Aaiseya 42 - Ojibwe Kihcimasina'ikan

KaaTipenciketc Otanohkii'aakanan Ehtashinsonitc

¹ KaaTipenciketc hsa o'o ihkito, “Inashke, mii hsa wa'a nintanohkii'aakan kaa⁠mashkawisii'ak. Mii hsa awe kaakii onaapamak, mii kaye awe kaa⁠minwaapamak. Ninkii‑ishi'aa hsa nintahcaahkwan ci⁠mooshkineshkaakotc, wiin kaye ta⁠ishihcike weweni ci‑inaahkonikenaaniwaninik kaashi ayaanitc pemaatisinitc.

² Kaawiin hsa ta⁠shaakowehsii, kaawiin kaye enikohk ta⁠noontaakosihsii. Miihkanaahkank kaye kaawiin enikohk ta⁠tashi kaakiikitohsii.

³ I'i kaye kaa⁠poohkoshkaanik mashkohsiiwaahtik kaawiin awahshime oka piikonansiin, waahsahkonencikaneyaapiini kaye kaani aahtawenik kaawiin oka aahtawe'ansiin. Oka piitoon tepwe kwayahk onaahkonikewin.

⁴ Kaawiin ta⁠poonihcikehsii, kaawiin kaye ta⁠pakicihsii piinihsh ci⁠onahtootc kwayahk onaahkonikewin o'omaa ahkiink. Waahsa kaa‑ayaanitc pepahkaan ahkiink i'imaa cishi pakohsentaminitc otinaahkonikewinink.”

⁵ Kishemanitoo hsa okii oshihtoonan kiishikoon, ekiih tashwekipitootc ishpimink, wiin kaye kaakii oshihtootc ahkiini, kahkina kaye i'imaa eyaanikin. Wiin kaye kaa⁠onci pakitanaamonitc pemaatisinitc, e⁠miinaatc pimaatisiwin o'omaa ahkiink eyaanitc. Miitahsh o'o kaaTipenciketc Kishemanitoo enaatc ini otanohkii'aakanan,

⁶ “Niin kaaTipencikeyaan, kikii antomin e⁠miininaan mashkawisiiwin kehcinaac iko weweni, kwayahk kaye ci‑inaahkonikenaaniwank i'imaa ahkiink. Kiin hsa kiwii aapaci'in ahshotamaatiwin ewii oshihtamawakwaa kahkina pemaatisiwaatc. Kiin kaye kiwii aapaci'in ewiih piitamawakwaa kaa⁠waahseyaanik kotak pemaatisiwaatc,

⁷ ci⁠waapi'intwaa kaye iki kaa⁠waapihsikwaa, ci⁠aapa'ontwaa kaye iki kaa⁠tahkonintwaa, ci⁠pakitinintwaa kaye iki kaashi kashkiitipihkaninik kipa'otiiwikamikonk eyaawaatc.”

⁸ “Niin ohsha kaaTipenciketc, mii hsa 'i eshinihkaasoyaan! Kaawiin hsa niwii miinaahsiik kaashi kihci inentaakosiwak, kaashi miikwehciwentaakosiwak kaye iki kaa⁠mihci oshi'intwaa manitoohkaanak.

⁹ Ini hsa kekoonan kaakii ihkitoyaampaan ci‑ishihsekin aasha tepwe kii‑ishihsewan. Kiwii wiintamawininim kaye oshki kekoonan cipwaa maacihsekin.”

Miikwehcinikamowin

¹⁰ Oshki nikamon hsa nikamoohtawihk kaaTipenciketc, misiwe hsa piko ahkiink onci miikwehciwenimihk! Kahkina hsa awiyak eyaawaatc anaamiintim! Taka minihsan oka miikwehciwenimikonan, ini kaye i'imaa kahkina eyaanitc.

¹¹ Taka pikwatahkamikoon, ini kaye ootenawan ta⁠kishiiwemakanoon ci⁠miikwehciwenimikotc, taka pemaatisinitc Kiitar (Kedar) wenciinitc oka miikwehciwenimikoo'! I'i kaye pemaatisinitc Siila (Sela) wenciinitc ta⁠nikamowa' ke⁠ahpiihci ciihkentaminitc, taka wakitatin ta⁠onci shaakowewa'.

¹² Taka hsa iki waahsa minihsihkaank kaa⁠ishitaawaatc oka kihci inenimaawaan kaaTipencikenitc kaye ci⁠miikwehciwenimaawaatc.

¹³ KaaTipenciketc hsa kii⁠anta miikaasotc mii hsa enentaakositc taapishkoo kaa‑aahkwiihkaasotc miikaasowinini, eh⁠kiishiitc e⁠mihsawentank ci⁠miikaasotc enikohk hsa ta⁠shaakowe miikaasowi shaakowewin, oka shaakooci'aa' kaye kaa⁠shiinkenimikotc.

Kishemanitoo Kii'ahshotamawaatc Ewiiwiici'aatc Opimaatisiima'

¹⁴ Kishemanitoo o'o ihkito, “Kinwesh ihsa kaawiin ninkii noontaatihsii, ninkii manaa noontaat ekii nahkwehtansiwaan. Miitahsh aasha e⁠ocihcihsek kekoon ci‑ishihcikeyaan; ci⁠shaakoweyaan taapishkoo ihkwe kaa⁠wiihsakentank ewii nihtaawikinaawahsotc.

¹⁵ Ninka nihshiwanaacihtoonan hsa waciin, kaa⁠pihkwatinaakin kaye, ninka ishihcike kaye ci⁠paahsowaatc mihtikook, mashkohsiin kaye, siipiin kaye tani pikwatahkiiwanoon, kaa⁠wawaashipiiyaakin kaye tani paahtewan.”

¹⁶ “Ninka ishi niikaaniihtamawaak hsa nahke weyaapihsikwaa wiihkaa eshi ishaahsikwaa, kaa⁠kashkiitipihkaninik hsa ninka waahseyaahtaawaan keni ishaawaatc, eshi papiihko ayaanik hsa kaye ninka shooshkohtaawaan. Mii hsa iwe ke⁠ishihcikehtamawakwaa; kaawiin ninka nakanaahsiik.

¹⁷ Iki tahsh wiin kaa⁠tepweyenimaawaatc manitoohkaana' enaawaatc ihsa kaye i'i oshihcikana', ‘Kiinawaa hsa nimanitoominaanik,’ miiwak hsa iki keni kiiweshkaawaatc ke⁠akaci'intwaa kaye.”

Isriyalak Kiipwaanawikihkencikewaatc

¹⁸ KaaTipenciketc hsa ihkito, “Pisintamok kiinawaa kaa⁠onsihtehsiwek; inaapik weyaapihsiwek ci⁠waapiyek!

¹⁹ Awenen itahsh kaa⁠waapihsik? Mii hsa awe nintanohkii'aakan, kaa⁠onsihtehsik taapishkoo kaa⁠maacinisha'wak ci⁠tipaacimotc.

²⁰ Niipiwa' hsa kekoon kipi waapantaam, kaawiin itahsh kipapaamihtansiim. Aana eshehtawakeyek, kaawiin itahsh kekoon kinoontansiim.”

²¹ KaaTipenciketc ohsha eh⁠kwayahkwaatisitc kaa⁠onci minwaapantank ekii kihci inentaakohtootc otoonahshowewinan, okihkino'ikewinan kaye, e⁠antawenimaatc opimaatisiima' ci⁠kihtentaminitc.

²² Inashke tahsh opimaatisiima' kii⁠mahkamaawa', anaamahkamik e⁠ishi kipa'omintc, pehkihsh eh⁠kaanimintc eh⁠kipa'omintc. Kiih⁠kiimootimaawa', ekii mahkamimintc otaya'iimini, kaawiin kanake awiyan cikii naatamaakonitc mahkantwewinink eshinaakosiwaatc, kaawiin awiya ci‑ihkitotc ci⁠kiiwewicikaniwiwaatc.

²³ Awenen itahsh kiinawaa ke⁠pisintamek o'o, konikehsh awiya piciinak o'o oka papaamihtaan.

²⁴ Awenen itahsh i'i otishihcikewin Isriyalak kaakii onci kiimootimaawintwaapanen, kaakii onci mahkamaawintwaapanen kaye? KaaTipenciketc iitok kaakii ishihcikekopanen, kiinawint kaakii macitootawank. Kaawiin aaniihsh kikiih piminisha'amowaahsiimin otishihtwaawin, kaawiin kaye kikii na'ihtamowaahsiimin enahshowetc.

²⁵ Miitahsh kaakiih siikinank onishkaatisiwin eshkote wentaakwaninik, enentaakwaninik miikaasowinink kaashi kihci inahkamikahk. Misiwe kii‑inahkoneni ishkote eshi'ayaanitc, shaakooc itahsh kaawiin cikii nihsitohtaminitc; ekii ankwaahkisookonitc kaawiin kanake cikiih papaamihtaminitc.