁠pepahkaanwewaanakisiwaatc pemaatisiwaatc ohkwiino'itiwak ci⁠maawaci'itiwaatc. Aaniin itahsh ini omanitoomiwaan ke⁠wiintaminitc aaniin keni ishihsenik? Aaniin kaye ini kaakii wiintaminitc aaniin keni ishihsenik? Taka hsa oko manitook oka piinaawaa' ke⁠wiintaminitc wiinawaa eh⁠tepwewaatc, kotak itahsh kaa⁠noontaminitc ci‑ihkitonitc, “Tepwewan hsa i'iwe!”

¹⁰ Miitahsh o'o kaaTipenciketc ehkitotc, “Kiinawaa hsa niwiintamaakewininiimak, nintanohkii'aakanak kaakii onaapaminakook, ci⁠kihkentamek, ci⁠kihkenimiyek kaye ci⁠nihsitohtamek kaye niin Eyaawiyaan. O'o hsa kaa‑ayaayaan, kaawiin kotak manitoo kiihpi ayaahsii. Kaawiin kaye wiihkaa kotak manitoo tani ayaahsii.”

¹¹ “Niin hsa ehta kaaTipencikeyaan, kaawiin hsa kotak opimaaci'iwe ayaahsii, niin ehta ko.

¹² Niin hsa kaakii wiintamaan aaniin keni ishiwepahk, miitahsh kaakiih pi naatamawinakook. Kaawiin hsa kotak mayaki manitoo o'o wiihkaa pimi ishihcikehsii; kiinawaa hsa kaa⁠tipaacimiyek niin eh⁠Kishemanitoowiyaan.

¹³ Tepwe hsa nehpici otaanaank o'o kaatinowiyaan nintoonci tinow. Kaawiin hsa awiya ninka kacishkininciipinikoohsii. Kekoon itahsh ishihcikeyaan, awenen hsa tahsh ke⁠aancihtoohpan?”

Paapilan Ahkiink Kii'oncishaapwiiwaatc

¹⁴ Mii hsa 'oweni kaaTipenciketc kipimaaci'iwemiwaa Isriyalak Okihtentaakosiimiwaan ehkitotc, “Ci⁠naatamawinakook, shimaakanihshak hsa ninka ishinisha'waak Paapilan ahkiink; ninka piikopitoonan ootenaawi ishkwaanteman. Kaashi nihtaa shaakowewaatc hsa pemaatisiwaatc i'imaa eyaawaatc tani mawiwak!

¹⁵ Niin ohsha kaaTipencikeyaan, kikihtentaakosiimiwaa, kaakii oshi'inakook Isriyalak, niin kikihciokimaamiwaa!”

¹⁶ Mii hsa 'oweni kaaTipenciketc ehkitotc kaakii oshihtamawinek ke⁠ani ishaawek kihcikamiink, miihkana kaakii inamohtootc eshi mashkawentaakwaninik nipiink!

¹⁷ Wiin iitok kaakii ishiwinaatc meshkawentaakosinitc shimaakanihsha', miikaasowi otaapaanaahkwa', mihtatimoo' kaye, miihsh kaakiih kawihsenitc wiihkaa miinawaa ci⁠wanishkaahsinik, ekiih tootawaatc taapishkoo waahsahkonencikaneyaap kaa‑ahtawe'ikaatek.

¹⁸ “Waniihkenotamok otaanaank kaakiih pi inahkamikahk, keko wiin otaanaank kaakiih pi inahkamikahk onci kakwe pimaatisihkek.

¹⁹ Inashke oshki kekoon ohsha niwii ishihcike; aasha ohsha ishihse, kaawiin ina kiwaapantansiim? Ninka inamohcike hsa eshi pikwatahkamikaak, ninka sasiipiihke kaye eshi papaahtehkamikaak.

²⁰ Aya'aawihshak hsa pikwacaya'ii eyaawaatc ninka kihci inenimikook, mayaki waakohshak, kohkohko'ook kaye, aaniihsh nintoontinamawaak nipiini ke⁠minihkwewaatc pikwatahkamikonk. Ninka ishihcikewaan hsa ci⁠sasiipiihkaanink eshi pikwatahkamikaanik ewii mina'akwaa nipiini nimpimaatisiimak nintoonaapancikanak.

²¹ Miiwak iitok iki pemaatisiwaatc kaakii oshihtamaasoyaan, wiinawaa ci⁠waawiintamowaatc eshi miikwehciwentaakosiwak.”

Isriyalak Kaakii'ishimacitootamowaatc

²² Kiinawaa hsa tahsh Cekapoonk wentahkaanesiyek kaawiin shaakooc kikiih kanooshihsiim, ekii noonte pakitenimiyek ekii ani aanawenimiyek, kiinawaa Isriyalak (Israel).

²³ Kaawiin kaye kikiih piitamawihsiim maanahcaanihshak ke⁠pakitinekwaa kaa‑ankwaahkisontwaa tino. Kaawiin kaye kipakitinaahsowiniwaank kitoonci kihtenimihsiim. Kaawiin iitok kimikoshkaaci'ihsinooninim ci⁠antotamawinakook pahkweshikaniminiwi pakitinaahsowinan, kaawiin kaye kitantotamawihsinooninim ci⁠minaahsamawiyek ke⁠onci ahkwentamek.

²⁴ Kaawiin hsa cikii ataawehtamawiyek menomaakwahk minaahsikan, kaawiin kaye cikiih tepi'iyek eshi papimitewankin kipakitinaahsowiniwaan. Kimacitootamowiniwaan ohsha kaa⁠mikoshkaatentami'ikoyaan, kimamaashiiwiniwaan kaye kaa⁠noontehshimikoyaan.

²⁵ Niin ohsha piko eh⁠tinowiyaan kaa⁠onci kaahsii'amawinakook kimacitootamowiniwaan, kaa⁠waniihkenotamaan kaye kimaci'ishiwepisiwiniwaan.

²⁶ Taka hsa tahsh ishaataa eshi tipaahkonitink ci⁠piitooyek eshi anaamihtaakosiyek. Wiintamok aaniin waa⁠ihkitoyek ci⁠kihkentaakwahk taka ci⁠tepwewekwen.

²⁷ Nihtam hsa tahsh kaakii ayaawaatc kikehteya'aamiwaapaniik kii⁠macitootamook; kikiikitoowininiimiwaak ninkiih shashiipihtaakook.

²⁸ Miitahsh ke⁠onci maci'inentaako'akwaa kaa⁠kihtentaakosiwaatc anami'ewikimaak kitanami'ewikamikowaank. Miitahsh kaawii inenimakwaa Isriyalak ci⁠nihshiwanaatisiwaatc; nimpakitinaak hsa pisaan nimpimaatisiimak ci⁠maanenimintwaa.