2 Timahti 4 - Ojibwe Kihcimasina'ikan

¹ Kitayaankwaamimin e'waapamitc Kishemanitoo, a'awe Christ Ciisahs kaye, ketipaahkonaatc ini pemaatisinitc, ini neponitc kaye. Otakohshinowin kaye otipencikewin Christ Ciisahs nintihkito'ikon o'o waa'ininaan.

² Kiin wiintamaaken Kishemanitoo otihkitowin. Aaniin iko 'iahpii eshina'inaakwahk wiintamaaken, maano hsa wiin ishinaakwahsinok, wiintamaaken. Kaye kakwekashkimiwen. Kaye maanaasinaman kekoon onci' 'awe kaatootank. Kakaansomiwen, kahkina kekoon cimaminawakaatisiihkantaman kaye mooshak ci‑ishikihkino'amaakeyan.

³ Aaniihsh inkotink taishiwepan cishikasihtamowaatc i'i kwayahk kihkino'amaakewin, nawac ewii'maawantoonaawaatc awiya' kekihkino'amaakowaatc i'iwe wiinawaa piko kaawiihpisintamowaatc.

⁴ Oka‑aniwepinaawaa kwayahk tepwewin cinanaanta pisintamowaatc mayakaacimowinan.

⁵ Kiin itahsh keyaapi peshikwan iko kakweishikakiihtaawisin, kakweshashiipiayaan ahpii ehkakwaataki'ikooyan. Mii 'iwe ishianohkiin minwaacimowin ciwiintamaakeyan. Tipitootan 'iwe kaaishianohkii'ihk Kishemanitoo.

⁶ Niin itahsh iko, aasha kekaa mii'o ahpii cipakitinaahswaakaniwiyaan. Aasha tipihse cimaacaayaan.

⁷ Minokakwecihkanitiwinink ninkii'ahpahtoo. Ninkiihkiishihtoon, ninkiihpikanawentaan i'i kitepweyentamowininaan.

⁸ Aasha weti nimpii'ikon nintipa'amaakoowin kwayahk hsa ko ekiihtipihsahtwaayaan, keoncimiishitc a'awe kaaTipenciketc weti ahpii keokiishikanomitc. Mii 'awe Okihcitipaahkoniwe misiwe kaaishikwayahkohciketc. Kaawiin niinehta ninkaoncimiinikoohsii, ikiweniwak hsa kaye maawac kaapii'aawaatc cinaakosinitc ehsaaki'aawaatc, tamiinaawak.

Ehtipaacimotc eshiwepisitc weti

⁹ Weyiip pikakwe⁠antawaapamihshin!

¹⁰ Aaniihsh ninkii'nakanik a'a Tiimahs (Demas), o'o noonkom iko kaaishiahkiiwaninik ekii'nawacisaakihtootc. Ahpanehsh i'imaa kii'ishimaacaa Tehsalanaihkaank (Thessalonica). Karehsenhs (Crescens) itahsh kii'ishaa Kalehshiyaank (Galatia). Shikwa Taitahs (Titus) kaye kii'ishimaacaa Taalmehshaank (Dalmatia).

¹¹ Mii ehta 'awe waaciiwitc Lok (Luke). Kiin itahsh ontin a'a Maarhk (Mark) cipiwiiciiwihk, ninkawiici'ik e'anohkiiyaan.

¹² A'ahsh Tihkihkahs (Tychicus) i'imaa ninkii'ishinisha'waa Ehpihsahsink (Ephesus).

¹³ Kiin itahsh ahpii pimaacaayan, piitoohkan ninkihcipiinsihkawaakan kaakii'nakatamowak a'a Kaarhpahs (Carpus) i'imaa e'ayaatc Caroowahsink (Troas). Piitoohkan kaye ini masina'ikanan, memintake ko ini pashkwekinonk kaaoshipii'ikaatekin.

¹⁴ Kiwiintamawin eshiayaatc a'a Aalikihsaantar (Alexander) Opiiwaapihkohke kaainintc. Aaniihsh ninkiihkihcimacitootaak. KaaTipencikenitc itahsh okatipa'amaakoon otishihcikewinan.

¹⁵ Kaye kiin itahsh ayaahshwiihkantaw, aaniihsh okiihkakwewanaahtoon nintipaacimowininaan.

¹⁶ Nihtam iko ekiihtipaahkonikooyaan niin iko ninkiihkanoocikehtamaatis, awiya ekiiwii'wiici'ihsik. Kahkina ninkii'nakanikook. Maano tahsh kaawiin oka‑akintamaakohsiiwaan Kishemanitoon.

¹⁷ Wiin itahsh kaaTipenciketc mooshak ninkiihpiwiici'ik, ninkii'mashkawisii'ik, ekii'oncikashkihtooyaan kahkina cimooshkinewiintamaakeyaan Kishemanitoo otipaacimowin, mii 'i kahkina ko cioncinoontamowaatc iki kaakihkenimaahsikwaa Kishemanitoon. Shikwa ninkiihshaapwii'ikoo aasha ekiihtanentaakosiyaampaan otoonink a'a mihshipishiw.

¹⁸ Kaye ninkashaapwii'ik kaaTipenciketc kahkina ini aanawii'macitootaakooyaan, ninkakanawenimik itahsh 'imaa ciotihtamaan oTipencikewinink kihcikiishikonk entashikimaawitc. Mii 'awe ahpane ko mooshak takihtenimaa, wiihkaa hsa ko ciwehkwaahsehsinok! Emen.

Pooshoo'iwewin

¹⁹ Pooshoo nintinaak Parihsila (Priscilla), Ahkwila (Aquila) kaye, kahkina kaye entahshiwaatc Anehsihpwaarahs (Onesiphorus) owaahkaa'ikanink.

²⁰ Shikwa kiwiintamawin, Iraastahs (Erastus) kii'ishkwii i'imaa Kwaarintink (Corinth). Caroohpimahs (Trophimus) ninkii'nakanaa 'imaa Maailiitahsink (Miletus) ehkishaataahpinetc.

²¹ Kiin pikakwetakohshinin cipwaa pipoonk. Kaye kipooshoo'ik Iyoopiyolahs (Eubulus), oko kaye Piyootenhs (Pudens), Laainahs (Linus), Kalwaatiya (Claudia), kahkina kiwiiciotepwehtamoomaakaninaanik o'omaa kaa‑ayaawaatc.

²² Maano kitahcaahk okawiiciiwikoon kaaTipencikenitc. Okishewaatisiwin mincikahkina kika‑ahshici⁠wiiciiwikom.