Aaiseya 35 - Ojibwe Kihcimasina'ikan

Pehkaatisiwin Ehtashintek

¹ Pikwatahkamik hsa kaa⁠paahtek wiinke ta⁠minwentamoomakan, waapikwaniin hsa kaye ta⁠nihtaawikinoon noociko piko kaashi nanihshiwanaasinaakwahk ahki.

² I'i hsa pikwatahkamik ta⁠nikamoomakan ke⁠ahpiihci minwentamoomakahk; wiinke kaye ta⁠minonaakwanoon taapishkoo waciin Lepanan (Lebanon) kaashi minonaakwahkin, wiinke kaye kekoon ta⁠wahke nihtaawikin taapishkoo kaa⁠ishi'ayaakin kihtikewahkamikoon Kaarmel (Carmel), Sheran (Sharon) kaye kaa⁠ishinihkaatekin. Kahkina hsa ko kaa⁠tahshiwaatc pemaatisiwaatc oka waapantaanaawaa e⁠waahsenaakosinitc, e⁠kihci inentaakosinitc, e⁠mashkawisiinitc kaye kaaTipencikenitc.

³ Mashkawisiihtook hsa kininciiwaan kaa⁠maciiwakiimakahkin, iki kaye kikitikowaak kaa⁠niinamisiwaatc.

⁴ Wiintamaw hsa iki kaa⁠shaakote'ewaatc o'o ci‑inatwaa, “Soonkaatisik, keko kohtaacihkek! KiKishemanitoomiwaa ohsha wiih⁠takohshin ewii nana'ahsaatc kaa⁠shiinkenimiminek, kiinawaa tahsh kika naatamaakowaa kaye.”

⁵ Miitahsh i'i kaa⁠waapihsikwaa ci⁠waapiwaatc, kaa⁠noontansikwaa ci⁠noontamowaatc.

⁶ Kaa⁠maahkikaatewaatc ta‑ayishpi kwaashkwaniwak taapishkoo waawaashkeshiwak, iki kaye kaa⁠nihtaa kiikitohsikwaa ta⁠shaahshaakowewak ke⁠ahpiihci minwentamowaatc. Nipi kaye ta⁠ishiciwan misiwe pikwacaya'ii, misiwe kaye ta⁠pimiciwan kaashi papaahtek pikwatahkamikaank.

⁷ I'i hsa kaa⁠kishaawankitek mihtaawank tani saaka'ikaniwan, kaashi papaankwahkamikaak kaye misiwe tashi mamoohkiciwan. Pikwatanimohshak kaa⁠nihtaa ishitaawaahpan kaye tani mashkiikowan, ci⁠ani nihtaawikinkin ansihsiin.

⁸ Ta‑ayaa hsa weti kihci miihkana o'o ci‑ishinihkaatek, “Pehkaatisiiwi miihkana.” Kaa⁠maci'ishiwepisiwaatc hsa kaawiin i'imaa tashi pima'atoohsiiwak; mii hsa i'iweni omiihkanaamiwaa iki kaa⁠pehki pimaatisiwaatc. Kaa⁠kakiipaatisiwaatc itahsh kaawiin ta⁠pakitinaahsiiwak i'imaa ci⁠pimohsewaatc.

⁹ Kaawiin mihshipishiw i'imaa ta‑ayaahsii, kaawiin kaye kaa‑ahkwaatisitc aya'aawihsh i'imaa ta⁠mekwaashkawaahsii. Iki hsa ehta kaakiih pimaaci'intwaa i'imaa miihkanaank ta⁠pimohsewak.

¹⁰ Ta⁠pikiiwewak i'imaa Saayanink kaaTipencikenitc ekii naatamaakowaatc eh⁠kishiiwewaatc e⁠nikamowaatc ke⁠ahpiihci minwentamowaatc ehpi takohshinowaatc. Minwentamowin wiihkaa ke⁠poonihsehsininik hsa tahsh oka kikishkaakonaawaa, miitahsh i'i nehpic iko ci⁠minwentamowaatc, ci⁠ciihkentamowaatc kaye. Miitahsh kaye i'i ahpii maanentamowin, kashkentamowin kaye ci⁠poonihsekin.