Aaiseya 33 - Ojibwe Kihcimasina'ikan

Keshi'anami'aank Awiya Ciwiici'intipan

¹ Etatawe hsa kikoohpaasinaakos kiin kaa⁠nihshiwanaacihcikeyan! Kiin mahshi kaa⁠nihshiwanaaci'ikoohsiwan! Ahpii hsa pooni nihshiwanaaci'iweyan, mii hsa 'i ci⁠nihshiwanaaci'ikooyan. Etatawe hsa kikoohpaasinaakos, kiin kaa⁠mamishi'iweyan! Kiin mahshi kaa⁠mamishi'ikoohsiwan! Ahpii hsa pooni mamishi'iweyan, mii hsa 'i ci⁠mamishi'ikooyan!

² Kiin Tepencikeyan, koohpaatenimihshinaam, kiin ohsha kaa‑ahpenimonotaakooyan. Mashkawisii'ihshinaam entahso kikishep, naatamawihshinaam ahpii wahsitaawihseyaank.

³ Ahpii hsa e⁠noontaakwahk miikaasowin, mii hsa 'i pemaatisiwaatc eshi tapasiiwaatc; ahpii hsa kiiwi miikaasoohtamawiyaank, mii hsa 'i kotak pemaatisiwaatc eshi maaciipa'iwewaatc.

⁴ Wiinawaa hsa omahkantwewiniwaan ta⁠caaki mooshakinikaateniwan taapishkoo pahpahkinenhsak kaashi kitaanawewaatc, taapishkoo pahpahkinenk kaa⁠paahtiinowaatc ininiwak ta⁠kakwe aatinamaatiwak e⁠mooshakinamowaatc kaakii mahkantwewaatc.

⁵ KaaTipenciketc hsa ishpentaakosi, weti ishpimink tanentaakosi, wiin iitok misiwe kaa⁠onci ayaamakahk kwayahkwaatisiwin, weweni inaahkonikewin kaye i'imaa Saayan (Zion) ootenaank.

⁶ Wiin ohsha kaa‑aasoshkawinek ci⁠ayiici ayaayek, owenoocihtoon kaye pimaaci'iwewin, kakiihtaawentamowin, kihkentamaawin kaye. Awiya hsa kaa⁠kohtaanenimaatc kaaTipencikenitc, mii hsa iwe owenootisiwin.

⁷ Inashke naa kaa⁠soonkite'enitc otininiimiwaa' enikohk papaamatemowa' miihkanaahkaank, i'i kaye kekwe kashkihtoonitc pisaan ci⁠wiiciintiwintc wiinke kihci mawiwa'.

⁸ Kihci miihkanaan hsa wiinke mamaanshashkwaawan, kaawiin awiya ci⁠pimi ayaatc miihkanaahkaank. Kekii ishi mino wiiciintinaaniwankipan hsa kaye kaawiin okihciwinasiinaawaa. Kekiih tipaatotamowaahpan hsa aanawencikaniwiwak. Kaawiin kanake awiya ci⁠kihtenimintc.

⁹ Miitahsh enentaakwahk taapishkoo e⁠mawiimakahk i'i ahki, kekoon e⁠inentaakwahsinok. Lepanan eshi noohpimiiwank wiinke paahte. Sheran (Sharon) kaa⁠pahsatinaak pikwatahkamikonk ani tinowan. Weti tahsh Peshan (Bashan) mihshawahkamik, Kaarmel (Carmel) waciink kaye aniipiishan pankihsinoon.

KaaTipenciketc E'ayaankwaamimaatc Kaashiinkenimikotc

¹⁰ Miitahsh kaaTipenciketc ehkitotc, “Miitahsh i'i kekoon ci‑ishihcikeyaan, ewi waapanta'inakook aaniin ehpiihci ishpentaakosiyaan, ehpiihci kihtakimikoyaan kaye.”

¹¹ I'i hsa enentamek wa⁠ishihcikeyek kaawiin kekoon enentaakwahsinoon, kahkina kaye kekoon eshihcikeyek kaawiin kekoon inaapatahsinoon, taapishkoo kekoonan kaa⁠piiwihsekin kaa⁠wepaahsinkin. Kaa⁠kihci ayihkitoyek amii'i taapishkoo ishkote kaa‑ankwaahkisokoyek.

¹² Mii hsa 'i enentaakosiyek taapishkoo ahsin kaa⁠nanawihsetc kii⁠caakisotc kii⁠waapaapikanihkenk ini kaye kaa⁠kiishka'ikaatekin kaawiminakashiin kaa⁠sahka'ikaatekin.

¹³ Kiinawaa hsa waahsa eyaayek, noontamok aaniin kaa⁠ishihcikeyaan, pehsho kaye eyaayek kihkentamok e⁠mashkawisiiyaan!

¹⁴ Meci'ishiwepisiwaatc hsa kaa‑ayaawaatc Saayanink sekisiwak. Nininkishkaawak kaa⁠kihkenimaahsikwaa Kishemanitoon. Miihsh o'o ehkitowaatc, “Awenen itahsh inaa ke⁠kashkihtoohpan ci⁠wiici ayaantankipan o'oweni enkwaahkisowemakaninik ishkote nehpic kaa⁠piskanenik?”

¹⁵ Mii hsa wa'a ke⁠kashkihtoohpan i'imaa ci⁠tashi pimaatisitc, kwayahk kaashi pimaatisitc, kwayahk kaa⁠ihkitotc, kaa‑aanawentank ci⁠onci ontisitc wayeshihtaakosiwinink, kaa⁠papaapisiskentansik aana wiih tipa'amawintc kekoon ci⁠maanshi tootank, kaa⁠pisintansik kii⁠tashincikaatenik nihshiwewin, kaa⁠nanaakatawentansik kaye cikii macitootankipan.

¹⁶ Mii hsa wa'a ke⁠ishitaatc kaashi ishpatinaanik taapishkoo kaa‑ahpa'iwetc waahkaayaahkonikanink ci⁠kanawentaakositc. Ta⁠ontinamawaa hsa ke⁠miicitc, nipiini kaye kaawiin ta⁠noontehsehsii.

Niikaanaya'ii Ekihciminonaakwahk

¹⁷ Miitahsh ci⁠waapamek aahpici ke⁠sasekaa kihciokimaawitc waahsa waahkaaya'ii kika onci tepaapantamowaam ahkiini kaa⁠tipentank.

¹⁸ Kika mihci naanaakatawentaanaawaa itahsh kaakii ishi nihtaa sekisiyekipan ci‑ihkitoyek, “Aanti tahsh inaa eyaatc kaa⁠nihtaa akimiwehpan? Aanti tahsh inaa a'a kaa⁠nihtaa onakintankipan taakihs? Aanti tahsh inaa eyaatc a'a kaakiih kanawenta'aakaniwitc ahshawaapiiwikamikoon?”

¹⁹ Kaawiin itahsh miinawaa kika waapamaahsiwaawaak kaa‑ahkwaatisiwaatc pemaatisiwaatc kaa⁠pahkaani kiishwewaatc kaa⁠nihsitohtawaahsiwintwaa e⁠mayaki kiishwewaatc.

²⁰ Inashke waapantamok Saayan ke⁠tashi wiihkwantiiwahkamikisiyank. Kika waapantaam Ceroosalam weweni ke⁠ishitaaniwank. Mii hsa 'i ke⁠inentaakwahk taapishkoo pakwaanekamik kaa⁠wahkawihsehsinok, kihciwaahkwahpicikanan kaa⁠kitahkiipicikaatehsinokin, shinootaakanan kaye ke⁠pahkihsehsinokin.

²¹ Mii hsa weti kaaTipenciketc kimashkawentaakosiiminaan ke⁠tanentaakositc. Ke⁠ishitaayank hsa ta⁠pimiciwan kaa⁠mankatehtikweyaakin kihci siipiin, siipiinhsan kaye. Kaawiin miikaasowi ciimaanan kaa‑apwiihkantekin i'imaa ta⁠pimi ayaahsinoonan. Kihci ciimaanan kaye kaawiin ta⁠pimi ayaahsinoonan.

²² KaaTipenciketc ohsha kaa⁠onaahkoninank, wiin kaye kaa⁠miininank onahshowewin. KaaTipenciketc hsa kitookimaaminaan kaa⁠pimaaci'inank.

²³ Pimaahshiiwi aapacihcikanan hsa 'i kihci ciimaanink mihci wewepakootewan; pimaahshiiwaahtik kaawiin ayiitahkisohsii, pimaahshiiwekin kaye kaawiin ci⁠tashwekakootek. Aahpici hsa ta⁠paahtiinat ke⁠mahkantweyank ke⁠nenaawa'oonitiyank, awaac hsa kaye kaa⁠maahkishkaawaatc oka maaciitoonaawaan mahkantwewinan.

²⁴ Kaawiin hsa miinawaa awiya i'imaa eshitaatc Saayanink ta⁠onci ihkitohsii, “Nintaahkos!” Iki kaye i'imaa ke⁠ishitaawaatc ta⁠poonentamawaawak omacitootamowiniwaan.