Aaiseya 11 - Ojibwe Kihcimasina'ikan

Kaapisaanentaakwahk Okimaawiwin Ehtashintek

¹ Tepit (David) otookimaawiwin hsa inentaakwanini taapishkoo mihtik kaakiih kawa'ontc. Taapishkoo oshkimihtik kaa⁠onci nihtaawikitc i'imaa kishkata'ikanink, miihsh i'imaa peshikwan Tepit opiiwesiiman peshik keni onci nihtaawikinitc keni kihciokimaawiwinitc.

² KaaTipencikenitc otAhcaahkoni hsa oka miinikoon ci⁠kakiihtaawentank, ci⁠nihsitohtank, keshi maamiinomiwetc, ci⁠mashkawisiitc kaye. Oka miinikoon kaye ci⁠kihkentank kaashi antawentaminitc kaaTipencikenitc, shikwa keshi kohtaanenimaatc.

³ Oka minwentaan tahsh kaye i'i kaashi kohtaanentaakosinitc kaaTipencikenitc. Kaawiin hsa kaashi waapanketc tashi onaahkoniwehsii, kaawiin kaye kaashi noontank oka onci onentansiin ke⁠inaahkoniketc.

⁴ Kaashi kwayahkwaatisitc ohsha oka onci onaahkonaa' i'i kaa⁠noontehsenitc kekoon. Kaashi tepweyentaakositc hsa kaye oka onci weweni tootawaa' kaa⁠kitimaakisinitc o'omaa ahkiink. Inaahkoniketc hsa ko mii 'i ci⁠nana'ahsimintc pemaatisinitc, taapishkoo pahpahshanshe'ikan e⁠aapacihtootc, kaa⁠maci'ishiwepisinitc kaye mii 'i ci⁠nihsaatc taapishkoo eh⁠pootaanaatc ci⁠maacii wepaashinitc.

⁵ Kwayahkwaatisiwin hsa kihkinciciihpiso, kehcinaa'entaakosiwin kaye kihcihpiso.

⁶ Ma'iinkan hsa pisaan oka wiici'ayaamaan maanahcaanihshensan, kihci pooshinhs kaye oka wawiicihshinoomaan maanatihkonhsan. Pishihkiinhsak, mihshipishiwenhsak kaye pisaan ta⁠niisho wiihsiniwak, apinoonciishan tahsh oka papaa niikaaniihtamaakowaan.

⁷ Pishihki, a'ahsh kaye mahkwa pisaan ta⁠niishoo wiihsiniwak, oniicaanihsiwaa' kaye pisaan ta⁠wawiicihshinoomitiwa'. Mihshipishiwak hsa mashkohsiwan oka miicinaawaan taapishkoo pishihkiwak.

⁸ Apinoonciish hsa pisaan ta⁠tashi otamino kaashi owaashinitc ciihsowe kinepikoon, pisaan kaye ta⁠papiincininciini owaashiniink kaa⁠pihcipooshiwenitc kinepikoon.

⁹ Weti tahsh Saayanink (Zion) Kishemanitoo kaashi kihtentaakwaninik owaciimink, kaawiin hsa kekoon weti ayaahsinini ke⁠wiihsakaahpinashiwemakaninik, ke⁠nihshiwanaaci'iwemakaninik kaye, aaniihsh misiwe ahkiink ta⁠kihkencikaniwi taapishkoo nipi kaashi misiwe ayaak kihcikamiink.

Kaakiimaaciinintwaapan Pemaatisiwaatc Cipikiiwewaatc

¹⁰ Ninkotink hsa kiishikahk awiya Tepitiink (David) ke⁠ontahkaanesitc ta⁠naakosi ke⁠kihkinawaasinaakoshkawaatc pemaatisinitc. Kaa⁠pepahkaanwewaanakisinitc pemaatisinitc hsa oka pi anta waapamikoo', eshi pisaanapitc ta⁠kihci inentaakwanini.