2 Timahti 2 - Ojibwe Kihcimasina'ikan

Ciominoshimaakanihshiimikotc Christ Ciisahsoon

¹ Ninkosihs, kitinin o'owe, kikawii'ishi⁠mashkawisii i'i oshawencikewin kaamiinihk Christ Ciisahs ehkikishkawatc.

² Ono tahsh kekoonan kaakii'noontawiyan e'wiintamaakeyaan niipiwa' awiyak e'noontawiwaatc, miiwan ono anikihkino'amaw ininiwak kaakwayahkwentaakosiwaatc, kekashkihtoowaatc cianikihkino'amawaawaatc kotak awiya'.

³ Kaye kiin, aaniin minihk kaamiinikooyan kakwaatakihtoowin, aniotaahpinan. Mii 'iwe cionci⁠ominoshimaakanihshiimihk a'a Christ Ciisahs.

⁴ A'awe hsa ko inini kaa/⁠antashimaakanihshiwitc, nawac wii'ishihcike ciwii'nana'entaminitc iniweniwan kaaonaapamikotc. Kaawiin okapimentansiin i'iweni opimaatisiwin weti kaaonciitc.

⁵ A'a kaye otamino kaakakwecihkashiwetc, mii ehta cipahkinaaketc na'ihtank i'iweni otaminowi inaahkonikewin.

⁶ A'a kaye okihtike kaakihcianohkiitc, mii 'awe keotaahpinankipan ini nihtam onihtaawihcikanink kaaontinikaatenikin, aaniihsh kiihkashkihtamaaso.

⁷ Naanaakatawentan ono kaaihkitoyaan, kahkina kekoon kaaTipenciketc kikakihkentamoonihk cishinihsitohtaman.

⁸ Maamihkwenim a'a Ciisahs Christ kaahpiontahkaanesitc Tepitihkaank (David), kayehsh ekii'nipohpan miinawaa kiihkiiwepimaatisi. Mii 'iwe eshiwiintamaan i'iwe minwaacimowin.

⁹ Mii 'iwe minwaacimowin kaaoncikotakihtooyaan, ampooshke e'oncikipa'okooyaan taapishkoo omacihcikeshk. Kaawiin itahsh wiin 'iwe inakintehsinini Kishemanitoo otihkitowin cikipa'ikaatenik.

¹⁰ Mii 'iwe kahkina kekoon nintooncishashiipentaan ciwii'wiici'imak ini Kishemanitoo otoonaapamaakana', kewiinawaa ciontinamowaatc i'i pimaaci'ikoowin kemiinikowaatc Christ Ciisahsoon, ahshic kaye kihtentaakosiwin wiihkaa kepooniayaahsininik.

¹¹ Aaniihsh tepwemakan o'owe ihkitowin: Kiishpin tepwe kaawiicinipoomaawanken, kikawiicipimaatisiimaanaan tahsh kaye.

¹² Kiishpin shashiipiayaayank mii 'i kaye ciwiicitipencikemank. Kiishpin aanawenimank, kaye wiin kika/⁠aanawenimikonaan.

¹³ Kiishpin poonitepwehtawank, keyaapihsh wiin takehcinaa'entaakosi. Kaawiin wiihkaa oka/⁠aancihtoohsiin otinaatisiwin.

Aaniin keishinaakositc kwayahk kaa‑anohkii'aakaniwitc

¹⁴ Ono kekoonan maamihkawaasom iki kaanoontawihkwaa. Kishemanitoo enaahsamiitc kikaishiayaankwaamimaak ekaa cikakwe⁠shaakoosontihsikwaa ini ihkitowinan. Kaawiin inkotano taainaapatahsinoon, mii ehta cimihci⁠nihshiwanaaci'intwaa kaapisintamowaatc.

¹⁵ Weweni kakwewiihkwacihtoon ci‑ishikaapawi'itisoyan keshiminwaapamihk Kishemanitoo, taapishkoo anohkii'aakan ekaa kaa‑akaci'ikohsik otanohkiiwin, kaye mii 'iwe e'ishiwiintamaakeyan eshikwayahkohsininik Kishemanitoo otepwewin.

¹⁶ Keko wiicitoonaamaahken awiyak e'macihtaakwaninik, ehkakiipaatentaakwaninik kaye entashintamowaatc. Nawac waahsa otishikaancishkaakon awiya i'imaa ciayaahsik Kishemanitoonaank.

¹⁷ 'Iwe okihkino'amaakewiniwaa aanciko tanimaaciishkaamakanini taapishkoo e'inaahpinetc awiya ehpihcipohsenik. Tako kaye niishiwak o'o e'ishikihkino'amaakewaatc Haaiminiiyahs (Hymenaeus), Paailiitahs (Philetus).

¹⁸ Mii oko kii'oncipahkewak tepwewinink, o'oweni e'ishikihkino'amaakewaatc: “Aasha kii'ishkwaa⁠ishihse kaawii'ishi⁠kiiwepimaatisi'ikooyankipan,” e'ihkitowaatc. Miitahsh o'o nahke eshinihshiwanaacihtamawaawaatc otepwehtamowinini aaninta.

¹⁹ O'o hsa Kishemanitoo ishinaakwanini kaaishitepwetc taapishkoo aayiicionaapihkihsicikan wiihkaa kewahkawishkaahsininik, o'owe e'ishikihkinawaacihsininik: “KaaTipenciketc okiihkaayenimaa' awenena' ini kaatipenimaatc.” O'o kaye, “Awenen iko 'awe ‘Nintipenimik kaaTipenciketc,’ e'ihkitotc, okapoonihtoon omacitootamowin,” eshihsininik.

²⁰ Inashke awiya okihciwaahkaa'ikanink e'ayaatc ahcikanan, kaawiin ehta kaaosaawi shooniyaa waapihkaninikin kaye kaawaapaapihkaninikin otayaahsiinan, kaye hsa ko kaamihtikowankin kaye waapikaniahcikanan otayaanan. Aaninta eshikihtentaakwaninikin otishiaapacihtoonan, aaninta tahsh tahsokiishik kaaotaahpinank e'nekaamiaapacihtootc.

²¹ Kiishpin awiya miiwinishintank wekonen hsa ko waanentaakwaninik, taapishkoo minoahcikan tainentaakosi kehci‑inentaakwaninik ci‑ishiaapatisitc. Aasha aaniihsh okii'miinaan opimaatisiwin ini kaaTipenimikotc, kihtaapatisiwinink ci‑inaapaci'ikotc, e'waaweniitc minoanohkiiwinink ci‑inaapatisitc.

²² Mii 'iwe wenci‑ininaan: keko kekiin pisintanken oshkaatisiiwi mihsawentamowinan. Piminisha'an tahsh minwaatisiwin, tepweyentamowin, saaki'iwewin, koshkwaawaatentamowin. Mii 'iwe ci‑ishikakwe wiiciiwatwaa ikiweniwak kwayahkote'ewinink kaaishikanoonaawaatc ini kaaTipencikenitc.

²³ Awenen iko kaakakwe shaakoosonketc ehkakiipaacikiishwetc ehkihkentaahsohsik, keko 'owe pimentanken. Kikihkentaan mii 'imaa e'onciimakahk kiihkaantiwin.

²⁴ Awiya kaa‑anohkii'ikotc kaaTipencikenitc kaawiin tanihtaa kakweshaakoosonkehsii. Pekihkaac okakanoonaa' kahkina, tanihtaa kihkino'amaake, okashashiipenimaa',

²⁵ noohkaatisiwinink cikakwemaamiinomaatc ini kaakakwewanaamikotc. Maakishaa Kishemanitoo okamiinaa' cikwehkaatisinitc cipikihkentaminitc i'i tepwewin.

²⁶ Mii 'iwe e'ishipakahkentamowaatc keoncikashki'owaatc i'imaa kaaishitahsoonikowaatc ini Setanan (Satan) kaakii'ishi⁠kaahcitinikowaatc ekii'inanoonikowaatc aaniin iko kaakii'inenimikowaatc.