Aaiseya 41 - Ojibwe Kihcimasina'ikan

Isriyalak Kehcinaa'entamook Kishemanitoon Ciwiici'ikowaatc

¹ Mii hsa 'o Kishemanitoo ehkitotc, “Kiinawaa waahsa ahkiink eyaayek, keko noontaatihkek ci⁠pisintamek! Kwayaanciik ci⁠kiikitoohtamaasoyek eshi tipaahkonitink! Kika tawinamaakoom hsa ci⁠kiikitoyek. Taka nakishkotaatitaa ci⁠kihkentaakwahk awenen teyepwekwen.”

² “Awenen hsa kaakii ompwemaatc waapanonk inahke kaa‑ayaanitc entootawaatc kaye eshaanitc iko ci⁠shaakoocihtwaanitc? Awenen hsa kaa⁠ishi'aanitc ci⁠shaakooci'aanitc kihciokimaa', kotak kaye pemaatisinitc, opashipa'ikewihkomaaniniink kaye e⁠onci tootawaanitc taapishkoo kaa⁠paashkinehsek. Opihkwahkoniink kaye e⁠onci ohsweyaamwa'waanitc taapishkoo paahte mashkohsi kaa⁠maacii wepaahsink!

³ Eh⁠piminisha'ikenitc hsa kaawiin kekoon ishi naniisaanisihsiiwan, kaa⁠ishaanitc miihkanaank wiihkaa inahke kaakii ishaahsinik.

⁴ Awenen itahsh kaa⁠ishihciketc o'o ci‑ishihsenik? Awenen hsa kaa⁠onentank aaniin kaah⁠pi ishihsenik otaanaank? Niin Tepencikeyaan hsa ninkii ayaa maawac nihtam kekoon kii⁠maacihsek. Niin hsa kaye Tepencikeyaan Keshemanitoowiyaan ninka ayaa kahkina kekoon ishkwaahsek.”

⁵ “Pemaatisiwaatc hsa waahsa eyaawaatc okii waapantaanaawaa aaniin kaa⁠ishihcikewak; eh⁠sekisiwaatc hsa mii 'i eshi nininkaanimisiwaatc, miihsh kaye eshi ohkwiinowaatc eh⁠piishaawaatc.

⁶ Entahso pehpeshikowaatc hsa otaa'inaawaan owiicipimaatisiiwaan, ‘Taka naa mashkawentan.’

⁷ Mihtikonaape hsa otinaan kaa⁠tashiihkawaanitc osaawi shooniyaa waapihkoon, ‘Etatawe kiwawiinkehs.’ A'a tahsh kaye inini kaa⁠shooshkwakanaamaatc manitoohkaanan omino kanoonaan ini kaa⁠kihciwi saka'ikenitc e'inaatc, ‘Etatawe onishihshin i'i akwaapihkisikewin.’ Miihsh eshi kihciwi saka'waawaatc ini manitoohkaanan ci⁠kawihsehsinik.”

⁸ “Kiinawaa tahsh wiin Isriyalak (Israel) eneniminakook taapishkoo kaakii otanohkii'aakanimiyaan, Cekap (Jacob) kaakii onaapamakipan, kaakii ontahkaanesitc Eparahaamink (Abraham) kaakiih saaki wiiciiwimak.

⁹ Weti hsa ayishkwehkamik kikiih pi'onci piinininim, maawac eshi waahsawank eshi kakiihkeyaak ahki kikii onci antomininim ekii'ininakook, ‘Kiinawaa ohsha nintanohkii'aakanak!’ Kikii onaapamininim, kaawiin itahsh kitaanawenimihsinooninim!

¹⁰ Keko hsa sekisihkek, niin iitok kiwiiciiwininim, keko pakitentankek, niin ohsha kiKishemanitoomiwaa. Kika mashkawisii'ininim, kika wiici'ininim kaye. Kehcinaac hsa kaa⁠kwayahkwentaakwahk nimashkawisiiwin ninka aapacihtoon ci⁠mincimininakook.”

¹¹ “Inashke tahsh iki kaa⁠nishkeniminekwaa mii 'i ci⁠akaci shaakooci'intwaa, iki hsa kaa⁠nakaashkawinekwaa kaawiin kekoon ta⁠inaapatentaakosihsiiwak, ta⁠nihshiwanaatisiwak kaye.

¹² Mihsawaa ko kakwe mihkawekwaa kaa⁠shiinkeniminekwaa kaawiin kika mihkawaahsiwaawaak. Iki kaye kaa⁠miikaaninekwaa kaawiin kekoon ta⁠inaapatentaakosihsiiwak, kaawiin kaye ta‑ayaahsiiwak.

¹³ Niin ohsha kaaTipenciketc kiKishemanitoomiwaa kikihcinihkiwaank inahke kika ishi kihciwinininim e'ininakook, ‘Keko sekisihkek, kika wiici'ininim.’ ”

¹⁴ “Keko sekisihkek mecentaakosiyek Cekapoonk wentahkaanesiyek, ekaahsentaakosiyek Isriyalak, niin hsa piko kika wiiciiwininim,” ihkito kaaTipenciketc kipimaaci'iwemiwaa, kaa⁠kihtentaakosinitc Isriyalak oKishemanitoomiwaan.

¹⁵ “Mii hsa waa⁠ishi'inakook taapishkoo napakihsak kaa⁠saahsaakaapihkihsinkin oshki saka'ikanan kaa⁠kaahshaakin kaa‑aapatahk eshi ahtekin kihtikaanan. Miihsh ci⁠shikopitooyek kihci waciin ci⁠pikishkihsinkin, kaa⁠pihkwatinaakin kaye ci⁠tootamek ci‑inentaakwahkin kihtikaanenhsi ohkonayaanink.

¹⁶ Miihsh ci⁠kiisii'aahsincikeyek, ci⁠maacii wepaahsinkin ohkonayaanan misiwe ci‑ishi wepaahsinkin kii⁠kihcinootink. Kiinawaa tahsh wiin kika minwentaam e⁠wiiciiwinek kaaTipenciketc, kika miikwehciwenimimaawaan kaye kaa⁠kihtentaakosinitc Isriyalak oKishemanitoomiwaan.”

¹⁷ “Ketimaakisiwaatc hsa nanaantone'amowaatc nipiini, kaawiin oka mihkansiinaawaa; otenaniwiwaan wiinke paahteniwan e⁠noontayaapaakwewaatc. Niin hsa Tepencikeyaan ninka nahkwehtawaak, niin weKishemanitoomiwaatc Isriyalak kaawiin ninka wepinaahsiik.

¹⁸ Ninka ishihcikewaan hsa siipiin ci⁠pimiciwaninikin eshi ayishpaawankaanik, ci⁠mamoohkiciwaninik kaye eshi papahsatinaanik. Ninka ishihcike hsa pikwatahkamik ci⁠wawaashipiiyaak, paahtehkamik kaye ci⁠mamoohkiciwank nipi.

¹⁹ Eshi pikwatahkamikaak hsa ninka nihtaawiki'aak kiishkaahtikook oko kaye tino mihtikook, Akesha (Acacia), Mwetal (Myrtle), Aalip (Olive) kaye. Eshi pashkwaak hsa tani noohpimiiwan cini ayaawaatc ohkihkak, mina'ikook, Coonipar (Juniper), kaye Saaipares (Cypress) tinowaahtikook.

²⁰ Miitahsh pemaatisiwaatc ci⁠waapantamowaatc, ci⁠kihkentamowaatc, ci⁠naakatawentamowaatc, ci⁠nihsitohtamowaatc kaye niin kaaTipencikewak o'o ekii ishihcikewak, Isriyalak kehtentaakosinitc oKishemanitoomiwaan o'o ekii ishihcikenitc ci‑ishihsenik.”

KaaTipenciketc Kiikakaansomaatc Manitoohkaana'

²¹ Miitahsh o'o kaaTipenciketc ehkitotc Isriyalak wetookimaamiwaatc, “Piitook aaniin wa⁠ihkitoyek kiinawaa kaa⁠omanitoomiminekwaa kotak pemaatisiwaatc, piitook aaniin wa⁠ishi kakwe shaakoosohtaakosiyek.

²² Ampeyohk ci⁠tipaacimoyek aaniin ke⁠ishiwepahk, wiintamawihshinaam aaniin kaa⁠ishiwepahk otaanaank ci⁠kihkentaakwahk aaniin maawac ishkwaac ke⁠ishiwepahk, komaa kaye ci⁠tipaacimoyek aaniin piciinak ke⁠ani ishiwepahk.

²³ Tipaacimok kaye aaniin niikaanaya'ii inahke eshinaakwahk ci⁠kihkentamaank e⁠manitoowiyek! Kekoon hsa naa ishihcikek wenishihshink, komaa kaye kaa⁠maanshinaakwahk ke⁠onci pakitentamaank ci⁠mooshkine kohtaaciyaank.

²⁴ Kaawiin hsa awaac kekoon kitinaapatentaakosihsiim, enanohkiiyek kaye kaawiin kekoon inaapatentaakwahsinoon. Iki hsa enami'ehtawinekwaa kakwaanihsakentaakosiwak.

²⁵ Ninkii onaapamaa hsa inini waapanonk inahke wenciitc niwiinsowinink kaashi kanooshitc, kiiwetinonk hsa nahke ta⁠pionci miikaaso. Oka tahtahkohkaanaa' hsa wekimaawinitc ci⁠tootawaatc taapishkoo kaa⁠tootawintc oshiciishkiwakinikan, ahpii waapikan ahkihkwa' kaa⁠oshi'aatc kii⁠shikoshkawaatc waapikanan.

²⁶ Awenen itahsh kaa⁠tahshiyek kaa⁠wiintamawinek o'o niiyaak ci‑ishihsenik, cikii'ikooyekipan itahsh eh⁠tepweyek? Kaawiin hsa awiya entahshiyek o'o cikii ihkitoyek! Kaawiin awiya kikii noontaakohsiiwaa kekoon ci‑ihkitoyek!

²⁷ Niin hsa nihtam kaakii wiintamawakwaa Saayanink (Zion) eyaawaatc ekii ihkitoyaan, ‘Inashke pemaatisiwaatc hsa pikiiwewak.’ Ninkii ishinisha'waa awiya Ceroosalamink ci⁠awi minwaacimotc.

²⁸ Ekii ayinaapiyaan itahsh eshi'ayaawaatc manitoohkaanak kaawiin awiya kii⁠ayaahsii ke⁠wiintamaaketc ke⁠ishihcikewintc, kaawiin kaye awiya cikii nahkwehtank kaa⁠ishi kakwetwewak!

²⁹ Inashke tahsh oko kahkina manitook kaawiin kekoon inaapatisihsiiwak, kaawiin kaye kekoon ishihcikehsiiwak, nootinonk hsa inentaakosiwak, emihci wawaanentamo'iwewaatc.”