Aaiseya 1 - Ojibwe Kihcimasina'ikan

¹ Ahpii hsa kii⁠kihciokimaawiwaatc Coota (Judah) ahkiink oko Yoosaya (Uzziah), Coohtam (Jotham), Ehaas (Ahaz), a'a kaye Hesihkaaya (Hezekiah), mii hsa 'i ahpii Aaiseya (Isaiah) wekosihsimikotc Emaasoon (Amoz) o'o kii‑ishinamokopan, Kishemanitoon ekii waapanta'ikookwen onci Coota ahkiini, ootenaani kaye Ceroosalam (Jerusalem) ecikaatenik.

Kishemanitoo Kiihkishiikanoonaatc Opimaatisiima'

² KaaTipenciketc hsa o'o kii‑ihkito, “Ahki, kiishik kaye, pisintamok o'o kaa⁠ihkitoyaan! Iki hsa kaapi ompiki'akwaa apinoonciishink nintinenimaak wiinke eh⁠shashiipihtawiwaatc.

³ Pishihki hsa wiin okihkenimaan tepenimikotc, maanshimihtatim kaye okihkentaan aaniinti nehtaa tashi ahshamikotc tepenimikotc; Isriyalak (Israel) tahsh wiin kaawiin i'i inahke ishi kihkencikehsiiwak, kaawiin kaye i'i ishi nihsitohtansiiwak!”

⁴ Kika nihshiwanaatisim hsa kiinawaa pemaatisiyek omaci'ishiwepisiik kaatinowiyek. Etatawe hsa noociko, kaa⁠maci'ishiwepisiwaatc pemaatisiwaatc kitinowim, taapishkoo apinoonciishak kaa⁠pisintansikwaa onahshowewin. Kikii nakanaawaa kaaTipenciketc, ekii anawenimek Kishemanitoo Kaa⁠kohtaanentaakositc kaa⁠tipenimaatc Isriyala', ekiih kwehkikaapawiyek e⁠aanawenimek.

⁵ Wekonen tahsh keyaapi ke⁠onci wehsaani'ikooyekipan? Wekonen kaye wenci poonihtoohsiwek i'i kaashi shashiipihtamek? Aasha iitok kihtikwaaniwaan maahkakanaancikaatewan, kite'iwaan kaye aasha aahkosiimakanoon.

⁶ I'imaa hsa kisitiwaank piinihsh weti kihtikwaaniwaank, kaawiin hsa aapiinc iko ayaahsinoon mino'ayaawin. Wiinke hsa kimaahki'ikoom, kikaakiitisim kaye, kitayenakanaasom kaye kiwiiyawiwaank; kaawiin mahshi pehkihcikaatehsinoonan, kaawiin kaye mahshi siitoohpicikaatehsinoonan cikiih takonikaatekipan pimitewaapo.

⁷ Kitahkiimiwaa hsa wiinke kii⁠nihshiwanaacihcikaate, kitootenaamiwaan kaye wiinke piko kii⁠ankwaahkisikaatewan. Kikihtikewahkamikowaan kaye wiinke okii nihshiwanaacihtoonaawaan iki pahkaan ahkiink kaakii onciiwaatc, eh⁠kanawaapiyek Piiwitek ekii nihshiwanaacihtoowaatc kahkina kekoon.

⁸ Ceroosalam (Jerusalem) ihsa ehta ishkonikaate, e⁠waahkaashkikaatek e⁠inentaakwahk taapishkoo okanawencike otaniipiihshikiwaam kaa⁠nishihke patahkitenik mekweya'ii shoominaahtiko kihtikewinink, komaa kaye mihsikiwaam mekweya'ii kaashi kihtikaasowaatc kaa⁠pimaapihke nihtaawikiwaatc.

⁹ Kiishpin hsa kaaTipenciketc kaaMaawaci mashkawisiitc pakitinihsinowininankipan aaninta ci⁠pimaatisihsiwankipan, wiinke iitok kitaakii nihshiwanaaci'ikoomin taapishkoo kaakii toocikaatekin ini ootenawan Swaatam (Sodom), Komwaara (Gomorrah) kaye.

¹⁰ Ceroosalam, iki hsa kaa⁠tipenimihkwaa, iki kaye i'imaa e⁠ayaawaatc, mii hsa enentaakosiwaatc taapishkoo awiyak kaakii ishi'ayaawaahpan Swaatamoonk, Kamwaarawiink kaye. Taka pisintamok aaniin eninek kaaTipenciketc. Pisintamowaahk kaye aaniin kiKishemanitoominaan eshi kihkino'amawinek.

¹¹ O'o hsa Kishemanitoo ihkito, “Aaniin tahsh enwaatamek ini pakitinaahsowinan mooshak kaa⁠piitamawiyek? Aasha ohsha teminihk kipiitamawim iki kaa‑ankwaahkisontwaa kiih⁠pakitinaahswaaniwiwaatc aape maanahcaanihshak, iki kaye kaa‑aancipoonintwaa awahkaanak. Niwiiyakishkentamowaan ohsha aasha omiskwiimiwaa aape pishihkiwak, maanahcaanihshenhsak, maanatihkwak kaye.

¹² Awenen tahsh kaa'ininek ci⁠piitooyek ono kiipi⁠anta anami'ehtawiyek? Awenen kaye kaa'ininek ci⁠tahtahkohkaatamek nintanami'ewikamikonk.

¹³ Mii 'i ishi poonihcikek i'i kaa⁠paapiitamawiyek kekoon kaa⁠inwaatehsinokin pakitinikewinan. Wiinke ohsha ninkakwaanihsakentaan i'i kaa⁠minaahsamawiyek. Kaawiin hsa niminwaapantansiinan ini kaa⁠nihtaa maawaci'itiyek kii⁠oshkakoocink tipihkikiisihs, kii⁠Anwepiiwi kiishikahk kaye.

¹⁴ Wiinke hsa kaye nishiinkentaanan kaa⁠nihtaa wiihkwantiyek kii⁠oshkakoocink tipihkikiisihs, ini kaye kaa⁠kihtentamek kaa⁠kiishikahkin. Wiinke ohsha niwiiyakishkentaanan, nintishkentaanan kaye.”

¹⁵ “Ahpii hsa tahsh shiipinihkeniyek anami'aayek, kaawiin hsa kika kanawaapamihsinooninim. Mihsawaa ko aana kihci anami'ehtawiyek, kaawiin kika noontawihsinooninim onsaam aaniihsh kininciiwaan miskwiiwanoon.

¹⁶ Kiisiiyaapaawanintisok itahsh, nakatamok i'i kaashi waapaminakook e⁠macitootamek. Poonihtook i'i kimaci'ishihcikewiniwaan;

¹⁷ meshkoc tahsh kihkentamok kwayahk ci‑ishihcikeyek. Kehcinaac iko weweni kakwe mino'ishihcike'ihkok, wiici'ihkok ci⁠mashkawite'ewaatc iki kaa⁠koohpaatisiwaatc. Naatamawihkok kwiiwahshi apinoonciishak, naatamawihkok kaye ihkwewak kaa⁠kiiwaatisiwaatc, kiikitoohtamawihkok kaye ci⁠minohsewaatc.”

¹⁸ Miitahsh o'o ehkitotc kaaTipenciketc, “Taka hsa nakishkotaatitaa ci⁠nana'ahtooyank o'o, aana hsa wiin kimacitootamowiniwaan e⁠aahko miskonaakwahkin taapishkoo hsa koon kaa‑ahpiihci waapishkisitc ta⁠ishinaakwanoon. Mihsawaa hsa ko kaye ishinaakwahkin kekoon kaa⁠miskwatihtek, i'i hsa kaa‑ahpiihci waapishkaak maanahcaanihshipiiwai mii hsa 'i ke⁠ishinaakwahkin.

¹⁹ Kiishpin hsa inentamek ci⁠na'ihtawiyek, miitahsh i'i ci⁠ontantamek sasekaa miicim ke⁠nihtaawikink i'imaa ahkiink.

²⁰ Kiishpin itahsh wiin aanciko shashiipihtawiyek, mii hsa 'i ci⁠nihshiwanaatisiyek. Niin aaniihsh kaaTipencikeyaan o'o nintihkit.”

Maci'ootena Ehtashintek

²¹ I'i hsa kihci ootena kaa⁠tepweyentaakwahkipan ani tinowentaakwan taapishkoo pishikwaacihkwe. Aapitink hsa i'imaa ootenaank kiih⁠tanentaakwan weweni e⁠inaahkonikaaniwank, kwayahkwaatisiwin kaye i'imaa kii⁠ayaa. Noonkom itahsh wiin onihshiwek i'imaa ayaawak.

²² Ceroosalam, waapaapihko shooniyaa waapihkonk e⁠inentaakosiyampan, kaawiin itahsh noonkom kekoon kitinentaakosihsii. Kishoominaapoom kaye kaawiin kekoon ci‑inaakamink aaniihsh nipi kiih⁠takwaakaminikaate.

²³ Kaa⁠niikaanisiwaatc hsa i'imaa eyaawaatc shashiipihtamook, owiiciiwaawaa' kaye okimoocishka'. Kahkina kaye ominwentaanaawaa kekoon e⁠onci ishihcikewaatc shooniyaan eh⁠tipa'amawintwaa, eh⁠kakwe tepinamowaatc kaye ehta miikiwaanan. Kaawiin kanake onaatamawaahsiwaawaa' kwiiwahshishaana', kaawiin kaye opapaamihtawaahsiwaawaa' kiiwaacihkwe' kii⁠naasihkaakowaatc ci⁠wiici'aawaatc.

²⁴ Miitahsh kaaTipenciketc kaaMaawaci mashkawisiitc, Isriyalak oKishemanitoomiwaan wenci ihkitonitc, “Niin hsa piko kika nana'ahsininim enentaakosiyek kaa⁠shiinkenimiyek, kaawiin itahsh awahshime kika ocaanimentami'ihsiim!

²⁵ Kekoon hsa kika tootawininim taapishkoo piiwaapihk kaa⁠ninkisikaatek eh⁠pehkaapihkisikaatek, mii hsa 'i nahke keshi pehki'inakook, ci⁠otaahpinamawinakook kaa⁠wiinishkaakoyek.

²⁶ Miitahsh ci⁠naapahsakwaa kitipaahkonikewininiimiwaak taapishkoo tino kaakii nihtaa ayaawaahpan otaanaank, kiikitoowininiwak kaye tino nihtam kaakii ayaawekwaa. Miihsh o'o keni ishinihkaanikooyan, ‘Ootena kaa⁠kwayahkwentaakwahk, ootena kaa⁠tepweyentaakwahk.’ ”

²⁷ Aaniihsh kaaTipenciketc eh⁠kwayahkwaatisitc oka shaapwiihtoon Saayan (Zion), ci⁠pimaaci'aatc i'imaa kahkina kaa‑ayaanitc kaa⁠kwehkaatisinitc.

²⁸ I'i tahsh wiin kaa⁠shashiipihtaminitc, meci'ishiwepisinitc kaye minciniish iko ta⁠nihshiwanaatisiwak, kaaTipenciketc kaa⁠nakanikotc ta⁠pooni ayaawa'.

²⁹ Tepwe hsa ko kika onci akatentaam ekii anami'ehtawekwaa e⁠anami'ewakimekwaa ohk tinowaahtikook, kika akaci'ikom kaye ini tino kihtikaanahkamikoon ekiih kihtikaatamek onoweniwan kaa⁠mihsawentamek.

³⁰ Mii hsa 'i ke⁠inentaakosiyek taapishkoo ohk tinowaahtik kaa‑ani paahsotc, taapishkoo kaye kihtikaanahkamik kaa⁠onci siika'ancikaatehsinok.

³¹ Taapishkoo hsa paahtewi mashkohsi kaa⁠onci maacii sahkitek e⁠mihci pahkinek, mii hsa 'i inahke kaa⁠soonkisitc awiya omaci'ishiwepisiwinink kaa⁠onci kashkihtamaasotc ke⁠onci nihshiwanaatisitc. Kaawiin hsa awiyan oka kashkihtoohsiini ci⁠kipihtinaminitc keshi nihshiwanaatisitc.