2 Timahti 3 - Ojibwe Kihcimasina'ikan

Ishkwaac anikakiishikahk keishisanakahk

¹ Kihkentan o'o, ishkwaac anikakiishikahk tapiici‑ishiwepan cisanakahk i'iwe pimaatisiwin.

² Aaniihsh iki pemaatisiwaatc wiinawaa piko tipinawe tasaaki'itisowak; okasaaki'aawaan kaye oshooniyaamiwaan. Taishpenintisowak, tamamiihkwaanitisowak, okapaahpinotawaawaan Kishemanitoon. Kaawiin kaye okapisintawaahsiiwaawaa' oniiki'ikowaa'. Kaawiin tanihtaa miikwehciwentansiiwak; oka‑aanawentaanaawaa kaye anami'aawin.

³ Kaawiin kaye okaote'inotawaahsiwaawaa' owiicipimaatisiimaakaniwaa', okasanaki'aawaa' itahsh, ehpapaatashimiwewaatc, ewii'nihtaapiikwahkamikisiwaatc. Omiikaasoshkak tainaawak. Okashiinkentaanaawaa kaaonishihshininik.

⁴ Tamamishi'iwewak. Kaawiin taonaanaakatawencikanihsiiwak. Okaonsaamentaanaawaa okihtenimowiniwaa. Nawac okaminwentaanaawaa otishihcikewiniwaan ahpiihc wiin cisaaki'aawaahpan Kishemanitoon.

⁵ Okicaya'ii ehta ko oka‑ayaanaawaa anami'aawinink kaaishinaakwaninik, okawepinaanaawaa tahsh i'iwe mayaa kaaishimashkawisiimakaninik. Keko wiiciiwaahken oko tino.

⁶ Aanint hsa ko onanamaayenimaawaan awiyan piinihsh cinehpici piintikanikowaatc owaahkaa'ikaniniink, i'imaa e'anitepimaawaatc ihkwewa' kaakakiihtaawentansinik cina'ihtaakowaatc. Oko tahsh ihkwewak otoonsaamentaanaawaa omacihcikewiniwaan. Otanikaancishkaakonaawaa kaye kekoonan anoociko eshimihsawentamowaatc.

⁷ Miiwak iki tino ihkwewak kaananaantakihkentamowaatc, ekaa tahsh wiihkaa ehtipikihkentansikwaa 'iwe tepwewin.

⁸ Ikiweniwak itahsh okihkino'amaakek taapishkoo ishiayaawak Caaniis (Jannes), Caampariis (Jambres), mewisha kaakii'wanaa'aawaatc ini Moosihsoon (Moses). Noonkom peshikwan ishihcikewak oko okihkino'amaakek. Owanaahtoonaawaa 'i tepwewin. Nihshiwanaatanini otinentamowiniwaa. Ayinwaasowak otepweyentamowiniwaank.

⁹ Kaawiin aahpici kekoon okakashkihtoohsiinaawaa. Piciinak itahsh kahkina okamohshe⁠kihkenimikowaan ekiihkakiipaacihcikewaatc, taapishkoo kewiinawaa kaakii'ishiwepisiwaakopanen Caaniis, Caampariis kaye.

Ishkwaac eshiayaankwaamimaatc Timahtiwan

¹⁰ Kiin itahsh kipioncikihkenim e'aayiintiyaan, wekonen i'i kaaishikihkino'amaakeyaan, kaakakweishihtamaasoyaan kaye kikii'waapam, i'i kaye eshitepweyentamaan, eshishashiipentamaan, eshisaaki'iweyaan, eshimashkawentamaan,

¹¹ kaa'ishionciihkaakooyaan kaye, kaa'ishikakwaatakihseyaan kaye. Kahkina kikihkenim aaniin kaahtootaakooyaan Entiyaahk (Antioch) ootenaank, Aaihkooniyamiink (Iconium), Listaraink (Lystra) kaye, aaniin kaakii'ahpiihcikakwaataki'ikooyaan. Kahkina tahsh ninkii'oncishaapwii'ik kaaTipenciketc.

¹² Mii'i peshikwan awenen iko kaawii'onci⁠anami'ewaatisitc Christ Ciisahsoon, kewiinawaa taoncikakwaataki'aawak.

¹³ Aaniihsh iki kaamacaatisiwaatc, iki kaye owayeshimiwek, awahshime tani‑ishiayaawak, niipiwa' ewii'wayeshi'aawaatc. Kaye wiinawaa piko taniwayeshi'aawak.

¹⁴ Kiin itahsh, minihk kaapi‑ishikihkino'amaakooyan, kaapi‑ishitepweyentaman kaye, keyaapi anikakwewiicihtoon, aaniihsh kikwayahkwenimaak iki kaakihkino'amawihkwaa.

¹⁵ Shikwa kaapiahko⁠apinoonciishiwiyan kikiihpioncikihkentaanan ini maawac kaakihci‑inentaakwahkin oshipii'ikewinan, ini kaakashkihtoomakahkin cikakiihtaawentamo'ikoyan cioncipimaaci'ikooyan ehtepwehtawatc Christ Ciisahs.

¹⁶ Kahkina Kihcioshipii'ikewin kiikihkentamo'iwe Kishemanitoo, kaye kihtaapatan cikihkino'amaakenk i'i tepwewin, awiya kaye wanikihkino'amaaketc ciwaapanta'intc ehkwayahkwahsininik. Inaapatan kaye cimaamiinomiwenk, cikihkino'amawintc kaye awiya aaniin keshikwayahko ishi/ayaatc.

¹⁷ Mii 'iwe ishimiinaa a'awe kaa‑anohkawaatc Kishemanitoon, citeayishiitc kaye kahkina kekoon cionciihtamawintc, kahkina ini wenishihshininikin citootank.